Стихи́:

Елевфе́рие, я́ко непорабоще́н ум естество́м,

Ме́чеви сматря́я, не порабо́тив себе́ льсти,

И́мже Елевфе́рие в пятьна́десятый мече́м у́мре.

Сий бя́ше от гра́да Ри́мскаго, зело́ юн во́зрастом от отца́ осире́в, ма́терь же то́чию име́я, и́менем Анфи́ю, я́же и Христо́ве ве́ре святы́м Па́влом науче́на бы́вши. И приведе́н бысть сын ея́, святы́й Елевфе́рий, ко епи́скопу Аники́те, и от него святы́м кни́гам науче́н бысть, и ко кли́рическому чи́ну приобща́ется. И пятымна́десятым ле́том поста́влен бывает диа́коном, и во осмона́десятое ле́то поста́влен бысть презви́тером, и в двадеся́тое ле́то епи́скоп вруче́н бысть Илири́ческий, пе́рвее соде́лавшу чудеса́.

И зане́же и мно́гих ко Христо́ве ве́ре обрати́, призыва́ет его́ Андреа́н царь. И Христа́ пред ним испове́да. Повеле́ положи́ти его́ на одре́ ме́дяне и жера́ток о́гненый под ним подсыпа́ти, та́же положи́ти его́ на сковраду́, и абие в коно́б, врющь ма́слом и ло́ем и смоло́ю, вве́ржен. Бо́жиею же благода́тию и си́лою от обою́ сохране́н бысть невреди́мь. Таже угото́вльше пещь с сове́том епа́рха Коревора, иму́ще по по́ду стре́льная желе́за о́стра. Во́ньже той сам Корево́р, пресла́вно испо́лнься Ду́ха Свята́го и Христа́ Бо́га И́стиннаго быти испове́дав, и вни́де в пещь, и изы́де невреже́н. Отсеко́ша главу́ ему́.

Святы́й же Елевфе́рие вве́ржен бысть в пещь, и пла́мени уга́сшу, изы́де цел и в темни́цу его́ вверго́ша. Та́же привя́зан бысть к колесе́м, и жрецы́ хотя влачимь бы́ти, а́нгелом отреше́н бысть и на го́ру высоку́ поставлен, иде́же бя́ше с ди́виими скоты́ пребыва́я, скоты же кроти́ми бя́ху Бо́жиими словесы́, тому́ к ним веща́ющу. Таже иже по́слани бя́ху во́ини, е́же я́ти его́, святы́й же, поучи́в, и крести́ с ни́миже я́ко и други́х до пятисо́т, ве́ровавших во Христа́. Приведе́н же быв святы́й к царю́ и звере́м вдан, и цел сохрани́ся, и двема́ во́инома убие́н бысть повеле́нием царе́вым.

Ма́тери же его́ Анфи́и обие́мши сыно́внее те́ло ме́ртво и целу́ющи, мече́м и та убие́на бысть. Соверша́ет же ся собо́р муче́ния его́ близ Клилоро́фа.

Стихи́:

Кувикула́рие ны́не мече́м,

Раб явля́ется Твои́м рабо́м сокрове́нным, Спа́се:

Елевфе́рие в пятна́десятый у́мер, сконча́ся.

Сей в Византи́и имя́ше оте́чество, и правосла́вием блиста́яся. В ца́рских же дво́рех воспита́н быв, та́може и пе́рвейшую честь восприи́м: бога́тством и сла́вою всех в таково́е вре́мя пре́йде. Но раче́нием боже́ственным, нетле́нная и ве́чная помяну́в, вся землена́я нивочто́же вмени́. Во дво́рех Госпо́дних помета́ти себе́ и пребыва́ти изво́ли, не́жели в селе́ниих гре́шничих. К Богу у́бо о́ко у́мное вы́ну простира́я: и бя́ше по вся дни в пе́снех упражня́я себе́, и вся́кую доброде́тель содержа́. Сицева́я же ви́де душерастли́тель враг нетерпе́, показа́в неберца́ла раба́ [его́] блаже́ннаго, е́же ити́ и оболга́ти к царю́ своего́ господи́на. И́бо я́коже не́который прему́др рече́: Раб, враг господи́ну своему́. То́йже прише́д к царю́ глаго́ла: Я́ко господи́н мой, к боже́ственей ба́ни приступи́в, и це́рковь сотвори́в, и распя́тому ве́ровав, и ца́рским у́зам руга́ется. И о́бразы приложи́л есть мно́жайшыя, слу́жбы христиа́нскому Бо́гу прино́сит, посто́м, и слеза́ми, и до́лу лега́нием те́ло свое́ друча́. И сицева́я на своего́ господи́на рабу́ пове́давшу. Царь же я́ростию разже́ся, и свята́го призва́в, ему́же и предста́вшу, ми́рная к нему́ бесе́довав, рече́: Ка́ко нас оста́вив Елевфе́рие, в толи́ко вре́мя отше́л еси́, на́шу любо́вь преоби́дев дворо́в ца́рских, и к тебе моему́ прилежа́нию? Святы́й же рече́: Разли́чными неду́ги, о́ царю́, плоть нося́, ко дручи́му дея́нию изво́лих. И рече́ царь: Что же еди́н то́чию благовозду́шие приимова́яй бя́ше, и́же от того́ благи́ми пита́емь еси: мы же не и́мамы ли спита́тися прише́дше? Блаже́нному же ни весма́ к сим внуши́вшу, а́бие к ве́черу Сага́рь преше́д идя́ше. Иде́же вита́лище имя́ше, и закры́в сокрове́нная врата́ своя́. Святы́й же ви́де во сне я́ко в студенце́ про́пасть ве́лию я́вльшуюся: в ню же низше́д, це́рковь красну́ изобре́т. И содрогну́вся о виде́нии, па́ки к царю́ шед. И царь ласка́ти того́ наче́н глаго́лы льсти́выми, окуша́яся преврати́ти блаже́ннаго твердоу́мие. Но я́ко возду́х бия преврати́ти не возмо́же, мече́м главу ему́ отсещи́ повелева́ет: честно́е же те́ло его́ псом, и пти́цам на снедь поврещи́. И та́ко блаже́нному ду́шу свою́ Бо́гови преда́вшу, и телеси́ его́ небрего́му лежа́щу. И не́который от боголюбе́зных и благочести́вых христиа́н, свяще́нническим чи́ном укра́шен, ми́ром пома́зав, и покади́в сие́ досто́йно те́ло, прии́м же, и в наро́читем ме́сте отпе́в положи́.

Сей бысть ро́дом ри́млянин, и егда́ бе юн, бе́яше изво́зник. Еди́ною же и́де со мски во Иерихо́н, и ту обита́ в гости́ннице. И се бе де́тищь мал, пад под мски его́, не ве́дущу же Па́рду, и от де́йства диа́воля распра́ мска де́тища, и у́мре. Опеча́лися же о сем Пард вельми́, и отше́д во Арио́н го́ру, и постри́гся, и ту рыда́ше при́сно глаго́ля: Я́ко аз сотвори́х разбо́й де́тищу, и я́ко уби́йца и́мам осужде́н бы́ти на суде́. Бе же ту близ в суходо́лии лев, и всегда́ оте́ц Пард хожда́ше на ло́же ко льву, ты́кая и трясы́й льва, да бы воста́л и изъя́л и́: лев же ника́коже вреди́ его́. Тогда́ ста́рец ви́дев, я́ко без успе́ха быва́ет де́ло его́, глаго́лав себе́: да ля́гу спа́ти на пути́ льва, да мимоходя́щу ему́ на реку́ воды́ пи́ти, и ви́дев изъя́ст мя, да бых в бу́дущий век не шел в му́ку, за уби́йство де́тища. И я́коже рече́ ля́же, и совле́к ри́зы своя́, положи́ я́ на пути́. И се с по́ля иды́й лев, и я́ко челове́к со вся́ким молча́нием прескочи́ ста́рца, и ничи́мже прикосну́ся ему́. Тогда́ ста́рец извести́, я́ко прости́ его́ Госпо́дь греха́ того́. И па́ки прише́д в пребыва́ние свое́, и пребы́сть вся ле́та своя́, всем пове́дая до уме́ртвия своего́, я́ко бе муж благ о всем.

И́же а́ще сотвори́ши грех де́ля, се ти есть упова́ние, и се обря́щеши в час беды́ исхо́дныя. Возненави́ди словеса́ его́ све́та, да у́зрит се́рдце твое́ Бо́га. Возлюби́ моли́тву твори́ти ча́сто, да просвети́тся се́рдце твое́. Не возлюби много ясти, и не бу́дет ти оскверне́но се́рдце твое́. Сохрани́ язы́к свой, да всели́тся в тя страх Бо́жий. Потщи́ся ко свое́й слу́жбе, к моли́тве и пе́нию, да не изъядя́т тебе́ мы́слении зве́рии. Кре́пко се́рдце име́й на помышле́ние твое́, обле́гчат ти ся. Не име́й вражды́ с челове́ком, да прия́та ти бу́дет моли́тва. Смири́ся со все́ми, да дерзнове́ние и́маши моли́тися. Сохрани́ свои́ о́чи, да сохрани́тся вну́трений ти челове́к. Сохрани́ си слу́ха, да не от себе́ собере́ши бра́ни. Де́лай де́ло ручно́е, да обря́щеши свой хлеб. Не внима́й к поко́ю: до́лжен еси́ в телеси́. Е́же смеша́ти словеса́ своя́ с просты́ми словесы́, смути́т ти кре́пость. Возлю́блене, да сотвори́м село́ себе́ в слеза́х: се́юще слеза́ми, ра́достию по́жнут. Бо́гу на́шему сла́ва всегда́, ны́не и при́сно и во ве́ки веко́в. Ами́нь.