Стихи́:

Сподо́бился еси́ Харала́мпие мече́м умре́ти:

Све́тлость получи́в и ра́дость му́ченическую:

В девя́тый Харала́мпие посе́чен под горта́нем.

Святы́й Харала́мпий бя́ше в ца́рство Се́вирово, и Лукиа́на иге́мона, в Магниси́и гра́де епи́скоп, и уча́ пути́ и́стинному. Ят же быв, и совлече́н от свяще́нническия оде́жды, та́же содра́ша ему ко́жу всю теле́сную. И я́ко зря́ше его́ иге́мон терпя́ща, разъяри́вся, и свои́ма рука́ма нача́т строга́ти свята́го: и внеза́пу изсхо́ста его́ ру́це, и прилепи́стася к телеси́ свята́го, и́же и помо́льшуся свято́му, а́бие здра́ва его́ сотвори́. Тогда́ ви́девше слуги́ Порфи́рий и Ва́птос, ве́роваста во Христа́, та́коже и жены́ три от та́мо предстоя́щих: и́хже всех емь иге́мон, мно́ги му́ки наложи́ на них, и главы́ их отсече́. А́ще бо и исцеле́, но пребы́сть в неве́рии.

Стихи́:

В обруче́ние де́вы отрокови́цы о́бе,

Жени́х подае́т де́рзость к пла́меню:

О́на Па́вла раба́ Христо́ва,

Христо́вы р́ади любве́ вы́ю ей отсеко́ша.

В сих у́бо Енна́фа бя́ше от Газсо́нския ве́си. Валенти́на же от страны́ Кесари́йския. Фирмилиа́ну же иге́мону приведена́ бысть Енна́фа до́блественная деви́ца, и вопроше́на бы́вши, Христа́ испове́да. Бие́на бысть вельми́, и на дре́ве пове́шена и стро́гана бысть. Честна́я же Валенти́на, и та деви́ца су́щи: и соде́ловаемая суро́вая и безчелове́чная не терпя́щи, приведена́ и та бы́вши, и повеле́но бысть ей пожре́ти: бя́ше бо близ суди́ща ка́пище поста́влено. Да я́ко к ка́пищу приведена́ бы́вши, ка́мень, на ка́пище до́блественная кре́пко ве́ргши, и к належа́щему огню́ себе́ обрати́. Но мучи́тель у́бо разъяри́вся, по ре́бром ея́ наложи́ му́ки, ели́ки несть мощно изрещи́, и обою́ ме́чною сме́ртию осуди́. По сих к по́двигу приведена́ бысть Па́вла, и мно́гим му́кам приобщи́вшися, и превы́ше всех Христо́вою благода́тию бы́вши, и тамо ме́чным муче́нием осуждена́ бысть. Она́ же Бо́га благодари́вши, и к единове́рным поклони́вшися, прия́т посече́ние, и Бо́гу дух предаде́.

Оте́ц Ма́рко живя́ше в вели́цей пусты́ни, еди́н живы́й. Бе же ниже́ его́ монасты́рь иму́щь мно́ги мона́хи. Седя́ше же ста́рец при пути́, виде диа́вола иду́ща во образе челове́чи, имя́ше же ри́зу косма́ту. И при ко́емждо ко́сме ты́ковца вися́ше. И глаго́ла ему́ ста́рец: Ка́мо и́деши? И той рече́: Иду́ воспомяну́ти бра́тии. Отвеща́ ста́рец: Что же суть ты́ковцы сия́? И рече́ диа́вол: Вкуше́ния несу бра́тии. И рече́ ста́рец: Вся ли сия́? И той рече́: Ей, а́ще еди́но бу́дет неуго́дно ему́, принесу́ и друго́е; и по еди́ному подава́я, вся́ко поне́ ки́йждо еди́н прии́мет. И сие́ рек отъи́де. И оста́ ста́рец стреги́й путь, до́ндеже возврати́тся. И па́ки ви́дев его́ ста́рец гряду́ща, глаго́ла ему́: Спаси́ся. Отвеща́ диа́вол: Где ми есть спасти́ся? И рече́ старе́ц: Почто́? И рече́: Я́ко вси мне бы́ша зли мона́си, и никто́же мене́ прие́млет. И рече́ ста́рец: Ни еди́наго ли в них и́маши дру́га себе́. Отвеща́ диа́вол: Еди́наго то́кмо и́мам в них бра́та, и той мене́ слу́шает. И егда́ прииду́, ве́ртится я́ко порпли́ца пре́до мно́ю. И рече́ ста́рец: Ка́ко и́мя мона́ху тому́? И рече́ диа́вол: Ферапо́нт. И рек же сия́ отъи́де. Воста́в же Ма́рко, по́йде до монастыря́ того́. И слы́шавше бра́тия, взе́мше ва́ия изыдо́ша в сре́тение ему́: и ки́йждо гото́вяшеся, мня я́ко у мене́ и́мать вита́ти ста́рец. Он же иска́ше кто есть нарече́нный Ферапо́нт. То́йже прия́т его́ ра́дуяся. И я́ко начаста беседовати, глаго́ла ему́ ста́рец: Ка́ко живе́ши бра́те? Отвеща́: До́бре молитвами твои́ми. Рече́ ему́ ста́рец: Еда́ па́костят ти злыя мы́сли? Он же отвеща́: Обче ныне добр есмь, стыдя́шебося яви́ти я́. Глаго́ла ста́рец: Се коли́ко лет пощу́ся, и вси чтят мя, но еще́ па́кости ми де́ет дух любодея́ния. И рече́ Ферапо́нт: Вои́стинну отче аз отню́д облада́емь есмь от ду́ха любодея́ния. Ста́рец же иска́ше други́х мы́слей гу́бящих ду́шу его́, до́ндеже все испове́сть ему́. Посе́м рече́ ему́: Ка́ко пости́шися? Отвеща́: от девя́тыя годи́ны. И глаго́ла ста́рец: Пости́ся до ве́чера, и а́лчи, и учи́ся из уст от Ев́ангелия, и от ины́х книг святы́х: И а́ще взы́дет зла́я мысль, не приими́ ея́, и помо́жет ти Бог. И утверди́в его́ ста́рец, и́де в пусты́ню. И стреги́й пути́, ви́де де́мона. И рече́ па́ки ста́рец: Ка́мо и́деши? И рече́: Воспомяну́ти бра́тии: и ми́ну. И егда́ па́ки возврати́ся, рече́ ему́ святы́й: Ка́ко бра́тия? И отвеща́ диа́вол: Вси зли ми бы́ша. И его́же пре́жде име́ях дру́га послу́шающа мене́, и не ве́де от кого́ разврати́ся и той, и не слу́шает мене́, но всех горе́е ми бысть. И кля́тся к ста́рцу та́мо уже́ не ити́, ра́зве в прииду́щее ле́то. И то рек, отъи́де. Ста́рец же святы́й вни́де в хи́жу свою́, спасе́ бра́та Ферапо́нта, и диа́воле злохи́трие обличи́в.

Бра́ту не́коему прии́де брань, и возвести́ а́вве Иракли́ю. И глаго́ла ему́ он укрепля́я его́: я́ко не́кто ста́рец, имя́ше ученика́ послушли́ва зело́, на мно́га ле́та. Еди́ною же брань бысть ему́: и сотвори́ мета́ние ста́рцу, глаго́ля: сотвори́ ми еди́ному бы́ти. Глаго́ла ему́ ста́рец: виждь ме́сто, и сотвори́м ке́ллию. И шед я́ко зна́мение еди́но обре́те, и прише́дше сотвори́ша ке́ллию. И глаго́ла бра́ту: е́же глаго́лю ти, сотвори́, егда́ вза́лчеши, яждь: егда́ вжа́ждеши, пий: егда́ воздре́млеши, спи, то́чию из кел́лии не исходи́ до суббо́ты, и тогда́ прии́ди ко мне. Брат же сотвори́ два дни по за́поведи. В тре́тий же день уны́в глаго́ла: что сие́ сотвори́ ми ста́рец? И воста́в пев мно́ги псалмы́, и по захожде́нии со́лнца яде́: и воста́в и́де спа́ти на рого́зе свое́й, и ви́де ефио́па лежа́ща, и скре́гчуща зубы́ свои́ми нань. И со стра́хом мно́гим тек, прии́де к ста́рцу, и толкну́ во врата́ глаго́ля: а́вво, поми́луй мя, и отве́рзи. Ста́рец же позна́в, я́ко не сохрани́л есть сло́во его́, не отве́рзе ему́ до зау́тра. Во у́тро же отве́рз, обре́те его́ моля́щася, и уще́дрив его́ введе́. Тогда́ глаго́ла ему́: моли́ся о́тче, ефио́па че́рна ви́дех, внегда́ идо́х спа́ти. Он же рече́ ему́: се пострада́л еси́, поне́же не сохрани́л еси́ сло́во мое́. Тогда́ даде́ ему́ чин проти́ву си́лы его́, и по ма́ле бысть иску́сен мона́х. Бо́гу на́шему сла́ва, ны́не и при́сно, и во ве́ки веко́в. Ами́нь.