Стихи́:

Жи́ва по сконча́нии Саму́ил зря:

И Жива́го всегда́ Све́та по сконча́нии ви́дит:

Взы́де Саму́ил в двадеся́тый ви́дети Хотя́щаго везде́ доити́.

Сей бя́ше от Ексармафе́ма Си́фскаго, от горы́ Ефре́мовы. Сын Елка́нин и А́нин. Елка́на же две жене́ имя́ше, еди́ной и́мя А́нна, а вторе́й Фена́на. Фена́на же ражда́ше де́ти, А́нне же не бя́ше отроча́ти. И взы́де Елка́на помоли́тися Бо́гу в Сило́ме со А́нною, и бя́ше та́мо Или́й, и сы́нове его́ Офни́й и Финее́с свяще́нницы Госпо́дни. Госпо́дь же затвори́ утро́бу А́ннину, и поноша́ше ей ненави́стница ея́. Она́ же помоли́ся ко Го́споду, и помяну́ ю́ Госпо́дь, и роди́ сы́на Саму́ила, и возложи́ его́ Бо́гу. И в во́зраст доспе́, и бя́ше служа́ Бо́гу, и бысть в проро́ка вели́ка. Или́й же и сы́нове его́ гне́вом и я́ростию Госпо́днею сокруше́ни бы́вше потреби́шася, зане́ прогне́ваша Бо́га. И дово́льствова Саму́ил во вся дни своя́ судя́, и да́ры ни от кого́ взят. И пома́зав Сау́ла на ца́рство. Та́же Дави́да. В глубо́ку ста́рость доше́д, и дово́льными ле́ты быв сконча́ся. Предвари́в прише́ствие Христо́во за ты́сящу и три́десять пять лет. Проро́чествовав лет четы́редесять.

Стихи́:

Трие́ внидо́ша ко сожже́нным,

Четве́рем Тебе́ ра́ди четвери́цею соверша́ти де́сять.

Сеи́р не́кто от Си́ды Памфили́йския, сын Петро́ния не́коего фра́ченина, и ма́тере Мугдоли́нии. Сей обре́те святы́я три́десять седмь му́ченик, в Филиппопо́ли по Христе́ му́чащихся от Апелиа́на про́клятаго иге́мона. Дерзну́в бо по Христе́, и стро́ган бысть зело́. И посе́м пе́рстни горя́щия прия́т на пе́рсты своя́, и на дре́ве пригвожде́н быв и претре́н, и по́ясом желе́зным препоя́сан быв. Посе́м главу́ его́ усе́кнуша. Ме́мнон же со́тник на двою́ столпу́ растя́жен быв, и содра́ша ему́ три реме́ни от главы́ и до ногу́. Посе́м пе́щи распале́не вели́це, и всем ру́ки и но́ги усе́чени бы́ша, и вве́ржени бы́ша в ню. И та́ко сконча́шася, преда́вше ду́шы своя́ в ру́це Госпо́дни.

А́ще хо́щете до́бре пожи́ти в жи́зни сей, щади́те уста́ своя́ от мно́гаго глаго́лания. Блаже́н муж и́же не попо́лзнется язы́ком свои́м. Ненави́дяй бо глаго́лания, умаля́ет зло́бу, и блага́я от Го́спода на уста́ излива́ются молчали́ваго. Мудр муж лю́бит безмо́лвие, и молча́ Бо́га чтет. Те́мже отлага́йте от уст свои́х лука́вая, и не пра́вая словеса́ от себе́ отри́ните. И с пра́вдою отвеща́йте и не постыди́теся. И́же бо храни́ язы́к, соблюде́т от ско́рби свою́ ду́шу, смерть бо и живо́т в руку́ язы́ка есть. Сему́ бо Иа́ков брат Бо́жий учи́т ны глаго́ля: «Бу́ди всяк челове́к скор на послуша́ние, и медли́в на глаго́лание». И́же бо не паде́т язы́ком, той соверше́н есть, моги́й восхласти́ти и все те́ло свое́. Госпо́дь же рече́: «Ей глаго́лю вам, я́ко сло́во пр́аздно е́же а́ще реку́т челове́цы, отдадя́т о нем сло́во в день Су́дный. От слове́с бо свои́х оправди́шися, и от слове́с свои́х осу́дишися».

А́ще си́це во и́ноческом жи́тельстве поживе́м, и и́стинною Того́ лю́бим, и за́поведи Его́ твори́м, тогда́ оте́ц Тому́ и ма́ти и бра́тия любо́вию быва́ем. Сам бо рече́: «Всяк творя́й во́лю Отца́ Моего́, сей брат Мне и сестра́ и ма́ти есть». Брат, яко соца́рствуя: И сестра́, я́ко снасле́дник: Ма́ти, я́ко вельми́ любе́зен. Да я́коже ма́ти ча́до лю́бит, та́ко и мы Хри́ста возлю́бим. Тогда́ Оте́ц и Сын к нам прии́дет, и оби́тель в нас сотвори́т: Я́ве я́ко Святом́у Ду́ху предвсе́льшуся, тогда́ просвеща́ется душа, и просветля́ется ум, и освяща́ется се́рдце. Услажда́ется смысл, цвете́т со́весть, игра́ют по́мысли. Весели́тся дух, ра́дуются вся у́ды ду́ши мы́сленыя. Обновля́ется но́вый челове́к, отбе́гает ве́тхий. Тогда́ ликовству́ют а́нгели, прогони́ми суть бе́сове. Взыграва́ются пра́веднии, рыда́ет супоста́т. Ра́дуются му́ченицы, пла́чет сопроти́вный. Хва́лятся преподо́бнии, пра́зднуют пе́рвенец торжества́. Восхваля́ют патриа́рси, сла́вят проро́цы. Дряхлу́ют и сокруша́ются лука́вии ду́си и льсти́вии. С таково́ю душе́ю ра́дуется Оте́ц, весели́тся Сын, ра́достен есть Дух Святы́й. В такове́й души́ река́ дарова́ний наводня́ется, и исто́чник живота́ истека́ет: со́лнце пра́ведное сия́ет: зве́зды блиста́ют: луна светит: ангели дивя́тся, арха́нгели чудя́тся: серафи́ми ди́вством содержи́ми суть: нача́ла и вла́сти сла́достию объе́млются, и с таково́ю душе́ю глаго́лют: Свят, Свят, Свят Госпо́дь Савао́ф, испо́лнь не́бо и земля́ сла́вы Его́: И е́же сла́ва в вы́шних Бо́гу, и на земли́ мир, в челове́цех благоволе́ние. С таково́ю душе́ю престо́ли и госпо́дьства восхваля́ют глаго́люще: Сла́ва вседержи́тельней Отца́ си́ле, и боже́ственей Сы́на славе, и Свята́го Ду́ха вла́сти. Тогда́ в неизглаго́ланней ра́дости быва́ет такова́я душа́, и вся просвеща́ется, вся украша́ется и утвержа́ется, смирева́ется и прославля́ется, похваля́ется и удивля́ется, утеша́ется и велича́ется. Тогда́ восприе́млет воздая́ния трудо́в и боле́зней землены́х, ме́сто поко́йно, ца́рство непрее́мно, жизнь безконе́чную и непреходимую. Тогда́ быва́ет прия́тно приноше́ние, жива́ же́ртва. Тогда́ обрета́ет кади́ло благово́нно, сла́дость присносу́щну: приста́нище благоути́шно, и ме́сто безмо́лвно, просветова́нно нерукотворе́нно: вене́ц безсме́ртия, рай сладча́йший, цве́ти благово́нни, кри́ни доброуха́ннии: ра́дость неизглаго́ланну, дерзнове́ние неконча́емо. Тогда́ со дерзнове́нием к Бо́гу беседует, и све́том лица́ его́ освеща́ется, и слове́сная смы́сла ея́ прозяба́ния обновля́ются. Тогда́ чи́стое ея́ приноше́ния кади́ло благоуха́ет: и неле́стная уст ея́ моли́тва, на вы́шнем же́ртвенице всесожже́ние показу́ется. Тогда́ мзду многосугу́бну бде́ния ея́ от Бога прие́млет. Тогда́ полуно́щных моли́тв, и у́тренняго моле́ния и славосло́вия, досто́йный поко́й прие́млет. И кто дово́лен испове́дати, или́ кий язы́к изрещи́ возмо́жет? Или́ кото́рый ум челове́чь пости́гнет ра́дость, поко́й, весе́лие, сла́ву, присносу́щный свет, и́же от Бо́га сицевы́м дае́мый. О́ко бо не ви́де, и ухо не слы́ша, и на се́рдце челове́ку не взы́де, я́же угото́ва Бог лю́бящым Его́, и пра́ве и неле́ностне от всея́ души́ и кре́пости и си́лы, со усе́рдием и стра́хом рабо́тающым Ему́. Кто же ли па́ки возмо́жет изрещи́, или́ испове́дати, или усмотри́ти, скорбь, боле́знь, тесноту́, студ, поноше́ние, томле́ние, плачь, рыда́ние, мучи́лища, гее́нну, скре́жет зу́бный, о́гненную реку́, про́пасть а́дову, та́ртар, тму кроме́шнюю, червь ядови́тый и неусыпа́ющий, изоощре́ныя трезу́бцы, на́глая томи́тельства, и неми́лостивыя а́ггелы, я́же гото́вашася небрегу́щым о свое́м спасе́нии? И что мно́го глаго́лю? С са́мым тем диа́волом му́чими бу́дут, ели́цы безстра́шне в ны́нешнем ве́це пита́ющеся, и Бо́жие долготерпе́ние преоби́дят, и не хотя́т пока́ятися и́скрене. Нас же да пощади́т Госпо́дь от сего́ зла, и напра́вит на путь спасе́ния. Ему́же сла́ва, ны́не и при́сно, и во ве́ки веко́в. Ами́нь.