Стихи́:

Агафанге́ловы и Кли́ментовы кро́ви

Ме́чнаго у́стия о́стрие написа́вшеся:

В два́десять тре́тий посе́чени бы́ша Агафанге́л с Кли́ментом

Блаже́нный Кли́мент сей и богоуго́дный во всем свое́м челове́честем житии́ препроводи́ муче́ние. Два́десять бо и осмь лет просте́рт бысть ему́, и́же к му́чению по́двиг. И́же быва́ше непреста́нно ниже́ по завеща́нию во дни унарече́нныя учине́ние не́которое восприима́ти нача́т и мир. Я́коже в сицевы́х бра́нех ополча́яйся с обапо́лы зако́н, его́же а́бие друг от дру́га ю́ности испа́дше ю́нотствующии, но ве́сели и бы́стри, и я́ко не бы́ти па́че вре́мене диви́тися. Он же я́ко ино́му стра́ждущу терпя́ше, не́жели мно́жеству и нахо́ду злых. Па́чеже диви́тися подоба́ет обоим, зане́же вся́каго вид муче́ния преше́д, от тогда́ содержа́щих мучи́телей и царе́й, и всей, реку́, вселе́нней позо́р быв, и а́нгелы же ужаси́в терпе́нием, и та́ко сла́вный вене́ц восприя́т. Бя́ше же от гра́да Анки́ры Галати́йския отца́ е́ллина, ма́тере же благочести́вы, и́менем Софи́и, и́же и Христа́ Бо́га И́стиннаго от тою́ роди́телю позна́вша. Сей же двуна́десятим ле́том быв, и́ноческому житию́ себе́ вдав, и в двадеся́тое ле́то на архиере́йский престо́л возведе́н быв. Пострада́ же в ца́рство Диоклитиа́ново и Максимиа́ново.

Блаже́нный же Агафанге́л ри́млянин бя́ше ро́дом, по убие́нии святы́х, и́же со святы́м Кли́ментом затворе́ных в Ри́ме, сей бя́ше Агафанге́л еди́н от них, пе́рвее же от ины́х прише́д, и крести́ся от свята́го Кли́мента. И во вре́мя внегда́ хотя́ху посе́чени бы́ти, и́же с ним затворе́ннии, и бежа́ той. Хотя́щу же свято́му Кли́менту вни́ти в кора́бль, и отплы́ти в Никомиди́ю повеле́нием Диоклитиа́новым, предвари́ Агафанге́л, вни́де о́тай в кора́бль, и жда́ше свята́го Кли́мента, да я́коже и той вни́де, и припа́д к нога́м его́. И ви́де его́ святы́й Кли́мент, пора́довася его́ обраще́нию и прилежа́нию, я́ко бла́га а́нгела прише́ствие вмени́, и благода́рствие Бо́гу вся́ческим воздаде́. И бя́ше с ним стражда́, доне́леже доидо́ша до Анки́ры. И к Луки́ю прише́дше, та́мо повеле́нием Луки́евым главы́ их отсеко́ша. Та́ко и с пр́очими и́же с ни́ми му́жи, и жена́ми, и детьми́, ко Христу́ прише́дшым и му́чившымся, и в небе́сных водвори́шася оби́телех. Соверша́ет же па́мять их во святе́м их мучен́ии, су́щем об он пол Евдокси́и, у святы́я Ири́ны ве́тхия же и но́выя.

Стихи́:

Язы́ком бесе́дуя дре́вле Мавси́ма си́рскым:

Язы́ком ны́не бесе́дует а́нгельским ко а́нгелом.

Бя́ше не́который муж в Ки́ре, Мавси́ма и́менем, си́рин бесе́дою, препро́сто в житии́ пребыва́я, просия́ в доброде́телех преизя́щне, в еди́ной же сый ри́зе. И Егда́ у́бо сия́ раздира́шеся, ины́я ру́бы к ней пришива́я, и се́ю покрыва́я свою́ наготу́ теле́сную. Стра́нных и ни́щих учрежде́нию прилежа́ше возжеле́нно, я́ко всем приходя́щым врата́ не затворя́ти. Два скуде́льника име́ющу ему́, глаго́лаху, еди́наго с бра́шном, а друга́го с еле́ем, от ни́хже подава́ше всем тре́бующым. Иже сарефяны́не вдови́це пода́вый благослове́ние, то́йже благослове́ние наведе́ и на его́ скуде́льники: и́бо Бог всех призыва́ющих Его́ богати́т. Я́коже сосу́ду о́ному и чва́нцу оскудева́ти никогда́же повеле́ страннолю́бная се́мена подава́ти: та́ко и ди́вному сему́ подаде́ возжеле́нно пода́нию ра́вную ме́ру. И до́бре и преподо́бно вре́мя жития́ своего́ препроводи́в, ко Го́споду отъи́де.

Стихи́:

Ни худо́му, ни сла́бому житию́,

Высо́кий де́йством и сло́вом Салама́не.

Весь не́где есть у Ефра́тския реки́, к ве́черу лежи́ма при бре́зе, Каперса́на нари́чема: отту́ду бе нарица́емый блаже́нный Салама́н. И безмо́лвное житие́ прии́м, об он пол бре́га ма́лу хлеви́ну обре́т, и затвори́ себе́ та́мо, ни врат, ниже́ про́духа оста́вль. И чрез все ле́то копа́ше внутрь зе́млю, и приима́ше пи́щу. Гра́да же того́ архиере́й, уве́дев доброде́тель му́жа, тща́шеся святи́тельство пода́ти блаже́нному. И раскопа́ еди́н угол хлеви́ны, вни́де, и ру́ку нань возложи́в, и моли́тву соверши́в, и мно́гая к нему́ изре́к словеса́: и бы́вшаго святи́тельства благода́ть пове́дав. Он же ни еди́наго гла́са ему́ отгласи́в. Архиере́й же отъи́де, повеле́ созда́ти раскопа́нную часть хлеви́ны, ю́же бя́ше сам разори́л. Иногда́ же па́ки от тоя́ ве́си, от ея́же нарица́шеся, челове́цы но́щию реч́ный брод проше́дше, и того́ похвати́вше, тому́ не пру́щуся ни сопротивля́ющуся, ни и́но что веля́щу, и в свою́ весь того́ заведо́ша: и такову́ же хра́мину сотвори́ша, в ней того́ затвори́ша. Он же та́коже в молча́нии пребыва́ше, ничто́же ни к кому́ бесе́дуя. И по ма́лех же днех и́же от други́я обонпо́лныя ве́си, па́ки но́щию прише́дше, обрето́ша того́ Бо́гу моля́щася и глаго́люща: Го́споди Иису́се Христе́ поми́луй мя, и всех служа́щих Твоему́ И́мени, и покланя́ющыхся Тебе́ И́стинному Бо́гу на́шему. И хра́мину раскопа́вше, отведо́ша, не противоглаго́лющу же ему́, ни ну́дящу никогоже, е́же оста́вите мя бы́ти зде, но ме́ртва себе́ всеконе́чно в житии́ оста́ви. И апо́стольскаго гла́са и́стинствующаго бя́ше вещая: Христу́ сраспя́хся, живу́ уже не ктому́ аз, живе́т же во мне Христо́с. А е́же ны́не живу́ в пло́ти, ве́рою живу́ Сы́на Бо́жия возлю́бльшаго мя, и преда́вшаго Себе́ за мя. И толи́ко сам себе́ умертви́ блаже́нный Салама́н, я́коже ин никто́же никогда́же. И та́ко да́же до конца́ соверши́в. И взы́де ко Го́споду ве́чно ликовству́я.

Стихи́:

Соста́в же еди́н ‐ Богочелове́к,

Сугу́бная же познава́й хоте́ния естество́м.

Святы́й вселе́нский шесты́й собо́р, бысть в Константи́не гра́де, при Константи́не царе́ Брада́том, сы́на Ко́нсты царя́, вну́ка Иракли́ева, отца́ Иустиниа́нова: и при Агафо́не па́пе Ри́мскаго гра́да, и Гео́ргии патриа́рсе Константи́ня гра́да. Бя́ше же число́м святы́х оте́ц сто се́дмьдесять, собра́шася на подви́гших е́реси, на святу́ю собо́рную и апо́стольскую церковь. Глаго́лю же Фео́дора Фара́нскаго, и Оно́рия епи́скопа Ри́мскаго, и Кири́лла Александри́йскаго: и Се́ргия, и Пи́ра, Па́вла, и Петра́, Константи́ня гра́да бы́вшым им епи́скопом. Еще́ же и на поно́вльшуюся е́ресь, сих преждепи́санных еретико́в в святе́м сем собо́ре, е́же есть на Мака́рия, именова́ннаго Антиохи́йскаго епи́скопа, и на Стефа́на его́ ученика́, и на побо́рники их. Си́и у́бо избра́вшиися еретицы́, Фео́дор, и Оно́рий: Кир, и Се́ргий: Пир, и Па́вел, и Петр: Мака́рий же и Стефа́н, злочести́во дерзнуша рещи́ едину во́лю, и еди́но де́йство име́ти Го́споду Бо́гу и Спасу на́шему Иису́су Христу́, и по воплоще́нии: сою́з правове́рия разруши́ти хотя́ще. Сего́ ра́ди святы́й сей вселе́нский шесты́й собо́р, прежденапи́санныя еретики́, я́ко богопроти́вники прокля́т, и всех и́же подо́бная им му́дрствующих, или́ мудрствовати хотя́щих, и без покая́ния пребыва́ющих. С ни́миже иже и мертвыя воздви́гнути в такове́й пре́лести е́ресней велере́чествующаго. И безстра́шие име́я и́же не воздви́гнути Бо́гу глаго́ля ме́ртвых, и бо́льшее злохуле́ние. И такову́ю е́ресь святи́и отцы́ обличи́вше прокля́ша. Правове́рная же повеле́ния ясне́йши святы́й сей собо́р изгласи́в. И две во́ли, и два хоте́ния, во двою́ естеству́ и действу, извести́ша име́ти Го́споду на́шему Иису́су Христу́, не в разделе́нии Ипоста́си. И не бу́ди то, е́же обою́ естеству́ Христо́ву, без во́ли, ре́кше без хоте́ния коему́ждо бы́ти, и неде́йствену. И́бо такова́я от естеству́ отъе́млюща со́бства, сей святы́й собо́р низложи́ и прокля́: и пра́вила изложи́.