Стихи́:

Анастаси́я цельба́ ве́рным вели́ка,

Вся́ку я́зю реша́щи ражде́гшуюся:

Сожжена́ бысть Анастаси́я огне́м в два́десять вторы́й.

Свята́я му́ченица Анастаси́я бе́яше при Диоклитиа́не цари́ во гра́де Ри́мстем, Препекса́та не́коего дщи, ма́тере же Фа́всты. Ею́же прии́мши ма́ти, и приведе́ Фрисого́ну, му́жу благочести́вы, от него́же науче́на бы́вши священным кни́гам, Христо́ве же вере свое́ю ма́терию научи́вшися. И сопряже́на бы́вши е́ллину ко бра́чному приобще́нию, Пу́плию и́менем, и за е́же ра́ди неве́рствия его́ беззло́бную к нему́ приноша́ше бесе́ду, вы́ну неду́жная творя́щися, е́же не соприбли́житися ему́ на смеше́ние. Во смире́ную же оде́жду и нища́вую обле́кшися, и повсегда́ собирашеся с жена́ми с прося́щими, и о́тай Христа́ ра́ди стра́ждущих врачева́ше, и́же и в темни́цы су́щих, и скве́рны отмыва́ющих, и ма́слом ма́жущи, и гной их отира́ющи, и пи́щу изоби́льну кому́ждо подаю́щи, еди́ной то́чию рабо́тницы спосле́дствующи ей. И́же от нея́ уви́дена бы́ша, я́же о ней, пе́рвие свои́м му́жем, всажде́на бысть в темни́цу. Ше́дшу же му́жеви ея́ пла́ванием ку́плю твори́ти, и погрязну́, и истопе́ в мо́ри. Она́ же, осо́бна бы́вши, и вся я́же в дому́ ея́ ни́щим разда́, таже безболе́знено е́же по Христе́ стра́ждущим прилежа́ше, а скончева́ющихся сопря́товаше, и подава́ше на погребе́ние. И мно́гих на муче́ние потверди́вши, и разли́чными иге́моны испы́тана бы́вши, и в мо́ре со ине́ми жена́ми вве́ржена бы́вши, в коне́чное ко́лием растя́жена и свя́зана бы́вши, и во огнь вве́ржена, муче́ния вене́ц восприи́м. Соверша́ет же ся па́мять муче́ния ея́ су́щему в До́минове со́брании.

Стихи́:

Подае́т Хрисого́н вы́ю к мечу́,

И́же ду́хом позлаще́не, ме́дяне же мо́щию.

Хрисого́н му́ченик бя́ше от вели́каго гра́да Ри́мскаго, при Диоклитиа́не царе́. Бя́ше же муж благочести́в, и боя́ся Бо́га. Учи́тель быв е́же ко Христо́ве ве́ре, и в свяще́нных пи́сменех святе́й Анастаси́и. Гоне́нию же подви́гшуся ят бысть, и в темни́цу вве́ржен. Тогда́ написа́ к нему́ свята́я Анастаси́я, да помо́лится о ней, да бу́дет муж ея́ христиа́н, да спасе́н бу́дет. А́ще ли ни, да у́мрет. И да не бога́тство ея́ иждив́ет со идолослужи́тели: но да истощи́т его́ свята́я, к святы́м, и к ни́щым, е́же и бысть. И обо́лкшися в ни́щетную оде́жду, прохожда́ше и служа́ше святы́м и́же в темни́цах; Егда́ же Диоклитиа́ну в Нике́и проходя́щу, написа́ в Рим, да вся христиа́ны побию́т. Хрисого́н же в Нике́ю привести́, и та́мо мече́м усе́чен бысть.

Вре́мя у́бо моего́ отше́ствия настои́т, потщи́теся свои́ми попещи́ся душа́ми, поне́же бо отсю́ду ошес́твия покая́ния или́ доброде́тели сотвори́ти плода́ не мнит: «Во а́де же бо, рече,́ кто испове́стьтися?» Зде по́двизе, а и́нде венцы́ по зако́ну стра́ждущим. Зде с неви́димыми и ви́димыми рать, и́нде бо храбо́рства и нарече́ния. Зде чте́ния и сла́вы, зде подвиго́м купова́ние, и́нде прибы́тку собр́ание. Зде, сократя́щи рещи́, добру́ же и злу де́йство твори́тся, инде у́бо ему́ отда́ние. Да не у́бо вре́меннаго ра́ди и грехо́внаго восприя́тия не то́кмо ве́чных лиши́мся благ, но и безконе́чным преда́мыся му́кам: «И́дут бо си́и, рече́ Госпо́дь, в жизнь ве́чную, а си́и в студ ве́чный, в му́ку безконе́чную». Пе́рвое же у́бо к Бо́гу ве́ру тве́рду и неподви́жиму в свои́х душа́х от всего́ соблюди́те. Но дерза́ти Спас вели́т: «Аз же победи́х ми́ра». И па́ки: «Не бо́йтеся от убива́ющих те́ло, а души́ не могу́щих уби́ти: убо́йтежеся паче могу́щаго погуби́ти ду́шу и те́ло в гее́не». Си глаго́лю вам: того убо́йтеся. Злопомина́ния не держи́те: «Во гне́ве бо ва́шем да не за́йдет со́лнце». Егда́ же нечи́сто что помы́слив па́ки вни́дете, ско́ро того́ потщи́теся погуби́ти моли́твою. «Свя́ти бо, рече́, бу́дете, я́ко аз свят есмь». Лихоима́ния же, а́ки кумирослуже́ния ма́тере, бе́гающе, нестяжа́ние па́че люби́те о Христе́ Иису́се, Го́споде на́шем. Ами́нь.