Чтение на день: Декабрь, 19 число (старый стиль)
По шестой песни:
И поется кондак и икос (или мученичен, аще несть).Стихи́:
Ища́ Вонифа́тие ко́сти му́ченическия,
И себе́ приобре́те му́ченика, посе́чен мече́м:
В девятьна́десятый Вонифа́тие посе́чен.
Сей бя́ше в ца́рство Диоклитиа́ново, раб жены́ не́кия боля́рыни, дще́ре Ака́кия анфипа́та ри́мскаго, и́же сочет́ася с госпоже́ю свое́ю Бя́ше и пия́ница, но ми́лостив, и страннолюби́в, и тре́бующим вожделе́нно изоби́льствуя, и кра́молы и напа́сти челове́ческия теша́ . Та́коже и госпожа́ его́, ми́лостива и человеколю́бица. Во еди́н у́бо от дний рече́ Вонифа́тию госпожа́ его́: Поиди́ к восто́ку, иде́же му́чатся святи́и, и принеси́ нам мо́щи святы́х, да и́мамы и сих на по́мощь и на спасе́ние душе́вное. Вонифа́тие же засмея́вся рече: Да а́ще принесу́т мое́ те́ло, прии́меши ли е́? Она́ же засмея́вшися, и пия́ницу того́ наре́кши, та́же наказа́вши его́, и моли́твовавши, и отсла́.
И отше́д со обоимина́десяте в Килики́ю со мно́гим зла́том, иде́же святи́и му́ченицы бяху. И шед, ста пред иге́моном, и испове́да себе́ христиани́на. Ят бысть и разли́чно му́чен: отсеко́ша главу́ его́: и млеку́ вме́сто кро́ви истекши.
И прие́мши же дружи́на его́, и принесо́ша госпожи́ свое́й. Она́ же с ра́достию прии́мши, и мно́го соверше́не поче́тши, положи́ его́ в дому́ свое́м, созда́вши це́рковь во и́мя его́. Она́ же от тогда́ преподо́бне пожи́вши и богоуго́дне, с ми́ром Го́сподеви дух свой преда́сть.
В то́йже день святы́х му́ченик, Илии́, и Про́ва, А́риса
Стихи́:
Страда́льным мече́м главе́ отсе́чене я́ве наско́ре,
Про́ву же му́ченику и Илии́,
А́рис стяжа́в ко огню́ и́стинный глас,
Трисмы́слено ору́жия принося́.
Си́и бя́ху еги́птяне ро́дом, и христиа́ны ве́рою. Ре́вность же иму́ще Бо́жию, ходя́ще в темницы, и посеща́ху стра́ждущих по Христе́ святы́х му́ченик, и исцеля́ху я́ от ран, Идо́ша же в страну́ Килики́йскую, и хотя́ще вни́ти во Аскало́н град, я́ти бы́ша во врате́х от страже́в, от пога́ных муже́й и ди́виих. Мня́ху бо я́ разсо́чники су́ща. И пре́дани бы́ша кня́зю Фирмилиа́ну. И я́ко предста́ша ему́, и вопроше́ни бы́вше, христиа́ны себе́ испове́даху, и му́чени бы́ша кре́пко. А́рис же пе́рвее безчи́сленными му́ками му́чен бысть, последи́ же огне́м сожже́н бысть. Святы́й же Пров и той истя́зан бысть, и Христа́ не отве́ржеся, и усе́чен бысть. Посе́м же святы́й Илия́ мно́го му́чен быв, и мече́м главу́ его́ отсеко́ша.
В то́йже день святы́х му́ченик Полие́вкта и Тимофе́я
Стихи́:
Тимофе́я же, огне́м сожже́наго,
Где положи́м, получи́вшего всечестну́ю кончи́ну?
Тебе́, Полие́вкте, Кеса́рия творя́щи коне́ц,
Огнь мимоше́д, обре́л еси́ благоста́точную кончи́ну.
В сих у́бо святы́й Тимофе́й, ят бысть и испове́дав Христа́. По мно́гих же му́ках в Маврита́нии огне́м сконча́ся. Полие́вкт же му́ками разли́чными томле́н быв, и той в Кеса́рии во огнь вве́ржен быв, и коне́ц прия́т.
В то́йже день сло́во о покая́нии
Блу́днаго сы́на подража́й, е́же припади́ к Бо́гу сокруше́ным се́рдцем и ду́хом смире́ным. Глаго́ли: «Согреши́х пред Тобо́ю, приими́ мя, О́тче, ка́ющася». И па́дания оста́нися, и грех гнуша́йся. А́ще бо обрати́шися пред Бо́гом и дале́че сотвори́ши от жития́ твоего́ непра́ведное, и бу́дет помо́щник Вседержи́тель Бог, Ему́же сла́ва, ны́не и при́сно, и во ве́ки веко́в. Ами́нь.