Стихи́:

Тле́нное оста́вив, Пата́пие, со дна землена́го:

Ступа́еши, иде́же ступа́ют кро́тких но́зе:

В осмы́й Пата́пие зла́чное по́ле ше́ствовал еси́.

Сий бе́яше от Фив и́же при Еги́пте, и́ноческое житие́ притяжа́в. И мно́га ле́та в пусты́ни пости́вся, в Константи́нь же град дости́г, мно́га соде́лова чудеса́: слепы́я просвети́в, и водотрудови́та пома́занием свята́го ма́сла исцели́, и бе́сы прогна́, и главотряса́вична уврачева́, с ми́ром Христо́ви дух свой преда́сть.

Стихи́:

Рука́ма ариа́нскими побие́ни бы́ша,

Рука́ма боже́ствеными про́чее ны́не венча́ни бы́ша.

Си́и святи́и му́ченицы бяху во времена́ Зино́на царя́ гре́ческаго. Африки́йскую же страну́ пра́вящу в содержа́нии Онори́ху, по сконча́нии отца́ своего́ Гизери́ха, ариа́нин сый ве́рою. И с ним тоя́же ариа́нския е́реси епи́скопи, Кири́лл, и Вилима́ндис, совеща́вшеся, и гоне́ние подви́гше таково́ безле́пием на православ́ныя, я́ко превзы́ти времена́ Диоклитиа́нова и Максимиа́нова. От всех бо градо́в и стран во́ином пяти́надесятим ты́сящам, вся иере́и прогна́ти повеле́. Пе́рвее же церко́внаго посвяще́ния прикро́вы отъи́мше. Та́же во еди́ну це́рковь правосла́внии собра́шася, и та́мо та́йную слу́жбу соверша́ху. Сие́ же уве́девше ва́рвари, тай я́ко вси кровопия́вии, мечи́ обнажи́вше, (о́ нра́ва безчелове́чна!) всех ссеко́ша: и́мже Бо́га пою́щым и славящым. Сия же Онори́ху подража́ющу, повеле́ не креща́щихся во ариа́нское креще́ние, внеза́пу убива́ти. Да ели́цы муче́ния му́ки терпе́ти не можа́ху, бе́гством спасение получа́ху, оставля́юще до́мы и се́ла. Ели́цы же крепя́щеся в правосла́вней ве́ре, вожделе́ннее себе́ на му́ки подава́ху. Триста же у́бо от еди́наго укрепи́вшеся бы́ша, и в Кархидо́не же, не му́дрствовати ариа́ном совеща́вшеся, и отсече́ние глава́м муче́ние прия́ша. Свяще́нники же бо́льшая вменя́юще, и два от них сожго́ша. Шестьдеся́ть же речи́вейших, язы́ки их от са́мых ви́лиц изре́заша, и́же и разсе́явшеся по всей земли́ гре́честей. Бо́жие же в них вели́ко чудоде́йствие бысть: без язы́к бо пропове́даху небоя́зненно, и я́сно глаго́лемая разсева́юще, я́ко диви́тися зря́щым, и послу́шающым тех. От ни́хже еди́ному во благода́ти же и Христо́ве испове́дании, попо́лзшуся в теле́сный грех, боже́ственней благода́ти отступити от себе́ сотвори́. И́же о сем нема́лии писцы́ и писмена писа́ша, я́ко си́и у́бо от Ванди́л во Африки́и, Единосу́щна Отцу́ Бо́жия Сло́ва испове́дати христиа́ном дерзну́ша. В ста́ром же Ри́ме в таково́е вре́мя Суни́лда, жена́ Ри́ги, содержа́щаго Рим, и́же и та неду́гующи подо́бне во о́ной вере, еди́ну от гра́дских жи́тель не́коего от вельмо́ж жену́ ну́дяше, е́же крести́тися о́ной во ариа́нское креще́ние: ей же бя́ше и́мя Анфи́са. И я́ко увеща́ти ю́ не возмо́же, но слы́шавши, я́ко водо́ю от епи́скопа Медиола́нского и крести́тися приве́дши: е́йже и от ба́ни изше́дши, две ме́ре испроси́ от своея́ рабы́ни, даде́ епи́скопу ре́кши: се и́маши мзду твое́й ба́ни. Разгне́вавшися же Суни́лда, и святу́ю Анфи́су огне́м сожже́. Тоя́же муж убоя́вся стра́хом, самохо́тно и́де и крести́ся во а́риево служе́ние: е́здити же хотя́, и на коня́ всед, и быв проти́ву це́ркве гра́дстей, и мо́лниею не́которою нань напа́дшую заже́гся, и сокруше́н бысть, и сгоре́. Та́ко о том Бо́жий суд бысть сильне́йши па́че бу́дущаго огня́.

Сии бе́ша в ле́та святы́х апо́стол. В сих же у́бо Сосфе́н, его́же святы́й Па́вел помина́ет: епи́скоп в Колофо́не бысть. Аполло́с же, и́же и того́ то́йже апо́стол помина́ет, я́же к кори́нфом в пе́рвей еписто́лии: в Сми́рне бысть, пре́жде свята́го Полика́рпа епи́скоп. Ти́хик же, и́же и того́ то́йже апо́стол помина́ет: вторы́й епи́скоп в Колофо́не быв. Епафроди́т же, и́же и того́ то́йже апо́стол помина́ет: епи́скоп во Адриа́кии бысть. Си́и вси до́бре пожи́вше и преподо́бне, и упа́сше и окорми́вше прилучи́вшыяся сим це́ркви и лю́ди. И мно́ги напа́сти о Христе́ претерпе́ша. И от идолослужи́тель сконча́шася, преда́вше ду́шы своя́ Го́сподеви, за Него́же и своя́ главы́, возжеле́нно положи́ша.

От Сами́йскаго гра́да осмь по́прищь село́ есть, име́я це́рковь, ея́же поп оба́жен бысть ко епи́скопу. И не испыта́в о нем епи́скоп, посла́в, приведе́ его́ от села́ и прида́сть и́ в темни́цу, иде́же бе обы́чай согреша́ющим кли́риком затворя́емым быти.

И су́щу ему́ в темни́цы, дости́же и свята́я неде́ля, и в нощи́ яви́ся ему́ ю́ноша, благообра́зен зело́ и глаго́ла: «Воста́ни, презви́тере, и поиди́ в це́рковь, я́же на селе́ твое́м, и сотвори́ши Литурги́ю». И рече́ к нему́ поп: «Не могу́, поне́ заключе́н есмь». И глаго́ла ему́ яви́выйся: «Аз отве́рзу темни́цу, и поиди́ восле́д мене́». Отве́рз же две́ри, изведе́ и́, и с ним идя́ше до еди́ного по́прища села́ попо́ва. И бы́вшу дни, держа́й темни́цу вни́де, ища́ попа́, и не обре́т его́, и́де ко епи́скопу и рече́: отбежа́л поп из темни́цы, мне иму́щу ключь. И мнев епи́скоп, я́ко отбеже́, посла́в епи́скоп еди́ного о́трока от себе́ глаго́ля: «Иди́, виждь презви́тера, а́ще есть на селе́ свое́м, и не рцы ему́ ничто́же». Шед же о́трок, обре́те и́ в це́ркви, святу́ю Литурги́ю творя́ща, и обра́щься, рече́ ко епи́скопу: «Я́ко ту есть, Литурги́ю творя́ща обрето́х его́». Епи́скоп же па́че разгне́вався нань и кля́тся, я́ко: «У́́тро со мно́гим безче́стием приведу́ его́». И в нощь втору́ю яви́ся презви́теру, и́же пре́жде яви́ся ему́, глаголя: «Поиди́, да тя веду́, иде́же тя епи́скоп гра́да всади́». И пое́м, веде́ и́, посади́ в темни́цы, не ве́дущу темни́чному стра́жу. И утро, уве́дав шед, и пове́да епи́скопу, я́ко обре́теся поп в темни́цы. И епи́скоп призва́ попа́ и вопроси́ и́, глаго́ля: «Ка́ко изле́зе из темни́цы и ка́ко вни́де, не ве́дущу темни́чнику?». И рече́ поп, я́ко: «О́трок, доброзра́чен зело́, от тебе́, влады́ко, прише́д, повеле́ ми в це́рковь на село́ ити́, и отве́рзе ми темни́цу, изведе́ мя, и пре́до мно́ю идя́ше до еди́ного по́прища села́ моего́, и па́ки в другу́ю нощь то́йже, пои́м мя, и посади́ в темни́цы. Приведе́ же епи́скоп вся о́троки своя́, и ни еди́ного же их не позна́ презви́тер. И разуме́ епи́скоп, я́ко а́нгел Бо́жий сотворивый се, да не кры́ет жития́ презви́тера, но да вси уве́дят Бога, прославля́ющаго рабы́ Своя́. И по́льзу прии́м епи́скоп, отпусти́ попа с ми́ром, и мно́го казни́ оба́дившаго и́, запреща́я, да не друзи́и клевета́ти и́мут на презви́теры.