Стихи́:

Севастиан преле́стныя льсти преоби́дев,

Бие́н быва́ет по те́лу:

В осемьна́десятый Севастиа́н па́лицами бие́н.

Зои́с к высоте́ главу́ уя́звену

Ды́мом лю́тым прие́млет кончи́ну жития́.

Ей, напа́днета на мя зело́ ча́стым ка́мением:

От се́рдца Тракели́н взыва́ше.

Е́же о Кла́вдии зде учине́но:

И́хже глубина́ поне́же пожре́, не́бо прино́сит.

Тиву́ртиеву отсеца́ют главу́ честну́ю:

И Ты Бог мой, вопию́щу, о Бо́жие Сло́во.

Касту́ла влеча́ху в поги́бельную про́пасть,

Да я́ко нестерпе́, в землены́й ров вве́ржен бысть.

Вра́жиими прободе́н[и] ко́пии в сердца́,

Прину́ждени ко́пии, Ма́рко и Маркели́н.

В тех убо святы́й Севастиа́н в боля́рстем сове́те бя́ше, при цари́ Диоклитиа́не и Максимиа́не, от гра́да Медиола́на, мно́гих ко Христо́ве ве́ре приводя́. Маркели́н же и Ма́рко, самобра́тцы, мно́гое претерпе́вше муче́ние, и ве́щьми обложе́ни, и посе́чени бы́ша. И си́хже оте́ц Маркели́н, е́ллин сый, Марка́я ма́ти, вма́ле пла́чущим, и напа́даху на них, е́же пострада́ти Христа́ ра́ди. Но а́ще и сие́ хотя́ше бы́ти, то́чию Севастиа́н присновоспомина́емый, укроти́в и умоли́в, не то́чию сих утверди́в, но и Тракели́на ко Христо́ве ве́ре привлече́. И а́бие Тракели́н поучи́в и огласи́в епа́рха ве́ровавша.

И а́бие у́бо епа́рх, призва́в блаже́наго и сла́внаго Севастиа́на и Полика́рпа презви́тера, и моля́ше их, е́же спасе́ние получи́ти и от обдержа́ща недуга премени́тися. И́же и цел бысть, ве́рова во Христа́ единоду́шно, и́же и в дому́ его́ и́долы сокруши́, и крести́ся. Блаже́ный же Га́й епи́скоп Маркели́на же и Ма́рка самобра́тца в диа́коньсте чи́не учини́, си́хже отца́ Тракели́на в презви́терский сан, блаже́ннаго же Севастиа́на свободи́теля церко́внаго поста́ви.

Подви́гшу же ся гоне́нию, с ни́ми Никостра́т, Кла́вдие, Ка́стор, Тиву́ртие, Касту́л и Зои́с, зане́же я́ти бы́ша, и коне́ц житию́ восприя́ша. Святы́й же Севасти́ан Диоклитиа́ном зван бысть и вопроше́н, и Христа́ испове́да, стре́лами ча́стыми состре́лян быв, и па́лицами те́ло его́ сокруши́ша, и на ча́сти ссече́н, и дух свой Бо́гу преда́сть.

В ца́рство Иусти́на но́ваго, Тиве́рия, и Марвики́я, бе той святы́й Флор. Имяше отца́ Фло́ра, та́коже нарица́емаго, и мать и́менем Евфи́мию. Научи́ста же его роди́телие кни́гам е́ллинским. Посе́м стражь ца́рский: та́же и патрики́й. И пои́м жену́, и прижи́ де́ти. Уме́рши же жене́ его́ и де́тем, от о́спныя боле́зни, сам же сжа́ли си, и вину́ обре́те, да спас́ется. И отъиде во и́но ме́сто от стяжа́ния своего́, и се́де ту во Ана́пле. И посе́м доброде́тели его́ ра́ди, епи́скоп поста́влен бысть во Амии́се. И до́бре пору́ченное ему́ соблю́д ста́до. И научи́ лю́ди правове́рней ве́ре, и до́бре твори́ти Бо́жию во́лю, и храни́ти за́поведи Его́, и у́спе о Го́споде.

Стихи́:

Не конца́ прие́млеши Михаи́ле стра́ннаго сего́,

Но у́мер живе́ши, и животу́ досто́ин.

Той бя́ше от гра́да Иерусали́мскаго, благочести́вых роди́телей сын быв. И изве́дев у́бо соверше́нне е́ллинския прему́дрости, и на́ша до́бре изучи́в, и и́ноческое житие́ восприи́м. Уме́ршу же отцу́ его́. Ма́тери же со сво́ими дще́рьми в не́котором монастыре́ постри́гшися. До́бре же у́бо, и боголюбе́зне вели́кий Михаил жи́тельствуя: и же́стоким житие́м себе́ обложи́в, презви́терскому сподобля́ется чи́ну. Таже в верте́п вни́де. К нему́же Фео́дор и Феофа́н испове́дницы и филосо́фи прихожда́ста. Та́же блаже́нный Михаи́л от иерусали́мскаго епи́скопа, сигге́л поста́влен бысть. Боже́ственнии же отцы́, Фео́дор и Феофа́н, самобра́тнии су́щии, свяще́нницы и служи́телие бы́ста. Не́когда же у́бо при́тче ну́жней належа́щей в Ри́мстем гра́де от ерети́к. И по умоле́нию ри́мскаго па́пы, от патриа́рха Фомы́ Иерусали́мскаго по́слани бы́ша в Рим, е́же искорени́ти ерети́ческое уче́ние, и утверди́ти пра́вую ве́ру, по преда́нию собо́ров святы́х оте́ц, зане́ е́реси уже́ бы́вшей вели́цей в Ри́ме, не то́кмо в та́йне, но и я́ве. Они́ же а́бие пути́ каса́хуся, и не поше́дше в Рим, но в Константи́нь град ити́ устреми́шася, обличи́ти царя́ Фео́фила иконобо́рца: зане зе́льне гоня́ на Це́рковь Бо́жию, па́че же ико́ннаго поклоне́ния до конца́ отве́ржеся. И пр́едани бы́ста от него́ руга́нию: си́речь, повеле́ ли́ца их начерта́ти разжже́нными желе́зными дски с руга́тельными словесы́. Преподо́бнии же они́ и пресла́внии отцы́, я́ко тве́рдии адама́нти, отню́д сего́ не убоя́шася, ниже́ усумне́шася. И повеле́ннаго царе́м не сотвори́ша, и проти́ву его́ му́жески ста́ша о благоче́стии. И по́сланныя при́тча от патриа́рха царю́ не пода́ша, но ну́ждею у них взя́та бы́ша. Мно́гая же уче́ния о правосла́вней ве́ре простро́ша, и супроти́вныя глаго́лы к царю́ веща́ху, сего́ ра́ди во изгна́ние осужде́ни бы́ша, от мучи́теля. Блаже́ннаго же у́бо Михаи́ла со ученико́м его́, и бра́том И́овом, повеле́ в прето́р затвори́ти: в не́мже и вери́ги тя́жки на вы́ю его́ возложи́ти, и в не́который монасты́рь Паусиа́дский ку́пно со ученико́м И́овом посыла́ется. Тем и от мно́гаго озлобле́ния, течения слез из о́чию пуща́ше: и погорбле́ние с про́чим те́лом пострада́в, непоколеби́мь же тве́рдый пребы́сть. Егда́ же Феодо́ра и Михаи́л, ца́рствие восприя́ста, и святы́х воображе́ния вся́ко со дерзнове́нием почита́ста. И и́же во изгна́нии су́щии призыв́аеми бя́ху, и че́сти такове́й же сподобля́еми бе́яху. И патриа́ршеское достоя́ние вели́кий сей испове́дник, цари́цею моли́мь бя́ше восприя́ти, и не восхот́е. И присновоспомина́емый вели́кий Мефо́дий, патриа́рх поста́влен бысть. Сей же Михаи́л сигге́л быв: и вели́каго хра́ма все, в свою́ власть приве́д, поко́й восприе́млет. Благочестно же и богоуго́дно поживе́ про́чих лет, о́смьдесять и пять. И во осмьнадеся́тый, деке́мврия ме́сяца, с ми́ром ко Го́споду отъи́де: и ны́не почива́ет во святы́х, и со всеми пра́ведными весели́тся.