Стихи́:

Порожде́ние непоро́чное, му́жескаго не позна́вши приме́са,

Да́ры непоро́чными подава́яй словесы́.

На бе́гство Святы́я Богоро́дицы

Иду́щаго к Тебе́, дре́вле разреши́вшаго мя,

Еги́пте, устраша́йся, и му́дрствуй Бо́га Сего́.

Во Еги́пет же бе́гает Богоро́дица со младе́нцем и со Ио́сифом сих бо ра́ди обои́х: да сбу́дется рече́нное проро́ком: «Из Еги́пта призва́х Сы́на Моего́» и да заградя́тся уста́ вся́кая ерети́ческая. И́бо а́ще не бежа́л бы, но держи́мь бысть младе́нцем, да а́ще уб́ит был бы Младе́нец, запя́ло бы ся челове́ческое спасе́ние. А́ще ли не убие́н бысть или́ са́блею или́ мече́м не́которым, или́ ины́м муче́нием, ра́ди да испо́лнит смотре́ние, мне́тися хотя́ше мно́гим, я́ко по привиде́нию бысть, и не по и́стине яви́ челове́ческую плоть: посече́н бы был мече́м. Иде́же бо, и при́тчи не сбыва́ющеися, дерзну́ша стра́стнии и окая́ннии еретицы́ рещи́, я́ко по привиде́нию роди́ся: того́ ра́ди бе́гает во Еги́пет, да и та́мо сокруши́т и́долы, и вселе́нную всю спасе́т во вре́мя спасе́наго распя́тия и воскресе́ния.

Стихи́:

Тща́шеся Еваре́ст де́лом и сло́вом,

Да́же до конца́ угоди́ти Тебе́, Сло́ве.

Сей оте́чество имя́ше во Аси́и, Галати́йския епа́рхии, роди́телей явле́ных, но несказа́нных. Ца́рствующу гре́ки, Льву мучи́телю иконобо́рцу: и́же и мече́м прободе́н быв, досто́йную кончи́ну восприя́т. Прии́мшу же Михаи́лу, и тому́ та́коже су́щу, и испыта́ния тому творя́щу. И елма́ же в ме́ру во́зраста дости́же сей о́трок, в науче́ние восприя́тий вдан. И всем вся́чески быв, роди́телем пови́нен: друго́м, и сосе́дом благоста́точен: стра́нным, и своим прия́тель. И́стинствуя во всех, и предпоказу́я свою́ любо́вь. Раче́нием же боже́ственным себе́ уязви́в, и́ноческое полюби́ житие́. Тем и к Константи́ню гра́ду до́йде, ку́пно с свои́м отце́м. И прия́т бысть от не́коего Вриенния, та́же и патрики́я напосле́док властию почте́ннаго, и сро́днику ему́ су́щу. И не́колико дней с ним пребы́сть, потре́бе доспе́вши, по́слан бысть от цари́цы Феодо́ры хода́тай к болга́ром. Патрики́ю же иму́щу с собо́ю честна́го Еваре́ста. Доше́дшым же им до не́коего ме́ста, Скупе́ль глаго́лемый, и мало не́что почи́вшым. Блаже́нный Еваре́ст, по не́коему смотре́нию получи́в презви́тера, по́стническое житие́ провожда́юща, и люби́мое си получи́. И власы́ остри́г, и вожделе́нно к Госпо́дню ярму́ совни́де. И кни́гу присновоспомина́емаго Ефре́ма обрет, и проче́т и поучи́ся, соверши́тель уче́нием его́ тща́шеся бы́ти. Ста́рец же доброде́тели ю́наго ощуща́я, моли́твами у́бо и пи́смены того́ огради́в, и во оби́тель Студи́йскую посла́. И прия́т быв, и к по́стническим подвиго́м себе́ вмести́. Еди́наго же от бра́тий посмотри́в, я́ко до́бре доброде́тель преиме́ющу ему́, тогда́ наипа́че соо́бщник тща́нию его́ быв, и к трудо́м труды́ прилага́ше. Но никому́же ино́му ви́ден быв. И ино́го ничто́же вкуша́я, то́кмо еди́ницею в неде́лю ма́ло хле́ба, и того́ су́ха су́ща, и сок зе́лиян. О други́х же боле́знех и труде́х, немо́щно есть нам изрещи́. Желе́за бо мно́га и тя́жка на ра́ме свои́ возложи́в по на́гу те́лу. И чре́сла препоя́сав. И всех богоуго́дными де́лы превзы́де, до́бре пожи́в блаже́нный сей. Се́дмьдесять и пять лет всего́ живота́ своего́ испо́лнив. И та́ко по сих дух свой Бо́гу преложи́.

Стихи́:

Бо́гу предста́вь, Евфи́мие треблаже́нне,

Испо́лнь непреста́ннаго, получи́вше благодаре́ния.

Сей бя́ше в ца́рство Константи́на и Ирины. Пе́рвее же во и́ночестем житии́ я́ко звезда́ просия́в. Таже архиере́й бысть, и в Ники́йстем второ́м собо́ре, еретики́ без воздержа́ния посрами́. Тем тако су́ща, сего́ ца́рие ви́девше, в крамо́льная и разли́чная места хода́тая посыла́ют. Ники́фору же ца́рство прии́мшу, в Патала́рию вече́рнюю святы́й со другими епи́скопы правосла́вными, отрокови́цы ра́ди не́кия, ю́же постри́г: посыла́ется от тогда́ у́бо, да́же и до страстоно́сия, всесла́вный уже́ не бысть держа́тель свое́й епи́скопии. И ле́том два́десятим и девяти́м мину́вшым, и царем держ́ащым тогда́ мимоше́дшым: и Льву звероимени́тому грече́ския ски́птры прии́мшу, от изгна́ния святы́й приведе́ся: и от него́ вопроша́емь быва́ет, я́ко ико́нам рече́ прино́сит честь. Свято́му же дерзнове́нно по обы́чаю ре́кшу, и ана́фему на мучи́теля возложи́вшу. И мучи́телю разгне́вавшуся, во Асс того́ прогоня́ет. И а́бие мече́м Льву зле́йше прободену бы́вшу: и ца́рство прии́мшу Михаи́лу, и́же и Тра́влый нари́чася. И от А́сса блаже́нный приводи́мь быва́ет, и честь святы́м ико́нам не приноси́ти пону́жден быва́ет. О́ному же а́бие сие́ сло́во громогла́сно испусти́вшу: и́же не покланя́ется о́бразу Го́спода на́шего Иису́са Христа́, по челове́честву напи́санному, того анафематиса́ем. И бие́н бысть, и в Крит изгна́ние подъят, и в темнице мра́чней затворе́н. Та́же на четы́ри ча́сти растя́жен, и волуями жи́лами су́ровыми бие́н бысть. Тем святы́й от мно́жества ран, я́ко мех напря́гся. Посе́м святы́й по той стра́сти ма́ло пребы́в, и та́ко честну́ю свою́ ду́шу в ру́це Бо́гу преложи́.

Слы́шите и научи́теся, я́ко Благи́й Госпо́дь наш, я́ко [и] пло́тию Свое́ю пита́ет ны, и кро́ви Своея́ не щади́т, егда́ тре́буем. Ты же ни хле́ба да́си Его́ ра́ди, ни ча́ши [воды́]: такова́я [у́бо] прие́мля [от Него́], худы́х щади́ши. А́ще бо за Христа́ не у́мреши, то без сме́рти ли пребу́деши? Я́же бо ти нуж́дею оста́вити сия́ во́лею Бо́га ра́ди, егда́ не тя́жка сия́, я́ко Бог Сы́на Своего́ за тя дал: ты же ни хле́ба Его́ ра́ди не да́си. Тебе́ ра́ди и ра́спят бысть, ты же издая́ти презира́еши. И что сего́ беззако́ния горе́е, я́ко вся телеса́ тебе́ ра́ди Сотво́ршему, ты же тве́ржи еси́ ка́мени, толи́ким тя ну́дящим ве́щем, в ску́пости пребыва́еши? А́ще бо не вда́си за тя Пострада́вшему, но поне́ да щедро́т ра́ди поми́луй. У́зницы ра́ди умили́ся, боле́зни ра́ди преклони́ся. А́ще ли ни си тя сотворя́т человеколю́бца, на ле́гкое пода́тие приити́, то помяни́ ре́кшаго Христа́: ничтоже прошу́, рече, вели́ка, но то́чию хле́ба и словесе́ уте́шна. Не глаго́лю ти: разреши́ мою́ нищету́ или дай ми бога́тство - но хле́ба прошу́, ма́ла утеше́ния от гла́да. А́ще во у́зницу впаду́, не ну́жду уз разреши́ти извести́ вон - но прошу́, да посети́ши та́мо, и ви́диши мя посреде́ свя́заных. Могу́ у́бо и сих ра́ди посеще́ния и мзду ти пода́ти, и в ве́це о́ном венча́ти: хощу́ бо ти до́лжен бы́ти, да ти не́кий бу́дет плод к венцу́. Того́ ра́ди, Моги́й Себе́ пита́ти, обхожу́ всех прося́, у две́рий предстоя́, простира́ю ру́ку, тобо́ю накормле́н бы́ти жела́ю. Украша́юся тем, я́ко да пред вселе́нною все́ю похваля́ю тя, внегда́ всем слы́шащим, и покажу́ тя пита́теля Моего́. А́ще бо ки́ими накормле́ни бу́дете, то стыдя́щеся тем подава́ете. Аз же поне́же вы люблю́ зело́, того́ ра́ди наказу́ю: я́ко да ми́лостиви бу́дете, и ины́м глаго́лемая мно́ю изглаго́лете. И а́ще сим не бу́дете ревни́телие, ни ине́х научите́, посра́млени бу́дете в су́дный день, и от ли́ца Моего́ отринове́ни. А́ще ли сия́ сотворите́, испове́м бы́вшее ва́ше все с вели́кою похвало́ю, и не стыжу́ся рещи́: я́ко на́га Мя су́ща облеко́сте и а́лчна напита́сте, но и па́че украша́юся си́ми, и́миже и насле́дницы небе́снаго Ца́рствия бу́дете. Сия́ же помышля́юще, возлю́блении, пои́щем ми́лостынею спасе́ния своего́, да и ве́чных благ улучити сподо́бимся, о Христе́ Иису́се, Го́споде на́шем, Ему́же сла́ва, ны́не и при́сно и во ве́ки веко́в. Ами́нь.