Стихи́:

Благове́стниче ме́ртвым, моли́твениче Бо́жия Сло́ва

Челове́к я́влься да́же и до сего́ дости́г:

В тре́тий жити́йских уз разреши́ся Симео́н.

Святы́й Симео́н бе от пле́мене Леви́ина, сын вели́каго иере́я Иони́и. Егда́ же преводи́ша кни́ги Птоломе́ю еги́петскому царю́, и писа́ху зако́н Моисе́ов: пиша́ Симео́н кни́гу Иса́ии проро́ка, и егда́ дости́же сего́ словесе́: Се Де́ва прии́мет во чре́ве, и роди́т Сы́на Христа́ Госпо́дня, и прии́м ножь, хотя́ше загла́дити. И им а́нгел за ру́ку его́, глаго́ля: не не ве́руй напи́санным, бу́дет бо сие́, и́бо а́ще до́ндеже не прии́меши его́ ты на руку́ свое́ю, не и́маши вкуси́ти сме́рти. И бе пр́аведен и непоро́чен, приседя́ в це́ркви, и моля́ся Богу, да поми́луй мир Свой, ча́яше глаго́ланнаго ему́ а́нгелом ви́дети: та́коже и А́нна проро́чица моля́щися, и жду́щи таковы́я сл́авы. Испо́лнившымся же четы́редесятим днем от Рождества́ Христо́ва, принесо́ста роди́теля Отроча́ Иису́са в це́рковь, по уста́ву зако́нному. И прии́м Симео́н на руку́ свою́, и рече́: Ны́не отпуща́еши раба́ Твоего́, Влады́ко, по глаго́лу Твоему́ с ми́ром, я́ко видеста о́чи мои́ спасе́ние Твое́. Проро́чествова же о стра́сти Христо́ве, и о распя́тии, и о Богоро́дице, я́ко Сы́на на кресте́ ви́сяща у́зрит: и глаго́лав преста́вися. Та́коже и А́нна, благодари́вши, прия́ коне́ц. Соверша́ется же таковы́й собо́р в честне́м апо́стольстве свята́го апо́стола Иа́кова бра́та Госпо́дня, су́щем в це́ркви Пресвяты́я Влады́чицы на́шея Богоро́дицы, близ святы́я вели́кия це́ркве.

Стихи́:

Андрия́на ра́дующе́ся мечь посече́,

Рука́ посекает ра́достно слугу́ уби́йственаго:

Мече́м у́мер Евву́л Го́спода ра́ди,

Свет уви́дев е́же и уго́ден бы́ти Го́сподеви.

Сия́ ро́дом бя́ста от Вани́и, любо́вь же е́же ко испове́дником Христо́вым имя́ста, в Кесари́ю идо́ста, и позна́на бы́ста дерзнове́ния ра́ди и чистоты́ ею́, я́ко христиа́на су́ща, и приведе́на бы́ста Фирмилиа́ну кня́зю, и ра́ны по плеще́ма и по ре́бром прия́ста, и ины́ми бо́льшими му́ками обложе́на бы́ста. Да я́коже в Христо́ве испове́дании неукло́нно стоя́ста. Судия́ же и и́же с ним я́ростию распала́хуся, и святы́я звере́м скверным вда́ша. Блаже́нный же Андреа́н львом ят быв, му́жески к по́двигу я́тся: та́же мече́м главу́ его́ отсеко́ша. Святы́й же Евву́л мно́га утеше́ния и ласка́ния подъя́т, и не поко́рся, с те́мже зве́рем боря́ся: и ра́вно я́ко и пе́рвый он пострада́, и коне́ц жития́ восприя́т.

Бе не́кто разбо́йник, и прии́де ко отцу́ Зоси́ме, и моля́ше ста́рца реки́й: Бо́га де́ля сотвори́ на мне гре́шнем ми́лость, поне́же мно́га зла и безчи́сленныя грехи́ содея́л есмь, не́гли бых своего́ оста́влься зла. Ста́рец же наказа́в и́, и сотвори́ его́ чернеца́, дав ему́ святы́й о́браз. Посе́м рече́ ему́ ста́рец: ими́ ми ве́ру ча́до, я́ко зде пребыва́ти не мо́жеши, зане́ а́ще услы́шит князь и по́ймет тя. Но послу́шай мене́, да тя веду́ в монасты́рь пода́ле отсю́ду, и веде́ его́ в Дорофе́ев монасты́рь в край Га́зы, и сотвори́ ту де́вять лет: и навы́че псалти́рь, и весь чин черне́ческий. И па́ки взы́де к ста́рцу в Фирми́н, и рече́ ему́: господи́не отче, сотвори́ ми́лость со мно́ю, даждь ми ри́зы мирски́я, а мона́шеския возми́. Ста́рец же сжа́лив си, рече́ ему́: чесо́ ра́ди ча́до си́це сотвори́ти хо́щеши? Отвеща́ ему́ брат: се я́ко обо́лк мя еси́ во святы́й сей о́браз о́тче, и вдал мя еси́ во ин монасты́рь: и се лет де́вять и́мам, ели́ко моги́й алка́х и воздержа́хся, и всем стра́хом Бо́жиим в молча́нии бых повину́яся, и вем я́ко благосты́ня Его́ прости́ мя мно́гих моих зол. Оба́че и еще́ в це́рковь егда́ пойду́ причаща́тися ко обе́днице, и се де́тищь глаго́лет ми: почто́ мя еси́ уби́л? И ни еди́н день осла́би ми облича́я мя: и сего́ ра́ди ити́ хощу́ о́тче, да умру́ за де́тище, его́же без ума́ уби́х. И взем ри́зы, облече́ся в ня, и изы́де из ла́вры. И я́ко прии́де к Диоспо́лю гра́ду, и в други́й день я́ша его́, и уби́ша. И отъи́де ко Го́споду, от всех очи́щься грехо́в, и ко святы́м причте́н.