Стихи́:

Учиня́ет Бог, тебе́ уме́ыршему,

Но́ги на соверше́ние, Авваку́ме, я́коже рекл еси́:

Во вторы́й Авваку́м взы́де в Бо́жий град

Сий бе́яше от пле́мени Симео́нова, сын Асафа́тов. Ви́дев же пре́жде пле́на и запусте́ния це́ркви Иерусали́мския и попла́кав вельми́. И внегда́ до́йде Навуходоно́сор царь во Иерусали́м, бежа́в от срацы́н, и бя́ше пришле́ц в земли́ Исма́ильтестей, да я́коже возврати́шася халде́яне, изоста́вшии же су́щии во Иерусали́ме, и во Еги́пет [пресели́шася] . Пои́м же снедь, рече́ к свои́м: иду́ в зе́млю да́льнюю, и и́мам ско́ро доити́: а́ще ли закосню́, неси́те хле́бы жа́телем. […] И не рече́ бы́вшаго. Проро́чествова же, я́ко ско́ро и́мут лю́дие возврати́тися от Вавило́на. И пре́жде двою́ лет возвраще́ния у́мре: и погребе́н бысть на селе́ свое́м. Сей даде́ зна́мение во Иуде́и, я́ко узре́ти и́мут в це́ркви свет, и пото́м у́зрят сла́ву Бо́жию. И о сконча́нии церко́внем прорече́: я́ко от язы́ка за́паднаго бу́дет. И просте́ртие, рече, Дави́рово, в да́льняя раздра́ния раздере́тся, и никто́же позна́ет ка́мо де́шася: они́ же а́нгелом бу́дут принесены́ в пусты́ню, иде́же изнача́ла водружена́ бысть сень свиде́ния, и о сих позна́ется в соверше́нии Госпо́дь, и просвети́т гони́мыя зми́ем изнача́ла.

Стихи́:

Мужи́й четвери́ца в безско́рбное село́,

Из в ско́рби по́лна су́ща се́ла преидо́ша.

Си́и бя́ху от гра́да глаго́лемаго Оксири́ха, христиа́ну роди́телю бы́вше ча́да. Упражня́ющеся ча́сто на пи́сменная чте́ния. И направля́ющеся во вну́треннюю пусты́ню, иде́же и наста́влени бя́ху. И в ней му́жа улучи́ша свя́та, и в глубо́кую ста́рость достиго́ша, пребы́ша с ним ле́то еди́но. О́ному же от жития́ отше́дшу. И ти́и пребы́ша на том ме́сте, шестьдеся́ть лет, жесто́кому житию́ и посту́ себе́ вдавше. И бя́ше тем пи́ща ово́щие и вода́, и два́жды в неде́ли вкуша́юще сего́. Внегда́ же разлуча́ющеся, и в разли́чных гора́х, и верте́пех прбыва́юще осо́бно ки́йждо. В суббо́ту же и в неде́лю сходя́щеся, и свое́ дово́льное благодаре́ние Бо́гу возсыла́юще. И боже́ственным а́нгелом причаще́ние прие́млюще, и с ми́ром почи́ша. Сия́ же испове́да вели́кий Пафну́тий пусты́нный, иже и самови́дец быв тех, и списа́тель жития́ их.

Сия́ свята́я Миропи́я, бя́ше во Ефе́сстем гра́де. Отцу́ же ея́ уме́ршу, воспите́на бысть ма́терию. И порождена́ бы́вши святы́м креще́нием. Бя́ше же ей обы́чай ходи́ти к па́мяти святы́я Ермиони́и, еди́ныя от дще́рей свята́го апо́стола Фили́ппа, и ми́ро от гро́ба ея́ взима́ти, и всем неоску́дно подава́ти. Того́ ра́ди сицево́е и́мя себе́ стяжа́вши. Деки́ю же тогда́ ца́рствующу, и гоне́ние на христиа́ны подви́гшу. Ма́ти прии́мши Миропи́ю, во о́стров Хио́нский отъи́де, и де́днее насле́дие та́мо име́юща. И бя́ше тамо в хра́мине пребыва́ющи, Бо́гу всегда́ о себе́ моля́щися. Не́когда же кня́зю доше́дшу во о́стров Хио́нский, ят быв блаже́нный Иси́дор я́ко христиани́н, от того самого́ во́инскаго чи́на, муж чу́ден и благогове́ин, его́же искуша́я бя́ше князь, и му́ча, е́же отступи́ти от ве́ры Христо́вы. И я́ко не увеща́ его́, по мно́гих му́ках ме́чною сме́ртию того́ осуди́, и в дебрь не́кую в снедь зве́рем и пти́цам предаде́ и́. И стра́жем приседя́щым телеси́, по повеле́нию кня́зя. Святая же Миропи́я, ре́вностию боже́ственною подви́гшися, но́щию с свои́ми служе́бницами прише́дши, прия́т свято́е его́ те́ло, и че́стне покади́вши, в наро́читем ме́сте положи́. Уве́дев же князь теле́сное украде́ние, и стра́жи желе́зы окова́в, повеле́ по всему́ о́строву води́мым бы́ти, и испы́товати, глаго́люще: я́ко а́ще не изобря́щут крадо́мое, внутрь да́ннаго им повеле́ния, глава́м отсече́ние да прии́мут. Тогда́ свята́я ви́дящи всегда́ во́ины му́чимы, и влеко́мы с желе́зы обложе́ны их, и сих стра́сти злы́я, и главна́го отсече́ния слы́шавши, умили́ся душе́ю. И такова́я в себе́ ре́кши: А́ще си́и моея́ ра́ди крадбы́ стра́ждут, вем, я́ко ну́ждно душа́ моя́ оскорби́тся, и го́ре мне на суде́ бу́дет. И внеза́пу рече́ во́ином: О́ дру́зи, тело, е́же изгуби́ли есте́, аз взях е́, вам спя́щым. Во́ини у́бо о́ну и́мше, предста́виша ю́ кня́зю, глаго́люще: Сия́ есть го́споди, я́же нуждесме́ртнаго ста́рца укра́дшася. И князь рече́ ко святе́й: И́стина ли суть я́же о тебе́ глаго́лемая? Свята́я же рече́: И́стина. И князь рече́: Да ка́ко сме́ла еси́ прокля́тая же́но то сотвори́ти? Она́ же рече́: Преоби́дящи и оплева́ющи твое́ окая́нство и безбо́жие. И сия́ не вма́ле подвиго́ша на я́рость го́рдаго о́ного кня́зя. И а́бие повеле́ па́лицами без ми́лости би́ти ю́. Та́же и влачи́ти ю́ по всему́ о́строву за плени́цы влас, и би́ти по всем удесе́м. И сему́ бы́вшу, е́ле жи́ву в темни́цу му́ченицу затвори́ша. В полу́нощи же моля́щися святе́й, свет обсия́ всю темни́цу, и лик а́нгельский предста́, и посреде́ их святы́й Иси́дор, пою́ще Трисвяту́ю песнь. И святый на му́ченицу воззре́в, «мир тебе́, рече́, Миропи́е, прибли́жашася мольбы́ твоя́ к Бо́гу. И се бу́деши с на́ми, и прии́меши угото́ванный тебе́ вене́ц». И а́бие с сло́вом предаде́ дух свой Го́сподеви, и испо́лнися темни́ца неизрече́ннаго благоуха́ния, я́ко и темни́чником ужасну́тися, и чудеси́ бы́ти. Сия нам пове́да бдяй тогда́ стра́жник, я́ко ви́дев сия́ и слы́шав. И сего́ ради прише́д и крести́ся, и муче́ния вене́ц восприи́м. Те́ло же святы́я повеле́нием кня́жим христиа́не взе́мше, в наро́чите ме́сте положи́ша.

«Ви́дите, оби́дливыя, смотри́те и чуди́теся чудеси́, [и] изче́знете, поне́же де́ло Аз де́лаю во днех ва́ших, ему́же не и́мате ве́ровати, а́ще кто испове́сть» «Презо́ривый же и оби́дливый мужь [и] велича́вый, ничто́же не сконча́ет, и́же разшири́ а́ки ад ду́шу свою́, сей бо а́ки смерть ненасыще́н». «Погра́бя пограблю́ злы́я от до́му их и вчиню́ в высоту́ гнездо́ Свое́ во благи́х, исто́ргну я́ от руки́ злых. Умы́сли стыде́ние до́му своего́, сконча́ лю́ди мно́ги, и согреши́ душа́ твоя́». Гре́шен, вои́стину прегре́шен хотя́й бо́льшему, и от таце́х труд возрасти́ти умно́живаяй дом, и всех челове́к вы́шший бы́ти любя́. Бо́льше бо паде́ние си́це подъе́млет, а́ки от высоты́ бо́льша во глубину́ вноси́мь, на мно́ги сотво́рь беды́, свою́ ду́шу на мно́зи грех [пронзи́л есть и весь дом свой покры́л есть студо́м.]