Стихи́:

Ра́дующися, темни́це мра́чней вдана́ бы́вши Ага́фия:

И све́та ненави́дящи е́же льсти́вых в лице́ зре́ти:

В пя́тый в темни́це Ага́фия у́мре виде́нием рачи́тельным.

Та бя́ше от гра́да Пано́рма, и́же в Сикили́и: ви́дом теле́сным добра́ бя́ше, и добро́тою душе́вною сия́ющи, и бога́тство мно́гое иму́щи. Во времена́ же Де́кия царя,́ Кинтиа́ну иге́мону приведена́ бы́вши: и пе́рвее у́бо предана́ бысть Афродиси́и не́которой жене́, е́же претвори́ти ю́ от Христо́вы ве́ры. Она́ же кре́пко держа́ше, и па́че жела́ше муче́ния сме́рти. Му́чена же бы́вши зело́, и сосца́ ея́ отре́заша: ю́же всехва́льный апо́стол Петр в темни́це здра́ву сотвори́. Та́же по чрепи́нах влачи́ма бысть: и огне́м попалена́, и в темни́цу вве́ржена, и та́мо Бо́гу дух предаде́. Соверша́ется же собо́р ея́ во свое́м ея́ муче́нии, су́щем в Трикогхо́не.

Стихи́:

Раболе́пнаго огня́ не устраши́ся Феоду́лия,

На Бо́га возложи́вши ра́бски наде́жду.

В ца́рство Диоклитиа́ново, и Максимиа́ново, по́слан бысть в Назаре́т град, не́кто Пела́гий и́менем, твори́ти христиа́ном истяза́ние. Тогда́ я́та бы́вши свята́я, и предста́ Пела́гию, и дерзнове́нно Христа́ испове́дающи пред всеми Бо́га И́стиннаго, и скве́рныя и́долы обезче́стивши. И пове́шена бысть за главны́я плени́цы на кипари́се, и рожны́ железными разжже́ными сосца́ ея́ сожго́ша. И ко иге́мону ре́кши: Где суть бо́зи твои, покажи́ ми их, я́ко да велми́ почту́ я́? А́бие сведена́ бы́вши, и по́слана в це́рковь Адриа́нову, его́же имя́ху че́стна и прехва́льна. Вше́дши же свята́я в це́рковь и помоли́ся Бо́гу: и ду́нувши на Адриа́ново тре́бище, и паде́ до́лу, и разсе́деся на тро́е. И ко иге́мону изше́дши рече: Вни́ди и дай ру́ку по́мощи бо́гу твоему́, зане́же пад сокруши́ся. Он же ско́ро вшед, и ви́дев его́ лежа́щь на тро́е разсе́дшася, пропла́кав рыда́нием, я́ко и во у́ши царев́ы до́йде бы́вшее. И по́слан бысть от царя́ муж е́же доити́ в Назарет́ град, и повеле́но бысть ему́ от царя́, я́ко а́ще и́стина есть е́же на бо́га сбы́вшееся, пода́ти кня́зя на снедь звере́м. Сия уве́дев князь, припаде́ к блаже́нней Феоду́лии, моля́ о́ну со слеза́ми е́же помоли́тися Бо́гу. Да а́ще сокруше́ннаго Бо́га здра́ва сотвори́ши, и на мес́те иде́же стоя́л есть поста́виши, прииду́ ко Христу́ твоему́ и христиани́н бу́ду Тогда́ свята́я Христу́ помоли́вшися, и а́бие сокруше́нный и́дол Бо́жиим повеле́нием, весь цел в свое́ ме́сто ста: и обре́т его́ по́сланый здра́ва, возврати́ся и пове́да царю́. Царь посла́ пи́смена ко кня́зю, повелева́я пе́рвее разли́чными му́ками му́чити святу́ю, и пото́м го́рцей смерти преда́ти. А́бие же рожны́ желе́зны князь разже́г, и нача́т свертати те́ло ея́: и сему́ сбыва́ющуся, изнемога́ше треокая́нный, и стра́стный он па́губник. И рече́ коментари́сий кня́зю: даждь ми о́бласть над не́ю, да а́ще аз сего́ не сотворю́, е́же пожре́ти Адриа́ну бо́гу, главу́ мою́ отсецы́. И во́льная ему́ на святу́ю твори́ти повеле. Он же сотвори́в пять гво́здий, вонзе́ два во у́ши ея́, тре́тий же в чело́, и два во о́ба сосца́ ея́: и сим вонзе́ным. Свята́я же мы́сленыя о́чи на не́бо возве́дши, помоли́ся Бо́гу, е́же да́ти ей кре́пость и терпе́ние. Что же, и невдале́че сие́ сбы́сться? И́бо коментари́сий ви́дев до́блественое ея́ терпе́ние, я́ко нивочто́же го́рькую му́ку вменя́ет. И позна́в я́ко а́ще отпаде́т от сро́ка, беду́ своему́ животу и́мать прия́ти, я́коже бя́ше обеща́лся. И призвав ю́ в дом свой, моля́ше ю́, е́же с ним пожре́ти и́долом. Тогда́ блаже́нная мольбу́ о нем сотво́рши, обрати́ того́ христианина бы́ти, и тому́ вседу́шно Христо́ви ве́ровавшу. У́тру же бы́вшу, предста́в коментари́сий со свято́ю кня́зю, и рече́ ему́: Не возмого́х рабу́ И́стиннаго Бо́га претвори́ти от пра́ваго и блаже́ннаго пу́ти. Сия же па́че из тмы неве́дения изба́ви мя, приве́дши мя ко Христу́ спасе́на: Того́ и аз испове́дую, и покланя́юся Тому́ Еди́ному И́стинному Бо́гу, и Го́споду моему́ Иису́су Христу́. Да я́ко слы́ша князь глаго́лы из уст Елла́дия коментари́сия, и я́ростию испо́лнися, повеле́ мече́м главу́ его́ отсещи́, а те́ло его́ в мо́ре воврещ́и. И та́ко соверши́ся му́чение его́, в два́десять четве́ртый ианнуа́рия ме́сяца. Святе́й же пещь зело́ разже́гше, ри́нути ю́ в ню повеле́. Но блаже́нная невреди́ма пребы́сть в пещи́, моля́щися и сла́вящи Бо́га. Те́мже и в недоуме́ние впаде́ иге́мон, и вельми́ возопи́: О́ ну́жда, что сотворю́ стра́стнцие сей? Не вем. Не́кто же от предстоя́щих, помо́щник, глаго́лемый си́це: Даждь ми сию́ рече́. И кня́зю повеле́вшу, поя́т ю́ в свой дом: и́же и той словеса́ блаже́нныя в се́рдце прии́м, я́коже и коментари́сий боже́ственным измени́ся премене́нием. И нау́трия предста́в со свято́ю кня́зю рече́: О́ иге́моне, на́ша у́бо познава́й коли́ка и́мут: зане и аз христиани́н есмь, и Христа́ испове́даю Бо́га И́стиннаго, и наде́жду обетова́нием тще́тну тебе́ происхода́таих: лу́чше бо лгав насле́днику ми Христу́ бы́ти, не́жели и́стинствовати, и о́гня гее́нскаго приобрести́. Тебе́ же бы лу́чше благодари́ти И́стиннаго Бога, изба́вльшаго тя к Нему́ приити́, я́коже ему́ обеща́лся еси: ты же не точию таково́е сотвори́в, но и безу́мен яви́лся еси, благода́рственницу твою́ разли́чным му́кам пре́дал еси́ стра́стниче, си́це рече́, и князь мече́м главу́ его́ отсече́. Блаже́нней же сковраду́ разжже́г, и на ней ту просте́рти повеле́, смолу́, и ма́сло, и воск возлива́я на вели́кое разжже́ние сковрады́. Помо́щник же мече́м муче́ние соверши́в, взы́де ко Го́споду. Блаже́нная же помоли́вшися Бо́гу, взы́де на сковраду́: и я́ко ту восприя́т сковрада́, разсе́деся, и вели́ки и́скры испусти́вши, попали́ мно́жество предстоя́щих. Но и князя зле го́рцей сме́рти пла́мень предаде́. По́слежде же вели́цей пе́щи разжже́не, и в ню вве́ржена бысть свята́я с Ева́грием, и Мака́рием, и со ине́ми нема́лыми. И та́ко блаже́нную кончи́ну восприя́т.

Седя́щу не́когда отцу́ Арсе́нию в Кано́пе, прии́де от Ри́ма не́кая сигклитики́я де́ва бога́та зело́ и боя́щися Бо́га, хотя́щи ви́дети его́. И прия́т ю́ Фео́фил архиепи́скоп, и шед к нему́, моли́ ста́рца прия́ти ю́, глаго́ля: «Прии́де де́ва от Ри́ма», сигклитики́и же род ея́ сказу́я, и хо́щет тя ви́дети. Ста́рец же не возлюби́ ея́ прия́ти. Егда́ же возвести́ша ей сие́, и повеле́ оседла́ти клюся́та, глаго́лющи: «Ве́рую Бо́гови, хощу́ ви́дети его́, суть бо и в на́шем гра́де мно́зи челове́цы, но проро́ка приидо́х ви́дети». И я́ко прии́де близ ке́ллии ста́рца, по смотре́нию же Бо́жию упраздни́ся вне ке́ллии, и ви́девши она́, припаде́ на но́зе его́. И воздви́же ю́ со гне́вом, глаго́ля: «А́ще лице́ мое́ хо́щеши ви́дети, виждь». Она́ же от стыда́ не смотря́ше на лице́ его́. И рече́ ей ста́рец: «Не́ си ли слы́шала дел мои́х, сих ли ви́дети тре́буеши, ка́ко же сме́ла еси́ толи́ко дерзнове́ние сотвори́ти? Не ве́си ли, я́ко жена́ еси́, и несть ти ле́по исходи́ти ка́мо? Или́ да в Рим ше́дши рече́ши други́м жена́м: ви́дех Арсе́ния: и сотворя́т мо́ре путь, гряду́ще ко мне». Она́ же рече́: «А́ще хо́щет Бог, не наста́влю никого́же се́мо приити́, но моли́ о мне». Он же отвеща́в рече́ ей: «Молю́ся Бо́гу, да поги́бнет па́мять твоя́ от мене́». И се слы́шавши, изы́де смире́на, и смуще́на умо́м. И па́ки рече́ ему́: «Моли́ся за мя». И посе́м я́ко прии́де она́ во град, и от ско́рби жа́ждею впаде́ во огнь. И возвеще́но бысть архиепи́скопу, я́ко боли́т. И прише́д к ней, моля́ше уве́дети, что есть боле́знь ея́. Она́ же рече́ ему́: «Добро́ бы бы́ло, а́ще не бых приходи́ла се́мо. Реко́х бо ста́рцу: Помяни́ о́тче. И он рече́ ми: Молю́ Бо́га, да потреби́тся па́мять твоя́ от се́рдца моего́. И се аз умира́ю от ско́рби». И глаго́ла ей архиепи́скоп: Не ве́си ли, я́ко жена́ еси́, и враг жена́ми брань твори́т святы́м? Сего́ ра́ди си́це тебе́ рече́ ста́рец, о души́ же твое́й мо́лится присно. И та́ко уте́шишася помышле́ния ея́, и и́де с вели́кою ра́достию в дом свой.

Бра́тие, подвиза́йтеся я́ко во́ини царе́вы, до́ндеже и́мате вре́мя. Се ве́дуще яко нетле́ннаго ра́ди венца́, предлежи́т нам подвиза́ние, на очище́ние грехо́в, и на жизнь ве́чную. Сотвори́те у́бо очище́но целому́дрие, все́ми делесы́ ва́шими, е́же есть ма́ти послуша́ния. Отве́рзите же от себе́ малоду́шие, и облецы́теся ве́рою вся́чески: я́ко да ви́дев Госпо́дь души́ ва́шея единоду́шие, все́ми укрепи́т вы до́брыми де́лы. Возненави́дите злу́ю ле́ность ненавиде́нием вся́цем, и злый нрав, и за́висть, Го́спода ра́ди. Я́коже есте́ оста́вили роди́теля своя́ по пло́ти, други́е же и име́ния. А́ще бо в нача́ле осла́бите по́мысл си, труд и́мате и тщету́. А́ще приключи́тся нам когда́ что, тогда́ не поро́пщем Го́спода ра́ди: ропща́й бо, исчезнове́ние твори́т себе́, я́ко не от своего́ предложе́ния де́лает. Ты у́бо мудр сый, не возненави́ди слабе́йших бра́тий, ни ревну́й в безстра́шии Бо́жии живу́щым. Се ве́дый испы́тно, я́ко отпа́даяй, сам ся отмета́ет: и побежда́яй венча́емь быва́ет. И па́ки: Не возненави́ди бра́та, еда́ ка́ко его́ страсть обошла́ есть, ея́же ты не веси, и сего́ ра́ди не́мощь прихо́дит. Подоба́ет па́че миловати, и моли́ти за него́, а́ще и оскорбил́ есть неми́лостиво, но ты подвиза́йся добре. Ве́дый буд́и, к Кому́ прише́л еси. Се бо предло́жит ти вре́мя, на собрание бога́тства нетле́емаго, служе́нием и плодоноше́ние е́же к бра́тии.

Те́мже возлю́бленне, а́ще потребля́еши гной сре́дняго дворца́, потреби́ и вну́трения мирски́я по́хоти. А́ще ли помета́еши пепел ска́лочный, со мно́гим смире́нием соверша́й де́ло. Помяни́ проро́ка глаго́люща: Зане́ пе́пел, я́ко хлеб ядя́х, и питие́ мое́ с пла́чем растворя́х. Поразуме́й же возлю́бленне нетли́маго, и воспомяни́ пла́мень ве́чный хотя́щий попал́ити гре́шники. Пла́чися, зане́же согреши́л еси́, ку́пно же и за мя гре́шнаго, я́ко да оставле́ние грехо́в пода́ст нам Госпо́дь. Емуже сла́ва, ны́не и при́сно, и во ве́ки веко́в. Ами́нь.