Стихи́:

Моли́тву боже́ственый изры́гнув Лео́нт

И бесо́вския полки́ в страх введе́:

В осемнадеся́тый Лео́нт изры́гну я́рость.

Сей ди́вный оте́ц наш Лео́нтий премно́гаго его́ ра́ди целому́дрия и чистоты́, и жития́ и́стиннаго, архиере́йству ста́раго Рим́а, от е́же на святых почива́ющаго Ду́ха вруче́н бысть: и́же и житие́ богоуго́дно и нескве́рно показа́в. И е́же свою́ ему́ слове́сную па́ству преподо́бно упа́сшу, е́же и ерети́ческая хуле́ния погуби́ до конца́. Во вре́мени же том свято́му и вселе́нскому бы́вшу четве́ртому собо́ру, шести́ сот и три́десяти сше́дшихся оте́ц, мно́га списа́ния о правосла́вней ве́ре изложи́в. И е́же еди́но де́йство, и еди́ну волю, на Христа́ Бога на́шего, блядосло́вящих ерети́к воспяща́я изрече́ния. Еще́ же и богоме́рзских о́нех, супротивля́ющихся и́стине и претворя́ющих попра́. Боже́ственных оте́ц, богодохнове́нными словесы́ и повеле́нии, блаже́нный сей моле́нием всего́ свята́го собо́ра прекло́нься. И за мно́ги дни посто́м и бде́нием, и мольба́ми ко Го́споду прилежа́: и от Животворя́щаго Ду́ха испо́лнься, писа́ния о такове́м взыска́нии изложи́в, сугу́бо де́йство, и две во́ли, о Христе́ Бо́зе на́шем и́стинно проповедав: и сию́ еписто́лию посла́в к собо́ру, ю́же восприи́мше мно́жество преподо́бных оте́ц, и сию́ правосла́вию столп вмени́вше, и я́ко от уст Бо́жиих писа́нию изы́ти ве́ровавше, и о нем препочи́вше. И с дерзнове́нием на ерети́ческий собо́р собра́вшеся, и о́нех многоплете́нная шата́ния низложи́ша, и си́ми свяще́ннейшее слове́сне слага́шеся сосло́вие и утвержда́шеся. Богоуго́дный же Лео́нтий и еще́ дово́льствовав житие́м, и я́ко свети́ло доброде́тельми просия́, в глубо́цей ста́рости ко Го́споду отъи́де.

Стихи́:

Его́же возлюби́в Возлю́бленнаго Влады́ку,

Той зове́т тя ко оби́телем, и́хже возлюби́л еси́.

Сей бя́ше при Диоклитиа́не царе́, и Максимиа́не. От Каппадоки́и ро́дом быв, и христиа́ну роди́телю сын. Еще́ юн сый во́зрастом, в не́котором от та́мошних монастыре́й, мно́жество име́ющем па́че ты́сящи по́стник, и та́мо вшед, и от о́нех красне́йшая собра́в, де́латель иску́сен за́поведем Госпо́дним бысть. К поще́нию, и бде́нию, и к моли́тве упражня́яся, того́ ра́ди от всех люби́мь бя́ше и чуди́мь: кора́ми древе́сными то́чию облече́н, и пе́пел вме́сто хле́ба за о́смьдесять дний пребы́сть вкуша́я, и сна оша́яся: благопотре́бен во оби́тельных слу́жбах бра́тии бя́ше, всех я́ко влады́ки именова́ше и истязова́ше. Зми́я же моли́твою умертви́. И деви́цу не́которую неду́гом томи́му исцели́. О сем же уве́дев Ликини́й, я́ко телом кре́пок есть, во́инскому сосло́вию того́, и не хотя́ща совчиня́ет трекля́тый. То́йже ниже́ та́ко изобину́яшеся по́двига по́стническаго, но и во́инский нало́г терпя́ше: и неду́ги злы́я неи́стовныя, еди́ным проявле́нием врачева́ше. Не то́чию челове́ческия, но и ко́нския, и воло́выя, и вся́ких ины́х безслове́сных устрабляше боле́зни. Во вре́мени же том, Ви́ктору и Дорофе́ю, Феоду́лу же и Агри́ппе, добропобе́дным му́чеником, и ины́м мно́жайшым за Христо́ву ве́ру дручи́мым вельми́, соо́бщник тем изво́ли бы́ти блаже́нный. О́нем же Христа́ ра́ди сконча́вшымся, той копие́м ра́нен быв: но за е́же да мно́гия спасе́н, сохране́н бысть. Та́же Ликини́ю лю́тою смертию ду́шу окая́нную изве́ргшу. И вели́кому Константину волею Бо́жиею гре́ческую власть всю прии́мшу. И что таково́ сбыва́ется? О́трока благопотре́бна име́я царь, бе́сом нечи́стым одержи́ма, и свята́го призыва́я, тем того́ царь к нему́ о́ного приведе́: и сему́ помоли́вшуся, а́бие о́трок цельбу́ получи́. И нико́его ино́го да́ра про́сит, то́чию е́же во́инство оста́вити, и люби́мое безмо́лвие восприя́ти: тем и царя́ к сему́ спосо́бника имя́ше. И по е́же вспяти́тися тому́ иде́же пе́рвее пребыва́ше. Призва́ того́ страны́ Сина́йския архиерей, и тому́ не хотя́щу, иере́я того́ поста́ви: и вма́ле о́ному житие́ оста́вльшу. Вели́кий судо́м Бо́жиим и иере́йским, и всего́ людска́го при́чта, архиере́й Сина́йский поста́влен бысть. И проро́ческому да́ру сподо́бися, е́же о явлении проро́ческим соде́лованием не́которая воспомяну́ти, свята́го великоде́лие принести́ предлежи́т. Жена́ бо не́кая о нем слы́шавши, и хотя́щи благослови́тися от него́ прии́де: да внегд́а пред лице́м его́ ста́вши, вся соде́лованная о ней изде́тства сказа́: и наказа́в отсла́ ю́ утверже́ну. И диа́кона не́коего о́трока Иракли́йскаго, к нему́ прише́дша благослове́ния де́ля, деви́цу растли́вшу, того́ обличи́. И Дамиа́ну преподо́бному епи́скопу Силанде́йскому прише́дшу к нему́, и пове́давшу: я́ко теку́щая река́ в зиме́ наводня́ющися, мно́гия ни́вы и се́ла губи́т: и́же и еди́ною моли́твою на и́ну страну́ обрати́ ю́ тещи́. И и́на мно́гая соде́лав чудеса́, и́мже число́ бо́льше есть ста, я́коже и его́ писа́ние о нем пове́дует. Сей у́бо до́бре и боголюбе́зне пожи́в, и прикосну́тием рук, и се́нию теле́сною, и еди́нем у́бо сло́вом то́чию, неи́стовныя боле́зни врачева́ше. Испо́лнь дней быв, почи́ о Го́споде Спа́се на́шем Иису́се Христе́.