Стихи́:

Землена́го вся́кого, но и в зе́млю преклони́ся,

Вита́ет Дании́л на столпе́, ны́не же на небесе́х:

В единонадеся́тый Дании́л, на столп вшед, обре́те кончи́ну.

Сий бе́яше при Льве Вели́цем цари́ от Месопота́мии Си́рския, от преде́л Самоса́тских, от ве́си Вита́ра нари́чемо, рожде́н от отца́ Илии́ и ма́тере Ма́рфы. В пя́тое же ле́то во́зраста его́ от роди́телий в не́кий монасты́рь приведе́ся. И прии́де же к Симео́ну Сто́лпнику, уже́ приспе́вшу в посте́, и от него́ благослове́н быв. По боже́ственому же открове́нию и́де во страны́ Фраки́йския, близ Византи́и, во Ана́пли, иде́же затвори́ся в це́ркви не́коей и́дольстей, и многи напасти от бесо́в подъя́т. И та́же взыде на столп, мно́го на нем пощение показа́в и терпе́ние, ва́ром со́лнечным и мра́зом и ве́треным нападе́нием и нахо́ды. И мно́га у́бо соде́лав чудеса́, я́ко прослы́тися доброде́тели его́ до Льва царя́ и и́же с ним Зино́ном, и́же и прише́дшеся и поклони́шася свято́му, и проро́чествовав им о сбы́вшихся, и святе́й це́ркви, бори́мей от ерети́к, помо́г, блаже́не и преподо́бне и непоро́чне пожи́в, ко Го́споду отъи́де.

Стихи́:

К высоте́ возведе́ Луку́ столп,

Лука́ умо́м к Бо́гу, к Нему́же востече́.

Сей бя́ше при Рома́не ста́рем царе́, и при Константи́не багряноро́днем зя́те его́, сы́не Льва прему́драго царя́. Патриа́ршествующу Феофила́кту, сыну того Рома́на царя́, от восто́к нарица́емь сын Христофо́ров, и Кали́син. Внегда́ у́бо болга́рская рать подви́жеся, тогда́ и сеѓо влеча́ше на воева́ние, повеле́ние одержа́щаго и́. Срази́вшижеся ра́ти, и неуставле́нию бы́вшу в во́ех, мно́гим ты́сящам па́дшым. То́йже Бо́жиим промышле́нием сохране́н быв. И мона́шеское житие́ восприи́м, и в поще́нии преспева́я. И поста́влен бысть презви́тер. И желе́зы себе обложи́в по всей пло́ти, и до шести́ дней постя́ся, и нико́е и́но в седмы́й день вкуша́я, то́чию приноша́емую ему́ просфо́ру, и зе́лие су́рово. И на столп вшед, и три ле́та на нем препроводи́в, и боже́ственный глас слы́шав. И призва́вшему его́ после́дствовав, по́йде ко Оли́мпу. И ка́мень во уста́ вложи́в молча́ния ра́ди: И в Царь град вшед, и отту́ду в Халкидо́н. И на столп вшед, и мно́гим чудесе́м самоде́лец быв, четы́редесять и пять лет, пребы́в на столпе́, и до́бре подви́гся ко Го́споду отъ́иде.

Стихи́:

Акепси́й, и ви́дя мя стра́ждуща мече́м,

И Аифа́ла, поревну́й, поревнова́х ти.

Си́и бяху от Перси́ды. Бя́ше Аифа́ла иере́й и́дольский. Уве́дев же ве́ру Христову, помы́сли поити́ к епи́скопу христиа́нскому, от случи́вшагося ему́ неду́га премени́тися (бя́ше бо кровоточи́в). И науче́н быв от епи́скопа ве́ре Христо́ве, к своему́ гра́ду возврати́ся, и́же Арви́л нарица́шеся: и́же и про́чим бысть благоче́стия учи́тель. И обо́лган бысть, и предста́ кня́зю. Его́же ем, и у́хо ему́ отре́зав, в темни́цу вве́рже и́. Святы́й же Акепсе́й бя́ше диа́кон: ят бысть, и Христа испове́дав, бие́н быв неми́лостивно. И по́слан бысть старе́йшиною волхво́м ко Аифа́ле. И па́ки к царю́ введе́ни бы́ша, и́же и пред ним Христа́ испове́даша, и главы́ их отсеко́ша.