Стихи́:

И́мать что бо́льшее не́бо и ум,

Нача́льника Анто́ния в по́стницех име́я?

В седмьна́десятый Анто́ния от зде взя́ша.

Сей бя́ше ро́дом еги́птянин, от отца́ и де́дов Христо́ве ве́ре науче́н, ю́ношествовав в ле́та Диоклитиа́на и Максимиа́на, и доспе́ да́же и до благочести́ваго царя́ Константи́на и сыно́в его́. Вдав же себе́ постническому житию́, и толи́ко превзы́де всех, я́ко и во о́браз бы́ти ему́ про́чым. И пресла́вное, я́ко и пе́рвый быв зело́ пома́ле, е́же па́че челове́к таково́му житию́ бысть нача́льник. И еди́н сам к кра́йнейшему превзы́де уста́ву, я́коже о нем писа́ние пове́дует: но сказа́емо, я́ко яже о нем вся́кому изоби́льно пове́дати. Толи́ко же ну́жно есть рещи́, я́ко в ме́ртвене телеси́, егда́ от те́ла кому́ отсту́пльшу, и самыя восхо́ды душе́вныя смотря́ше, и о́нех крамо́ляща бесы, еже мы́сленному и безпло́тному естеству́ есть осо́бно. Жив же сто и пять лет, и ко Го́споду отъи́де. Соверша́ет же ся собо́р его́ во святе́й вели́цей це́ркви. Житие́ же его спи́сано бысть вели́ким Афана́сием архиепи́скопом Александри́йским.

В земли́ Саво́рстей бысть не́кий чернори́зец христолюби́в, и нищелюби́в, и ми́лостив, юн версто́ю, и стар смы́слом, и чи́сто житие́ имы́й, Марти́рий и́менем. Сей убо обычай имя́ше от своего́ монастыря́, во ин ходи́ти к духо́вному отцу́ моли́твы ра́ди. Еди́ною же иду́щу ему́, обре́те на пути́ ни́ща лежа́ща, и стру́пы сле́пшася, та́мо же ити́ хотя́ща, и не могу́ща неду́га ра́ди. Блаже́нный же Марти́рий поми́лова его́, просте́р ма́нтию свою́, любе́зно ноша́ше его́. Егда́ же прии́де к монастырю́, оте́ц же его́ духо́вный прозорли́выма очи́ма узре́в, и возопи́ к свои́м чернце́м глаго́ля: Тецы́те ско́ро, отве́рзите врата́ монастыря́: брат Марти́рий гряде́т, Бо́га несы́й. Сей же я́ко прии́де ко врато́м несы́й ни́щаго, и взя́ся с плещу́ его́, и яви́ся ему́ о́бразом я́коже и на ико́не напи́сан, Избав́итель челове́ческаго ро́да, Бог и Челове́к, Спас Иису́с Христо́с, и взя́тся на не́бо, Марти́рию ви́дящу. Восходя́ же рече́ к нему́: О́ Марти́рие, ты Мене́ не презре́л еси́ на земли́, и Аз тя на небесе́х. Ты на Мя ны́не воззре́л еси́ ми́лостию, Аз же тя во ве́ки поми́лую: и сия́ рек, неви́димь бысть. Вше́дшу же ему́ в монасты́рь, рече́ ему́ оте́ц духо́вный: Бра́те Марти́рие, где есть Его́же нос́ил еси́? Отвеща́ глаго́ля: А́ще бых ве́дал о́тче, Кто есть, ял бых тве́рдо за но́зе Его́. Тогда́ пове́да всем чернори́зцем бы́вшее. И вопроси́ его́ оте́ц глаго́ля: Тя́жко ли ти бе ча́до? Он же рече́: Ни о́тче, егда́ несо́х не чу́ях тяготы́. Нося́х бо рече́ Нося́щаго мене́, и весь мир нетру́дно, и сло́вом вся́ческая Содержа́щаго.

Ца́рство небе́сное ве́чно есть и безсме́ртно, его́же ждут рабо́тающии Го́сподеви: его́же де́ля отверго́шася ми́ра сего́, и всех похотен́ий его́, и не досто́ит нам помина́ти тех. Се же оста́вихом за́поведи де́ля Бо́жия, да не па́ки вре́менная возлюби́вше, ве́чная погуби́м. Нело́жно бо есть сло́во Глаго́лющаго: «Я́ко всяк и́же оста́вит дом, и се́ла, или отца́, или́ ма́терь, или́ жену́, или́ де́ти, или́ бра́тию и сестры́, стори́цею прии́мет зде, и в бу́дущий век жизнь ве́чную». Но я́же ини́и мня́ще толку́ют, я́ко о му́ченых во вре́мя гоне́ния, и́мене ра́ди Своего́ рече́ Госпо́дь. Не глаго́лет бо: я́ко тии еди́ни му́чени за и́мя Мое́ во вре́мя гоне́ния, телеса́ своя́ на смерть преда́ша, да жизнь ве́чную насле́дуют. Но: вси и́же и́мене ра́ди Моего́ от злых ми́ра сего́, и всех похоте́й его́, и всего́ име́ния отве́ргшеся, и жизнь ве́чную, ре́кше с му́ченики насле́дуют. И всех ни́щих ду́хом и чи́стых се́рдцем, и кро́тких, и боя́щихся Мене́, блажа́ Спас глаго́лаше: «Я́ко ва́ше есть Ца́рство небе́сное». Му́ченицы бо во еди́н час вре́мене подвиза́вшеся сконча́шася, жития́ же черне́ческое по вся дни стра́ждущий Христа́ ра́ди, му́чен быва́ет, не проти́ву пло́ти и кро́ви ополча́яся, но проти́ву влады́кам, и проти́ву власте́м, проти́ву мироде́ржцем тмы, и проти́ву духово́м лука́вства, до после́дняго издыха́ния брань иму́ще, и стра́ждут, и венча́ются, ору́жие Бо́жие иму́ще, за помога́ющаго нам, и соверша́ющаго ны Христа́.