Чтение на день: Февраль, 16 число (старый стиль)
По шестой песни:
И поется кондак и икос (или мученичен, аще несть).Стихи́:
Па́че всех Тебе́ Памфи́л полюби́, Сло́ве,
И главно́е посече́ние вменя́ше любо́вь:
Па́вел, Селе́вк, по Селе́вце и Уа́лент:
Ви́жду сече́ние ра́дующихся
И посече́ние стерпе́ти:
Идя́ху ко огню́ му́ченицы боже́ственнии дво́и,
Боже́ственыя любве́ огне́м разжже́гшеся и о́ба:
Распя́ша раби́ льсти́вии на дре́ве
Феоду́ла, раба́ распе́ншагося:
Зва́ния проро́ческая и концы́ му́ченичестии
Хва́лятся пять му́ченик усекнове́ннии:
В шестнадеся́тый посече́ ме́чное острие́ Памфи́ла.
Си́и сла́внии му́ченицы, в шесто́е ле́то гоне́ния Диоклитиа́нова, на муче́ние приведе́ни бы́ша, и от разли́чных у́бо градо́в, и в начина́ниих и власте́х, во еди́ну ве́ру Христо́ву совоку́пльшеся. О́браз же я́тия их бя́ше сице́в: Внегда́ тем хотя́щым во врата́ гра́да Кесари́йскаго вни́ти, вопроше́ни бы́ша стрегу́щими врата́: Вы кто есте́? И отку́ду и́дете? Они́ же христиа́ны себе́ испове́даша, и оте́чество Вы́шний Иерусали́м име́ти. Те́мже я́ти бы́ша, и предста́ша Фирмилиа́ну иге́мону. Илия́ же, и Иереми́я, и Иса́ия, и Дани́ил, и Саму́ил, по про́чих му́ках ме́чное осужде́ние прия́ша. С нимиже посечени быша, Памфи́л, Селе́вк, и Уа́лент, и Па́вел. Порфи́рий же господи́на своего́ те́ла иски́й, ят бысть и пре́дан огню́. Та́коже и Иулиа́н лобыза́я телеса́ святы́х, в пла́мень вве́ржен. Феоду́л же на дре́ве распя́т бысть, и та́ко сконча́ муче́ние. Соверша́ется же собо́р их, во святе́й вели́цей це́ркви.
В то́йже день па́мять святы́х му́ченик, и́же в Мартиропо́ли, и преподо́бнаго Мару́фа, созда́вшаго град во и́мя му́чеников
Стихи́:
Зва́ние дел му́ченическое, зако́нный град,
Мно́гих в том му́чив мече́м:
Возлюби́в Бо́га Ма́руфа вельми́ зело́.
Сей святы́й Мару́фа епископ бя́ше, по́слан же быв от Феодо́сия царя́ гре́ческаго, хода́тая к царю́ пе́рсскому, и вели́кия ра́ди его́ доброде́тели, вели́цей че́сти от пе́рсян сподо́бися. Па́че же и царе́ву дщерь, лука́вым ду́хом одержи́му уврачева́. Испроси́ же в пе́рсех пострада́вших му́ченическая телеса́, и во и́мя их град созда́в, и в том тех положи́. И по ле́тех мно́зех у́спе и той в ты́я дни, внегда́ град созда́ и обнови́. Те́мже пра́зднствуется и его́ па́мять ку́пно с му́ченики.
В то́йже день при́тча от патерика́ душеполе́зна, ю́же не́кто сказа́ отце́м
Прост муж не́кто люди́н, зело́ гове́ин, егда́ приидо́ша мно́зи к Пи́мену, прии́де и той с ни́ми, и вопроша́ху словесе́ от ста́рца. И рече́ Пи́мен к просто́му му́жу: Рцы сло́во к бра́тии; отвещ́а он: Аз ли рещи́ и́мам окая́нный. И ну́дяше его́ мно́го. И глаго́ла: Аз у́бо не вем ничто́же, но слы́шах при́тчу от вели́каго ста́рца зна́ема, глаго́ля: Поне́же возжела́вшу ми ви́дети царя́, веди́ мя та́мо. И той рече́ ему́: Иду́ с тобо́ю до полу́ пути́. И рече́ па́ки ино́му прия́телю. Веди́ мя к царю́. И глаго́ла ему́: Иду́ с тобо́ю до пала́ты. И та́мо ино́му дру́гу рече́: Веди́ мя до царя́. Глаго́ла ему́: Аз тя веду́ со дерзнове́нием к царю́, и глаго́лю о тебе́. И ре́ша ему́: Скажи́ нам при́тчу. И рече́: Пе́рвый, поще́ние, доводя́ до среды́ спаси́тельнаго пути́. Вторы́й, чистота́, доводя́ до небе́с. Тре́тий есть послуша́ние, вводя́щее со дерзнове́нием к Бо́гу. И вси по́льзу прии́мше, похвали́ше Бо́га. Ему́же сла́ва, ны́не и при́сно, и во ве́ки веков. Ами́нь.