Стихи́:

И жи́ва Тимофе́я, и́же и уме́рша,

Почте́ тебе́ Бог, живы́м же и ме́ртвым:

В два́десять пе́рвый Тимофе́я покры́ла есть земля́.

Сей блаже́нный от млады́х ногте́й мона́шеское житие́ восприи́м, и воздержа́ния ра́ди мно́гаго приле́жною моли́твою стра́стная кова́рствия потреби́в, и безстра́стен быв, прия́телище яви́ся Свята́го Ду́ха. Де́вственник да́же и до конца́ и душе́ю и те́лом пребы́сть. Тем и дар целе́б прия́т, бе́сы от челове́к прогна́, и всяк неду́г уврачева́. И та́ко до́бре пожи́в, в глубо́це ста́рости ко Го́споду отъи́де.

Стихи́:

Угоди́в Евста́фие Го́сподеви

И Еде́мских наслади́ся в сы́тость.

Сей бя́ше при Константи́не царе́ вели́цем христиа́нстем, и правосла́вия лучы́ сло́вом прему́дрости по всей вселе́нней разсла́в. Иже и прише́д в Нике́йский пе́рвый собо́р, уче́ние благоче́стия содержа́: облича́я же и покаряя, я́же на боже́ственное естество́ сече́ние совводя́щих, и Сы́на Бо́жия тварь глаго́лющих, и Оте́ческия че́сти и вла́сти отчужда́ющих. И боже́ственнаго ра́ди его́ жития́, и я́же о правосла́вней ве́ре его́ ре́вности, за́висть подвиго́ша на него́ Евсе́вий Никомиди́йский, и Фео́гний Нике́йский, и́же и хуле́ па́че рещи́ безбо́жию прио́бщницы бы́вше, и о́бразом иже мимохо́днаго посеще́ния, и́бо ко Иерусали́му ше́ствие сотво́рше, и во Антиохи́и бы́вше, е́же на свята́го сложи́ша низложе́ние: жену блудни́цу вели́кими дарми́ наусти́ша, и на руку́ отроча́ носящи до́йде к ним, и от смеше́ния, ре́кши, Евста́фиева заче́нши, и роди́вши младе́нцы: они́ бо бя́ху таково́му де́лу поспе́шницы, кля́твою то́чию обличи́ти на оболга́ние жену́ о́ну преблазни́вше. А́бие на свята́го сове́товаша изгна́ние, и царя́ наусти́ша изгна́ти его́. И́же и по́слан бысть в Филиппу́с Фраки́йский, иде́же и житие́ сконча́. Стом же ле́том мину́вшым, в ца́рство Зино́ново пренесено́ бысть свяще́нное те́ло его́ во Антиохи́ю. Всему ми́ру мно́жеству града изше́дшу, до осмина́десять по́прищь и да́ле, и пе́сньми и со свеща́ми и кади́лы того́ прии́мше. Того́ и честны́й Златоу́ст хвала́ми почти́. Жена́ же оболга́вшая свята́го в я́зу вели́ку впа́дши, е́же о нем вся́каго сове́та, и того́ оболга́вших, лжу о том бы́ти пове́давши: но по мзде поко́ршися оклевета́ние сказа́вши, то́чию кля́твы ра́ди, е́же от Еста́фия ковача́ растли́вшися, и от него́, рече́, бы́ти рожде́нному младе́нцу.

Стихи́:

Гео́ргие оста́вив те́ло,

Мно́гим соде́ловает душе́вное спасе́ние.

Сей сын бысть благочести́ву роди́телю, Фео́дора, и Мигефу́сы нарица́ему, оте́чество име́ющу че́стно, и житие́. В безде́тствии же и́ма пребыва́ющима, и моли́твою с посто́м Бо́га моля́ста, е́же да́ти и́ма плод чре́ва, е́же и бысть. Боже́ственным гла́сом зача́тие и прозва́ние, и свяще́нническую благода́ть восприя́ти хотя́щему роди́тися от них: к глубо́цей ста́рости доше́дшима, пове́дано и́ма бысть. Роди́вшуся же ему́, и по юности во́зрасту я́вльшуся, и сбыва́ющымся о нем исполня́ющымся, и уче́ние боже́ственным и челове́ческим весма́ изобилу́яся. Роди́телие же такова́я зря́ще, сла́вляху Бо́га. И дово́льно нака́зан быв, и от оте́чества изше́д, по́йде в Сирики́йскую го́ру: и тамо че́стна ста́рца обре́т, и от него́ прии́м а́нгельский о́браз. О́ному же житие́ оста́вльшу сей в Вони́ссу отъи́де, и вся́кому жестоко́му житию́, и посту́ себе́ вдав. Но поне́же Амастри́дския це́ркве первоседа́льник житие́ оста́ви, возведе́н бысть сей и не хотя́, я́ко свети́ло на све́щник, судо́м боже́стенным, и согла́сие иере́йским. И изше́дшу ему́ от ца́рствующаго гра́да, и к своему́ престо́лу дости́гшу, ку́пно вся сверша́хуся, и поспе́шствоваху учине́ния свяще́нная, сосу́ды, и украше́ния, и олтарю́ уста́в свяще́нных соста́ви. Си́рым и вдови́цам заступле́ние, и ни́щым пита́тельство бысть, долго́м отреше́ние, и е́же к Бо́гу благочестие: к сим богозна́мения и чудеса́ вся́кая от него сбыва́емая. Си́це до́бре житие́ проше́д, от сих преста́вися, и с ми́ром Бо́гу дух предаде́. Ему́же сла́ва, ны́не и при́сно, и во ве́ки веко́в. Ами́нь.