Стихи́:

Непобе́дными быстре́йшим язы́ком,

Руки́ и язы́к оста́вльше, в ру́це Бо́жии Макси́м дух свой вда́вый:

В два́десять пе́рвый смерть Макси́мова очеса́ покры́.

Сей бя́ше во времена́ Константи́на Брада́таго, су́ща пра́внука Иракли́ева. И вели́кими у́бо че́стьми от пе́рвых царе́й почита́емь, и дарова́емь, и дово́лен сый в градских настоя́ниях, содеявшаяся сказу́я сло́вом и нра́вом. И вре́меннаго ра́ди ра́зума, пе́рвое во асигкри́тскую власть поста́влен быв и ца́рским сове́том о́бщник быв. И зане́же лука́вая иноязы́ческая сла́ва, я́же во ед́иной во́ли, плотска́го ра́ди Христо́ва смотре́ния, несмы́сленно и злочести́вно обдержа́ше: ели́ко мы еди́но во обои́х есте́ств чтем, убива́ше же тех, и́же безчи́нны не́кия злосло́вием содержи́мыя, и по купи́лищах обводя́ срамотя́ше, и на вели́кую це́рковь востая́ше. Святы́й же не терпя́ злочести́вых приобще́нию совни́ти, оста́вль мирски́я нача́тки, и нача́т па́че в дому́ Бо́жии себе́ примета́ти и жи́ти, не́жели в се́лех нечести́вых вита́ти. И изше́д в Хрисопо́льский монасты́рь, власы́ главны́я отложи́в, ему́же и наста́вник по́слежде быв. Та́же боже́ственною ре́вностию я́ко огне́м разже́гся, ста́раго Ри́ма дости́же. И па́ки блаже́ному Марти́ну поме́стный собо́р собра́вшу, на прокля́тися нача́льников злочести́ваго веле́ния, е́же на Христа́ един́у во́лю блядосло́вящих, на изобличе́ние таково́е му́дрствующих, словеса́ написа́ еписто́лию бесе́дам, явле́нии пи́сьменными, е́же о христиа́нстей ве́ре испы́тно извести́в, и сложи́в, и повсю́ду посла́в. Припря́гся со обои́ма Анаста́сияма свои́ма ученика́ма, от Ри́ма во Евфи́мы от сигкли́та по́слан бысть. Царе́ви в е́реси пребыва́ющу, тойже от всех су́щих в суде́х всем супроти́влься, и ине́х про́чих на утверже́ние подви́же, други́х же препира́я еписто́лиями проти́вная му́дрствовати: того́ ра́ди во Фраки́ю в темни́цу по́слан бысть. И в темни́це бя́ше святый, неле́ностно и непоткнове́нно моли́твы Бо́гу приноша́ше, и благода́рственныя пе́сни вы́ну без разло́га возсы́лаше, и мно́гия уча́, и подтвержа́я непреста́нно. Ви́девше же того́ еретицы́, в правосла́вней и непоро́чней ве́ре пребыва́юща, ру́ку его́ и язы́к отре́заша. Чи́сто же и богоуго́дно подвиза́яся, отту́ду в Лазики́ю на изгна́ние по́слан быв, иде́же три ле́та препроводи́в, и томл́ения теле́сных потре́б подъе́мля. И испо́лни вре́мя днем, неду́говав, и почи́ о Го́споде, и положе́н бысть во оби́тели свята́го Арсе́ния, в той ве́си Лазики́йстей, и мно́га соде́лования чудесы́ творя́ повсегда́.

Глаго́лет же ся я́ко по отсече́нии руки́ и уреза́нии язы́ка, а́бие Бо́гом пресла́вно состатися язы́ку его́ и я́сно веща́ти, доне́леже от жития́ отъи́де. Обои́м же ученико́м его́, ста́рому Анаста́сию та́коже отре́заша ру́ку и язы́к, и дале́че того́ изгна́ша. Ме́ньший же Анаста́сий в не́которую темни́цу, я́же во Фраки́и всажде́н бысть, и ту житие́ оста́ви.

Стихи́:

Неофи́та искорени́ мечь от земли́,

Неофи́това добро́та я́ко цвет.

Сей бя́ше от Ники́и гра́да Вифини́йскаго, де́тищь благочести́ву роди́телю, и христиа́ну, Фео́дора и Флоренти́и, в ца́рство Диоклитиа́ново. А́бие же от нача́ла жития́ его́ бя́ше испо́лнен благода́ти Бо́жия. В девя́тое бо ле́то иды́й во́зраста своего́ с детьми́ уча́шеся кни́жному уче́нию: моля́ся, и сих пресла́вно пита́ше. И по всегда́ го́лубь одру́ его́ пристоя́ше, и челове́чески к нему́ веща́ше. Того́ ви́девши ма́ти его́ и́здше, ю́же святы́й моли́твою воскреси́. Шед же в го́ру Оли́мпову, и во еди́ну от пеще́р вни́де, иде́же наставля́яй его́ голубь показа́ вни́ти, и в ней бы́вшаго зве́ря изгна́, и та́мо виташе а́нгелом пита́емь. Наста́вшу же пе́рвому на́десять лету, открове́нием с горы́ сни́де, и роди́теля целова́в, и от стяжа́ния их тре́бующым подаде́, и па́ки в го́ру отъи́де. И в пятона́десятое лето во́зраста своего́, предста́ иге́мону Де́кию, по́мощию а́нгеловою и́же к нему́ нака́з творя́щу. Тем и непови́ннаго ра́ди дерзнове́ния его́, пе́рвее бие́н бысть: та́же в пещь о́гненную вве́ржен, и Христо́вою благода́тию сохране́н. И звере́м вдан быв. И напа́дшу нань не́коему ва́рвару, прободе́н бысть мече́м.

Научи́ся ве́рный челове́че благоче́стию быти де́латель. Научи́ся жи́ти по ева́нгельскому словеси́: очи́ма управле́ние, язы́ку удержа́ние, те́лу порабоще́ние, уму́ смире́ние, по́мыслы чи́сты име́я, гне́ву потребле́ние. Понужда́йся на до́брая дела́. Го́спода ра́ди лиша́емь, не мсти: ненави́димь, люби́: гони́мь, терпи́: хули́мь, моли́: умертви́ грех: распни́ся со Христо́м. Всю любо́вь возложи́. На Го́спода, да обря́щеши иде́же тмы а́нгел суть, и пе́рвенец собо́ры, и апо́стольстии престо́ли: же́зли патриа́ршестии, венцы́ му́ченичестии, и похвалы́ пра́ведник: тех сам ся причти́ и возжеле́й. Егда́ ли прии́дет напа́сть на тя от искуше́ния Бо́жия, или́ нагота́, или́ скорбь, или́ глад, или́ и́но что, или неду́г искуша́я те́ло твое́, или́ кро́ви проли́тие Бо́га ра́ди, терпи́ с похвало́ю Бо́жиею, наде́яся на Го́спода Ми́лостива. Да со дерзнове́нием несра́мно рече́ши: проидо́хом сквозе́ огнь и во́ду, и изве́л еси́ нас во уте́ху.