Стихи́:

Уме́рше боже́ствене Мака́рия,

О́ба и жизнь получи́ша боже́ственейшую:

Зе́млю блаже́нную дости́гше о́ба Мака́рия в девя́тый на́десять.

Святы́й Мака́рий Еги́петский бя́ше пусты́нное рожде́ние и воспита́ние от млады́х ногте́й доброде́тель проходя́: и ту прии́м и возлюби́в, боже́ственное оби́телище Свята́го Ду́ха быв. Толи́ко бо терпе́ние в доброде́тельных поте́х стяжа́в, я́ко и на ду́хи нечи́стыя прия́ти власть. Приложи́ же ся ему́ и прозре́ния дар, я́ко и бу́дущая предглаго́лати, и мно́гим чудесе́м самоде́латель быв. Сей убо мно́гия ра́ди мольбы́ тогда́ архиере́йствующаго, свяще́нничество восприя́т. Не хотя́ бо свети́льнику под спу́дом кры́тися: но ча́яти от осяза́ния рук его освяти́тися. Сему́ же бы́вшу, в жесточа́йшее житие́ себе блаженный вдаде: подзди́зд сотвори́в в зе́млю под ке́ллию свою́, я́ко полпо́прища бы́ти, и верте́п свои́ма рука́ма ископа́в при край. Да внегда мно́гим к нему приходя́щым и стужа́ющым, тай в подзди́зд, и в вертеп вхожда́ше, и никто́же того́ обрета́ше, и к Бо́гу вся́чески своя́ мольбы́ безмо́лвно в верте́пе приношаше. А е́же о я́стии и питии́ мно́го есть писа́ти и глаго́лати: телесе его виде́нию, и соверше́нному воздержа́нию свиде́тельствующу. И егда́ еретику́ к нему́ на бесе́ду доше́дшу, началобе́сие име́я, и глаго́ля не бы́ти ме́ртвых воскресе́нию, святы́й же мертвеца́ воскреси́, да тем препре́т еретика́. Глаго́лаше же святы́й: я́ко два чи́на суть бесо́вская: и ов у́бо бо́рет челове́ки на стра́сти вся́кия, ов же на нача́льственное нари́чемо, е́же на пре́лесть твори́т всех челове́к. Таковы́я же бе́сы разделя́ет сатана́ баснотво́рцем, и ересенача́льником. Сей же святы́й, разделя́ющу своему́ ученику́, и отделя́ющу я́же к ни́щым, и о́ному непра́вдующу, гнев Госпо́день прорече́, я́ко на Гиези́ю проказу: е́же и бысть. И ю́ноша не́кто разла́комився, и разжже́нием бесо́вским повсегда́ яды́й три ко́бли хле́ба, и ме́ру вина́ испива́я, его́же святы́й моли́твою на три ли́тры хле́ба уста́ви. И диа́вола ви́де, и его́ мечта́ния, принося́щаго ты́квицы, и тому́ повину́ющуся, мона́ху, Феопе́мпту нари́чему, и́же того́ научи́в и напра́ви. И привоззре́в в пусты́ню, иере́я бы́вша е́ллинскаго, и слы́ша вма́ле моле́ния его́, и му́це осла́битися гре́шником. И внегда́ творя́ше святы́й моли́твы к Бо́гу о нем, и принося́ приле́жно, тогда́ откры́ся ему́ от Бо́га проси́мое, и сказа́ ему́: ей, несть осла́бы му́ки согреша́ющым. Прорече́ же и запусте́ние ски́тское. И друга́го мертвеца́ воскреси́, я́ко да рече́т пре́даное ему́ сокро́вище, где положи́л есть. Степе́нем своего́ и́щущым, и объявив па́ки усну́ти тому́ повеле́. В сих у́бо богоуго́дными де́лы укра́шен, в до́бре ста́рости житие́ оста́ви, и к жела́емому от него́ отъи́де.

Боже́ственный же Мака́рие Александри́йский, пресви́тер бысть, глаго́лемых ке́ллий, соверше́нную любо́вь и безмо́лвие и терпе́ние показа́в, и зна́мения и дела́ сотвори́в. Сего́ доброде́телем поревнова́в вели́кий Анто́ний, рече́: Се почи́ет Дух Святы́й на тебе́, и бу́деши про́чее мои́м доброде́телем насле́дник. Сей блаже́нный а́ще некогда слы́шаше кого́ сотво́рша де́ло по́стническое, то ревнова́ше ему́, и де́лом исполня́ше. Тем услы́шав я́ко тавенисио́те во всю четверодеся́тницу ядя́т нева́рено, суди́ за седмь лет вся́ко е́же огне́м твори́мое не я́сти, и бо́льшее, зе́лие су́рово, и со́чиво ква́шено. Еще́ же и сна не насы́титися подви́гся: Трисвято́му и Всеси́льному Бо́гу моля́ся, о е́же пода́тися ему́ терпе́нию в сих. И за два́десять ноще́й и дней весьма́ не вни́де под кров, ва́ром жгу́щим во дни опаля́емь, и нощно́ю сту́дению му́чимь. Заба́влен же блудо́м быв, отъи́де в пусты́ню, и пребы́сть шесть мес́яц, иде́же комары́ ве́лии су́ще я́ко о́сы зело́ того́ сбода́ху, я́ко стру́пы по всему́ те́лу име́ти. По шести́ же ме́сяцех возврати́ся в ке́ллию свою́, от гла́са то́чию познава́емь бя́ше, зане́же измени́тися пло́ти его́, и яко ко́жи слоно́ве подо́битися. Сему́ же не́когда студенец́ копа́ющу, а́спид изобре́тшися, косну́ся ру́це его́: смертоно́сный же есть таковы́й зверь. Он же обе́ма рука́ма емь за о́бе устне́, о́наго растерза́, рек: Бо́гу тебе́ не посла́вшу, ка́ко мне дерзну́л еси́ косну́тися? Вни́де же не́когда в монасты́рь тавнисио́тский, мирско́е одея́ние наложи́в, хотя́ испыта́ти де́ло коего́ждо по еди́ному. И я́ко наста́ четыредеся́тница, ви́де разли́чная жития́ в них, и непреста́нную моли́тву к Богу всем иму́щым. И ов у́бо вкуша́ше ве́черу, а ин во вторы́й день, други́й же за три дни, и ин за пять, други́й же всю нощь стоя́ без сна на моли́тве: днем же на рукоде́лии приседя́ше. Блаже́нный же Мака́рий наква́сив себе́ фа́лия от фи́ник, и поста́ви на еди́ном у́гле, доне́леже четы́редесять дней мимоидо́ша: и Па́сха дости́же, ни хле́ба вкуси́, ни воды́ пив, ни коле́ну преклони́, ни се́де, ни ля́же, ни ины́я пи́щи вкуси́ кроме́ зе́лия су́рова, и сие́ то́чию в неде́лю. Сему́ не́когда седя́щу на дворе́, и е́же к по́льзе бесе́дующу, ме́чка (медве́дица) пои́мши щеня́ свое́ сле́по су́що, и прише́дши ве́рже его́ к нога́ма его́. О́ному же плю́нувшу на о́чию его́, сотвори́ е́ прозре́ти. Она́ же пои́мши свое́ исча́дие отъи́де. Нау́трия же стоя́щу свято́му, и обе́ты Бо́гу возсыла́ющу, потща́вшися ко́жу о́вню вели́ку принесе́ свято́му. Он же к ней рече́: е́же от непра́вды аз не прие́млю: ме́чка же прекло́ньши главу́ отъи́де. Сей же ви́де и диа́вола, ве́щы преле́стныя нося́ща, не́коею оде́ждею стро́еною и с ты́квами. Бя́ше же святы́й о́браз име́я накру́тен, ре́дки то́чию космы́ на устна́х име́я к концу́ о браде́.

Стихи́:

Ло́жною му́дростию избежа́вши теле́сныя скве́рны,

Страда́вши пои́стинне от меча́ Евфра́сия.

Та бя́ше от гра́да Никомиди́йскаго, при Максимиа́не царе́, ро́да наро́чита, нра́вом целому́дрена, и бла́га. Не поко́ршижеся же́ртву бесо́м принести́, бие́на бысть зело́: и терпя́щи вельми́ бя́ше. И ко оскверне́нию му́жу ва́рвару вдана́ бы́вши, и́мже и посе́чена бысть: прелга́н быв от нея́, я́ко а́ще по́ждеши мене́ ей ре́кши, обеща́вшися пода́ти ему́ бы́лия, е́же не прикаса́тися ему́ ору́жию супроти́вных. И иску́с ре́кши прия́ти ей само́й, и собра́вши бы́лие положи́ на вы́и свое́й. И о́ному мня́щу я́ко и́стина есть, е́же от нея́ рече́нное, извлече́ мечь свой, и кре́пко замахну́в, отсече́ главу́ ея́: И та́ко прия́т вене́ц муче́ния.

Челове́к не́кто бе в Константи́не гра́де, разболе́вся и сме́рти убоя́вся, ни́щым даде́ три́десять литр зла́та, и тоя ра́ди ми́лостыни здрав бысть. И диа́волим науче́нием нача ́тужи́ти по зла́те, раска́явся о ми́лостыни, ю́же бе сотвори́л: и пове́да се бли́жнему дру́гу бога́ту су́щу. Он же глаго́ла ему́: «Ника́коже челове́че прие́мли све́та сего́ зла́го: еда́ прогнев́аеши Бо́га воскреси́вшаго тя ми́лостыни ра́ди: еда́ и смерть напра́сну наведе́т на тя, и отъи́деши без покая́ния». Сему́ же не послу́шающу, но па́че гне́вом отбега́ющу. И рече́ ему́ друг: «А́ще мои́х глаго́л не послу́шаеши, и́хже на спасе́ние твое́ не прие́млеши, аз ти реку́ други́й сове́т». Он же рече́: «Кото́рый и ка́ко?». И́стинный же ми́лостивец отвеща́: «Гряди́ со мно́ю в це́рковь и рцы: Не аз Го́споди сотвори́вый есмь ми́лостыню, но сего́ есть, и аз вдам ти три́десять литр зла́та». Он же обеща́ся та́ко сотвори́ти: и к це́ркви прише́д, зла́то в руку́ прии́м. И поне́же ему́ то изглаго́ла, и исходя́ из двере́й церко́вных, пад у́мре. И всех обре́тшихся ту страх и тре́пет прия́т, и пра́ведному Судии́ Бо́гу песнь возда́ша. Кли́риком же веля́щым господи́ну зла́та того́ взя́ти свое́. Сей же отве́ржеся его́, рек: «Не бу́ди ми того́ ни в помышле́ние прия́ти, е́же вмени́х Го́споду Бо́гу и Того́ есть, и в вы́шних сокро́вищах напи́сано есть, да не могу́ его́ име́ти во власть. Си́це у́бо и Ана́ния с жено́ю свое́ю Сапфи́рою отда́ста Бо́гу це́ну села́ своего́, и утаи́вша от цены́, внеза́пу умро́ста: но Бог не уничижи́тся». И вси слы́шавше, по́льзу прия́ша, и да́ша ни́щым уме́ршаго три́десять литр зла́та.

Я́ко не хотя́щии по зако́ну твори́ти, и не хотя́щии слы́шати его́же не хотя́т, да ся угото́вят слы́шати и терпе́ти. А́ще бо мы умолчи́м, ка́мение возопие́т. А́ще кто я́же на по́льзу со дерзнове́нием глаго́лет, прии́мет мзду: а́ще ли я́же на поко́й слы́шащым глаго́лет, лицеме́рен прии́мет суд. У́не бо есть челове́ку от и́стины по́льзу прие́млющу, возненави́дену бы́ти па́че не́же от лицеме́рия врежде́ну, возлю́блену бы́ти. Возненави́деныя бо без пра́вды, воздви́гнет Госпо́дь: возлюбленныя же всу́е, уничижи́т. Я́ко мно́зи путие́ к покая́нию. Пе́рвее, е́же ка́ятися грехо́в свои́х. Второ́е, еже оставля́ти бли́жнему согреше́ния. Тре́тие, моли́тва от всего се́рдца возсыла́ема. Четве́ртое, е́же ми́лостыню даяти. Пя́тое, от смире́ния мудрость. Не мо́жем убо лени́тися, но по всем сим по вся дни хо́дим, зело́ бо уго́дни путие́ суть си́и. Бо́гу на́шему сла́ва, ны́не и при́сно, и во ве́ки веко́в. Ами́нь.