Стихи́:

Мече́м оте́ц тебе́ пожре́т, му́ченице Варва́ро,

Бысть други́й Авраа́м диа́волов:

В четве́ртый Варва́ра роди́тельныма рука́ма посече́ся.

Та бе́яше при Максимиа́не цари́, от со́лнечнаго восто́ка, дщи Диоско́ра не́коего е́ллина. На высо́це пи́рге отце́м храни́ма, цвете́ния ра́ди теле́сныя красоты́. Деви́ца же, су́щи Христа́ чту́щи, не утаи́ся отца́. Уви́дев же я́же о ней, зане́же о́ному егда́ созида́ти ба́ню, две окне́ рече́ сотвори́ти. Она́ же три рече́ бы́ти. И о вине́ вопрошена́ бы́вши, рече́ – во и́мя Отца́ и Сы́на и Свята́го Ду́ха. И а́бие устреми́ся оте́ц ея́ свои́м мече́м уби́ти ты́ю. Избе́гши же ей, и в разси́ль ка́менную вше́дши. Гнав оте́ц ея́ восле́д и изъе́м ю́ за власы́ и преда́сть кня́зю страны́ тоя́. И и́же пред ним испове́да Христа́ и идо́лы обезче́стивши, бие́на бысть вельми́, и стро́гана, и ре́бра ея́ сожго́ша. Та́же и в сквози́ град води́ма бы́вши нага́. И пото́м пои́м ю́ оте́ц ея́ и свои́ма рука́ма мече́м главу́ ей отсече́. И́мже глаго́лется, я́ко по сече́нии святы́я, сходя́щу отцу́ ея́ с горы́, испаде́ огнь с небесе́ и пожже́ его́, и́же и зле ду́шу изве́рже.

Стихи́:

Исполни́в зе́млю пе́сньми подземле́ными Иоа́нне,

А́ще и на не́бо восходи́т спасти́ся хотя́.

Сий бе́яше в ца́рство Льва Иса́вра и при Константи́не сы́не его́, от гра́да Дама́ска, ро́да сла́вна и бога́та и правосла́вною ве́рою сия́ющих. Изучи́в вся́кое е́ллинское окруже́нно наказа́ние и глубину́ богодухо́внаго писа́ния до́бре изуви́дев, и́ноческое житие́ с Козмо́ю обше́д и воспита́вся с ним.

И та́ко со ине́м Козмо́ю и́же в Майу́ме епи́скопствовавши, си́и ку́пно еди́нем учи́телем науче́ни бы́вше. И о́ному и́мя Козме́ бы́вшу нарица́емому Асигкри́ту, во́ньже утаи́вся от отца́ своего́ прибе́г, та́ко и с про́чими плене́нии, в соверше́ную же му́дрость дости́же, и́же и та́коваго учи́теля получи́вше.

Ему́же и во сне я́вльшеся Пречи́стей Влады́чице и Богоро́дице, ре́кши, ели́ким приста́нет Иоа́нн спосле́дствовати учи́телю. Или́ па́че запове́дати таково́му ученику́ Иоа́нну пе́ния изложи́ти во сла́ву И́же от Нея́ безсе́менне Рожде́нному и на похвалу́ и́же от среды́ серде́чныя хотя́щим Ю́ похвали́ти. И́же и сотвори́ при́тчу, изложе́нием такова́го сло́ва написа́ния сложи́в.

Пото́м в по́стничество прише́дше, блаже́ный же Козма́ мно́га писа́ния це́ркве оста́вив, с ми́ром почи́. Та́ко же и Майу́мский Козма́ ми́ром у́спе. Приснопомина́емый ж Иоа́нн, и той подо́бная и мно́жайшая соде́ловав, и свои́ми слове́сными си́лами и пи́сменным показа́нием изобличи́ти злочести́вую иконобо́рную е́ресь, и́же и той мно́га писа́ния соста́вив, и́же и повсю́ду иско́маго ра́зума обрета́ется, и во ста́рости масти́те житие́ оста́вив.

Прии́де не́кто от ста́рец ко а́вве Ло́ту, в пусты́ню ма́лую Арсенола́нта. И моля́ся ему да повели́т ему́ бы́ти близ себе́. И прия́т его́ а́вва Лот, и упоко́ив. И прихожда́ху не́цыи ко а́вве Ло́ту, и творя́ше их ити́ к ста́рцу неду́жному, и глаго́лаше им словеса́ Ориге́нова. И скорбя́ше а́вва Лот глагол́я: Еда́ рещи́ и́мут отцы́, я́ко и мы такови́ есмы.́ Изгна́ти же его́ хотя́ше от ме́ста о́ного, и боя́шеся за́поведи Бо́жия. И воста́в и́де ко а́вве Арсе́нию, и пове́да ему́ о ста́рце. Рече́ же ему́ а́вва Арсе́ний: Не отгони́ его́, но рцы ему́, сие́ от Бо́га: е́же есть яждь и пий, я́коже хо́щеши, то́чию словесе́ не глаго́ли. И а́ще хо́щет, то испра́витися мо́жет. А́ще ли же испра́витися не восхо́щет, сам изы́ти от ме́ста и́мать, и не бу́дет вина́ от тебе́. Шед же у́бо ав́ва Лот сотвори́ та́ко. Ста́рец же я́ко слы́шав сия́, не восхоте́ испра́витися, но приле́жно моли́ся глаго́ля: Го́спода ра́ди отпусти́ мя от зде, поне́же не могу́ терпе́ти в пусты́ни. И воста́в изы́де с любо́вию отпуща́емь.

Стихи́:

Епи́скопство землено́е Иоа́нн оста́вив,

Епи́скопством вся́ческим ра́дуется боже́ственым.

Той юн сый, пи́щных сласте́й и веще́й оша́явся, посто́м же па́че и целому́дрием, и ми́лостынями житие́ свое́ украша́я бя́ше. Тем и Поливо́тский епи́скоп поста́влен бысть. И пе́рвее церко́вныя степе́ни вся проше́д зако́нно. Внегда́ же в заступле́ние людско́е вру́чен быв, по́двиг к подвиго́м прилага́ше, и труд ко трудо́м. Поне́же Льву Иса́вру недосто́йне ски́птры царствия прие́мшу, и святы́я ико́ны ху́лити наче́ншу. Свяще́нный же сей муж кре́пко обличи́ его́ нече́стие. Та́же к свое́й па́стве ве́ру изве́ствова. Ага́ряном же Амори́ю обсе́дшым, богопосо́бно порази́в, и христиа́н коли́ко имя́ху плене́ных, свято́му дарова́ша. И свое́ те́ло да́же и досе́ле нетле́нно соблюде́. И по всяких днех святы́я Пятидеся́тницы двиза́емо быва́ет, и во архиере́йскую оде́жду облача́ще, и ко святе́й боже́ственней Трапе́зе принося́ще, и та́ко стои́т пра́во, и на престо́л его́ возво́дят, поддержа́щым двема́, доне́леже свята́я слу́жба соверши́тся. И про́чая же, ели́ко бесну́ющихся уврачева́, и неду́ги боле́зненых, не возмого́хом писа́нию преда́ти мно́жества ра́ди.

Ви́де еди́н ста́рец от святы́х оте́ц, а́нгельский чин сходя́щь с небесе́, по повеле́нию Бо́жию. Имя́ху же кни́ги, си́речь сви́ток напи́сан внутрьу́ду, и внеу́ду. Глаго́лаху же к себе́: Кто досто́ин есть прия́ти сей? О́вии глаго́лаху сего́, друзи́и же ино́го. Отвеща́ша же и реко́ша: Вои́стинну свя́ти суть и пра́ведни, но не мо́гут сего́ прия́ти. И мно́га у́бо наре́кше имена́ святы́м. Последи́ же реко́ша: Я́ко ни еди́ному мо́гут сия́ поруче́на бы́ти, то́кмо Ефре́му. Ви́дев же ста́рец ви́девый виде́ние, я́ко Ефре́му да́ша сви́ток: и воста́в зау́тра, слы́ша Ефре́ма уча́ща лю́ди, и я́ко исто́чник бе теки́й из уст его́. И разуме́ ста́рец ви́девый виде́ние, яќо от Свята́го Ду́ха суть исходя́щая из уст Ефре́мовых.