Стихи́:

Не я́коже Е́ва, скорбьми́ и ты роди́вши,

Ра́дость бо, А́нно, внутрь чре́ва но́сиши:

В девя́тый же Мари́ю, Бо́жию Ма́терь, заче́нши, А́нно.

Госпо́дь наш Иису́с Христо́с и Бог, хотя́ уготов́ати Себе́ Це́рковь душе́вную и Дом свят в жили́ще Себе́, а́нгела Своего́ посла́ к пра́ведным Иоаки́му и А́нне, от ни́хже восхоте́ произы́ти е́же по пло́ти Ма́тери Его́, и провозвести́ зача́тие безча́дне и непло́дови, да извести́т Деви́ческое рожде́ние. Тем зача́та бысть свята́я Деви́ца Мари́я, и роди́ся по обетова́нию, но от смеше́ния му́жеска: еди́н бо то́чию Госпо́дь и Бог Иису́с Христос роди́ся от святы́я Де́вы Мари́и све́не [1] му́жа и све́не смеше́ния, неизрече́но и несказа́нно, я́коже Той Еди́н свесть. Соверше́ный Бог, и совершен́ роди́ся Челове́к: все Своего́ е́же по пло́ти смотре́ния соверше́не восприя́т, я́коже и челове́ческое естество́ соде́лова и созда́ изнача́ла. Глаго́лют же не́цыи, я́ко седмы́м ме́сяцем или́ я́ко без му́жа роди́ся Пресвята́я Богоро́дица, но несть та́ко, но соверше́нно девяти́м ме́сяцем и совокупле́нием му́жеским. Соверша́ет же ся собо́р Ею́ в пречи́стем хра́ме Пресвяты́я Влады́чицы на́шея Богоро́дицы, су́щему в Евре́ниех, близ святы́я Вели́кия це́ркви.

Свята́я и блаже́нная А́нна проро́чица, бя́ше от гра́да Армафе́ма, от горы́ Ефре́мовы. Та спря́гшися му́жеви от пле́мене Леви́ина, и́менем Елка́ну. Непло́ды же су́щи, и не ражда́ше. И пои́м муж ея́ Фена́нну све́рстницу о́ной, и раждаше ча́да с не́ю, и ра́довашеся. А́нна же выну поноша́ема бываше, и нема́ла бя́ше ей базча́дная скорбь, но и от му́жа и от всех сосе́д и сро́дник. И мно́го о сем той Бо́гу моля́щейся, и я́же о зако́нных за́поведех вы́ну без ле́ности соверша́ющи. Та́ко святи́и своя́ проше́ния у́тро, и ве́чер от Го́спода приима́ху. Вше́дши же па́ки А́нна с му́жем свои́м в Сило́м, в хра́ме Го́спода Бо́га Вседержи́теля же́ртву соверши́ти рукою Или́и иере́я. И же́ртве соверши́вшися, еди́ну то́чию часть прии́мши: про́чая же усугу́би приноша́емыя ча́сти, зане́же не име́ти ей ни сы́на, ни дще́ри. О сем смути́ся, и испаде́ лице́ ея́, но не имя́ше что сотвори́ти. Му́жа во своя́ отпусти́вши, сама́ же еди́на в хра́ме оста́, и на зе́млю себе́ низложи́вши, си́це помоли́ся: Го́споди Бо́же оте́ц моих, а́ще призира́я при́зриши на смире́ние мое́, и пода́си ми плод чре́ва, то Тебе́ того́ пода́м, е́же рабо́тати Тебе́ вся ле́та живота́ своего́. И что у́бо Бог? Еда́ презре́ моле́ние ея́? Но что? Елма́ же ви́де Бог не отступа́ющу от хра́ма А́нну, и моля́щуся, и стужа́ющу Ему́, не то́чию плод чре́ва обеща́ся да́ти ей, но и рожде́нному сы́ну проро́чествие даде́. И взе́мши изве́стие изве́стно, и сни́де игра́ющи и веселя́щися, и заче́нши роди́ Саму́ила проро́ка. И по е́же отдои́ти его́, взы́де с ним в Сило́м, и паки припаде́ Го́сподеви Бо́гу своему́, и благодаре́ния воздаю́щи Ему́. И благослови́ ю́ Или́й иере́й, глаго́ля: Да пода́ст Госпо́дь други́й плод чре́ву твоему́, вме́сто Саму́ила сы́на твоего́, она́ же прии́мши сы́на сни́де, зане́же бы́ти ему́ зело́ ма́лу су́щу. Внегда́ же о́трок бысть, и́мши того́ за ру́ку, и введе́ его́ в це́рковь Го́спода Бо́га Вседержи́теля, и до́лжную моли́тву Го́сподеви возда́вши, предаде́ его́ в ру́це иере́ю Или́ю. И сотво́рши ефу́д, и ди́плу (сугу́бую) ма́лу, и служа́ше Го́сподеви пред Или́ею иере́ем. И ви́дящи Анна ра́довашеся. И приложи́вши роди́ три сы́ны, и дще́ри три. И в святи́лище прише́дши припаде́ Го́сподеви испове́дающися. И воста́вши нача́т пе́ти песнь сию́: Утверди́ся се́рдце мое́ о Го́споде, вознесе́ся рог мой о Бо́зе мое́м, разшири́шася уста́ моя́ на враги́ моя́. Возвесели́хся о спасе́нии Твое́м. И всю песнь отпе́вши, я́ко проро́чица, и проро́ча ма́ти. Сего́ ра́ди рече́: Я́ко непло́ды роди́ седмь, и мно́гая в ча́дех изнемо́же. Сия бо роди́вши три сы́ны, и три дще́ри, и Саму́ила, веселя́щися о седми́х. Фена́нна же истощи́ся и непло́дна бы́вши, и ктому́ не ражда́ше ча́да. Сия́ же А́нна ле́ты дово́льными испове́дающися Го́сподеви вы́ну, и проро́чествующи пре́йде в ве́чныя оби́тели.

Стихи́:

Изве́л еси́ Стефа́на ны́не от жития́,

Венце́м же сла́вы того́, Сло́ве, венч́ал еси́ верх.

Сей светоя́вственая звезда́ бысть Константи́ня гр́ада рожде́ние, и воспита́ние. Роди́тели же его́, Заха́рия, и Феофа́ния, вся́кою доброде́телию, и ра́зумом укра́шени. В ме́сте положе́н и супру́жнем, недале́че боже́ственныя це́ркве первому́ченика и архидиа́кона Стефа́на. И сим непра́здне су́щи ма́тери его́, вся́кия пи́щи то́лстыя оша́явшися, хле́бом и зе́лием, и водо́ю пита́шеся, да́же и до рожде́ния. Рожде́ну же бы́вшу отроча́ти, и а́бие крест светоявле́н и прекра́сен на пе́рсех его́ яви́ся, и́же бысть в зна́мение ве́лие, е́же после́дняго жития́ распя́тие я́вльшееся. Внегда́ же и пелена́ми пови́то бысть отроча́, ну́жда бя́ше е́же к сосцу́ сие принести́. Да внегда́ случа́шеся ма́тери его́ пи́щи не́кия дово́льно вкуси́ти, ника́коже отроча́ каса́шеся сосцу́. Мно́гажды бо и за два дни, и за три сему́ прилучи́тися. И уже пи́ща ма́терня бя́ше воздержа́ние, и́же отню́д у́жас вку́пе, и скорбь одержа́ше ср́одники. Та́же крещен бысть, и от пеле́н разреша́ется, и от сосцу́ отъе́млемь бысть. И по ле́тех во́зраста во уче́ние кни́жное вда́ша его́, и́же и возжеле́нно уча́ся навыка́ше: и бя́ше роди́телем повину́яся. И зане́же вскочи́вшу богоме́рзскому Фео́филу, внеза́пу на архиере́йский престо́л, и́же во святы́х Мефо́дий возведе́н бысть. И боже́ственным судо́м, честны́й Заха́рия, сего́ оте́ц, от него́ презви́тер поста́влен бысть, и кли́росу Вели́кия це́ркве приобщева́ется. Тогда́ же и боже́ственный Стефа́н постриза́ет власы́ главны́я, и кли́рик тоя́ же це́ркве быва́ет. И отцу́ испове́дует о преставле́нии его́, в Вели́кую це́рковь иду́щу. Во осмонадеся́тое же ле́то возраста его́, отцу́ его́ от жития́ отше́дшу. То́йже в це́ркви свята́го и верхо́внаго апо́стола Петра́ себе́ затвори́в, без стра́ха непреста́нно бя́ше моляся, и зе́лием то́чию пита́яся. В сих же ему́ живу́щу, во еди́ну же у́бо от но́щей яви́ся ему́ апо́стол Госпо́день, и рече́: Мир тебе́, ча́до. Добр тебе́ вожделе́нию нача́ток, Госпо́дь да укрепи́т тя. И та́мо три ле́та препроводи́в: и ви́де боже́ственнаго священному́ченика Анти́пу глаго́люща ему́: Мир тебе́ ча́до, и вонми́, не и́мам тя оста́вити. И от тогда́ вдаде́ себе́ в бо́льшее тща́ние, к посто́м, и моле́нием, еди́ною или́ два́жды в седми́це зе́лие вкуша́я без со́ли. И тако себе́ очи́стив, святи́тельстей че́сти сподо́бися, и мно́жайшая соде́лав чудеса́. Во второ́е же на́десять ле́то, ца́рства благочести́ваго царя́ Васи́лия, и в четыредеся́тое ле́то во́зраста преподо́бнаго, трус вели́к бысть, и́мже це́рковь свята́го Анти́пы вся разсе́деся. И изы́де отту́ду преподо́бный, и в не́кий гроб разсе́линный вни́де, и та́мо препроводи́в двана́десять лет. И отпадо́ша власы́ главы́ и брады́ его́, и зу́бы его́ испадо́ша. Коне́чнее же и все те́ло его́ распаде́ся. Зело́ бо бя́ше ме́сто о́но водо́ю мно́гою вла́жною обдержи́мо. И то соде́явшу ему́, изы́де из ров, повсю́ду умерщвле́н. Положи́в же дску, и на верху́ простре́ вре́тище остро, и возлеже́ на вре́тищи. Та́же и а́нгельскую наложи́в на себе схиму. Внегда́ на Госпо́дьския пра́здники соверша́ше боже́ственную слу́жбу, и по отпуще́нии еди́ну ово́щьку вкуша́ше, и ма́ло воды́. Пребы́сть же тако пита́яся сей блаже́нный, небе́сный граждани́н, оте́ц наш, пятьдеся́ть пять лет, те́сный, и о́стрый по́стнический проше́д путь. И по седми́десяти в тре́тие ле́то, всего́ своего́ жития́, па́че же умерщвле́ния, дух свой в ру́це Бо́гу преложи́.

Возлю́блении, днесь спасе́нию на́шему Нача́ток зачина́ется и плоди́тся во утро́бе пра́ведныя А́нны, по благове́щению арха́нгелову, и вну́ка Иессе́я пра́веднаго от коле́на Дави́дова. Се́ю бо разреши́шася у́зы Ада́мовы, Се́ю мир от пре́лести свободи́ся, о Сей бо ра́довахуся проро́цы, ча́юще от Нея́ роди́тися Го́споду на́шему Иису́с Христу́. Да есте́ ве́дуще, возлю́блении, я́ко днесь пра́зднуим день че́стно зача́тие Госпожи́ на́шея, Пречи́стыя Влады́чицы Богоро́дицы, темже к це́ркви Ея́ ра́достно теце́м, на моли́тве со стра́хом стои́м, и отве́рзем две́ри небе́снаго черто́га бде́нием и моли́твами, ми́лостынею и посто́м, и та́ко прово́дим че́стно, с ра́достию пра́зднующе честно́е зача́тие Пресвяты́я Госпожи́ Богоро́дицы, Та бо непреста́нно за нас мо́лит Сы́на Своего́ и Бога на́шего. Не то́кмо же са́ми яду́ще и пию́ще, но убо́гия ми́лующе, и а́лчущая насыща́юще, жа́дныя напая́юще, наги́я одева́юще, я́коже рече́ Госпо́дь: «Бу́дите ми́лостиви, я́коже и Оте́ц ваш Небес́ный Ми́лостив есть» (Лук. 6: 36). Подражаи́м у́бо о́ны му́дрыя де́вы, и́мже рече́ Госпо́дь: «Вни́дете в небе́сный черто́г, я́ко, стра́нна су́ще, поми́ловасте, и а́лчна накорми́сте, и жа́дна напои́сте» (Мф. 25:34-36). Еда́, бра́тие, Самого́ Христа́ накорми́ша ли напои́ша, те́мже Ца́рства небе́снаго сподо́бишася? Но ходя́щих бо в ми́ре сем и прося́щих во и́мя Госпо́дне. Молю́ вы, убежи́м и напра́снаго суда́, не ве́мы бо, в кий час душа́ от те́ла разлучится, еда́ яду́ще и пию́ще, ли ходя́ще, ли седя́ще. Те́мже име́имы на всяк час покая́ние, ми́лостыню, кро́тость, воздержа́ние, и та́ко умоли́м Влады́ку Христа́, могу́щаго ны поми́ловати. Помяне́м же вели́каго пастуха́ Златоу́стаго, я́коже рече́: «О́ ча́да, си вас де́ля сотворе́на суть, а не вы сих де́ля: не отвраща́йтеся от це́ркви, ни на пусто́шная поуча́йтеся да не напо́лнится вас гее́нна со отпа́дшими сла́вы Госпо́дни». Те́мже, возлю́бленая моя́ бра́тия, убеди́мся на моли́тву с чистото́ю к це́ркви ити́ и на вся́кий пра́здник Го́спода на́шего Иису́са Христа́ и Пречи́стыя Его́ Ма́тере, Влады́чицы на́шея Богоро́дицы, да сподо́бимся слы́шати: «Прииди́те, благослове́нии Отца́ Моего, насле́дуйте угото́ваное вам Ца́рствие» (Мф. 24:34). Ами́нь.