Стихи́:

Ру́це возведе́ Меле́нтие к Бо́гу:

В ру́це Твои́ и ду́шу предлага́ет глаго́ля:

В дванадеся́тый Меле́нтие в зе́млю положи́ся.

Сей за премно́гую доброде́тель, и е́же ко Христу́ честну́ю любо́вь, ревни́тель бысть в толи́ко, я́коже в нача́ле его́ во град тому́ вше́дшу, внегда́ свяще́ния его́ день наста́, любо́вь и́же к нему́ влеки́й ко́ждо к своему́ до́му призыва́ху свята́го, хотя́ще освяти́тися вхо́дом его́. Ни поне́ три́десять дней испо́лни во гр́аде, от е́же на и́стину вражду́ющих, изгна́н быв. Царю́ же тогда́ неи́стовствующу, Бо́гу та́ко попусти́вшу. По беззако́ннем же его́ изгна́нии, шед в Константи́нь град. И за два ле́та та́мо пребы́в. Па́ки призыва́ют его́ царе́вы пи́смены, не вдале́че же, но во Фраки́ю. Та́коже и друзи́и епи́скопов от мно́жества вселе́нныя та́мо снидо́шася, и ты́я ца́рскими же пи́смены при́званы церко́вных ра́ди исправле́ний, и́же издале́ча. Зане́ волне́нию бу́рну напа́дшу, и нача́ло тишины́ и смире́ния прия́т, тогда́ же уди́ви вся вели́кий сей. Глаго́лющым у́бо ариа́ном о развраще́нии правосла́вныя ве́ры, па́че же о само́м боже́ственнем Та́инстве. Тогда́ воста́в богослове́сный сей, пра́вила по зако́ну управле́ния име́я, и лю́дем прося́щым у него́ ско́раго уче́ния. Он же по боже́ственней благода́ти, хотя́ еретики́ устраши́ти и посрами́ти, и вся лю́ди удиви́ти, показа́ им три персты́, и не быть зна́мения. Пото́м же два совоку́пль, и еди́н пригну́в, благослови́ лю́ди: и изы́де от него́ огнь я́ко мо́лния. И достохва́льный он испусти́ глас: трие́ у́бо ипоста́си разумева́ем, о еди́ном же существе́ бесе́дуем. И та́ко посрами́ еретики́ вско́ре. Последи́ же ма́лу вре́мени мину́вшу, досто́йным сном усну́в, и Б́огу в ру́це дух свой предаде́. Сего́ вели́каго блаже́нный Златоу́ст похвала́ми почте́.

Стихи́:

Оде́жда Мари́нова пове́дует Мари́ю,

Погреба́ние Мари́ино объявля́ет Мари́на.

Та же́нскую измени́вши оде́жду, со свои́м е́же по пло́ти отце́м Евге́нием, вни́де в монасты́рь и постриже́ся, и служа́ше с ю́ными, бра́тиею не зна́ема я́ко жена́ есть. Еди́ною у́бо прележа́вши в гости́ннице, оболга́на бысть, я́ко растли́ гости́нников дщерь. Она́ же поноше́ние прии́мши, и грех е́гоже не соде́ла испове́даше. Тем из монастыря́ изгна́на бысть, и вне за три ле́та томи́вшися, и его́же не роди́ младе́нца пита́ше. Не́когда же прия́та бысть во оби́тель, и бя́ше после́дствуя ей отроча́ му́жеский пол. Откры́ся же я́же о ней. И́бо внегда́ уме́рши ей, и бра́тию опря́тавшым ю́, обре́теся жена́ су́щи. Гости́нникова же дщи су́щи лука́вым ду́хом объя́та бы́вши, нево́лею де́ло испове́да, яко от не́коего во́ина растле́на бы́вши, а не от Мари́на. И та́ко внеза́пу игу́мен и бра́тия, и́же по всегда́ окая́нницу нарица́ху, блаже́нству вели́ку сподо́биша.

Стихи́:

Никаково́ что во что вним́ая, Анто́ние до́льним,

По пра́вде добро́т вы́шних сподо́бися.

Сей ро́дом бя́ше, о́во от Аси́и, о́во от Евро́пы: тре́тие же оте́чество его́ бя́ше ца́рствующий град, и́же и воспита́ние его́, и де́тския его́ пелены́ отложи́, и в ме́ру во́зраста изве́д, и кни́гам наказа́, и по сих па́стыря стяжа́. Да внегда́ после́дним сбы́тием хотя́щим, духо́вная благода́ть на мно́зе мно́гажды прообразова́. И се же ди́вному еди́наче младе́нцу су́щу, хлеб предложи́ти, и кади́ло держа́ти, я́коже и в це́ркви боже́ственную Литурги́ю соверши́ти сматря́ше, и того́ слу́жбу соверша́ти в неве́дении во́зраста упра́ви. Вре́мени же прише́дшу и́ноческое прия́т житие́, и де́тельную прему́дрость му́жески ше́ствоваше, и не хотя́щу поста́влен бысть презви́тер: и повеле́нием патриа́рха игу́мен быва́ет. Он же ктому́ бде́ния и посты́, и е́же в моли́твах непреста́нно после́дствоавше. Тогда́ и оте́ц его́ в мона́шеский о́браз совхо́дит. И та́ко вре́мя прии́м, свои́ма рука́ма ми́лостыню соде́ловаше. Те́мже вели́кому сему́ сквозе́ тесноты́ преходя́щу, и ми́лостыни де́ло творя́щу, у́зол не́кто прине́с зла́та дая́ше ему́, си́це рек: Приими́ сие́ на разда́ние ни́щым. Рука́ же явля́шеся иму́щая зла́та, очи́ма же неви́димь бя́ше подава́яй. От сих вели́кий подава́ет изоби́льно до́брым. И та́ко вре́мени наста́вшу, и архиере́йскому престо́лу судо́м и жре́бием свяще́ннаго собо́ра и царя́, той архиере́й Константи́ня гра́да поста́влен бысть. И я́ко крила́т си́лою Свята́го Ду́ха ста́ростным телесе́м, вся це́ркви обте́к, мольба́ми Бо́гу моля́ся. И вре́менных страда́ний соодоле́ние подъе́мля, ели́ко по си́ле. И в недоуме́нии одержи́мыя кли́рики, и ну́жную потре́бу иму́щих, неску́дное бога́тство подая́нием, су́щее недоуме́ние отреши́. И нищих ты́сящею во вхо́дех ми́лостынею утеша́ше. Мно́гим же мно́гими пови́нник быв. И чудеса́ соде́лав ве́лия. И в ста́рости глубо́це ко Го́споду отъи́де. Соверша́ется же собо́р его́ в его́ оби́тели.

Пове́даше Григо́рий па́па Ри́мский: я́ко брат не́кий бе в монастыре́ мое́м, всем гове́нием Бо́гу рабо́тая, и житие́ благопотре́бно творя́, и во всем по пра́вилу ходя́. И того́ плотски́й брат по нем прия́т бысть в монасты́рь, и никоея́же о свое́й души́ по́льзы сотвори, ни мона́шескому внима́ше уста́ву. Брат же его́ дале́че от жития́ и от обы́чая его разделя́шеся. Живя́ше же прия́тый брат в монастыре́ ну́ждею па́че, не́жели во́лею, и все́ми де́лы развраще́н бе: но бра́та его́ ра́ди все́ми терпи́мь бе́яше. Бя́ше же злоу́ст, краси́в ри́зами, нра́вы неле́п, и терпе́ти не можа́ше, а́ще кто ему́ о свято́м житии́ и о покая́нии возглаго́лет. И бысть житие́ его́ всей бра́тии ви́дети тя́жко: но у́бо я́коже рече́но есть, за благода́ть бра́та своего́ бе все́ми терпи́мь. Руга́шеся же зело́ тем, а́ще кто что о покая́нии своея́ непра́вды глаго́лет: не то́чию твори́ти, но и послу́шати не хотя́ше. И николи́же на уста́в до́браго жития́ пону́дися приити́, но клены́йся, и гне́ваяся, и руга́яся бя́ше, в ту поги́бель иды́й. Гра́да же того́ мно́ги лю́ди глад порази́: пораже́н бысть и той тем, доне́леже приити́ ему́ к сме́рти. И егда бысть у кончи́ны душа́ его́, снидо́шася бра́тия, да преставле́ние его́ моли́твою защити́ли бы́ша, уже́ те́ло его́ от ногу́ ме́ртво бя́ше: во еди́нех пе́рсех толи́ко животная теплота дыха́ше. Вся же бра́тия та́ко нача́ша моли́тися вельми́ за него, я́ко уже́ его́ ви́дяху ско́ро сконча́тися. Тогда́ нача́т напра́сно то́йже бра́тии око́ло стоя́щей приле́жно, ели́ко моги́й, вопи́ти, е́же бы от моли́твы отста́вити, глаго́ля: Отъиди́те, отъиди́те, се зми́еви на снедь пре́дан есмь, и́же вас ра́ди стоя́щих, пожре́ти мене́ не мо́жет: главу́ мою́ уже́ в свои́х устне́х держи́т: дади́те ме́сто, дади́те, да мене́ па́че не му́чит, но сотвори́т, е́же хо́щет твори́ти. А́ще ему́ на изъяде́ние пре́дан есмь, то что вас де́ля до́лго стражду́? Тогда́ нача́ша бра́тия глаго́лати ему́: что сие бра́те, е́же глаго́леши? Прекрести́ся святы́м кресто́м. Отвеща́ он ели́ко моги́й глаго́ля: хощу́ прекрести́тися, но не могу́, я́ко змий да́вит мя. Егда́ же бра́тия то услы́шаша, па́дше на зе́млю ниц, со слеза́ми нача́ша за избавле́ние его́ Бо́га моли́ти. И се ско́ро нача́т лу́чши бы́ти больны́й, и уже́ можа́ше и ра́доватися, глаго́ля: Сла́ва Бо́гу, се змий, иже на изъяде́ние мя похи́тил бе за грехи́ моя́, и ны́не у́бо бежи́т моли́твами ва́шими отгна́н, и не мо́жет стоя́ти. И па́ки днесь помоли́теся о мне, я́ко обрати́тися гото́в есмь, и сего́ све́та житие́ отню́д оста́вити хощу́. Тогда́ пощаже́н бысть на живо́т, и всем се́рдцем к Богу обрати́ся: и многодне́вными ра́нами нака́зан к житию́ богоуго́дну. И по ма́лех днех преста́вися к Бо́гу, и уже́ о́наго зми́я не ви́де покая́ния ра́ди, но пре́йде от сме́рти к животу́, ми́лость Бо́жию получив: Емуже сла́ва, ны́не и при́сно, и во ве́ки веко́в. Ами́нь.