Ра́дуйся зело́ дщи Сио́ня, пропове́дуй Иерусали́ме р́адость. Лику́йте лю́дие гра́да Бо́жия. Взыгра́йте врата́, и сте́ны Сио́ни: и всея́ земли́ возопи́йте го́ры, и хо́лми вельми́. Взыгра́йте ре́ки, и восплещи́те, и весь наро́д Сио́н объими́те, Бо́жие прише́ствие в нем ви́дяще. Соглаша́йте днесь небе́сная с земны́ми. И да хва́лят го́рнии с до́льними Иерусали́м Христа́ де́льма, за е́же в нем небе́снии и земни́и. Небе́сныя у́мныя си́лы лику́йте, земни́и со а́нгелы сла́вите. Днесь сла́вное глаго́лано о тебе́ Иерусали́ме гра́де Бо́жий, гра́де Царя вели́каго. Да отве́рзет врата́, отве́рзшему всем небе́сная врата́, отве́рзшему две́ри гробо́в кресто́м, и сте́ршему а́дова врата́, и заключи́вшему чу́дне Деви́чи две́ри. Днесь И́же пре́жде Моисе́ю яви́ся на горе́, Сей нам боголе́пне соверша́ет зако́ном быва́я. Днесь Бог, от ю́га в Сио́н гряде́м. Днесь небесный Жени́х с Богоро́дичным черто́гом в це́рковь приходи́, дще́ри иерусали́мския изы́дем проти́ву сему́, свещи́ све́тлы возжже́м и́стинным све́том: ри́зы дневны́я Жениху́ Христу́ соугото́ваим: с Сио́ном стра́ннии лю́дие свещи́ несу́ще, сря́щем. С це́рковию в це́ркви, и о Бо́зе Христе́ стеце́мся. Со а́нгелы а́нгельскую песнь возопие́м: Свят, Свят, Свят, Госпо́дь Савао́ф, испо́лнь не́бо и земля́ сла́вы Его́: испо́лнь страны земли́ бла́гости Его́: испо́лнь хвалы́ Его́: испо́лнь челове́чество прише́ствие Его́. Небе́сная, земна́я, подзе́мная, испо́лнь ми́лости Его́, испо́лнь даро́в и благода́ти Его́. Тем у́бо вся страны́ ми́ра иди́те, и ви́дите дела́ Бо́жия. Вся́ка душа́ да хва́лит Бо́га: вся́ка душа́ да покло́нится: всяк язы́к да пое́т, и да сла́вит и хва́лит де́тища Бо́га четы́редесяте дний ви́дя. Преве́чный де́тищь мал, и ветх де́ньми. Де́тищь ссущь, и веко́в Творе́ц. Младе́нца ви́жду, и Бо́га познава́ю. Младе́нец пита́емь, и мир воскормя́щь. Младе́нец пла́чущь, и ми́рови жизнь и ра́дость даю́щь. Младе́нец повива́емь, и мене́ от пеле́н грехо́вных проща́ющь. Младе́нца на руку́ вижду Мате́рню с пло́тию пои́стине во оскуде́нии на земли́: того́же в не́дрех О́тчих, пои́стине без оскуде́ния на небесе́х су́ща. Младе́нца ви́жду от Вифлее́м во Иерусали́м гряду́ща, го́рняго Иерусали́ма ника́коже отлуча́ющася. Младе́нца ви́жду, по зако́ну в це́рковь тре́бу принося́ща на земли́: Но Сего́ всех благоче́стныя тре́бы прие́млюща на небесе́х. Сего́ на руку́ ста́рчу по смотре́нию, Сего́ на престо́ле херуви́мсте боголе́пне седя́ща. Сего́ приноси́ма и очища́ема, Сего всечи́стяща и отребля́юща. Сей принесе́ние Сам Сый старе́йшина моли́твеником: Сей тре́бище: Сей очище́ние: Сей приносяй: Сей И́же за весь мир приноси́мый: и Сей Огнь Сый, Сей Всесожже́ние: Сей Дре́во жи́зни и ра́зума: Сей А́гнец присно закала́емый благоче́стными жерцы́, и всем благоче́стным подава́емь, и николи́же иждива́емый: Сей Ножь духо́вный: Сей Пасту́х: Сей А́гня: Сей Жрец: и Сей жре́мый: и Сей же́ртву прие́мляй: Сей приноси́мый, и всех принося́ ко Отцу́ Своему́. Но се то́жде о дни сем от святы́х Ева́нгелий услы́шим. Рече́ бо о Христе́ чу́дный Лука́: я́ко егда́ испо́лнишся дни́е очищ́ения их, по зако́ну возведо́ша Иису́са во Иерусали́м поста́вити пред Го́сподем, я́коже есть пи́сано в зако́не Госпо́дни: я́ко всяк младе́нец му́жеска по́ла разве́рзый ложесна́, свят Го́сподеви нарече́тся. Саму́ил у́бо, и Исаа́к, и Иа́ков, и Ио́сиф, и ини́и, и́же от непло́довь ро́ждшеся, чрез наде́жду разве́рзше непло́дная ложе́сна, свя́ти Го́сподеви нареко́шася. Христо́с же Еди́ный от Еди́наго, Единоро́жденный, не разве́рз двере́й Деви́чь, не свят Го́сподеви, но Свят святы́х, и Госпо́дь господе́й, и Бог бого́в, и Пе́рвенец пе́рвенцей, Князь же и Царь царе́й, и нарече́тся, и ве́руется: и ны́не в це́ркви Симео́ном пропове́дася. Бе бо, рече́, челове́к во Иерусали́ме, ему́же и́мя Симео́н, и челове́к сый правди́в: и Святы́й Дух бе в нем, и бе ему́ обе́щано Ду́хом Святы́м не ви́дети сме́рти, пре́жде да́же не ви́дит Христа́ Госпо́дня. И прии́де Ду́хом в це́рковь, и егда́ введо́ста роди́теля де́тища Иису́са по обы́чаю, и прия́ его́ Симео́н на руку́ свое́ю, и благослови́ Бо́га, и рече́: Ны́не отпуща́еши раба́ Твоего́ Влады́ко, по глаго́лу Твоему́ с ми́ром: я́ко ви́деста о́чи мои́ спасе́ние Твое́. Кто возглаго́лет си́лы Госпо́дни, слы́шаны сотвори́т вся хвалы́ Его́? Содержа́й зе́млю дла́нию, на руку́ вмести́ся, и носи́мь есть: нося́й вся сло́вом си́лы Своея́, носи́мь есть чи́стою Ма́терию. Ра́дуется днесь Симео́н ко Христу́ глаго́ля: Ны́не отпуща́еши раба́ Твоего́ Влады́ко. Ны́не отпуща́еши мя от тле́ния и сме́рти. Ны́не разрешаеши мою́ печа́ль, мой Бог и Госпо́дь. Днесь бо показа́ язы́ком смотре́ния та́инство, в це́ркви на руку́ держа́ Влады́ку Симео́н, и вели́ким гла́сом о Нем с ра́достию зва́ше ко иуде́ом глаго́ля: Ви́дите ли Сего́ де́тища? Сей есть Сый пре́жде быв при́сно, Отцу́ Единосу́щен Сый: Единопресто́лен: Единосла́вен: Единомо́щен: То́чен си́лою: Всемо́щен, Безнача́лен: Несозда́н, Неизме́нен: Неопи́сан, Неви́димь. Неизвеща́емь, Непостижи́мь, Неося́жемь. Сей есть Оте́ческия сла́вы Сия́ние: и О́браз (начерта́ние) Ипоста́си Его́. Сей тва́ри Госпо́дь. Сей есть Свет све́тов, от Оте́ческих исходя́й недр. Сей у Бога, и от Бо́га зна́емь. Сей Исто́чник жи́зни, от исто́чника О́тча жизнь исходя́й. Сей Река́ Бо́жия, от бе́здны Бо́жия исходя́щи, но не разлуча́ющися. Сей Благода́ть О́тча, присносу́щаго блаже́нства. Сей Вода́ жи́зни, и жизнь ми́рови даю́щи. Сей Заря́ несозда́на от Отца́ све́та со́лнца бы́вшая неотсеко́ма. Сей есть от не су́щих во е́же бы́ти, Бо́жие Сло́во, вся соста́вивый. Сей есть Денни́ца пре́жде денни́цы, безпло́тныя устро́ивый си́лы, небе́сных неви́димых чи́нов. Сей есть простры́й не́бо Еди́н, и ходя́й по мо́рю а́ки по су́́ху. Сей есть море мгло́ю пови́вый. Сей есть утверди́вый землю на водах. Сей есть огради́вый песко́м мо́ре. Сей есть раздели́вый свет от тмы. Сей есть кругова́тую звезд сотвори́вый твердь. Сей есть всю ви́димую и неви́димую тварь му́дростию сотворивый. Сей есть рука́ма, от ка́ла челове́ка сотвори́вый. Сей есть по образу Своему́ нас сотвори́вый, ны́не то́йжде по о́бразу на́шему быва́яй: но и Бог то́йжде. Челове́к ви́димый, Бог же разумева́емый, Соверше́н от Соверше́нна, О́тчее существо́ име́яй. И́же во зра́це Бо́жии Сый, ны́не мой ра́бий зрак взят: освяти́вый моего́ естества́ смеше́ние. Горе́ весь, и до́ле весь то́жде ви́димь. Горе́ роди́вся без вре́мене, до́ле без се́мене. Горе́ Тво́рец, а до́ле Тварь. Слы́шите сия́ вси язы́цы. Слы́ши Иерусали́ме, Госпо́дь Бог твой Сей есть, Его́же аз твой жрец Симео́н на руку́ нося́, вели́ким гла́сом пропове́даю в лю́дех свиде́тельствуя тем: Внемли́те лю́дие мои́ зако́ну моему́, приклони́те у́хо ва́ше во глаго́лы уст мои́х. Сей Де́тищь есть, о Не́мже Иса́ия пропове́да глаго́ля: Я́ко Отроча́ роди́ся нам Сын, и дан бысть нам, и нарече́ся и́мя Его́ вели́ка сове́та а́нгел. Чу́ден Сове́тник: Бог кре́пок: Князь ми́ра: Оте́ц бу́дущаго ве́ка. Да а́ще Бог кре́пок Де́тище, то уже́ я́ве о сем и Дави́д рече́: Яви́тся Бог бого́в в Сио́не. О сем Де́тищи вопие́т Иереми́я: Я́ко Бог на земли́ яви́ся, и с челове́ки совокупи́ся. Сей Де́тищь есть, И́же мо́ре Изра́илеви разве́рже, и фарао́на погрузи́ со все́ми во́и, и зако́н подаде́ им, и ма́нну я́сти, и столпо́м о́гненным наста́ви. И купину́ о́гненную ро́сным пла́менем без опале́ния сохрани́ обра́зно (невреди́му). И ложесна́ Деви́ча не разве́рзе огне́м Божества́, и без испале́ния, и без скве́рны пребыва́ти благоволи́. Сей Де́тищь Моисе́я уби́йцу во Еги́пте ре́ти де́льма сотвори́, и четы́редесять лет пастуха́ его́ о́вцам показа́, и четы́редесять лет наста́вника Изра́илеви его́ поста́ви: но и четы́редесять дний алка́ти и си́льна его́ сотвори́. Я́коже и Сей Де́тищь от Девицы ражда́емый, по четы́редесятих днех, ны́не в земны́й Иерусали́м вни́де. И четы́редесять дний пости́вся алка́, на спасе́ние о́бразу (ро́ду) на́шему. И по четы́редесятих днех от ме́ртвых воскресе́ния, на го́рний Иерусали́м взы́де. О Сем Де́тищи проро́к Авваку́м пропове́да реки́й: Бог от Фема́на прии́дет, си́речь от ю́га. От ю́га бо Иерусали́мска, от Вифлее́ма. Ны́не Моисе́й послу́шествова глаго́ля: Я́ко проро́ка вам возста́вит Госпо́дь от бра́тий ва́ших, и всяк и́же не послу́шает его́, сокруши́тся душа́ его́. О Сем Де́тищи проро́к моля́шеся Дави́д глаго́ля: Седя́й на херуви́мех яви́ся: Воздви́гни си́лу Твою́, и прииди́ спасти́ нас. И па́ки: Ско́ро да предваря́т ны щедро́ты Твоя́ Го́споди. И па́ки: Приклони́ небеса́, и сни́ди. И еще́: Го́споди Бо́же сил, вонми́ посети́ти вся язы́ки. Сего́ ради разуме́йте вси язы́цы, и покаря́йтеся. Ви́дите жи́дове и ве́руйте, я́ко сего́ Де́тища сла́вят а́нгели: Сему́ кла́няются арха́нгели: Сего́ трепе́щут Вла́сти: Сего хва́лят Си́лы: Сему́ рабо́тают херуви́мы: Сего́ благосло́вят серафи́ми: Сего́ сла́вит со́лнце: Сему́ слу́жит луна́: Сего послу́шают соста́вы: Сему́ повину́ются исто́чницы и мо́ря: Сего Де́тища ви́деша врата́ а́дова затвори́шася, а небе́сная врата́ отверзо́шася: Сего́ Де́тища ад ви́дев вострепета́. Сей Де́тищь смерть попра́, диа́вола одоле́, Кля́тву разори́, печа́ль уста́ви, змию́ сотре́, прегра́ду разсече́, неприя́зненное рукописа́ние расто́рже, грехи́ попра́, пре́лести прокля́, тварь всю украси́, Ада́ма спасе́, Е́ву обнови́, страны́ призва́, мир освяти́.

Сего́ де́льма Госпо́дне Сре́тение вси све́тло сря́щем, не зако́нно, но духо́вно. Не чре́вом жиру́юще, но ду́хом игра́юще. Не вино́м упива́ющеся, но ду́хом те́пли су́ще. Си́це день сей све́тло све́щы украси́м а́ки сы́нове све́та, свещы И́стинному Све́ту Христу́ принесе́м с душе́вными свети́лы. Поне́же бо свет во открове́ние стран ми́рови просия́, поне́же свет и́же от Све́та изы́де. Па́че сне́га просвети́мся: па́че млека́ усыри́мся: паче ка́мене сапфи́ра просия́им: вы́ше голуби́чища на не́бо возлети́м. Си́це а́ки на о́блацех, проти́ву Бо́жию Сре́тению изле́зем. Днесь вся́чески по пра́здническому пути́ да хо́дим: со а́нгелы лику́ем: с пастух́и освети́мся: с волхвы́ и́стинно ве́рою поклони́мся: с Вифлее́мом пра́зднуем: с Сио́ном сря́щем: с це́рковию освяти́мся: с Де́вою Богоро́дицею возра́дуемся: со Ио́сифом принесе́м: с Симео́ном на руку́ Христа́ прии́мем безконе́чным не́дром ве́ры: Со А́нною проро́чицею исповеда́ем: па́че же испове́даемся Спа́су всех, всю свою́ жизнь Ему́ скве́рную открыва́юще, прося́ще проще́ния, ели́ко есмы́ или́ сло́вом, или́ де́лом, или́ умо́м Ему́ согреши́хом. Да не́гли бы́хом ве́чнаго добра́ дошли́, и тех внутрь бы́вше, благода́ти и ми́лости и человеколю́бия, Го́спода на́шего Иису́са Христа́ дости́гнули. Ему́же сла́ва и держа́ва, ны́не и при́сно, и во ве́ки веко́в. Ами́нь.

Стихи́:

Я́дра Твоего́ Отца́ вообража́ют, Христе́ мой,

Симео́новы ру́це поне́сшии Тя:

Во вторы́й прия́т Христа́ Симео́н па́че ума́.

Четы́редесятим днем мимоше́дшым по спаси́тельном Госпо́дни вочелове́чении, и от Святы́я Де́вы без му́жа рожде́нии, в таковы́й всечестны́й день принесе́н бысть во святи́лище Госпо́дь наш Иису́с Христо́с Пречи́стою Свое́ю Ма́терию, и Ио́сифом пра́ведным и обру́чником, по обы́чаю сено́внаго и зако́ннаго пи́смене. Внегда́ и ста́рец Симео́н и свяще́нник извеще́ние прия́т, иде́же ему́ бя́ше Ду́хом Святы́м извеще́но не ви́дети сме́рти, пре́жде да́же не ви́дети Христа́. Прии́м же на свои́х объя́тиих Бо́га, и благода́рствив, и испове́дався возопи́: «Ны́не отпуща́еши раба Твоего́ Влады́ко, по глаго́лу Твоему́ с ми́ром». И с ра́достию от сего́ жития́ преста́вися, землены́ми премени́в небе́сная и безконе́чная. Собо́р же таковы́й соверша́ется в пречестне́м хра́ме Пречи́стыя Влады́чицы на́шея Богоро́дицы и Присноде́вы Мари́и, су́щем во Влахе́рне.

Днесь у́бо бра́тие Законода́вец зако́н соверша́яй, а́ки Младе́нец вно́сится в це́́рковь земна́го Иерусали́ма. Днесь пра́ведный Симео́н Ду́хом Святы́м подвиза́емь на сре́тение Госпо́дне тщи́тся: бе бо обеща́но ему́ Ду́хом Святы́м не ви́дети сме́рти, пре́жде да́же не у́зрит Христа́ Госпо́дня во пло́ти. Днесь преста́реи ру́це Симео́ни Творца́ и Бога всех прие́млют. Днесь ра́достию испо́лнився пра́ведный ста́рец, отпуще́ния ми́лостивно про́сит, глаго́ля: Ны́не отпуща́еши ра́ба Твоего́, Влады́ко, по глаго́лу Твоему́ с ми́ром, я́ко видеста о́чи мои́ спасе́ние Твое́, е́же еси́ угото́вал пред лице́м всех люде́й. Прорица́ет же и о распя́тии хотя́щую бы́ти печа́ль Святе́й Богоро́дице, и рече́: Тебе́ же Самы́я ду́шу про́йдет ору́жие, си́речь, егда́ уз́рит Его́ распина́ема, туго́ю лю́тою и печалию тя́жкою а́ки копие́м прободе́т Свою́ ду́шу, не домы́слящися во́льнаго распя́тия. Днесь А́нна проро́чица испове́дается Богу, си́речь, хвалу́ Ему́ возда́ет, и в плоть человеч́у оде́явшася ви́дящи, на спасе́ние всего́ ми́ра, глаго́лет: Сей на́ше се́тование обрати́т на ра́дость. Сей па́ки райския двери отве́рзет всем ве́рным, затворе́ныя преслуша́нием дре́вле пра́деда Ада́ма. Сей разори́т кля́тву, ю́же приобре́те пра́баба на́ша Е́ва. Темже не исхожда́ше из це́ркве, посто́м и моли́твою служа́щи день и нощь Бо́гови. Той бра́тие поревну́ем вдови́це, прири́щуще к це́ркви день и нощь, та бо есть дом Бо́жий. Та есть христиа́ном прибе́жище, и моли́тва Бо́гови прия́тна. Та есть очище́ние души́ и те́ла, к той святе́й це́ркви всяк ве́рою приходяй спаса́ется: ту бо пе́ние и моли́тва Бо́гу возсыла́ется за весь мир. В той предстои́т свята́я Бо́жия трапе́за, иму́щи духо́вное неизрече́нное бра́шно, Те́ло и Кровь А́гнца Бо́жия, закла́вшагося во́лею за весь мир, и прело́жшаго те́ло Свое́ в духо́вное бра́шно, и ре́кша: Яды́й плоть Мою́, и пия́й кровь Мою́, [с ве́рою] во Мне пребыва́ет, и Аз в нем. Те́мже бра́тие разуме́ем, к Кому́ приступа́ем, и Что прие́млем; да очи́стившеся от вся́каго зла, и мир между́ собо́ю иму́ще, и та́ко приступай́те ко свято́му Те́лу, и Кро́ви Госпо́дни со стра́хом и тре́петом: и пото́м чи́сти пребыва́йте, храня́ще святы́ню ту в те́ле свое́м, а не а́ки свиния́ устремля́йтеся на пия́нство и на и́ну скве́рну, но я́ко раби́ Христо́вы и прича́стницы та́ин Его́ мир иму́ще между́ собо́ю, и любо́вь нелицеме́рну. Нищелю́бцы и странноприи́мцы бу́дите, и Бо́жию словеси́ сохра́нницы, а не слы́шателие то́чию. Подви́гнемся житие́м чи́стым прибли́житися к Бо́гу, да услы́шим Его глаго́люща: Прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра. Вас бо ра́ди стра́нен бых, от небесе́ на зе́млю снидо́х, да вы устра́ньшыяся от Мене́ па́ки примирю́ ко Отцу́ Моему́ и Бо́гу ва́шему. Вас бо ра́ди а́лчен и жа́жден бех, да да́вшым пода́ние пода́м ра́йския пи́щи наслажде́ние. И за сию́ оде́жду и тле́нную ри́зу в нетле́нныя облеку́ вы, и ца́рскими увяжу́ вы венцы́. Те́мже бра́тие все́ю душе́ю и чи́стою ве́рою просла́вим Пресвяту́ю Тро́ицу Равноче́стную, и Равнопресто́льную, в трие́х ипоста́сех сия́ющу наразде́льно, Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.