Стихи́:

Иулиани́и просвеще́ние мечь,

Я́ко исхода́тайствующу ей вене́ц све́тлый:

Посече́ние в два́десять пе́рвый Иулиани́я восприе́млет.

Та бе́яше при Максимиа́не цари́, бога́тых роди́телей дщи су́щи, и от них обручена́ бы́вши Елесви́ю не́коему сигкли́тику. Ему́же мы́слящу брак сотвори́ти, и не восхоте́ его́ свята́я, но пе́рвие ей ре́кши: А́ще не бу́дет в сей ве́си епа́рх, не поиму́ его́. И поста́влен бысть епа́рхом. Пото́м па́ки к самому́ рече́: А́ще не от и́дольския льсти отврати́шися и слу́жбы их, и к вере́ христиа́нстей при́идеши, бра́чнаго приобще́ния не рачу́. Он же отцу́ ея́ сия́ изрече́. Не возмо́гшу же отцу́ ея́ от Христо́вы веры ту преложи́ти, самому́ обру́ченику и епа́рху преда́сть ея́ в зако́нное испыта́ние. Он же совле́к ту́ю, и жи́лами суро́выми шестию́ во́ин бив ю́, и за власы́ ту пов́есив, я́ко да отто́ргнется ей ко́жа главна́я и желе́зы ражже́ными соже́г ю́, и во огнь вве́рже. И я́ко ви́дев ю́ от сих всех невреди́му пребы́вшу, и паче мно́жество лю́дий, му́жий и жен, ко Христо́ве ве́ре приве́дши, и́мже и главы́ их отсеко́ша, последи́ же и святу́ю повеле́ мече́м сконча́ти. Соверша́ет же ся собра́ние ея́ близ святы́я Евфи́мии в Пе́трии.

Стихи́:

И́же от желе́зных о́стрых гво́здий вонзе́ния,

Я́ко не́которое желе́зо терпи́ши, Фемистокле́е.

Сей бя́ше в ца́рство Деки́ево, от Мир Лики́йских. Па́стырь сый овца́м. Кня́зю у́бо гоне́ние на христиа́ны подви́гшу, и свята́го Диоскори́да и́щущу, ему́же в го́ры бежа́вшу. И́щущии же его́, обрето́ша Фемистокле́я, пасуща о́вцы: и вопросиша его́ о Диоскори́де, и той его́ не объяви́. Рек же сие: Несть зде никого́же. Себе́ же преда́в, и испове́да себе́ христиани́на и Христа́ пред ни́ми испове́дав. Асклипи́ю же кня́зю повеле́вшу его́ би́ти, и бие́н бысть по чре́ву, доне́леже просе́деся чре́во его́. И на дре́ве пове́шен бысть. Та́же по желе́зех о́стрых влачи́мь быв, и́миже все те́ло его́ сбоде́но и сре́зано бысть, Бо́гу дух предаде́.

Брат еди́н отре́кшихся проста́го жития́, и изда́в все име́ние свое́ ни́щим, удержа́в же ма́ло в слу́жбу свою́, и́де к ста́рцу Анто́нию. И се уве́дав ста́рец, рече́ ему́: «А́ще хо́щеши мних бы́ти, иди́ в сию́ весь, и купи́ мя́са, и возложи́ я́ на те́ло свое́ на́го, и та́ко прииди́ се́мо». Сотво́ршу же бра́ту та́ко, пси и пти́цы растерза́ху ему́ те́ло. Прише́дшу же ему́ к ста́рцу, вопроси́ его́, а́ще бысть ему, я́ко завеща́. О́ному же показа́ющу те́ло расте́рзано, рече́ святы́й Анто́ний: «Отре́кшихся проста́го жития́ и хотя́щим име́ти име́ние, та́ко от де́мон расте́рзани бу́дут борю́щиися».

Сей у́бо блаже́нный Петр, роди́ся от христиа́ну, и благогове́йну роди́телю, во еди́ном от мест земли́ Волы́нския. Прилучи́жеся не́что сицево́, и пре́жде рожде́ния его́, е́же не досто́ит молча́нию преда́ти. Еще́ бо ему́ су́щу во утро́бе ма́терни, во еди́ну от но́щей света́ющи дню неде́льну, ви́де виде́ние ма́ти его́: мня́шеся бо ей а́гнца держа́ти на рука́х свои́х. Посреде́ же рог его́ дре́во благоли́ствено изра́стшо, и мно́гими цве́ты же и плоды́ обложено́. И посреде́ ве́твей его́, мно́ги свещы́ светя́ща, и благоуха́ния исходя́ща. И возбуди́вшися недоуме́яшеся, что сие́, или́ что коне́ц таково́му виде́нию. Пове́да же и му́жу своему́. Он же не домышля́шеся о виде́нии. И а́бие пома́ле роди́ся и́ма отроча́. Но коне́ц последи́ со удивле́нием яви́ся о нем. И приспе́вшу седмо́му ле́ту, вдан быва́ет о́трок роди́телема свои́ма кни́гам учи́тися. И ко́сно уча́щуся ему́, нема́ла печа́ль бя́ше роди́телем его́ о сем. И па́ки же о́трок ви́де во сне не́коего му́жа, во святи́тельских оде́ждах прише́дша, ста́вша над ним, и глаго́лавша: Отве́рзи ча́до уста́ твоя́. О́трок же отве́рз уста́. Святи́тель же косну́ся язы́ку его́, и благослови́ о́трока, и отъи́де. И я́коже не́коею сла́достию налия́ся горта́нь его́. Отроку же возбуди́вшуся, и никого́же ви́девшу. И от того́ часа ели́ко ему́ учи́тель написова́ше, о́трок же вско́ре изуча́ше. И в ма́ле вре́мени всех све́рстник свои́х превзы́де. И бысть у́бо святы́й два́десяти лет, и отъи́де к предлежа́щей та́мо пусты́ни, во еди́н от монастыре́й. И та́мо прия́т а́нгельский о́браз, и вся слу́жбы монсты́рския та́мо проше́д: и бра́тиям мы́яше власяни́цы. В зиме же и ле́те пра́вила своего́, ни ма́ло оставля́ше: и пе́рвие всех обрета́шеся на церко́внем пра́виле, и последи́ исхожда́ше. Посе́м же проразсужде́нием настоя́теля оби́тели, поста́влен быв́ает диа́коном. Пото́м же и презви́тером. И а́бие повеле́нием наста́вника, ико́нному худо́жеству вско́ре навы́че блаже́нный Петр, ико́ны писа́ше, и отдава́ше наста́внику своему́. Наста́вник же раздав́аше бра́тии, и ины́м христолюби́вым лю́дем, приходя́щым в монасты́рь благослове́ния ра́ди. Посе́м же проразсужде́нием наста́вника своего́, обре́те ме́сто пусты́нно на реце́ зово́мой Ра́та. И ту святы́й це́рковь воздви́же, во и́мя Го́спода Бо́га и Спа́са на́шего Иису́са Христа́: и монасты́рь соста́ви, и бра́тий мно́жество собрашася к нему. Святы́й же всех наказу́я, и печа́шеся ими яко чадолюбивый отец. Та́коже и кня́зем, и вельмо́жами знаемь бе и чтимь, земли́ Волы́нския. Посе́м же у́бо Макси́м архиепи́скоп от жития́ отъи́де, и положено́ бысть те́ло его́, в преимени́том гра́де Влади́мире, в це́ркви Святы́я Богоро́дицы. В то же вре́мя не́кто Геро́нтий игу́мен, самочи́нием восхи́ти сан святи́тельский, и отъи́де к Царю́ гра́ду к патриа́рху, и не получи́ ча́емаго. И а́бие князь и вельмо́жи, Волы́нския земли́ моли́ша свята́го Петра́, да и́дет к патриа́рху Царегра́дскому. Святы́й же умоле́н быва́ет, от кня́зя и от вельмо́ж, и от свяще́ннаго собо́ра, и отъи́де в корабль. И в ма́ле вре́мени дости́же Царя́ гра́да, и прия́т бысть че́стно от патриа́рха Афана́сия, и освяще́н бысть митрополи́том на престо́л Росси́йския земли́. И посе́м святы́й прии́де неме́дленно на свой престо́л, мир и благослове́ние всем дав. И нача́т учи́ти без ле́ности, Бо́гом поруче́нное ему́ ста́до, проходя́ от ме́ста до ме́ста. Посе́м не́кий епи́скоп Тверска́го преде́ла, и́менем Андре́й, наважде́нием вра́жиим сплета́ет на свята́го, ло́жная и ху́льная словеса́. И по́сле в ца́рствующий град, к святе́йшему Афана́сию патриа́рху. Патриа́рх же удиви́ся, и неве́рна вмени́ оболга́ния епи́скопля на свята́го. И писа́ние написа́ к свято́му Петру́ патриа́рх, и посла́ с кли́риком свои́м. Кли́рик же прии́м, и Росси́йския земли́ достиже. И собо́р собра́ся во гра́де Переясла́вле, о лжи́вом клевета́нии на свята́го. Епи́скоп же и́же оклевета́вый свята́го, пред все́ми посра́млен бысть, и уничиже́н. И па́ки еретика́ Сеи́та препре́, и́же чу́жда бы́вша Це́ркве Христо́вы, и прокля́тию преда́. Посе́м же прии́де святы́й в приснослову́щий град Москву́, еще́ ему́ ма́лу су́щу, и не многонаро́дну. В том же гра́де бя́ше князь Ио́анн, сын вели́каго кня́зя Дании́ла, внук блаже́ннаго и вели́каго кня́зя Алекса́ндра Не́вскаго. Его́же ви́дев святи́тель Христо́в Петр в правосла́вии сия́юща, и во всех до́брых де́лех цвету́ща, зело́ возлюби́ его святы́й. И нача́т бо́льши ине́х мест жи́ти святы́й в том граде. И посе́м святы́й повелева́ет кня́зю це́рковь ка́менну воздви́гнути, во и́мя Святы́я Богоро́дицы. И проро́чески рече́ кня́зю: А́ще мене́ сы́не послу́шаеши, и храм Пресвяты́я Богоро́дицы воздви́гнеши во свое́м гра́де, сам просла́вишися па́че ине́х князе́й, и сы́нове и вну́цы твои́ в род и род, и град сей сла́вен бу́дет во всех гра́дех Росси́йских. И святи́тели поживу́т в нем: и взы́дут руки́ его́ на плещу́ враг его, и просла́вится Бог в нем. Еще́ же и мои́ ко́сти положены́ бу́дут. И я́коже князь слы́шав та словеса́ от свята́го, и повеле́ це́рковь основа́ти. И сам прилежа́ святы́й о це́ркве, це́ркви же соверша́ющися. Святы́й же проуве́де смерть свою́ Бо́жиим открове́нием, и нача́ себе́ гроб де́лати свои́ма рука́ма, близ свята́го же́ртвеника. И по соверше́нии гро́ба своего́, па́ки ви́де виде́ние, е́же от жития́ сего́ отъити́ к Бо́гу. И весь святы́й ра́дости испо́лнися. И дню бы́вшу, сам вни́де в це́рковь, и боже́ственную Литурги́ю соверша́ет. Помоли́вся о правосла́вных царе́х и князе́х, и о свое́м сы́не благочести́вом кня́зе Иоа́нне, и за все благочести́вое христиа́нское мно́жество, всея́ Росси́йския земли́, и о уме́рших такоже воспомина́ние сотвори́: и святы́м Та́йнам причасти́вся. Посем изыде из це́ркве, и призва́ весь при́чет церко́вный, и дово́льно поучив их, я́коже обы́чай бя́ше ему́ твори́ти. И от того́ часа́ не преста ми́лостыню твори́ти, всем приходя́щым к нему́ убо́гим. Такоже и це́рквам и монастыре́м, и иере́ом. И коне́чное свое́ уве́де, е́же от ми́ра отхожде́ние, и призва́ к себе́ Прота́сия, его́же князь старе́йшиною поста́ви гра́дским: кня́зю бо не прилучи́вшуся во гра́де. Рече́ Прота́сию: Се оставля́ю сы́ну моему́ кня́зю Иоа́нну мир и благослове́ние, и ми́лость от Бо́га, и се́мени его́ до ве́ка, и аз отхожду́ от жития́ сего́. И мно́го поучи́в его́ святый, и даде́ ему́ влага́лище, и завеща́ истощи́ти на церко́вное соверше́ние. И а́бие всем вку́пе мир дав. И нач́а вече́рню пе́ти. Еще́ бо су́щи моли́тве во усте́х его́, и сам ру́це возде́в на не́бо, предаде́ ду́шу свою́ в ру́це Бо́жии. В то же вре́мя кня́зю приспе́вшу со все́ми вельмо́жами свои́ми во град, и скорбя́ше о лише́нии отца́. Посе́м положи́ша свята́го те́ло на одре́, и к це́ркви понесо́ша, я́коже обы́чай есть ме́ртвым. И челове́к не́кий прии́де посреде́ о́ного наро́да, неве́рием одержи́мь ко свято́му. И ви́де свята́го на одр́е седя́ща, и по обою́ страну́ наро́д благословля́юща, и кня́зя. И одр у́бо с мощьми́ святаѓо прине́сше ко гро́бу, и́же сам созда́ свои́ма рука́ма. И положи́ша тело свята́го отца́ в нем, ме́сяца деке́мврия в два́десять пе́рвый день, иде́же и ны́не лежи́т, чудеса́ разли́чная точа́щи, в сла́ву Христо́ву и до сего́ дне, с ве́рою приходя́щым.