Стихи́:

Любя́й Архи́ппе Ка́мене краеуго́льнаго,

И любве́ ра́ди Его́ побие́н быва́ет ка́мением:

Страну́ лю́бящему Филимо́ну зла́чную,

Ло́жным же́злием бие́мь сукова́тым:

Просте́рше по земли́ би́ша Апфи́ю,

К небеси́ иму́щу о́ко серде́чное.

Си́и бя́ху в ца́рство Неро́ново, ученицы́ бы́вше свята́го апо́стола Па́вла. Пра́зднику же бы́вшу Артеми́дину в Колосса́ех, е́же есть град Фриги́йский, и сим славосло́вие Бо́гу принося́щым в це́ркви, напа́дше на них идолослужи́телие, про́чым же бежа́вшым, то́чию святы́м изоста́вшым, я́ти бы́ша, и приведе́ни ко Андрокли́ю. А́бие бие́н бысть Архи́пп, и не поко́рься пожре́ти и́долом, в ров до чре́сла вложе́н быв, и ка́мением побие́н первее, и от отроко́в сбоде́н, сконча́ся. Святы́й же Филимо́н и Апфи́я, разли́чно му́чени, сконча́стася.

Стихи́:

Му́жие тро́ица*, страда́ние благоуго́дно,

И му́жествоваше Тебе́, о Тро́ице, да́же и до посече́ния:

Венча́ Христе́ и Асклипиодо́ту,

Сей же главу́ мечь посече́.

Си́и предста́вше кня́зю, и не поко́ршеся ему́, мно́гими му́ками обложе́ни бы́вше. Пе́рвее же на дре́ве пове́шени бы́ша, и стро́гани ноготми́ желе́зными. Та́же из град во град преводи́ми и влеко́ми, звере́м лю́тым вда́ни бы́ша. Асклипиодо́та же пята́ми пха́на бысть, и на дре́ве растя́жена, превы́шши мук бы́вши. Тем и ку́пно вси ка́мением бие́ни бы́ша, и по о́стрых ме́стех влачи́ми, и мече́м главы́ их отсеко́ша.

Что тре́буеши, челове́че, книг мно́гих ища́, наставля́ющих тя к поле́зным, и пыта́еши учи́телей всех, глаго́ля: пове́дите ми, ка́ко ми спасти́ся? Се вся кни́ги уча́щыя в две глави́зне схо́дят, глаго́лю у́бо, Бо́жий страх, и е́же име́ти Го́спода пред очи́ма всегда́: себе внима́й яќоже есть ле́по: и уразуме́еши вся за́поведи Бо́жия, и удержи́ я́. Та́ко бо су́ще от ве́ка святи́и угоди́ша Богу ра́зумом чи́стым и непреме́нными де́лы. Друзи́и же от них ни книг святы́х иму́ще, ни учи́ми учи́тели поле́зных их, от Ада́ма бо и до Моисе́я разли́чно жи́ша. Пове́ждь же ми, ка́ко угоди́ша Бо́гу, А́вель, Ено́х, Ной, Мелхиседе́к, Авраа́м, и Исаа́к, и Иа́ков, и про́чии пра́веднии, и́же бы́ша пре́жде Моисе́я? И́же кни́гам не навы́кше, я́коже рече́но бысть, ни учи́телем не́ким в челове́цех учи́вшым я́, ра́зве ра́зумом Бо́жиим, и благи́ми по́мыслы име́ша Бо́га пред очи́ма вы́ну. Та́коже и по воплоще́нии Го́спода на́шего Иису́са Христа́ ве́мы многи неве́гласы бы́вша су́ща, и при ре́чи, и при ра́зуме: о́ви от санови́тых приклю́чшыяся, а други́я от просты́я ча́ди: ини́и от пасту́х, и разли́чных жи́телей, не то́чию му́жи, но и жены́ прибего́ша к Бо́гу, и соверши́ша за́поведи Его́, я́ко от вня́тия их преждерече́нныя глави́зны. То уже́ не извеща́йся челове́че изве́том о гресе́, глаго́ля: груб есмь и неве́жа, ка́ко есть ле́по твори́ти за́поведи Госпо́дни? Се тебе́ пока́зано есть, ка́ко угоди́ти Бо́гу, и не рцы, не могу. А́ще бо хо́щеши, с си́ми же приступи́ ко Влады́це, Дави́дски глаго́ля: Бла́гости и наказа́нию и ра́зуму научи́ мя, я́ко за́поведем Твои́м ве́ровах. И па́ки: Научи́ мя твори́ти во́лю Твою́, Ты бо еси́ Бог мой. И е́же: Помози́ ми, и спасу́ся, и поучу́ся оправда́нием Твои́м вы́ну. Всяк бо прося́й, прие́млет: и ища́й, обря́щет: и толку́щему отве́рзется. Не рцы па́ки: В ми́ре есмь, и мирски́ми печа́льми свя́зан есмь, и не могу́ твори́ти всех за́поведей Бо́жиих. А́ще хо́щеши твори́ти соверше́нне, и отврещи́ся ми́ра, и взя́ти крест твой, и ити́ во след Гос́пода твоего́, и́же ти добре́е всего́, то иди́. А́ще ли не мо́жеши сего́ сотвори́ти, то и в ми́ре сый, подви́гнися угоди́ти Бо́гу: мощно бо и в ми́ре су́щу кому́ твори́ти за́поведи Бо́жия: мно́зи бо образы покая́ния суть и спасе́ния челове́ков: в не́мже ки́йждо чи́ну есть, а́ще хо́щет подви́гнутися, и тве́рдо положи́ти на уме́ свое́м, я́ко дре́внии святи́и в ми́ре су́ще с жена́ми и с детьми́ живу́ще, и в бога́тстве и в до́мех су́ще вели́цех. Друзи́и же и людьми́ владу́ще поруче́нием Бо́жиим, и боле́знь мно́гу и печа́ль о земны́х де́лех иму́ще, а Бо́гу угоди́ша о всем. Како́в бе Авраа́м, и Исаа́к, и Иа́ков: Дави́д же, и Ио́сиф, и И́ов, ти́и не бе́ша ли в ми́ре, и с жена́ми живу́ще: но зане́же вся повеле́ния Госпо́дня испра́виша. Ему́же сла́ва, ны́не и присно, и во ве́ки веко́в. Ами́нь.