Стихи́:

Посе́чен мече́м, поне́же глаго́лати не и́мать

Ли то́чию да не глаго́лют злочести́вая уста́.

Злоче́стие заплева́в Ермоге́н,

Бысть му́ченик благоче́стию от меча́.

Ноже́м сбоде́ние, Евгра́фе, терпя́,

Скорописа́теля трость Бо́гови я́влься, благопи́ша.

В деся́тый Ми́на вы́ю мечу́ вдав.

Святы́й му́ченик Ми́на бе́яше при Максимиа́не цари́. Взыска́нию бы́вшу от алекса́ндрян о не́которых дви́гшеся ве́щех, по́слан бысть от царя́ ко о́нем реше́нию, и́бо изве́дел бя́ше вся́кую прему́дрость и к вети́йским дерзня́ше словесе́м, во Афи́нех мно́жайша проше́д и отну́д благоязы́чие навы́к, афи́анин сый ро́дом. Той прише́д во Александри́ю, не то́чию в ра́зум алекса́ндрян приведе́, вся́кое разреши́ и́же в них распре́ние и взыска́ние, но и́же о Христо́ве ве́ре сло́во прии́мшим, изве́стнейшее крепи́тися увеща́ и мно́гия не́мощныя исцели́.

Тем о сем царю́ уви́девшу, и посла́ Ермоге́на епа́рха, запове́дав ему́ е́же соврати́ти Ми́ну от христиа́нския ве́ры: да а́ще не покори́тся, весьма́ му́чи его́ и погуби́. Да я́коже свято́му Ми́не сопроти́вно глаго́лющу, пе́рвие же о́чи ему́ избоде́ и язы́к уре́за. Да я́коже вреже́ние теле́сныя я́звы ви́дев и пресла́вно прии́мших цельбу́ два а́нгела, покрыва́юща главу́ свято́му Ми́не, преложи́вся и ве́рова Христо́ви, и от свята́го Ми́ны креще́ние прия́т, и от соше́дшихся епи́скоп архиере́йское прии́м достоя́ние.

Уве́дев же сия́ царь, посла́в, повеле́ свята́го Ермоге́на во чре́во копие́ пробости́, и руце и но́зе ему́ отсещи́, и во сковраду́ о́гненую воврещи́, и изоставшая от те́ла поврещи́ в реку́, свята́го же Ми́ну в те́мне ме́сте пове́сити и ка́мень тя́жек нань навяза́ти. Си́мже по повеле́нию царе́ву соверши́вшимся, и со святы́ми а́нгелы боже́ственых слуг святи́и це́ли сохране́ни бы́ша, и царю́ предста́ша, и нече́стие того́ обличи́ша. Во́ньже святы́й Евгра́ф, отписа́тель свята́го Ми́ны бе́яше, дерзнове́нно Христа́ испове́да, и́же исше́д проти́ву царю́ и того́ обезче́стив. Царь же, укоре́ния и обличе́ния не терпя́, испо́лнь гне́ва бысть и, исто́рг ножь, сбоде́ Евгра́фа. Сбоде́ни бы́ша святи́и му́ченицы Ми́на и Ермоге́н ножи́, слуга́м царе́вым нань напа́дшим. Принесе́на бы́ша честна́я телеса́ их и положе́ни бы́ша в Византи́и, иде́же и н́ыне суть. Сие́ свято́му Ми́не у Бо́га испроси́вшу, мучен́ие же их, я́коже глаго́лют, списа́ вели́кий Афана́сие Алекса́ндрьский.

Стихи́:

О Бо́зе Ге́мелл ра́спят бысть,

И е́же на дре́ве распя́тие ра́достно претерпева́ет.

От страны́ Пефлаго́нския бя́ше сей святы́й. И слы́шав я́ко Иулиа́н законопресту́пник во Агки́ре есть Галати́йстей, дошед и ста пред ним, и нарече́ его́ престу́пника, и врага́ и́стиннаго, христиа́нстей ве́ре. Тогда́ огорчи́ся Иулиан, и нача́т му́чити его́. Пе́рвее опоя́са его́ желе́зным по́ясом разжже́нным, и толи́ко разжже́н бысть по́яс, я́ко и́скры испуща́ти ему́ от себе́. И кро́ви из телесе́ свята́го лию́щися, идя́ше в след престу́пника. О́ному же ше́ствующу, и внегда́ до́йде во Еде́с град, па́ки разжже́ рожны́ желе́зны и изверте́ плещи́ его́. Посе́м гво́зди желе́зны вонзе́ в главу́ его́. Та́же простер его́ по земли́, и на четве́ро растя́г, и всю ко́жу его́ содра́, от ногу да́же и до главы́. И посе́м ра́спят бысть, и гвоздьми́ но́зе его́ пригвозди́. И сконча́ся благодаря́ Бо́га.

А́ще кто лю́бит бра́та своего́, Бо́га люб́ит, а не любя́й бра́та, ни Бо́га не лю́бит, по апо́столу Иоа́нну. Я́ве, я́ко оскорбля́я бра́та своего́, Бо́га оскорбля́ет: «Не оскорбля́йте бо, рече́, Свята́го Ду́ха, и́мже зна́менастеся» (Ефес. 4:30). И па́ки о любви́ глаго́лет: «Поне́же еди́ному сотвори́сте сих ма́лых брат мои́х, Мне сотвори́сте» (Мф. 25: 40). И: «Елма́ же не сотвори́сте сих ма́лых еди́ному, ни Мне сотвори́сте» (Мф. 25: 45). Указа́ бо ся пре́жде рече́ными, я́ко угажда́я бра́ту своему́, Бо́га угажда́ет. Ве́дуще, бра́тие, я́ко сим Бо́гу угоди́м, да не оскорби́м ни о че́мже и́скреняго своего́, но всели́чно подви́гнемся угоди́ти бра́тии, и не да́ти вины́ и печа́льну бы́ти на ны подо́бне и неподо́бне. Да не неприя́та бу́дет моли́тва наша, яко овча́ непоро́чно. «Еди́ному, рече́, моля́щуся, а единому проклина́ющу тя, ко́его гла́са услы́шит Влады́ка» (Еккл. 34: 29), я́коже в Прему́дрости пи́сано есть. И па́ки: «Еди́н созида́ет, а други́й разаря́ет, что у́спе? То́кмо труд». (Еккл. 34: 28,30). Или́ ‐ мы́яся от мертвеца́ и па́ки прикасаяся ему́, ка́ко по́льза ему бысть от умыве́ния? Та́ко и постя́ся челове́к о гресе́ свое́м, и па́ки на той же восходя́ грех, мольбу́ его́ кто слышит? И что успе́ет в смире́нии свое́м? И приво́дит: «Не куй на дру́га своего́ зла, наде́ющагося на тя» (Еккл. 19: 10). «Из уст бо, рече́, безу́мных жезл досажде́ния, устны́ же пра́ведных храня́тся» (Притч. 14: 3). Ходя́й бо пра́ведне бои́тся Бо́га, а стропча́й путьми́ укоре́н будет. И проро́к Михе́й, воздыха́я на Изра́иля глаго́лаше: «Ко́ждо и́скреняго своего́ на зло пуща́ет, и руки своя́ нань гото́вающе» (Мих. 7:3). Апо́стол же: «А́ще брат твой скорби́т, рече́, на тя, уже́ не по любви́ хо́диши» (Рим. 14: 15). Глаго́лет же Госпо́дь: «Весь, гне́ваяйся на бра́та своего́ без ума́, пови́нен есть суду́, и́же ли рече́т бра́ту своему́: ра́ка, ре́кше неве́рие, пови́нен есть суду́, а и́же рече́т: уро́де, пови́нен есть суду́ оѓненому» (Мф. 5:22). И приво́дит: «А́ще у́бо принесе́ши дар твой ко олтарю́ и ту помяне́ши, я́ко не́что и́мать брат твой на тя, оста́ви дар твой пред олтаре́м, иди́ пре́жде, смири́ся с братом свои́м, и посе́м принесе́ши дар свой к Бо́гу» (Мф. 5:23, 24). Ами́нь.

Друзи́и бо и в затво́ры вла́зят, и да своя́ хоте́ния испо́лнят. И ту кормя́щеся а́ки сви́нии в хлеви́не пребыва́ют, и приноси́мым им ра́дующеся: и того́ ра́ди монасты́рскаго зако́на отбега́ют, не хотя́ще труди́тися, ни покори́тися игу́мену, ни могу́ще с чернцы со смире́нием ни дне пребы́ти, хотя́ще на земли́ че́стни бы́ти. И заве́ты и зако́ны своя́ даю́т жена́м, и и́споведию реша́ще, и вя́жуще несмы́сленнии, са́ми от них ча́юще разреше́ния. И е́же ненави́стное есть Бо́гу и ме́рзское высокоу́мие, то́же пребыва́ет в них. Мня́тбося вели́цы су́ще и свя́ти, вся же челове́ки ху́ждша себе́ творя́т, са́ми ся то́чию мня́ще угоди́вше Бо́гу. И ту седя́ще чужы́я до́мы стро́ят, а свои́х безу́мием отбе́гше. При́купы же и и́скупы мно́зи, и стяжа́ние сел, и ни́вы стро́ят, и про́чая у них безу́мия. Наре́чия же и кни́ги всем шлют, веля́ще уве́детися а́ще мо́щно, и на ине́х страна́х. Тако́в бо есть злохи́трый диа́вол, вся с пра́ваго пути́ совраща́ет на своя́ в́оли. Я́коже сбы́тися Дави́дову проро́честву глаго́лющему: вси уклони́шася, вку́пе неключи́ми бы́ша. Несть творя́й благо́е, несть до еди́наго. Сия́ же пи́сана бы́ша злых ра́ди, и без зако́на мяту́щихся во всех граде́х, и́же забы́вше уче́ния Па́вла апо́стола: и́же в ле́ностях чуждь хлеб яду́ще, и дни своя́ зле провожда́ют. И таковы́м, в Селу́нстей еписто́лии глаго́ля: Запреща́ю вам бра́тие, и́менем Го́спода на́шего Иису́са Христа́, отлуча́тися вам от вся́каго бра́та безчи́нно ходя́щаго, а не по преда́нию, е́же прия́ша от нас. Са́ми бо ве́сте, ка́ко ле́по есть вам подо́битися нам, я́ко не безчи́новахом в вас, ни ту́не хлеб ядо́хом у кого́ в вас: но в трудех и в по́двизех день и нощь, де́лающе своими рука́ми, я́ко не стужи́ти никому́ же от нас вам. Не я́коже не име́юще вла́сти, но са́ми себе́ о́браз даю́ще вам, я́ко подража́ти нас. Егда́ бе́хом у вас, и се запреща́хом вам, я́ко и́же кто не хо́щет де́лати, да не яст. Зане́ слы́шим у́бо н́екия ходя́ща в вас безчи́нно, ничто́же де́лающа. И таковы́м запреща́ем, и мо́лим, о Го́споде на́шем Иису́се Христе́, да с молча́нием де́лающе свой хлеб ядя́т.