Стихи́:

И́же мимои́дет кто и мимотече́т

Порфи́рия поне́ преше́дша от жития́:

Порфи́рия ме́ртва покры́ земля́ в два́десять шесты́й.

Сей нарица́шеся от Селу́нскаго гра́да, сын сый благоро́дных и бога́тых роди́телей. И воста́в по́йде во Еги́пет, и оттуд́у в скит, и в мона́шеское житие́ оде́яся. И по пяти́ ле́тех во Иерусали́м прии́де, мно́ги сло́вом просвети́в. Тем поста́влен бысть презви́тер, патриархом Иерусали́мским. Иоа́нном же архиепи́скопом, Кесари́и Палести́нския, епи́скоп вруча́ется Га́зский, иде́же и мно́га чудеса́ и си́лы соверши́в, подтвержда́я ве́рныя: и мно́гия от неве́рных обрати́ к богоразу́мию. Отъи́де же в Константи́нь град, от держа́щаго такову́ю страну́ ве́рныя оби́димыя ви́дя. И доше́д ко свято́му Иоа́нну Златоу́сту, и сказа́в ему́ я́же о себе́, и о чем прии́де. И от него́ приведе́н быв Аманти́ю кувикула́рию, я́ко е́же сказа́ти о нем цари́це осо́бно. Цари́ца же пове́да царю́ свята́го прише́ствие, и о прорече́нии бу́душаго рожде́ния му́жескаго по́лу. Он же бла́го о сем рекл, и и́стиннаго Б́ога благода́рствив. Та́же роди́ цари́ца Феодо́сия, и призва́вши преподо́бнаго, благослови́ся от него́, и обеща́ся испо́лнити хоте́ния его́ вся. Он же совеща́в, и позна́в воста́в, вельми́, глаго́ля: не невозмо́жно есть е́же прогна́ным бы́ти идолослужи́телем, мно́гаго ра́ди их сконча́ния. Она́ же к царю́ рече́: тя́жко проше́ние царю́, тяжча́йшее же преслуша́ние, Тем и повеле́ царь на́скоре бы́ти проше́нию. И посла́ пи́сьмена на еретики́, повелева́я прогна́ти их от Га́зы. Блаже́нный же Порфи́рий прие́м от царя́ име́ние, два кентинаря́, е́же созда́ти це́рковь три ты́сящы зла́тник. И дости́г це́ркве своего́ престо́ла, е́ллинская идоложе́ртвища разори́, и еретики́ прогна́, це́рковь же Марна́еву огне́м сожже́, и Христу́ це́рковь созда́ по о́бразу, е́же повеле́ цари́ца. До́бре у́бо пожи́в в такове́й це́ркви, и чудеса́ мно́га соде́лав, за два́десять и четы́ри ле́та и единона́десять ме́сяц и осмь дней, и ко Го́споду отъи́де.

Поне́же не́цыи ве́ровавше сном, соврати́шася с пра́ваго пути́. Сего́ ра́ди и воспису́ем вам, я́ко не подобает ве́ровати аерохо́дным сном: сие́ бо несть и́стина, но мысль блудя́ща, подо́бия и мечта́ния лука́вых бесо́в на прельще́ние на́ше. Тем и на сла́бость вво́дят челове́ки, о ни́хже прорече́ Иу́да Иа́ковль: Си́и бо со́ния видят, и́миже плоть оскверня́ют, и госпо́дьство ху́лят. Екклисиа́ст же: Не поработи́ся сном, да не прогне́вается на тя Госпо́дь, я́ко со́ния прельстя́т безу́мныя. Я́коже бо гоня́й ветр, и хотя́ я́ти свою́ стень, та́ко и е́мляй ве́ры сном. Ка́я бо от лжи и́стина? Мно́ги бо прельсти́ша со́ния, и отпадо́ша, наде́ющеся на ня. А́ще бо яви́тся кому́ свет, или́ огнь, ника́коже ве́руй: тем бо прельща́ет диа́вол. Па́вел бо глаго́лет, и во а́нгела све́тла преобразу́ющася его́. Добро́ у́бо есть пре́жде сна помоли́тися моли́твою се́ю, на прогна́ние вра́жия ле́сти: «Вседержи́телю Сло́во О́тчее, Самосоверше́нный Бо́же Иису́се Христе́, многаго ра́ди Твоего́ милосе́рдия николи́же отлуча́йся Твои́х раб: но при́сно в них почива́яй, Иису́се до́брый Па́стырю Твои́х овец, не преда́ждь мене́ крамоле́ змии́не, ниже́ жела́нию сатанину́ оста́ви мене, я́ко се́мя тли во мне есть. Ты у́бо Го́споди Бо́же Царю́ покланя́емый Иису́се Христе́, спя́ща мя сохрани немерца́ющим све́том, и Ду́хом Твои́м Святы́м, И́мже Твоя́ освяти́л еси́ ученики́. Даждь ми недосто́йному рабу́ спасе́ния Твоего́ на ло́жи мое́м, и просвети́ мой ра́зум све́том ра́зума Ева́нгелия Твоего́. Ду́шу любо́вию Креста́ Твоего́, се́рдце чистото́ю словесе́ Твоего́, те́ло мое́ Твое́ю стра́стию безстра́стною, мы́сль мою́ Твои́м ми́ром сохрани́. Воздви́гни мя во вре́мя благопотре́бно на Твое́ славосло́вие. Я́ко препросла́влен еси́ со Отцем, и со Святы́м Ду́хом, ны́не и при́сно, и во ве́ки ве́ков. Ами́нь». Суть же и и́на со́ния, я́коже глаго́лет И́ов: В пе́рвом возглаго́лет Госпо́дь, и второ́е со́нием, я́ко се нападе́т страх в нощи́. Но мы не хо́щем ве́ровати, а́ще и Бо́жие явле́ние по́слано бу́дет нам: да не в со́лнца ме́сто, дым прии́мем. Име́х же мно́ги по́вести о прельще́ных в со́ниях, и лю́те поги́бших, но едину то́чию обрето́х на утверже́ние чту́щих: Бысть не́кий мона́х в горе́ Сина́йстей, и́же вельми́ подвиза́шеся, в хи́же затво́рься на ле́та мно́га, последи́ же ве́ру ят сном, диа́волом пору́ган бысь, и во иуде́йство обре́затися впаде́. Мно́жицею показа́в ему́ диа́вол и́стинная со́ния, и те́ми обольсти́в его́ ум и омрачи́. Последи́ же показа́ ему диа́вол, я́ко се лик апо́стол, и му́ченик, и всех христиа́н во тме, и всего́ студа́ испо́лнены. Супроти́в же богоме́рзскаго ли́ка жидо́вска, све́том озаря́ема, и ра́дости исполня́ема. И воста́в окая́нный, оста́вив святу́ю го́ру, прии́де в Палести́ну, в жили́ща жидо́вская, и обре́зався ожидоби́ся, и жену́ поя́, и я́ве по жиде́х на христиа́ны пря́шеся. И посе́м не пребы́в трех лет зло́ю сме́ртию сконча́ся, жив сый согни́в, и че́рвьми ядо́мь и́здше. Сего́ же ви́дев аз и ини́и чернцы́ пла́кахомся, бе бо умиле́н муж, и весь сед, в посте́ и в труде́ состарев́ся, и на коне́ц ве́ру емь сном, поги́бе. Те́мже бра́тие не мо́жем ве́ру я́ти сном, ни привиде́нием. Глаго́лет бо Госпо́дь: Бди́те, я́ко не ве́сте в кий час тать прии́дет. А́ще бы ве́дал господи́н до́му, бдел бы у́бо, и не дал подкопа́ти хра́ма своего́. Да того́ ра́ди мо́лимся Влады́це Христу́ Бо́гу на́шему, изба́вити нам от проти́вных духо́в. Ами́нь.

Бога́тством ли обро́сл еси от дел, и и́миже велича́ешися, и ра́дуешися оте́честву, или добротою теле́сною, и че́стию я́же от всех, внима́й себе́, я́ко земля́ еси, и в зе́млю по́йдеши. Я́ко тра́ва увяда́ет, и я́ко цвет отпа́дает житие́ твое: Воззри́ у́бо на пре́дняя, в подо́бных сла́вах оболче́ны бы́вшая. Где суть вели́ких сан предержа́вшии, и гра́ды владе́вшии? Где и́же мудру́юще словесы́, и строяще торги́? Где си́льнии боля́ре, кормя́щии све́тлыя ко́ни? Где суть воево́ды вели́цы, и воинствотоми́тели, и губи́тели? Где суть вели́цыи цари́? Не вси ли персть, не вси ли прах, ни в ма́лых косте́х па́мять их бысть. Прини́кни во гроб, а́ще мо́жеши ту разсуди́ти, ко́е раб? Ко́е ли влады́ка? Ко́е ли убо́г? Ко́е ли бога́т? Ко́е ли судия́? Ко́е ли си́льный ю́жика царе́в? Ко́е ли кре́пкий? Ко́е ли немощны́й? Ко́е ли кра́сный, и некра́сный? Те́мже помяну́в естество́ твое́, не провозноси́ся николи́же: вся́ка бо плоть челове́ческа тля есть, и сла́ва его́ я́ко цвет изсо́хши отпаде́т. Се бо вси я́ко ри́за обетша́ют, и я́ко мо́леве изъядя́т вы. Душа́ и те́ло, брат, и сестра́ еста́. Да не живе́т душа́ без те́ла, ни те́ло без души́. Да ле́по есть разсмотри́ти, я́ко те́лу, та́ко и души́, на́полы дели́ти име́ние. Челове́ческий грех, подобен ест по́рту непра́ну: та́ко и грех, а́ще не ка́ешися его́, то па́че почерне́ет. Того́ ра́ди пока́емся, да прии́мет от Бо́га проще́ние.