Стихи́:

Ти́рон, явле́нный и всесоверше́нно избра́нный ору́жник,

Ко Го́споду принесе́ себе́, всесожега́ема ору́жника:

В седмы́й на́десять огне́м Ти́рона опали́ша.

Сей святы́й му́ченик Фео́дор Ти́рон во времена́ бя́ше Максимиа́на и Макси́ма царе́й: нарица́емь от митропо́лии Амаси́йскаго гра́да, от села́ глаго́лемаго Хумиало́на. И уже́ во́инство ти́ронское премени́в, и под чи́ном препози́та Ври́нги прилуча́ется. И́же от него́ на испыта́ние ят быв, и испове́да Христа́ И́стиннаго Бо́га бы́ти, и дела́ рук челове́чих поху́лив, вре́мени пода́вшуся ему́ на пребы́тие ссе́чени: и́бо и́дола бого́м ма́терь, я́коже е́ллини блядосло́вят, попали́. Того́ ра́ди ят бысть, и самоде́льца бы́ти запале́нию испове́дав. Сего́ ра́ди пе́рвее пове́шен, и стро́ган: та́же в сковраду́ о́гненную ввержен, и́же и сконча́ся в ней. Соверша́ется же собо́р его́ во святе́м его́ муче́нии, су́щем в Фораки́и: и в суббо́ту пер́вую седми́цы свята́го поста́, внегда́ чу́до кутии́ ра́ди от него́ бысть, изба́вльшее правосла́вные люди от оскверне́наго бр́ашна идоложе́ртвеных.

Стихи́:

Оста́вльши зе́млю Мариа́мна деви́ца,

И́же от Де́вы Мари́и Христа́ ви́дети.

По вознесен́ии Го́спода на́шего Иису́са Христа́, прише́д апо́стол Фили́пп с Варфоломе́ем, и Мариа́мною свое́ю сестро́ю во Иерапо́ль, за е́же пропове́дати сло́во Христо́во, и пове́шен сконча́ся. И егда́ прежде сконча́ния помоли́тися апостолу, Бо́гу, просе́деся земля́, и пожре анфипа́та, и и́же под ним лю́дие: Про́чии же убоя́вшеся, помоли́вше свята́го Варфоломе́я, и святу́ю Мариа́мну, и тем ви́сящым, да не и ти́и прося́дутся. И помоли́ша они́ свята́го Фили́ппа, и не просади́ их, но и просе́дшыяся изведе́: анфипа́та же и ехи́дну оста́виша до́лу. Тогда́ отпусти́ша Варфоломе́я и Мариа́мну. И Варфоломе́й шед во Алфени́йский град, и́же в вели́цей Арме́нии, и ту распя́т бысть сконча́ся: ту же и погребе́н бысть во Алва́не вели́ких ра́мен. Свята́я же Мариа́мна ше́дши в Ликао́нию пропове́даше сло́во Христо́во, и мно́гия крести́вши, с миром у́спе.

Стихи́:

Зе́млю раскопа́в я́ко ди́келем реч́ию,

Ми́ну отну́д принося́ сокрове́нно.

В ца́рство христолюби́ваго Маркиа́на, блаже́нный Ми́на, во еди́ну от но́щей став над му́жем не́которым, Филома́та глаго́лемаго, во икона́дстем чи́не вмене́не, я́ко зде, рече, лежи́т Ми́на Калликела́д, и́же под земле́ю сокрове́н, на краи́ гра́дстем песце́, показу́я и ме́сто пе́рстом иде́же лежа́ше. Боголюби́вый же он муж, у́треневав воста́ и Мариа́ну нуме́ру дру́гу своему́ су́щу, ви́димое изве́стно пове́да. Он же па́ки глаго́лемая объяви́ царю́. И а́бие в во унарече́нное ме́сто во́ины посла́, и́же и на́скоре раскопа́вше, обрето́ша ковче́г желе́зен, иде́же му́ченическое лежи́мо бя́ше те́ло. И с ним скрижа́ль приле́плену, и написа́нная пи́смена явля́ющая, положи́ти му́ченика на ме́сте иде́же изво́ли. И сложи́ша у́бо скрижа́льное написа́ние, и обрето́ша мимоше́дших лет четы́ре ста. Те́мже со всем наро́дом благода́рствие Бо́гу возда́ша.

Пове́даше оте́ц Сисо́й глаго́ля: Егда́ бех в ски́те со отце́м Мака́рием, и ше́дше седмь нас, на жа́тву ная́хомся: и се еди́на вдови́ца кла́сы собира́ющи бе за на́ми, и не преста́яше пла́чущися. Призва́в же Мака́рий старе́йшину села́ того́, и рече́ ему́: что есть ста́рице сей, я́ко всегда́ пла́чет? Глаго́ла ему́: я́ко муж ея́ закла́д взем у не́коего, и у́мре внеза́пу, не пове́да сей, где положи́. И господи́н закла́да ради того хо́щет ю́ поя́ти и ча́да ея́ в рабо́ту. Глаго́ла ему́ Мака́рий: рцы ей, да прии́дет к нам, иде́же почива́ем полу́дне. И прише́дши ей, рече к ней ста́рец: что таќо всегда́ пл́ачешися? Она́ же рече́ ему́: муж мой внеза́пу у́мре, взял же бе у не́коего зла́то блюсти́ ему́, и несть ми пове́дал, где сие скрыл. И рече́ к ней ста́рец: пойди, покажи́ ми ме́сто му́жа, где еси́ погребла́. И пои́м бра́тию, прии́де с не́ю. И прише́дшым им до гро́ба, рече́ ей ста́рец: Отъиди́ в дом твой. И помо́льшымся нам, воззва́ ста́рец мертвеца́ и́менем наре́к: О́нсий, где еси́ положи́л чуже́е сокро́вище? Он же отвеща́: В дому́ мое́м скрыл есмь под о́ною дско́ю одра́ моего́. Рече́ ему́ ста́рец: Усни́ па́ки, до́ндеже воскресе́ние бу́дет. Ви́девше же бра́тия, падо́ша от стра́ха на ногу́ его́. И рече́ им ста́рец: Отда́йте ми грех, не мене́ де́ля бысть сие́, ничто́же у́бо есмь аз, но вдови́цы сея де́ля, и сиро́т ея́, сотвори́ Бог вещь сию́. [Се же ве́дите, я́ко аще с ве́рою просит, и восприи́мет.] И шед возвести́ вдови́це, где лежи́т сокро́вище. Она́ же взе́мши даде́ е́ господи́ну его́, и свободи́ ча́да своя́. И слы́шавше сие́, вси просла́виша Бо́га.