Стихи́:

Что обе́щное Евфи́мие тебе́ и житию́?

Ко а́нгелом взы́де от стра́ннаго жития́:

Почи́ от жития́ Евфи́мий брада́тый в двадеся́тый.

Сей преподо́бный оте́ц наш вели́кий Евфи́мий бя́ше в ца́рство Гратиа́ново, в Мелити́не Нике́йския митропо́лии, роди́вся от роди́телей благочести́вых, Па́вла и Диони́сы, по вели́кому Иоа́нну Предте́чи, от непло́дныя и безча́дныя утро́бы: и́мже и зва́ние по обетова́нию име́яше, я́ко и благоду́шествовати роди́телем его́, и тре́бующым ми́лостыню пода́ти, и моля́щым о рожде́нии, те́мже и гла́су свы́ше прише́дшу. Сей по сме́рти отца́ своего́, приведе́н быв ма́терию свое́ю ко Евтро́пию вели́кому епи́скопу Мелети́йскому, и от него́ чи́ну кли́рическому причита́ется. Бысть же и во учи́тельских бесе́дах наро́чит, и всех и́же с собо́ю посто́м и доброде́тельным житие́м превзы́де. И пону́жден быв свяще́нничество прия́ти, и свяще́ннических по́стник, и монастыре́й прилежа́ние восприя́ти. Два́десять и де́вять лет имы́й во́зраста своего́ отъи́де во Иерусали́м, и в не́коем горы́ верте́пе с препод́обным Феокти́стом учиня́ется, иде́же и злы́я неду́ги от мно́гих прогна́. Глаго́лется же, яко и́менем Госпо́дним, зело́ ма́лым и худы́м хле́бцем, четы́рем стом из оби́тели изше́дшым, и на пути́ обре́т загладне́вших препита́. Не то́чию же сам си́лою Бо́жиею непло́дство разреши́в изы́де, но и ины́я безча́дныя жены́, благоча́дны и плодови́ты показа́. И по вели́кому Илии́, я́ко и сей небе́сныя хл́яби отве́рзе, и зе́млю непло́дием неду́говавшую напои́. Я́ви же и преподо́бнаго све́тлость звездо́ю, и о́гненнаго столпа́, внегда́ тому́ святу́ю слу́жбу служа́щему безкро́вную же́ртву, его́же предстоя́щии ви́девше с небесе́ сше́дша, и с преподо́бным близ его́ стоя́ща, доне́леже соверши́ся же́ртвенное вре́мя. По́мыслы и чу́вства прише́дших, и боже́ственнаго причаще́ния прия́ти мы́сленно прозира́ше. Да и́же с чи́стою со́вестию, или́ кото́рою скве́рною, всеконе́чному очище́нию зна́мение быва́ше. Сей блаже́нный ко Го́споду отъи́де, лет сый девяти́десяти и седми́, в ца́рство Льва Вели́каго. И изше́д предстои́т Святе́й и Единосу́щней Тро́ице, вельми́ сла́вимь во святы́х и преподо́бных и пра́ведных. Бя́ше же ви́дом благоли́чен, нра́вом препро́ст, убели́зен о́бразом, во́зрастом дово́лен, сед власы́, брада́ да́же до коле́ну. Глаго́лется же о нем: я́ко не́коему хотя́щу мона́ху умре́ти, и́же мня́шеся мно́зем целому́др, и по́стным воздержа́нием, но не бя́ше тако́в, но весьма́ бя́ше непотре́бен: ви́дяше сей блаже́нный а́нгела с трезу́бом ду́шу его́ извлача́ща, и ку́пно глас услы́шати, скро́вная постыде́ния объявля́юща мона́ха о́наго. Соверша́ется же собо́р его́ во святе́й вели́цей це́ркви.

Стихи́:

Ру́це Ва́ссу отсеко́ша ру́це слуга́м,

Ру́це скве́рных, рук святы́х:

Посе́чен секи́рою ру́це Евсе́вие на соста́вы,

Правосла́вною ве́рою непресече́н быва́ет:

Евти́хия пресеко́ша на три ча́сти,

Бо́жия боже́ственая Ли́ца чту́ща Троя́:

Отдели́тися не хоте́ Васили́д от ча́сти святы́х,

Прободе́н во утро́бу ноже́м.

Си́и бя́ху при Диоклитиа́не царе́, бога́тством кипя́ще, и сигкли́том о́бщни сове́ту. Приидо́ша ко Христу́, и Его́ прия́ша креще́ние, поне́же епи́скопа Феопе́мпта ви́девше му́ки терпя́ща, и пресла́вная чудеса́ Христо́вою си́лою соделова́юща. Тем приведе́ни бы́вше к царю́, и пе́рвее отъя́ша по́ясы их: та́же разли́чно прия́ша исхо́ды жите́йския. Святы́й Васо́с, в ров до бедру́ зако́пан, и по всему́ те́лу ссече́н, Бо́гу дух предаде́. Святы́й же Евсе́вий стремгла́в пов́ешен, и на удеса́ секи́рою ссече́н. Святы́й же Евти́хий на четы́ри кольца́ растя́жен, ну́жно разсе́деся. Святы́й же Васили́д, ноже́м прободе́н во утро́бу: И та́ко венцы́ муче́ния восприя́ша.

Стихи́:

Евге́ния, и страда́льцы трику́пно,

Благоро́дия ра́ди душе́внаго мечь посече́.

Си́и сла́внии добропобе́днии му́ченицы, пострада́ша при Диоклитиа́не, и Максимиане мучи́телех. Бя́ху же от страны́ Трапезо́нтския, благоро́дных и сла́вных, и бога́тых роди́телей су́ще де́ти. И за е́же Христа́ испове́даху, приведе́ни бы́ша Лиси́ю ду́ксу. Си́и же моли́твами от ка́пищь и́долы прогна́ша, и мучи́теля ужаси́ша: и в лю́тую я́рость разъяри́вся скве́рный, в темни́цу всади́ му́ченики. Днем же не малым мину́вшым, повеле́ сих привести́ на испыта́ние. И сим предста́вшым: дукс к ним кро́тким и ласка́нным гла́сом бесе́довав. Повини́темися, рече́, о бра́тие и дру́зи, и до́блественнии му́жие, и со мно́ю бого́м же́ртву принеси́те, и аз вас сове́тники, и ра́вны себе царе́ве сла́ве сотворю́, и вели́ки че́сти сподо́бимся от него́, а́ще мои́х слове́с послу́шаете. Му́ченицы же реко́ша: А́ще и весь мир приобря́щем я́ко ты глаго́леши сия́, и че́сти вели́ки от тле́ннаго царя́ нам пода́си: да и́же не́бо и зе́млю сло́вом еди́нем от небытия́ в бы́тие приве́дшаго Бо́га, и Единоро́днаго Сы́на Его́, Го́спода и Спа́са на́шего Иису́са Христа́, и животворя́щаго Его́ Ду́ха, отлучи́тися нам невозмо́жно есть. Непра́ведно есть благочести́вым еже отврещи́ся све́та, и приити́ во тму, и в нощи́ нам заблудити. Но слы́ша льсти́вый судие́, па́че же нам Христа́ и Бо́га на́шего рабо́м, и́же прише́дшым со все́ю душе́ю И́стинному Бо́гу на́шему, и ца́рствовати с ним во ве́ки безконе́чныя сообща́ющымся. Тем и́доли язы́честии (я́коже проро́к глаго́лет), сребро́ и зла́то дела́ рук челов́ечеких, уста́ и́мут, и не глаго́лют, о́чи и́мут, и не ви́дят: у́ши и́мут, и не слы́шат. Подо́бни им да бу́дут творя́щии я́, и вси наде́ющиися на ня. И па́ки пи́сано есть: бо́зи и́же не́бо и зе́млю не сотвори́ша, да поги́бнут. Тем нам повелева́еши, безу́мным покланя́тися о́ судие́, и глухи́м и скве́рным, но не и́маши подсмея́тися нам скве́рным сим посме́хом. Но отве́рзи о́чи твои́, и виждь Бо́га на́шего Христа́ Све́та И́стиннаго, просвеща́ющаго вся́каго челове́ка гряду́щаго к нему́, и блаже́н бу́деши. Сия́ слы́шав скве́рный, я́ростию распали́вся, и свои́м скве́рным слуга́м гне́вно погля́дав, рече́, си́це: До́блия сия́ му́жи, Евге́ния с его́ подви́жники, отве́ргшихся вели́ких и непобедимых бого́в, и Распя́тому Христу́ повину́вшихся, мече́м посещи́ повелева́ю. И а́бие с сло́вом слуги́ присновоспомина́емых главы́ у́бо отсеко́ша. И та́ко соверши́ся муче́ние их.

P.S. В отдельных прологах под 21 января

Приидо́ша не́когда трие́ бра́тия к не́коему ста́рцу в скит. И вопроси́ еди́н, глаго́ля: «О́тче, навыко́х ве́тхий и но́вый зако́н из уст?». И отвеща́в ста́рец, рече́ ему́: «Испо́лнил еси́ ае́р словесы́, и несть ти по́льзы». И вторы́й вопроси́ его́, глаго́ля: «Аз ве́тхий и но́вый зако́н исписах себе́?». И отвеща́ ста́рец, рече́ ему́: «И ты око́нца испо́лнил еси ко́жами, и несть ти пользы». И тре́тий рече́: «А мне на огни́щи возрасло́ есть былие?». И отвеща́в ста́рец, рече́ ему́: «А ты страннолю́бие отгна́л еси́ от себе́, и несть ти по́льзы». Но а́ще хо́щете спасти́ся, име́йте ко всем любо́вь, и ми́лости прилежи́те. Бо́гу на́шему сла́ва, ны́не и при́сно, и во ве́ки веко́в. Ам́инь.