Стихи́:

Нау́ма Елкеся́нина, уже́ издо́хша,

Влече́т мя любо́вь покади́ти сми́рною слове́сною:

В пе́рвый деке́мврия Нау́м от жития́ отъи́де, ра́дуяся.

Сий бе́яше от Елкеси́ма об он пол Ватари́ма, от пле́мени Симео́нова. Сий по Ио́не Ниневи́тяном зна́мение дасть, я́ко Нине́вия вода́ми сла́дкими и огне́м поги́бнет. И́же и бысть. И́бо и́же при нем бла́то, тру́сом потопи́ его́. И огню́ из пусты́ни прише́дшу, вы́шьшую его́ часть попали́. И у́мре же с ми́ром, и погребе́н бысть в земли́ свое́й. Нау́м же толку́ется «Поко́й» и «Утеше́ние» или́ «Му́дрость» или́ «Честь».

Стихи́:

Ана́ния – плоть, к пло́ти же томле́ния,

Чу́вство, я́ко плоть, ниже́ в ма́ле прие́млет.

Сей бя́ше от гра́да Арви́ла Перси́дскаго, и Христо́ва ра́ди испове́дания ят бысть. И внегда́ хотя́ше му́чен бы́ти, рече́: Ви́жу ле́ствицу на небеса́ возвыша́ющуся, и огневи́дныя му́жы призыва́ющыя мя во град, испо́лнен све́та и весе́лия. И та́ко сконча́ся.

Стихи́:

Умира́еши, и́же вся́кою доброде́телию тезоимени́тый,

О́тче, возлюби́в, по́лна су́ща ми́лости премно́гия.

Сей бя́ше при Константи́не царе́ и Ири́не, сын Гео́ргиев, и А́ннин. От ни́хже ко обще́нию бра́ка, жене́ че́стне припря́гся: и земледе́льстию прилежа́. И отту́ду притяжа́ния многая стяжа́в. Бысть же бога́т у́бо и ми́лостив. Те́мже и завистию диа́волею обнища́, я́коже не́когда И́ова, в толи́кую нищету́ сведе́, я́ко лиши́тися ему́ и дома́шния пи́щи. Но Бог того́ не оста́ви, до конца́ томи́тися в нищете́. Вну́ку у́бо его́ Мари́ю вся́ким благоле́пием ли́чным бы́ти су́щу испо́лнену, и разу́мну, цари́цыну сы́ну Константи́ну в жену́ упра́ви. И того́ такове́й же че́сти сподо́би, и мно́гому бога́тству вла́стеля быти. Он же по обы́чаю тре́бующым неоску́дно подава́ше. И уже́ вре́мени отше́ствия его́ приспе́вшу, созва́в своя́ вся сро́дники, и хотя́щая им сбы́тися прорече́. Приложи́ же и сия́: страннолю́бия не забу́дите, о чужди́х име́ниях не пецы́теся, церко́внаго хожде́ния не оставля́йте. И вся собра́в рек: Я́коже мене́ ви́десте творя́ща, та́ко и вы твори́те. И сия́ рек благослови́в, с ми́ром у́спе.

Бя́ше в пусты́ни не́кто чернори́зец Ио́р, сей у́бо де́сять лет не вкуси́ земна́го бра́шна, но а́нгел Госпо́день по трех днех небе́сное бра́шно приноша́ше ему́, и влага́ше во уста́, се ему́ в бра́шна ме́сто и пития́ быва́ше: Еди́ною же прии́доша к нему́ бе́си, и а́нгельския во́я показу́юще, и колесни́цу о́гненну, и оружено́сцы мно́ги зело́, я́ко се царю́ вели́кому гряду́щу. И к нему прише́дше глаго́лаху: уже́ испра́вил еси́ все: про́чее воста́в поклони́ся. И я́ко Илию́ вознесе́м тя. Мона́х же во уме́ свое́м помы́сли рече́: Аз по вся дни поклоня́юся моему́ Царю́ Спа́су Христу́, но а́ще бы сей Христо́с был, не бы истяза́л поклоне́ния. И се помы́слив рече́ ему́: Аз и́мам моего́ Царя́ Христа́, Ему́же всегда́ кла́няюся, ты же не́си царь мой. И а́бие неви́димь бысть. И та́ко победи́ диа́волю си́лу, и непрельще́н бысть ко́зньми его́.

От всего́́ се́рдца обраща́яся стена́нием и пла́чем серде́чным, терза́нием смиря́яся, и ми́луя ни́щая и убо́гия, и бли́жняго отпуща́я прегреше́ния. Ны́не бо глаго́лет Госпо́дь наш, обрати́теся ко Мне от всего́ се́рдца ва́шего посто́м и рыда́нием и пла́чем. И расто́ргнете сердца́ ва́ша, а не ри́зы ва́ша. Обрати́теся ко Го́споду Бо́гу на́шему, я́ко Ми́лостив и Щедр есть и Долготерпели́в и Многоми́лостив. Ми́луяяй рече́, ми́лован бу́дет. И отпустите́, отпу́стятся вам. Ми́лостыня му́жеви а́ки печать с ним, и дар благ есть творя́щим пред Вы́шним. И та́ко греси́ потира́ются. Име́яй ниневи́тско покая́ние, и́маши Дави́да, покая́нием очища́юща грехи́ и толи́ку покая́нию си́лу явля́ющу, я́ко тем проро́ческому дару сподо́бящеся и Бо́гу Отцу́ познава́ема. И́маши и́же рабе́ вопраша́ющи о Учи́тели и отве́ржеся с кля́твою, незна́ема Его́ сотвори́в и ло́жною ро́тою объят, тольми́ же скве́рну отверже́ния очи́сти я́ко и верхо́внику ему́ бы́ти и апо́столькаго ликостоя́ния не испаде́ и Це́ркви основа́ние, небе́снаго Ц́арствия ключа́рь от И́стины нарече́ся. И́маши мытаря́, и блу́днаго сы́на, и блудни́цу, и разбо́йника, во еди́ном часе́ и еди́ным благоразу́мным гла́сом грехи́ разсыпа́юще и поро́де граждани́на впи́шема. Дерза́й покая́нием, совлецы́ скве́рну, не бо́йся: проро́ком Госпо́дь де́рза тя сотвори́т. И егда́ пока́ешися, постене́ши, тогда́ спасе́шися, я́ко вели́ка есть ми́лость Христа́ Бо́га и очище́ние обраща́ющимся к Нему́ подо́бне: то́кмо обрати́мся и пока́емся. Тогда́ бо Госпо́дня ми́лость я́ко дождь на тро́скот в на́ша душа́ одожди́т и неприя́знина брань разруши́тся о Христе́ Иису́се Го́споде на́шем, Ему́же сла́ва, ны́не и при́сно, и во ве́ки веко́в. Ами́нь.