Стихи́:

Ники́й же Декаполи́та землены́й всяк град,

К мы́сленому и́де же превы́шнему гра́ду:

В два́десять седмы́й Проко́пия коне́ц прия́т.

Сей мона́шеское житие́ пе́рвее проше́д, всяќо поще́ние изве́стно испыта́в, коне́чно себе́ очи́стив, я́ко сло́вом воплоще́ния злочести́вно отри́чущихся, му́жески обличи́в и оплева́в, последи́ же бие́нием пострада́в, и о вся́кой злоб́е известву́я и́стину, вели́к испове́дник я́влься, и мно́гим чудесе́м соде́лования показа́в, и та́ко ко Го́споду отъи́де.

Сей бя́ше килики́янин ро́дом, по́стническое житие́ возлюби́в. И гра́да дости́же Гава́лскаго, от него́же за два́десять по́прищь моги́лу обре́т, иде́же бя́ше ка́пище бесо́вское: и та́мо ма́лу коли́бу вдрузи́, по́стническими подвиза́яся труды́, посто́м, и бде́нием, и злострада́нием себе́ друча́. Тем и́же в капищи бе́сове, мно́гими того́ страше́нии страша́ху, и́хже и сту́дно отсыла́ше, смея́ся неможе́нию их. Бо́льшыя же труды́ возжеле́в, и коли́бу оста́вив, ке́ллию тесне́йшу сотвори́в, ниже́ с теле́сную ку́пно ме́ру, и в ню входя́ коле́на к лицу́ име́я пригбе́не: и в ней благоуго́дно пожи́в, с ми́ром у́спе.

Молю́ вы у́бо бра́тие, име́йте вы́ну смерть пред очи́ма ва́шима: о сей бо помышля́юще не имате согреша́ти. Не ве́мы бо в кий час прии́дет, еда́ не обря́щемся гото́вы и неочище́ни. Помы́слите у́бо, где суть отцы́ на́ши, и бра́тия, и дру́зи? Вси у́бо отъидо́ша, а́може и нам, а́ще не днесь, то у́тре та́може отъити́. Да бу́дем пригото́вившеся на ве́чный путь, помина́юще преждесотворе́ная прегреше́ния, и о них пла́чемся прося́ще проще́ния пре́жде сме́рти у Бо́га. Се бо ны́не покая́нию вре́мя, а пото́м невозмо́жно возврати́вся пока́ятися, но егда́ от те́ла отлучи́мся, тогда́ предста́нут нам а́нгели и бе́сове, показу́юще сотворе́ная на́ми на сем све́те, я́же сотвори́хом во дни, или́ в нощи́, или́ ве́дуще, или́ не ве́дуще, вся явя́т я́же от де́тства и до после́дняго издыха́ния на́шего прегреше́ния, я́же сотвори́хом слов́ом, или́ де́лом, или́ помышле́нием: вся бо напи́сана суть на обличе́ние на́ше. И о́бразы поста́вят око́ло нас, а́ки гора́здии ико́нницы. Бе́сове у́бо преобразя́тся в на́ша дела́: я́коже бо ходи́хом на блуд, или́ на татьбу, или́ на разбо́й, или́ на ины́я грехи, та́ко и облича́т ны. И невозмо́жно бу́дет отврещис́я, ви́дяще пред собо́ю дела́ своя́, аще ны́не покая́нием и те́плыми слеза́ми не загла́дим тех написа́ний о́браза. Бы́ти же сему́ подоба́ет бра́тие: несть бо се лжа, но и́стина глаго́лемое. Те́мже не лени́теся о свое́м спасе́нии, я́ко бо кто се́ет, та́ко и по́жнет.