Чтение на день: Январь, 13 число (старый стиль)
По шестой песни:
И поется кондак и икос (или мученичен, аще несть).Стихи́:
И́же пла́вание Ерми́ла и Стратони́ка,
О́бщее низплы́тие во глубину́ творя́щим,
Ерми́ла в трина́десятый уже́ река́ удави́ И́строс.
Сия́ бя́ста при Ликини́и царе́. Бя́ше же святы́й Ерми́л по церко́вному уста́ву диа́кон. Предста́в же царю́, и Го́спода на́шего Иису́са Христа́ и́мя испове́да. И пе́рвее ме́дяными па́лицами по че́люстех бие́н быв: та́же о́стрым пла́том по я́звам его́ тря́ху. И Стратони́ка призыва́ет к дерзнове́нию, любо́вна ему́ су́ща, и его́ страсте́м сболе́знующа. Внегда́ бо бие́н бя́ше святы́й Ерми́л же́злием и желе́зы, и внегда́ разсе́дшися утро́бе и се́рдцу его́, прослези́ся Стратони́к: и явле́н у́бо бысть, я́ко о́бщник его́ произволе́нию. И вопроше́н быв от царя́, и христиани́на себе́ испове́да. Тем бие́н быв с Ерми́лом ку́пно, и во И́стру реку́ вве́ржени бы́ста, иде́же о́ба муче́ния венцы́ прия́ста. Соверша́ется же собо́р ею́ во благочести́вем дому́ арха́нгела Михаи́ла, су́щем во Окси́и.
В то́йже день па́мять преподо́бнаго отца́ на́шего Иа́кова, и́же от Нисиве́и
Стихи́:
Пусты́нному граждани́ну,
Ия́кова, уме́рша су́ща естество́м,
Со уме́ршими подо́бно не у́мер, подо́бнаго не бя́ше.
Сей бя́ше рожде́ние и воспита́ние, вели́каго гра́да Нисиве́и. И пусты́нное, и безмо́лвное житие́ возлюби́в, высо́ких гор верхи́ дости́г. И пусты́нныя ну́жды до́блественне терпя́: жа́ждею от ва́ра со́лнечнаго опаля́емь, в зиме́ же мра́зом и студе́нию друча́ себе́. Пи́ща же ему́ бяше самора́сленое бы́лие, и вода́ в ме́ру. Ри́за же ему́ бя́ше, просте́рто порти́ще. И оба́че та́ко те́ло томя́ше, и духо́вную пи́щу вы́ну принося́ души́: и везде́ бысть сла́вен. Ему́же бе к Богу дерзнове́ние таково́, я́ко и бу́дущая прозира́ше, и си́лу к чудоде́йствию Свята́го Ду́ха благода́ть восприи́м. Не́когда же от не́коего ме́ста иды́й, и нестыдя́щымся жена́м на кла́дези, кла́дязь изсуши́: о́нех же власо́м побеле́ти сотвори́. И умоле́н па́ки быв во́ду изведе́, еже тещи́ ей в путь свой: жены́ же во свое́ ку́юждо воображе́ние соста́ви. И судию́ пе́рсянина непра́ведным судо́м ходя́ща разсмотри́в. И того́ сокруши́в моли́твою свое́ю, е́юже ко вся́ческим Бо́гу быва́емою, разу́мчина того́ паки сотвори́. И игреца́ некоего еди́наго, бы́вшаго с ним, и́же яко уме́рша себе́ вообрази́вша, и и́же от него́ не́кое тре́бование прося́ща, пои́стинне того́ сме́рти предаде́: и а́бие умоле́н быв, и па́ки его́ оживи́. И поне́же первоседа́ние Нисиве́йское вели́кий получи́в, и на Ники́йский собо́р прише́д. А́рий же по низложе́нии свое́м, а́бие в це́рковь тща́шеся вни́ти, моли́твою уби́ того́ вели́кий Иа́ков, утроба бо его́ просе́деся. И Саво́рию пе́рсскому царю́, обсе́сти Нисивею иду́щу, и мно́гая мечта́ния сотво́ршу. Я́лься то́чию святы́й, и пе́рсяны на бе́гание обрати́: ше́ршни, и комары́ на них напусти́в, за е́же коне́м, и елефа́нтом стрека́емым от них бы́вшым и бе́гати. Се же ви́дев царь, и недоуме́нием одержи́мь, во своя́ до́йде безде́лен. В сих вели́ких великоде́лиих пребыва́я блаже́нный Иа́ков, и соверше́н де́ньми быв, почи́ о Го́споде.
В то́йже день страсть свята́го му́ченика Петра́
Святы́й му́ченик Петр, бысть от села́ Ани́йскаго, близ Иерапо́ля. Кре́пок сый те́лом, и кре́плей бысть во Христо́ву ве́ру: А́ще и юн сый те́лом, но ста́рческия име́яше смы́слы, и по вся дни пря́ся со е́ллины, уча́ше я́ отврещися и́дол, и приступи́ти ко Христу́ и Спа́су челове́ков. И сия́ слы́шав Иерапо́льский князь о нем, посла́в ят его́, и пону́ди отврещи́ся Христа. И яко не покори́вся, тогда́ повеле́ разжещи́ пещь о́гненну, и ту воврещи́ его́. И разгоре́вшися пе́щи, вве́ржен бысть в ню святы́й ра́дуяся. И та́ко благодаря́ Бо́га сконча́ся, и восприя́т жела́емое ему́ Ца́рствие.
P.S. Некоторыми исследователями указывается, что Петр Авесаломит и Петр Анийский - одно лицо.
В то́йже день поуче́ние о труде́ и о Ца́рствии небе́снем
Не лени́теся бра́тие о свое́м спасе́нии, ни пребыва́йте а́ки ско́ти без воздержа́ния, яду́ще и пию́ще, и́бо не на сию́ жизнь избра́л ны есть Христо́с, но в Ца́рство небе́сное позва́л ны есть, и за́поведь пре́дал есть нам, ю́же сотвори́вше, вни́дем в Не́. Мно́гими бо скорбьми́ подоба́ет нам внити в Ца́рство небе́сное, и ну́жницы восхища́ют Е́. Та бо ну́жда принужда́ет Бо́га, и подае́т жизнь. Той бо весть сердца́ на́ша, а́ще вои́стинну тружда́емся Его́ ра́ди, в моли́твах и во бде́ниих в це́ркви теку́ще, пе́сньми сла́вяще своего́ Творца́. И́же во а́нгельское достоя́ние возво́дит рабо́тающыя Ему́ челове́ки, и томя́щыя себе́ Бо́га ра́ди, и пре́зрящыя маловре́менную сию́ жизнь, и зна́еми суть си́и Бо́гу. Ве́сте бо и са́ми Па́вла глаго́люща: я́ко непра́веднии не вни́дут в Ца́рство небе́сное, ни блудники́, не прелюбоде́и, ни содо́мский блуд творя́щии, ни та́тие, ни клеветницы́, ни мздои́мцы. Лю́те бо зело́ в сих увя́зшу, и христиани́ну нарица́тися, не́жели Бо́жия ми́лости ча́яти.