Стихи́:

Раче́нием боже́ственым Тимофе́й да ве́нчан бу́дет:

Бие́н же́злием, омочи́ зе́млю багро́м кро́вным в два́десять вторы́й.

Сей бя́ше от гра́да Ли́стры отца́ е́ллина, ма́тере же иуде́яныни Евни́кии нарица́емыя. Учени́к быв свята́го Па́вла апо́стола, и списа́тель и пропове́дник свята́го Ева́нгелия, поживе́ со зело́ возлю́бленным ученико́м Иоа́нном, и от него́ и Па́вла апо́стола, епи́скоп Ефе́сский поста́влен быв. И по е́же изы́ти Иоа́нну от мо́ря, я́коже от Ирине́я Лугду́нскаго епи́скопа пи́смена, по́слежде от Дометиа́на царя́ в Па́том о́стров и́згнан. Сей блаже́нный Тимофе́й Ефе́сскую епи́скопию пра́вя, идолослужи́телем же по не́коему оте́ческому их пра́зднику пребыва́ющу, та́ко нарица́емь во гра́де Ефе́сстем, и́долы в руку́ име́юще, и не́которым напа́дающым, и себе́ не́кими зна́мении припева́ющым. Му́жие с жена́ми безсра́мно прити́чуще, и мно́га уби́йства разбо́йнически соде́ловающе. Блаже́нный же Тимофе́й не терпя́ такова́го дея́ния зре́ти, и ту их су́етную пре́лесть облича́я, и е́же отступи́ти от ме́рзских свои́х де́телей моля́, научи́ я́ богоуго́дными словесы́ и де́лы благи́ми, и мно́гих крести́в. И я́рости испо́лнишася неве́рнии е́ллини, и убива́емь быва́ет и́ми же́злием, с суровство́м напа́дшими нань. По́слежде свято́е его́ те́ло пренесено́ в Константи́нь град, и положено́ бысть в це́ркви святы́х и вели́ких ап́остол, иде́же и собо́р его́ соверша́ется.

Стихи́:

Анаста́сие на вы́и у́жем,

Я́ко све́тлым украше́нием терпя́,

В два́десять вторы́й Анаста́сие у́жем зада́влен.

Сей пресла́вный му́ченик Анаста́сий бя́ше от Перси́ды: Ца́рствующу же Хосро́ю в пе́рсех: в гре́цех же Иракли́ю. От оте́чества Рази́х, страны́ Ну́ны. Бя́ше же ему́ и́мя пе́рвее Магунда́т, сын не́коего волхва́, и́менем Вав: от него́же волхвова́нию нака́зан быв, уже́ в во́ех Тира́нских быв. Обте́кшым же пе́рсяном ме́ста свята́го гра́да, и мно́ги пле́нники похвата́вше, взят бысть с ни́ми и честны́й Крест, на не́мже Госпо́дь наш е́же пло́тию страсть претерпе́в: и его́ ра́ди сверша́емая чудеса́, и́же от прсян приходя́щым прослу́вшеся, я́ко зде до́йде христиа́нский Бог. Магунда́т же боже́ственною благода́тию дви́жимь, тепле́йше иска́ше о Христе́: тем и от не́коего ве́рнаго му́жа е́же о Кресте́ вся́кое смотре́ние уве́де, (и е́же) и с пе́рскими во́и в Халкидо́не быв. Да я́коже быть пе́рсское возвраще́ние, отъи́де во Иерапо́ль, иде́же обре́т не́коего среброкузнеца́, и́же с ним де́ло хи́трости творя́ше. И отту́ду во Иерусали́м шед, и во святе́м гра́де боже́ственное креще́ние прия́т. И быв́шу ему во оби́тели свята́го Са́ввы, свяще́нный о́браз мона́шеский восприя́т, иде́же вся́кий путь проше́д к доброде́тели веду́щь: и свяще́нным кни́гам научи́вся, и псалти́рь из уст. И про́чее же к Бо́жии любви́ разже́гся, и́же му́кою и кро́вию моля́шеся получи́ти сконча́ние. Ви́дя бо по церко́вных стена́х пи́саная, и слы́ша в пи́сменех, ка́ко по́льзовашася в подвиза́ниих за Христа́ святи́и му́ченицы, зело́ о сицевы́х разжиза́шеся к подо́бию. Тем случи́ся ему́ и сон ви́дети: ча́шу бо мне́вшуся зла́ту держа́ти по́лну су́щу вина́, и пия́, зна́мение позна́в сбытия́ жела́ния его́, е́же за Христа́ муче́ние: боже́ственных же Та́ин причасти́вся, изы́де из оби́тели. И ви́дев волхвы́, и я́же и́ми твори́мая, поруга́ся им. И́миже ят бысть, и приведе́н к Марзава́ну кня́зю их: от него́же учине́н быв ка́мение носи́ти. Иде́же мно́зи от ро́да его приходя́ще, и ни еди́ному щади́ти, ниже́ бесе́довати ему́: но бия́ху его́, и браду ему́ терза́ху. Доса́ду бо и подсме́х своему́ его́ ро́ду вменя́юще, я́же во Христа́ веру. Та́же от них вельми́ бие́н бысть. И приведе́н к царю́ пе́рсскому, и Христа́ Бо́га испове́дав. И зане́ к пе́рсстей слу́жбе повину́тися не восхоте́вшу, па́ки бие́н бысть же́злием неми́лостивно: и за еди́ну ру́ку пове́шен, и сдо́лу ка́мени вели́ку навя́зану. Та́же у́жем за вы́ю связа́вше, толи́ко, я́ко едва́ еди́наче дыша́, и отрезаша ему́ главу́. Соверша́ется же собо́р его́ во святе́м его́ муче́нии, су́щем в це́ркви внутрь святаго му́ченика Филимо́на в Страти́гии.

Стихи́:

Мече́м Ману́ил на две ча́сти разсече́,

Чтяй неразсе́ченая существа́ Христо́ва обоя́:

Гео́ргия и Петра́ во о́бщии по́чести,

Посеца́ют обе́щно Влады́чныя ра́ди о́бщия благода́ти:

Неизрече́нно имя́ше вожделе́ние Лео́нт,

Попра́вшу ему́ утро́бу мече́м,

К мечу прибли́жшуся бли́жае те́ла:

Вдасть Гаврии́л и вдасть же и Сио́ние,

И́стинныя воево́ды не боя́щеся меча́:

Иоа́нн и Лео́нт до́блейшии,

И Паро́д мно́жеством ка́мений побие́н,

Путь мимои́де от сего́ жития́:

Три пя́теро число́ два́десятиц посече́ мечь,

Совокупи́вый с си́ми седмери́ц де́сять и еди́на.

Си́и святи́и от разли́чных епа́рхий и мест су́ще, во Андриа́нове гра́де живу́ще. Болга́ре же неразу́мнии непознава́юще Христа́ Бо́га И́стиннаго, изыдо́ша в Македо́нию, и Фра́кию плени́ша: обти́чуще и того́ самого́ Царя́ гра́да. И во Андриа́нов град доидо́ша, и того́ за три ме́сяцы обсе́дше, и поплени́ша ели́цех обрето́ша. Сия́ же творя́ху в ца́рство злочести́ваго Льва Армени́на, ца́рствующа над гре́ки: и Кру́му воево́дствующу над болга́рским язы́ком. Тому́ же Кру́му плени́вшу число́м душ, четы́редесять ты́сящь: с н́имиже и свята́го епи́скопа стремгла́в на зе́млю пове́рже, и того́ стопта́ прокля́тый. Кру́му же зле живот изве́ргшу, Дуку́м нача́лие прия́т, и тому́ та́коже стра́стне уме́ршу. Дице́нг воево́да быв над болга́ры, су́ров и безчелове́чен: и́же вели́каго архиере́я Ману́ила на дво́е растеса́в, и ру́це от ра́му отсе́к, в снедь скве́рным псом пове́рже. И беззра́чием уя́звен быв, и от свои́х его́ су́щих убие́н быв. Мурта́гон же нача́лие прии́м, всем христиа́ном неповину́ющымся отврещи́ся Христа́, безчелове́чне сотвори́. И о́вех убо у́зами, и заво́йми му́чив, настоя́щаго лиши́ живота́. Свята́го же архиере́я Гео́ргия Дево́льтскаго, и Петра́ епи́скопа, Христа́ Бо́га пропове́дающа, и ве́рныя подтвержда́юща, зане́ пребыва́ти и́ма в благочести́вем Христо́ве повеле́нии, да́же и до сме́рти, же́злием безчелове́чно и зверообра́зно бив: и по сих мече́м святы́я их главы отсече́. Та́коже мно́жество други́х, три́ста се́дмьдесять седмь, ме́чному осужде́нию предаде́. И Иоа́нна, а Лео́нта христиа́нския воево́ды, мече́м посече́: Лео́нта же во святы́х епи́скопа Нике́йскаго, бытие́м скопца́, мече́м пронзе́ утро́бу его́. И Гаврии́ла, и Сио́ния мече́м посече́. Паро́да же свяще́ннейша презви́тера, ка́мением поби́ти осуди́. И ины́х про́чих разли́чными томле́нии уму́чив сме́рти предаде́. Не то́чию же сей злочести́вый Мурта́гон, но ели́цы и ини́и нача́льницы по восприя́тию бы́вше над болга́ры, мно́гия христиа́ны разли́чными му́ками сме́рти преда́ша, и жизнь ве́чную тем исхода́таиша.

Взы́де ста́рец иногда́ от ски́та еди́н в Терну́ф, иде́же обита́, и принесо́ша ему́ за труд по́стный вина́ ма́ло. Ини́и же слы́шавше о нем, принесо́ша ему́ бе́сна еди́наго. Нача́т же де́мон оклеветова́ти ста́рца и глаго́лати: «И винопи́йцу ли сему́ принесо́сте мя?». Ста́рец же, смиря́яся, не хотяше изгна́ти его́: но за поноше́ние его́ рече́: «Ве́рую Христу́, не и́мам сконча́ти ча́ши сея́ пия, до́ндеже изы́дет». И я́ко нача́т пи́ти ста́рец, возопи́ де́мон и рече́: «Жене́ши мя». И пре́жде да́же не сконча́ ча́ши, изы́де благода́тию Христовою.