Стихи́:

Стремгла́вное распя́тие терпи́ши, Андре́е:

Я́влься по и́стине несекови́дно нога́м проти́ву:

Распя́тие стремогла́вное в тридеся́тый прия́т апо́стол Андре́й.

Сий бе́яше от гра́да Вифсаи́ды, сын Ио́нин, брат же Петра́ верхо́внаго апо́стола. Сий пе́рвие бысть учени́к Иоа́нна Крести́теля. Та́же слы́шав: «Се А́гнец Бо́жий», оста́вль того́, после́дова Христу́. И Петру́ ‐ «обрето́хом Иису́са и́же от Назаре́та» ‐ ре́кшу, приведе́ и того́ ко Христо́ву раче́нию. И друго́е есть обрести́ в богодуховнове́ннем Писа́нии лежи́мая о сем. Сий зане́же Христо́ви после́дуя, по Вознесе́нии же Его́ ине́м апо́столом ины́я страны́ спадо́шася, первозва́нному же Андре́ю страна́ Вифи́йска и Евкси́нский понт, со стра́ною Припонтиа́дскою со Халкидо́ном и Византи́ею и Тра́кием и Македо́ниею даждь и до И́стра быва́емыя страны́ ‐ Феса́лию же, и Ела́са, и страны́ Халде́йския, и Ами́нс, и Трапезо́нта, и Ира́клию и Амастри́с. Си́ми же проше́д, и на ко́ейждо мно́гая сопротивле́ния подъя́т. Мно́гих веще́й злоко́зньства прии́м, Христо́ву по́мощь и наше́ствие обре́т вся содержа́щаго. От сих же во еди́н град дости́г про́чих же оста́вив, и в Сино́п доше́д и сло́вом возвести́в. Мно́гими ско́рбьми облага́ется, по земли́ бо его́ помета́ху, и за но́зе и ру́це и́мше влеча́ху, и по пу́тищех ре́яху и древесы́ бия́ху, и ка́мение нань мета́ху, и пе́рсты его́ с зубы́ отрыва́ху, но он Учи́телем свои́м и Спа́сом цел и здрав от язв явля́шеся. И отту́ду воста́в, мно́гия обы́де гра́ды: Новкесари́ю и Самоса́ты и Я́сы, и Ва́зги, и Зикхи́и, и во Споры́ни (Апсар), и Херсоня́ны. Та́же отплу́в в Византи́ю и Стахи́я епи́скопа поста́вив, и про́чие ве́си проше́д и в Пелопоне́с доше́д. И прия́т быв Со́сием, и зле боля́щу исцели́ его́. И внеза́пу весь град Па́трский приведе́ ко Христу́. Тогда́ и анфипа́това жена́ Максими́лла, лю́таго неду́га отреши́вшися и ско́рое исцеле́ние получи́вши и ве́рова и прему́дрый Стратокли́с и анфипа́та Егеа́фа брат, и и́ны мно́ги неду́ги разли́чны иму́ще рукоположе́нием апо́столовым здра́ви быва́ху. Сего́ ра́ди в не́нависть впаде́ Егеа́ф и на кресте́ пригвозди́ апо́стола, сам же с не́которыя стены́ паде́ сокруши́ся. Апо́стольское же те́ло по мно́гих ле́тех преложе́но бысть в Константи́нь град в це́рковь святы́х апо́стол.

Во дни Константи́на вели́каго царя́, Ти́рий не́который филосо́ф, шед написа́ти после́днюю Инди́ю: пои́м же с собо́ю два бра́та ю́на. Да внегда́ возврати́тися ему́ с ни́ми, поидо́ша в не́кое оти́шие потре́бы ра́ди водны́я, и впадо́ша в ва́рвары. Да ели́цы бя́ху в корабли́, в мо́ре всех ва́рвари измета́ша: про́чих же закла́ша, в ни́хже и Ти́рий убие́н бысть. Из оста́вших же со двои́ми ю́ношами связа́вше приведо́ша к царю инди́йскому, в сих же еди́н Еде́сий именова́шеся, а други́й Фруме́нтий. Царь же ю́ношы благоразу́мичны ви́дев, ца́рския наря́дники и прилежа́тели поста́ви. Пото́м же царе́ву сы́ну по уме́ртвии отца́ своего́ ца́рствие прии́мшу, бо́льшей че́сти сих сподо́би. Дерза́юще и е́же та́мошним купце́м устро́иста, е́же с гре́ческими купцы́ собира́тися. И боже́ственныя слу́жбы соверша́ти повелева́ху. И ле́том не́ким мину́вшым, доидо́ста к царю́ своему́, устро́ю мзды проси́ша, и́же к свои́м помоли́стася обраще́нию: таково́е же получи́вше, к гре́честей земли́ поидо́ста. И убо Еде́сий Ти́ра достиг, роди́телей свои́х иска́ше. Фруме́нтий же я́же о боже́ственных тща́ся, и роди́тельнаго предпоче́т виде́ния, во Александри́йский град до́йде. И церко́вному настоя́телю себе́ опове́да, я́ко инди́яне вельми́ лю́бят рече́ благоче́стия просвеще́ние. К нему́же блаже́нный Афана́сий: И что тебе́ к нам рече́ лу́чше, е́же чистото́ю мглу язы́ческую отгна́ти, и боже́ственнаго пропове́дания соввести́ зарю́? Сия́ рек, и архиере́йскую пода́в ему́ благода́ть, к язы́ческому посла́ соде́лованию. Он же оте́чество оста́вив, и роди́теля небре́г, и вели́кую пучи́ну благоче́стия ра́ди нивочто́же вмени́в, и дости́же несоде́лованнаго о́наго язы́ка, его́же возжеле́нно приплоди́, име́я соде́лованника богода́нную благода́ть, апо́стольскими бо уче́нии пома́зан. И чудоде́ланием не то́чию бесны́я врачева́ше и всяк неду́г, но и проти́вная ему́ глаго́лющым ненаско́ре прие́млющым, е́же от него ́глаго́лемым: О́вому бе́са подава́ше, по апо́столу, ре́кшу: предади́те его́ сатане́ к па́губе теле́сней, я́ко да дух спасе́н бу́дет. О́вого су́ха сотвори́, друго́му очи́ма ослепле́ние наведе́. Они́ же неза́пно припа́дающе, ве́роваху во Христа́, и цельбы́ получа́ху. Я́же и повсегда́ быва́емая от него́ чудоде́йствия свиде́тельствуют о нем, е́же в ве́ру Христо́ву вся́кое язы́ческое мно́жество к богоразу́мию преложи́. Дивля́хуся же вси, и сам царь, глаго́люще: Толи́ко лет с на́ми пребы́в, никаково́ от тебе́ чудо ви́дехом когда́ сотворе́но: ны́не же отку́ду тебе́ вселюбе́зный такова́я благода́ть дарова́ся в ма́ле вре́мени? Отвеща́ же блаже́нный: Не мой есть дар честни́и Христо́вы дру́зи, но свяще́нства, и того́ Самого́ Христа́. Ви́дех бо благи́й ваш ра́зум, того́ ра́ди оста́вих оте́чество, и вся́кое сро́дство, по гла́су Госпо́дню, и достиго́х Александри́ю: и нача́льнику вели́кому церко́вному Афана́сию о вас сказах́. Пома́занием святы́м от него́ пома́зан бых, и апо́стольскою благода́тию просвети́вся, е́же с Бо́гом моли́твами его́ по́слан бых к вам. Вам же ве́рно мене́ восприи́мшым, свяще́нный дар, па́че же и Бо́жий соде́ловает мно́ю, я́коже ви́дите. И та́ко нема́лыми ле́ты с ни́ми пожи́в богоуго́дно, и Бо́жиим за́поведем тех поучи́в. И коему́ждо по своего́ ему́ соде́лованию пресла́вно разме́рив, ели́ко по си́ле мо́щно. И я́же о них оста́вль, ко Го́споду отъи́де. Его́же честны́я мо́щи неоску́дно приседя́щым цельбы́ подава́ют, в сла́ву и́стиннаго Христа́ Бога на́шего.

Свято́му апо́столу Андре́еви живу́щему в Сино́пии, крестя́ще наро́ды, и отъи́де и прии́де в Ко́рсунь. И слы́шав, я́ко близ есть у́стие Дне́прское и лзе есть отту́ду отъити́ в Рим. И восхоте́ поити́ святы́й Андре́й по реце́ в Рим из варя́г в гре́ки и из грек по Днепру́. И верх Днепра́ во́лок до Лово́ти и по Лово́ти вни́ти в Илме́рь е́зеро вели́кое. Из него́ же тече́т Во́лхов во е́зеро вели́кое Не́во, из того́ е́зера вни́дет у́стие в мо́ре Варя́жское. И по тому́ мо́рю вни́ти и до Ри́ма, и от Ри́ма приити́ по тому́ же ко гра́ду Константи́ню. И от Константи́ня гра́да в Понт мо́ре, в него́ же тече́т Днепр река́. Днепр же тече́т из Во́лховского ле́са. И потече́ на пол дни. И Двина́ из того́ же ле́са потече́ на пол но́щи и вни́де в мо́ре варя́жское. Из того́ же ле́са потече́т Во́лга на восто́к и втече́т седмию́ де́сять у́стий в мо́ре Фали́сское (Хвали́сское). Те́мже из Руси́ мо́жет изы́ти в болга́ры и в хвали́сы и на восто́к доити́ в жре́бий Си́мов. По Двине́ же в варя́ги, и из варя́г до Ри́ма до пле́мене Ха́мова. Днепр же потече́т в По́нтское мо́ре, треми́ у́стии е́же мо́ре слове́т ру́сское. По тому́ же морю́ учи́л есть святы́й Андре́й и отту́ду прии́де в Рим. И прии́де во у́стие Дне́прское, и по́йде по Днепру́ горе́, по смотре́нию Бо́жию прии́де и ста под гора́ми на бре́зе, иде́же есть град Ки́ев. И зау́тра воста́в, рече́ ученико́м свои́м, су́щим с ним: «Ви́дите ли го́ры сия́, я́ко на сих гора́х возсия́ет благода́ть Бо́жия. И́мать град вели́к бы́ти зде, и це́ркви мно́ги хо́щет Бог воздв́игнути, и святы́м креще́нием просвети́ти сию́ зе́млю». И вшед на го́ру сию́, и благослови́ ю́ и помоли́ся Бо́гу. И поста́ви крест, и отту́ду и́де к Но́ву го́роду, та́же в Рим, в Пелопо́не же о́строве ра́спят бысть за Христа́ от анфипа́та. Те́мже вси вопие́м ему́: «Ра́дуйся, святы́й апо́столе Андре́е, благослови́вый зе́млю на́шу и прообразова́вый нам свято́е креще́ние, е́же мы прия́хом от свята́го Влади́мира. Ра́дуйся, насе́явый уче́ния вселе́ную всю. Ра́дуйся, учениче́ Христо́в и учи́телю наш, и не преста́й за ны моля́ся с Богоро́дицею и со апо́столы. Сих мольба́ми вся лю́ди от тмы свободи́ши, моля́ о нас предстоя́ престо́лу Христо́ву. Да избу́дем от злых». Ами́нь.