Стихи́:

Евстра́тия страда́льца два́жды двою́,

Ку́пно обою́ убива́ет огнь и мечь:

И́же со Евстра́тием в трина́десятый побие́ни бы́ша святи́и.

Си́и бе́яху при Диоклитиа́не и Максимиа́не царе́ма, и при Ли́сии ду́ксе лимита́нскаго чи́на держа́щему, и Агрикола́ю все́ю еп́архиею владу́щу, испе́рва же и от пра́дед чту́щеи Христа́, кры́ющежеся стра́ха ра́ди мучи́тель и гони́тель. В си́хже святы́й Евстр́атие от Аравраки́нскаго сказова́шеся ме́ста, чи́ном сый ду́кс, и в нем бя́ше старе́йшинствуя. Вжела́я же доити́ на муче́ние, и безче́стия безве́стие вмени́в, по́яс свой не́коему от слугу́ющих положи́ти повеле́ во Аравраки́нстей це́ркви, да а́ще презви́тер Авксе́нтие по́ймет его́, то по благоизволе́нию тому́ бы́ти во Христо́ве испове́дании и дерзнове́нное не́како не неча́яти, е́же страши́тися предста́ти кня́зю и христиа́на себе́ испове́дати. А́ще ли же не презви́тер Авксе́нтие, ин не́кто от церко́внаго чи́на по́имет, во Христа́ ве́ру уже́ принести́ и́мать о́тай, и ника́ко явле́ние до́йдет.

Презви́теру же Авксе́нтию по́яс взе́мшу, восприи́м у́бо до́бре, себе́ е́же Христа́ ра́ди приити́ дерзнове́нно и Ли́сиеви предста́ти, да внегда́ свято́му, пе́рвие не́же пострада́вшу предста́ти и я́влься Ли́сию ду́ксу: и́бо бе́яше от такова́го учине́ния, пе́рваго себе́ пове́дает, и христиа́на себе́ наре́к. Тем и от мучи́теля а́бие отъима́ется ему́ по́яс, и по повеле́нию его́ обнажа́емь быва́ет, и растя́жен по земли́, и бие́н быва́ет. Та́же, у́жи свя́зан, на высоту́ возвлачи́тся, и подкла́деным огне́м опале́н быва́ет. Посе́м же со́лию со о́цтом по опале́ных удесе́х полива́ется, и чрепи́нами ре́бра его́ строга́ше. И пресла́вно чудоде́йствова, сотвори́ся здрав. И́же свята́го Евге́ния привлече́ в ве́ру, и́же и той, Христа́ испове́дав, сому́дрствовати глаго́ля Евстра́тию и такову́ю честь, и́же от о́ного что́мую, принести́ Бо́гу.

Тогда́ святы́й Евстра́тие в сапоги́ желе́зныя обуве́н бысть, и гвоздьми́ пригвозди́вше, от Севасти́йска града гони́мь, да́же и до Никопо́ля. И среди́ став святы́й Марда́рие, гони́ма и теку́ща ви́дев свята́го Евстра́тия, и в такове́м воображе́нии ублажи́ его́, я́ко Христо́ва ра́ди испове́дания и и́стинныя ве́ры в таково́ до́йде, преоби́дев бога́тство и све́тлость, от злоде́й стра́ждет хотя́й. И сове́тницу на сие́ пои́м жену́ свою́, и о́ной поспева́ющу на сицево́е страда́ние, и своя́ ча́да Бо́гу преда́в и с ма́терию их, и путе́м гони́ма свята́го Евстра́тия тек дости́же, и привяза́в себе́ к нему́.

На испыта́ние Ли́сию се́дшу, пе́рвие же свято́му Авксе́нтию главу́ отсеко́ша, именова́вшаго себе́ христиани́на. Свято́му же Марда́рию провертеша гле́зне его́, и пове́сиша стремгла́в, и рожны́ остры́ разже́ными па́зухи его́ опали́ша, и Бог дух свой преда́сть. Свято́му же Евге́нию язы́к отре́заша, и голе́ни ему́ па́лицами сокруши́ша, и в тех му́ках оста́ви дух. Святы́й же Оре́стие, и той христиа́н сый, и внегда́ хотя́ше на Евстра́тия ру́цы возложи́ти, устраши́ся, и́бо крест имя́ше на пе́рсех свои́х, и на вы́и нося́. И внегда́ гна́ша свята́го, тому́же восле́д его́ иду́щу, и а́бие воспя́ть возврати́вшуся, и извне́ всех я́влься, и Христо́ва раба́ себе́ именова́в, и ко свято́му Евстра́тию привя́зан бысть.

По́слани бы́ша о́ба Ли́сием ко Агрикола́ю, мне́вшу Ли́сию, не то́чию слове́с ра́ди свята́го Евстра́тия и му́дростною си́лою поху́лившу слу́жбу его́ и поруга́вшу, и да не, а́бие чудоде́йствовавшу, мно́гих приведе́т ко Христо́ве ве́ре. Предста́в у́бо Агрикола́ю, Евстра́тие и та́йну е́ллинскую, и пре́лесть, и блуд, и е́же от ине́х глаго́лемы му́дрости изобличи́в, - бя́ше бо наказа́нием произве́рстен, - и по Христо́ву смотре́нию произше́д, и ужаси́в мучи́теля, и сви́ток завеща́нию вручи́в святому Вла́сию епи́скопу, и на нем жития́ своего́ коне́ц начерни́вшу. Посе́м же пещь разже́гше, и в ню святы́й Евстра́тие вве́ржен бысть, и вене́ц тамо муче́нию восприи́м. Соверша́ет же ся собра́ние его́ в пресвяте́м хра́ме свята́го апо́стола и благове́стника Христо́ва Иоа́нна Богосло́ва, близ святы́я Вели́кия це́ркви.

Стихи́:

Я́ко деви́цу еди́нем венце́м венчева́ю тя, Луки́е,

И венца́ ра́ди други́й, му́ченице, прие́млеши.

Та бя́ше от Сиракуси́йскаго гра́да при Сикели́и. Обручена́ же бы́вши му́жеви. И за е́же напа́дшу неду́гу ма́тери ея́, а́бие она́ и́де в Ката́нь, помоли́тися святе́й му́ченице Ага́фии, е́же уврачева́ти кровоточе́ние ма́тере ея́. Ше́дши же в́иде во сне святу́ю Ага́фию, цельбу́ подаю́щу ма́тери ея́, и проро́чествовавши о ней, е́же о Христе́ му́чене бы́ти. Да я́коже ма́ти ея́ оздраве́вши, она́ свою́ прики́ю (бра́чный дар) ни́щым разда́, и гото́ва бя́ше ко Христо́ву испове́данию. От обру́чника же обо́лгана бы́вши, предста́ кня́зю Пасха́сию, иже повеле́ в блуди́лище ю́ отвести́, е́же осрамоще́не ей бы́ти. Пребы́сть же Хрсто́вою благода́тию сохранена́, никому́же могу́щу обрати́ти ю́ от пути́, иде́же утверди́лася бя́ше. Повеле́вше же ра́ди ея́ непреложе́ния, огнь заже́гше иде́же свят́ая стоя́ше, и опали́ти ю́: той же Бо́гом сохране́не бы́вши. Посе́м мече́м святу́ю ей главу́ отсеќоша.

Пред враты́ Константи́ня гра́да, бысть монасты́рь Оли́мп та́ко нарица́емь, в не́мже це́рковь сотворе́на святы́х му́ченик, Евстра́тия, и дружи́ны его́. Патриа́рх же от пе́рвых прии́м обы́чай, на пра́здник их приходи́ти в монасты́рь, и свой по́сох посыла́я исхожда́ше. Та́кожде и царю́ приходи́ти, и полага́ти зла́то на потр́ебу мона́хом. Уста́в бо той бе от созда́вшаго монасты́рь, ничто́же притяжа́ти мона́хом ту су́щым в монастыре́, ни виногра́да, ни се́ла, но святых преда́тися поуче́нию. Да поне́же храня́ху за́поведь предавшаго, того́ ра́ди не отступи́ша святи́и му́ченицы, пеку́щеся потребою монасты́рскою. Поне́же со искуше́нием быва́ет Божия благода́ть всем, да явя́тся упова́ющии на Бога, не́жели на бога́тство. Проразу́мник же всех и печа́льник Бог, больма́ хотя просла́вити святы́х му́ченик ме́сто, во вре́мя пра́здника их устро́и бы́ти бу́ри вели́цей с мо́ря, и дождю́ вели́ку, и сту́дени належа́щи, и никто́же от гр́ада прии́де на пра́здник святы́х му́ченик. Отпе́вше же вече́рню, и кано́н, ту су́щии мона́си, и в ско́рби бя́ху не иму́ще что вкуси́ти. И творя́ху пред ико́нами поно́с святы́м му́чеником, глаго́люще: У́тро изы́дем от ме́ста сего́ ка́мо ко́ждо потре́бных ра́ди. И я́ко бысть су́мрак, прии́де вра́тник ко игу́мену пове́дая, глагол́я: Благослови́ о́тче, да введу́ к тебе́ му́жа прише́дша от царя́ на двою́ вельблу́ду. Повеле́вшу же игу́мену, и вни́де муж све́тел зело́, глаго́ля: Царь посла́ вам бра́шно и вино́. Сотво́рше же моли́тву, и внесо́ша в пала́ту, и вкуси́ша вси от бра́шна и от вина́, а про́чее сохрани́ша. И еще́ су́щым всем на ме́сте, прии́де вра́тник пове́дая прише́дша от цари́цы. И тому́ введе́ну бы́вшу, и рече́ ко игу́мену: Се принесе́ны бы́ша ры́бы от цари́цы, и де́сять златни́ц. И еще́ сему́ глаго́лющу, прии́де вра́тник пове́дая от патриа́рха прише́дша му́жа. И тому́ введе́ну б́ывшу. И даде́ игу́мену сосу́ды церко́вныя глаго́ля: Благоволи́ патриа́рх у́тро зде служи́ти Литурги́ю. Игу́мен же рек всем о сем: Я́коже Бог восхо́щет тако и сотвори́т, вы же отъи́дете ли отсю́ду? Они́ же ре́ша: А́ще нам есть ме́сто, зде пребу́дем до у́трия. И повеле́ их ввести́ в па́перть церков́ную. Отпуща́я же я́ вопроси́ име́н их. И рече́ прише́дый пре́жде от царя́: Аз нарица́юся Авксе́нтий. А и́же от цари́цы: Евге́ния себе́ повед́а. Принесы́й же ди́скос от патриа́рха: Марда́рия себе́ нарече́. Во вре́мя же пе́ния у́тренняго внидо́ста два му́жа в це́рковь. И по пе́нии псалты́ри, рече́ игу́мен: Да почте́тся чте́ние святы́х му́ченик. И реко́ша мона́си: Оста́вим е́ нечто́мо, поне́же никто́же прии́де от гра́да на пра́здник сей. Рече́ же вше́дый муж в це́рковь к пе́нию, его́же не зна́ху: Дади́те ми кни́ги да почту́ я́. Сему́ же бы́вшу, до́йде писа́ние, иде́же рече́ся: Обуве́н бысть Евстра́тий в сапоги́ желе́зны с гвоздьми́ острыми. И воздохнув, уда́ри в помо́ст церко́вный жезло́м. Уткну́вшийся же жезл пусти́ от себе́ ве́тви, и бысть дре́во. Реко́ша же созади́ стоя́щии: Себе́ ли ра́ди сотвори́л еси́ сие́, Евстра́тие? И рече́: Ни, ма́лы суть моя́ стра́сти проти́ву Бо́жия воздая́ния. Того́ бо ра́ди бысть сие́, да не оста́нется пра́здник наш без приходя́щих от гра́да. И се ре́кшу, вси неви́дими бы́ша. Игу́мен же изше́д из це́ркве, обре́те хра́мину по́лну хле́бов, и рыб. Тщи́и же де́льви по́лны бы́ша вина́. Тогда́ возвести́ша царю́ и патриа́рху, и вси прише́дше просла́виша Бо́га о чудеси́ святы́х му́ченик. Жезл же бы́вший в дре́во, разлома́ша на благослове́ние. Мно́га же исцеле́ния в той день неду́жным бы́ша. И́хже моли́твами и мы прии́мем оставле́ние грехо́в.

Святи́и отцы́ ски́тстии проро́чествоваша о после́днем ро́де, глаго́люще: Что сотвори́хом пред Бо́гом? Отвеща́ же еди́н от них, вели́к житие́м, и́менем Исхирио́н, и рече́ им: За́поведи Бо́жия сотвори́хом де́лом. И отвеща́вше, реко́ша: А и́же по нас что сотворят́? И рече́: В пол де́ла на́шего прии́дут. И реко́ша: А и́же по них, после́днии мни́си, что сотворя́т? И глаго́ла им: Не и́мут ти́и отъину́д де́ла мни́шескаго сотвори́ти. Приити́ же и́мут на ня напа́сти, и обре́тшеся в напа́стех, и до́блествено претерпе́вше страсть, я́ко зла́то искуше́но, бо́льши нас и оте́ц на́ших обря́щутся пред Бо́гом. Бо́гу на́шему сла́ва, н́ыне и при́сно и во ве́ки веко́в. Ами́нь.