Стихи́:

Я́вльшеся от земли́ му́ченицы сокрове́нии

Взима́ют вся́кий вред от лица́ земли́.

Фоме́ освяще́нному престо́л пра́вящу Константи́ня гра́да, обрето́ша святы́я мо́щи лежа́щы под земле́ю, и́же и а́бие взя́ти бы́ша че́стне от архиере́я. Собо́ру вели́ку бы́вшу, внегда́ неду́зи и ско́рби уврачева́хуся. По претече́нии же мно́гих лет не́ким боже́ственным явле́нием, яви́шася му́жу не́коему Никола́ю кли́рику каллигра́фу, я́ко от не́ких мно́гих бы́ти моще́м Андрони́ка и Иу́нии, и́хже боже́ственный Па́вел апо́стол помина́ет в Ри́мстем посла́нии.

Стихи́:

Афана́сие, воспита́ние Павлопетри́йское,

Апо́столом приобщи́ся, Петру́ и Па́влу.

Сей преподо́бный роди́ся в Константи́не гра́де, от благочести́ву роди́телю, и боголюбе́зну и бога́ту зело́. Благогове́ин же быв от млады́х ногте́й, и возлюби́ наложи́ти на ся мона́шеский о́браз. И вшед в страны́ Никомиди́йских ве́сей, власы́ остриже́, толи́ко же превзы́де в доброде́телех, я́ко и царе́м зна́емь бы́ти. В ца́рство же Льва иконобо́рца оклевета́н бысть, я́ко чтит святы́я ико́ны. И му́ками обложе́н бысть мно́гими, и изгна́ния го́рькая, и ско́рби прия́т. Без сумне́ния же пребы́в, и правосла́вную ве́ру да́же до конца́ соблю́д, ко Го́споду отъиде.

Бя́ше не́кий скомра́х во гра́де Та́рсе Килики́йстем, и́менем Вави́ла, и той име́яше две жене́: и́мя еди́ной Коми́та, а друзе́й Нико́са. И той бе живы́й скве́рно, де́лая яже подобна де́лающым диаволу. Еди́ною же прии́де в це́рковь, и прилучи́ся че́сти во Ева́нгелии по Бо́жию строе́нию то ме́сто, иде́же пи́сано есть: Пока́йтеся, прибли́жибося Ца́рство небе́сное. И то слы́шав, разве́рзеся се́рдце его́ на покая́ние, и нача́ пла́кати, и укоря́ти себе́ сам дел свои́х ра́ди, я́же сотвори́л бя́ше. И а́бие изше́д из це́ркве, и призва́ о́бе жене свои, и рече́ и́ма: вы ве́сте, ка́ко жих с ва́ми скверне́но, и се даю́ вам име́ние, е́же бех обеща́л: даю́ же вам и мою́ часть, да раздели́те ра́вно себе́ все: аз бо отны́не всего́ отмещу́ся, и шед бу́ду черне́ц. Оне́ же то слы́шасте, яќо еди́неми усты́ отвеща́вше, глаго́люще ему́: да или́ при беззако́нии, и при душе́вней поги́бели о́бщницы ти есве́ бы́ли, а ны́не ли, егда Бо́гу уго́дно сотвори́ти хо́щеши де́ло, оставля́еши нас, или́ ты еди́н хо́щеши спасти́ся? Пои́стинне не оста́нем тебе́, но и при до́бре де́ле о́бщницы тебе́ бу́дем. То слы́шав скомра́х, шед постриже́ся, и затвори́ся во еди́ном столпе́ гра́днем. Оне́ же распрода́вше все свое́ име́ние, раздая́вше ни́щым, и в че́рныя ри́зы оде́явшеся, и сотво́рше хи́жу близ столпа́, и заклепа́вшеся тве́рдо. Бе же той сам Вави́ла, муж умиле́н, полн стра́ха Бо́жия, и смире́н и кро́ток, мн́озем на по́льзу быв, и Бо́гови угоди́в, в ве́чную преста́вися жизнь, о Христе́ Иису́се Го́споде на́шем: Ему́же сла́ва, ны́не и при́сно, и во ве́ки веко́в. Ами́нь.