Стихи́:

От земли́ явля́ет Предте́ча честну́ю главу́,

Плоды́ повелева́я достойны творити дре́вле.

Друзи́и стиси́ на второ́е обре́тение:

Крест новый дре́вле водны́ми исто́чники

Наро́ды на земли́ я́влься и креща́ет чуде́сными исто́чники:

В два́десять четве́ртый Предте́ческая глава́ яви́ся.

Сия́ честная́ и анге́лом гове́йная глава́ честна́го Предте́чи, пе́рвее у́бо обре́теся по благоволе́нию его́ двема́ не́которыма мона́хома в хра́мину И́родову доше́дшым во Иерусали́м на поклоне́ние гро́бу Христа́ Бо́га и Спа́са на́шего. Еди́н же от таковы́х мона́х взем ю́ в сосу́д скуде́личный, и в Емеси́йский пренесе́ град, мня, я́ко не́коего ра́ди благоде́лия разли́чно почита́я. Хотя́щу же ему́ от жития́ отъити́, оста́ви ю́ сестре́ свое́й, поручи́в ей, е́же не двиза́ти ею́, ни открыва́ти, но то́чию почита́ти и кади́ти. И по уме́ртвии жены́, мно́зи сию́ по преда́нию преима́ху. Последи́ же к Евста́фию мона́ху и презви́теру до́йде, су́щему во Ариа́нстем злосла́вии: и́же и в верте́п удали́вся от правосла́вных, за е́же предава́ти цельбы́, и́же честно́ю главо́ю быва́емыя, и написова́ти сих, и обраща́ти к своему́ злосла́вию. По боже́ственному же смотре́нию, о́ному уме́ршу, и изоста́ви в вертепе божественнаго Предте́чи главу́: и бя́ше сокрове́на да́же и до Марке́лла архимандри́та, епи́скопа Емеси́йскаго, тогда́ мно́гим откры́ся о ней. Обре́теся же в скуде́льнем сосу́де, и от епи́скопа Ура́ния внесена́ бывши в це́рковь, мно́ги цельбы́ и чудеса́ соде́лавши. Соверша́ется же таково́е собра́ние, во святе́м его́ проро́честве, су́щем в Фораки́и.

Бе не́кто мона́х презви́тер, и́менем Иоа́нн, зело́ благочести́в и братолюби́в живы́й в монастыре́ близ Иерусали́ма, его́же архиепи́скоп Илия́ игу́мена хотя́ше сотвори́ти того́же монастыря́. Он же не хотя́ше, глаго́ля: в Синайскую го́ру хощу́ ити́ моли́твы ра́ди. Епи́скоп же ну́дяше его́, дабы пре́жде игу́мен был, и пото́м ити́. Не хоте́вшу же ста́рцу, отпусти́ его́: целова́в вся изы́де, путь творя́ в Сина́йскую го́ру, пои́м ученика́ своего́. И преше́дше Иорда́н по́прища единаго, нача́ ста́рец рде́тися огне́м жгомь, я́ко и ити́ не моги́й. Обрето́хом же верте́п мал, и ту внидо́хом, дабы возле́г: и пребы́сть три дни огне́м жгомь, не моги́й ника́може ити́. И ви́де во сне ста́рец не́коего глаго́люща к нему́: пов́еждь ми ста́рче, ка́мо хо́щеши ити́? Глаго́лаше яви́вшемуся: В Сина́йскую го́ру иду. И рече́: Молю́тися, не ходи́ отсю́ду. И я́ко не провеща́ ста́рец, отъи́де от него́: Огнь же бо́ле пребыва́ше ста́рцу. И в другу́ю нощь то́йже прии́де глаго́ля ста́рцу: Почто́ калуге́ре та́мо хо́щеши ити́, послу́шай мене́, отсю́ду ника́може иди́. И рече́ ему ста́рец: Ты кто еси́? Отвеща́ яви́выйся: Аз есмь Иоа́нн Крести́тель, и сего́ ра́ди не велю́ ти ника́може ити́: ма́лый бо сей верте́п, бо́лий есть Сина́йския горы́. Мно́жицею бо прии́де Госпо́дь наш Иису́с Христо́с, посеща́я мене́. Даждь ми сло́во, а́ще хо́щеши зде жи́ти, и аз ти здра́вие пода́м. Ста́рец же в сла́дость послу́шав, обеща́ся ту пребыва́ти в верте́пе: и тогда́ исцеле́ от неду́га: и ту пребы́сть до живота́ своего́. Созда́ же це́рковь, и созва́ бра́тию, есть же и до ны́не вели́кий монасты́рь моли́твами свята́го Иоа́нна Крести́теля.

Законоуста́внику ре́кшу Моисе́ю израильтяном, а́ки от лица́ Бо́жия: Се дах пред лице́м ва́шим путь жи́зни, и путь сме́рти. И пото́м избери́ себе́ жизнь, да живе́ши. Да изря́днее мы возсле́дующе Учи́телю Христу́ глаго́лем: я́ко два пути́ еста́, еди́н жи́зни, а други́й сме́рти. Пе́рвый же есть путь жи́зни, и́же зако́н уставля́ет: Возлюби́ Го́спода твоего́ от всея́ души́ твоея́, и ближняго твоего я́ко и сам себе́, и всего его́же не хо́щеши себе, того́ ни дру́гу твори́. Благослови́ клену́щыя тя, моли за гне́вающыя тя. Люби́ враги́ твоя́, ка́я бо вам рече благодать бу́дет, а́ще лю́бите лю́бящыя вы? Ка́я бо по́льза вам, ибо и язы́чницы то́жде творя́т. Оста́нися плотски́х похоте́й. Аще кто тя уда́рит за лани́ту, обрати́ ему́ и другу́ю. А́ще поймет тя кто по си́ле по́прище еди́но, иди́ с ним два. И хотя́щему на суде́ ста́ти с тобо́ю, и ри́зу твою́ взя́ти, оста́ви ему и срачи́цу. И взе́млющаго твоего́ не истязу́й. Прося́щему тебе́ дай, и хотя́щаго у тебя́ зая́ти не отвраща́йся. Потщи́ся всем пра́ведное подая́ти, от свои́х пра́ведных трудо́в. Чти же и святы́я. И не уби́й, ни любоде́йствуй. Содо́мскаго греха́ блюди́ся, про́клят бо всяк творя́й такова́я, не бу́дет бо блудя́й в сыне́х Изра́илевых. Не укра́ди: Аха́р бо крад во Иерихо́не, ка́мением побие́н, жития́ отъи́де. Гиези́й же солга́в окра́д, насле́дова Неема́ново прокажение. Иу́да крад ни́щих ра́ди бога́тство, и Го́спода прода́, и раска́явся удавися. Ана́ния же и Сапфи́ра кра́дша своя́, и искуси́вша Дух Госпо́день, а́бие от Петра́ апо́стола и дру́га на́шего уморе́на бы́ста. Не волхву́й, не отрави́, не чароде́йствуй: чароде́й бо рече́ не живи́т, но губи́т младе́нцы во утро́бе. Все бо воображе́ние ду́шу прии́м от Бо́га, убие́но непра́ведно, мсти́тся. Не похо́щеши се́ла и́скренняго, ни жены́ его́, ни вола́ его́, ни осля́те его́. Не преступа́й его́ кля́твы: рече́но бо есть, не кля́тися без ума́. Не оба́ди, я́ко оклевета́яй убо́гаго, раздража́ет сотво́ршаго и́. Не люби́ оклевета́ти, ни клеветы́ прие́мли на бли́жняго. Не по́мни зла, путие́ бо по́мнящих зло, смерть. Не бу́ди язы́чен: муж бо язы́чен не испра́вится на земли́, и сеть кре́пка му́жеви свои́ устне́. Блюди́, да не бу́дет сло́во твое́ тще и всу́е. О вся́ком пра́здне словеси́ отве́т возда́си, и от слове́с твои́х оправди́шися, и осу́дишися. Не лжи: погуби́т бо Госпо́дь вся глаго́лющыя лжу. Не огра́би бра́та твоего́ грабле́нием злым. Не бу́ди лицеме́р, да не бу́дет часть твоя́ с лицеме́ры положи́тися. Не бу́ди гордя́ся, го́рдым бо Госпо́дь проти́вится. Не стыди́ся лица́ на суде́, яко Госпо́день есть суд. Не возненави́ди бра́та твоего́ в се́рдце твоем, обличе́нием обличи́ши бра́та твоего́, рече, да не прии́меши греха́ его́ ра́ди. Бе́гай от вся́каго зла, и не убои́шися. Не буди гневли́в, ни велича́в, ни яря́ся, ни дерз, да не прии́меши отме́стия Ка́инова, и Сау́лова, и Иоа́вова. Я́ко ов уби́ А́веля бра́та своего́, имже избра́ну ему́ обрести́ся от Бо́га. Ов Дави́да гоня́ше победи́вшаго Голиа́фа, возревнова́в о пля́шущих доброхва́лию: Ов же два воево́ды уби, Авени́ра, и Амеси́ю. Не бу́ди объявля́я сна своего́, да не прельстишися. Не волхву́й, и не бу́ди ча́ры творя́, ни научи́ся уче́нию злу, вся бо та зако́н отрече́. Не бу́ди студосло́вец, ни нами́глив, ни пия́ница, от того́ бо блуд и любоде́йство быва́ет. Не бу́ди люби́в зла́ту, да не в Бо́га ме́сто порабо́тишися мамо́не. Не бу́ди велича́в а́ки фарисей, я́ко вознося́йся смири́тся: и высо́кое в челове́цех, ме́рзость есть пред Бо́гом. Не бу́ди жестосе́рд, ни напра́снив, я́ко наставля́ет на хулу́ обое́: но терпели́в и кро́ток в му́дрости. Кро́тцыи у́бо насле́дят зе́млю живы́х. Не бу́ди де́рзок, я́ко муж дерз впа́дает в зло. Не запрети́ рабу́ твоему́ во гне́ве души́ твоея, еда́ когда́ воздохнет на тя, и бу́дет на тебе́ гнев от Бо́га: не даждь бо рече́ челове́ку вся́кому прокля́ти тебе́́. Клену́щему бо тя во гне́ве души́ своея́, услы́шит сотвори́вый его́. Бра́тий и сердобо́лей свои́х не пре́зри: свои́х бо рече́ сплеме́нник, не возненави́диши. Не вни́ди на моли́тву в день лука́вствия твоего́, пре́жде да́же не оста́нешися гне́ва твоего́. Случа́ющыяся тебе́ стра́сти ти́хо приими́, и напа́сти без опеча́ления: ве́дая я́ко мзда ти от Бо́га да́стся, я́ко И́ову, и Ла́зарю. Глаго́лющыя тебе́ сло́во Бо́жие просла́ви, и по́мни же е́ день и нощь: почти́ же его́, бы́вша ти я́ко до́браго хода́тая: иде́же бо Бо́жие уче́ние, ту и Бог есть. Взыщи́ по вся дни ли́ца святы́х, да почита́еши словеса́ их, ни сотвори́ши вражды́ к ним: [помяну́в Дафа́на и Авиро́на, я́ко опеча́листа Моисе́я, и пожре́ ты́я земли́,] той путь есть жи́зни. Сме́ртный же есть путь, и́же в де́лех злых ви́димых, в том же есть неуве́дение Бо́жие, и́мже быва́ют блуды́, уби́йства, любоде́йства, и про́чая. Всего́ же зла того належа́щаго избы́ти, воздержа́ние да возлю́бим в яде́нии и питии́, я́коже рече́ апо́стол: А́ще я́сте, а́ще пиете́, а́ще и́но что творите́, все в сла́ву Божию твори́те. Объясти́вым же глаго́лет: и́хже бог чре́во, и сла́ва в студ их. И па́ки проро́ком глаго́лет: Бу́дите свя́ти, я́ко и Аз свят есмь, глаго́лет Госпо́дь. И Тому́ сла́ву возсле́м, не словесы́ то́кмо, но и до́брыми де́лы: о Христе́ Иису́се Го́споде на́шем, Ему́же сла́ва, ны́не и при́сно, и во ве́ки веко́в. Ами́нь.