Стихи́:

Ме́чеве зде соде́яша мно́га уби́йства:

Сицева́я пострада́ша му́жие, доброде́тели дру́зи:

Авва́ды в четырена́десятый посече́.

Си́и по́стническаго жития́ жела́юще, и всем и́же в ми́ре ра́дуйтеся ре́кше, живя́ху в пусты́ни. В ни́хже бя́ше блаже́нный Нил, епа́рх Константи́ня града, иже и си́лою слове́сною, и благода́тию Свята́го Духа, кра́сная списа́ния изложи́в к поще́нию повелева́ющая, о пребы́тии, и о пле́не, и о убие́нии святы́й оте́ц списа́ сия́. Си́и бо от ва́рвар, та́ко нари́чемых от Ара́вии, да́же и до Еги́пта, мо́ря Чермна́го, и е́же к пусты́ни просте́ртых. Пре́жде же лет мно́гих в ца́рство Диоклитиа́на царя́ и Петра́ архиепи́скопа Александри́йскаго, побие́ни бы́ша, и друзи́и безмо́лствующии, и ти́и в горе́ Сина́йстей та́коже сконча́шася. Срацы́ны же уме́ршу старе́йшине их, мно́гих поби́ша от по́стник, про́чым же бежа́вшым в тве́ржу, яви́ся срацы́ном но́щию пла́мень о́гнен пожига́я го́ру, пла́мень же восхожда́ше да́же до небе́с. Ви́девше же срацы́ны, и убоя́шася, и пове́ргше ору́жия своя́ бежа́ша. Пе́рвее же закла́ни бя́ху, три́десять и осмь, иму́ще я́звы разли́чны на телесе́х свои́х: от ни́хже обрето́стася два жи́вы, Са́вва и Иса́ия. Поби́ты же бя́ху, о́вех главы́ до конца́ отсе́чены: ины́м же ко́жа придержа́шеся ко еди́ной стране́: друзии же на́полы пресе́чены: и́хже погребо́ста сия́ два мона́ха, и́же о них и сия́ реко́ша.

Стихи́:

Я́коже дре́вле Рахи́ль чады, ны́не же авва́ды,

Пла́чет в Раи́фе ссече́ныя мече́м.

Си́и святи́и блаже́ннии отцы́, по́стническое показу́юще житие́, иде́же суть двана́десять исто́чники вод, и се́дмьдесять сте́блий фи́никовых. Влеммиа́ном же трем стом вше́дшым в кора́бль вели́кий, и преше́дше пучи́ну Ефио́пскую, и доше́дше в не́которое ме́сто, и ладию́ обре́тше, и вше́дше прейдо́ша в стран́у Фарани́тскую. Изыдо́ша же фарани́те в сре́тение их, и побежде́ни бы́ша от влемми́й: и закла́ни бы́ша му́жие, четы́редесять и седмь. Влеммиа́не же взе́мше жены́, и де́ти фарани́тския, и доидо́ша во град, иде́же имя́ху це́рковь святи́и отцы́, ея́же и затвори́ша врата́, и ча́яху сме́рти. Прише́дше же ва́рвари, и не обре́тше у них име́ния, поби́ша вся преподо́бныя. И взе́мше плен доидо́ша е́же прейти́, и не обре́тше ладии́, нае́мницы бо похва́тивше ю́, бежа́ша. Разъяри́вшежеся, закла́ша плен весь: та́же и са́ми себе́ закла́ша ну́ждею.

Стихи́:

Оста́вив Са́ва землену́ю сла́ву:

И восприя́т от Христа́ небе́сную сла́ву.

Сего́ у́бо блаже́ннаго и святи́телем сопресто́льнаго, свята́го и преподо́бнаго отца́ на́шего Са́вы житие́ си́це бя́ше:

Бысть у́бо благоро́дну и правове́рну роди́телю сын, и люби́мь бя́ше зело́ и́ма. И измла́да возлюби́ Бо́га всем се́рдцем, и все́ю душе́ю свое́ю, и ева́нгельский глас услы́шав глаго́лющь: И́же оста́вит отца́ или́ ма́терь, и вся кра́сная ми́ра сего́, стори́цею прии́мет и жизнь ве́чную насле́дит. И оста́вль у́бо отца́ своего́ и ма́терь, и вся кра́сная ми́ра сего́, и взем крест после́дова Христу́, и бежа́ во Святу́ю го́ру. И вшед в монасты́рь свята́го вели́каго му́ченика Христо́ва Пантелеи́мона, реко́маго Ру́сы, и прия́т святы́й мона́шеский о́браз. Трудолюби́вое же его́ житие́ кто испове́сть? Труди́вся бо до́бре, поще́нием, и бде́нием, и моли́твами, я́ко превзы́ти ему́ житие́м вся мона́хи су́щыя в ме́сте том. Его́же ви́дев Бог, И́же вся прови́дя и ве́дый, хотя́й всем спасти́ся и в ра́зум и́стинный приити́, утверди́ толи́ко, я́ко он боже́ственным посеще́нием; и благода́тию Свята́го Ду́ха разже́гся: не себе́ еди́наго на высоту́ возве́д дово́льне, но собо́ю путь и роди́телем показа́в, и тех привести́ к доброде́тели а́нгельскаго жития́ потща́ся. Восхоте́ же посети́ти и ви́дети оте́чество свое́: слы́шаше бо о них я́ко бя́ху о́вцы, не иму́ще па́стыря. Го́споду же Бо́гу поспе́шествующу ему́, труды́ его́ премно́гими, кроле́вскаго и святи́тельскаго свяще́ния, земли́ оте́чествия его́ сподо́бися получи́ти. И слы́ша о нем вселе́нский патриа́рх Ману́ил, сия́ше бо в ми́ре я́ко со́лнце, доброде́тели ра́ди его́, архиепи́скопа поста́ви его́ Се́рбския земли́, и вруче́нное ему́ ста́до па́сти до́бре предаде́. И епи́скопы поста́ви, и весь свяще́ннический и мона́шеский чин уста́вив умно́жи, и архиепи́скопию созда́в, и украси́в вся́ческими добро́тами. И па́ки оста́вив вся, и́де во Иерусали́м поклони́тися гро́бу Госпо́дню, и всем святы́м ме́стом: та́же и в Сина́и жела́ние получи́в. Бог бо рабо́м Свои́м исполня́ет вся проше́ния их, я́коже и сему́ свято́му: жела́ше бо и моля́ше в то́йже стране́ прия́ти коне́ц жития́ своего́, я́коже и бысть. Доше́д бо Терно́ва, в ца́рских пала́тах предаде́ дух свой Го́сподеви, Его́же и возлюби́: честно́е же те́ло его́ положено́ бысть во гро́бе.

Мно́гу же вре́мени мимоше́дшу, боголюби́вая его́ ча́да земли́ оте́чествия его́, со вся́ким усе́рдием доше́дше и обрето́ша це́ло и ника́коже разруши́мо, любе́зно восприи́мше от землены́х недр, принесо́ша со вся́кою че́стию в зе́млю оте́чествия своего́, иде́же и ны́не лежи́т.

Того́ моли́твами Христе́ Бо́же поми́луй нас, я́ко Человеколю́бец. Ами́нь.

Сей бя́ше сын Ни́ла прему́драго, бы́вшаго у́бо епа́рха в Константи́не гра́де, оста́вльшаго же сла́ву мирску́ю, и отше́дшаго на го́ру Сина́йскую, и мона́шествоваваго с сы́ном свои́м. Обои́м у́бо живу́щым, и по́стническое житие́ проходя́щым. И внеза́пу напа́дшым ва́рваром, и наче́ншым закала́ти святы́я отцы́. Нил у́бо возмо́же бежа́ти, сын же его́ Феоду́л, ят бысть ва́рвары со други́м еди́ным ю́ношею, и свя́зани бы́вше ведя́хуся. И доше́дше ва́рвари, хотя́ху закла́ти ю́ныя, жре́ти звезде́ возсия́ющей пре́жде со́лнца. И един у́бо избеже́; Ва́рвари же усну́вше, со́лнцу возсия́вшу, и звезде́ скры́вшейся, не закла́ша Феоду́ла. И мы́сляще прода́ти его́, и не взя́ху бы кроме́ дву златы́х. И еди́н обнажи́в мечь хотя́ше того́ посещи́. Оте́ц же его́ Нил прему́дрый моля́шеся Бо́гу, глаго́ля: Да не оста́виши Го́споди мой, Го́споди Бо́же оте́ц, ра́ди Тебе́ ро́ждшия честны́я Богома́тере, и Твоея́ ра́ди бла́гости, е́же поги́бнути сы́ну моему́ от ва́рвар. Тогда́ искупи́ того́ епи́скоп, и отпусти́: и до́бре пожи́в у́спе. Соверша́ется же сицевы́й ку́пно собо́р святы́х отец, в честне́м апо́стольстве свята́го апо́стола Па́вла, су́щем си́рым пита́тельстве.