Стихи́:

И зе́млю оста́вльше е́же о Ксенофо́нте,

Авраа́м прие́млет у́ слове́сную гости́ну:

Со детьми́ собра́вся Ксенофо́нт, у́мре в два́десять шесты́й.

Преподо́бный Ксенофо́нт бя́ше в Константи́не гра́де, боля́рин вельми́ бога́т, и́стинен и благочести́в. Посла́ же о́ба сы́на своя́ в Вири́т град, е́же учи́тися кни́гам и зако́ном: внидо́ша же в кора́бль и со свои́ми о́троки. И внегда́ нача́ша твори́ти морско́е пла́вание, дви́гшейся бу́ри в мо́ри, и разби́ся кора́бль: и о́ны погрязо́ша, ини́и же уцеле́ша. Сих же изве́рже мо́ре, коего́ждо в разли́чныя страны́. Прия́ста же мона́шеский о́браз, и не зна́юще себе́ бе́ста, и мне́вше друг дру́га я́ко утопо́ста. И воста́вше ко́ждо от своея́ страны́, поидо́ста ко Иерусали́му, и та́мо обрето́ста мона́ха ста́рца, му́жа благочести́ва, и́хже поучи́в. И пребыва́ста у ста́рца не познава́юще себе, я́ко бра́тия себе́ су́ще. Посла́ же оте́ц их раба́ своего́ в Вири́т посети́ти я́, я́ко два ле́та извеще́ния о них не бысть ему́. И шед раб не обре́те их. Уве́де же слу́чшаяся им от раба́ бы́вшаго с ни́ми в корабли́, и доше́д к роди́телем пла́ча, пове́да им дете́й их поги́бель, и́же и мно́го пла́каша, и Бо́га благодари́ша. Разда́ша же име́ние свое́ ни́щым, и взя́ша мно́го бога́тства от свои́х стяжа́ний, и ко Иерусали́му обрати́вшеся, обыдо́ша свята́я ме́ста покланя́ющеся, и моля́ху Бо́га о свои́х ча́дех: ка́мо обрати́шася, в животу́ ли или́ к сме́рти? И подава́ша от бога́тства, е́же ноша́ху. И та́ко манове́нием Госпо́дним достиго́ша и до о́наго свята́го ста́рца, у него́же тогда́ о́ба ча́да их бе́ша: ему́же поклони́шася и благословение от него́ прия́ста. Ви́деста же и святы́х о́ных ю́нош, святы́й а́нгельский о́браз на себе́ нося́щих, и ста́рцу слу́жащих, ра́достна бе́ста. И нач́аста ча́сто к ста́рцу приходи́ти, е́же ра́ди зре́ния на ю́ныя мона́хи, и́же и не́когда припадо́ста к нога́м свята́го она́го ста́рца, е́же помоли́ти ему́ Бо́га о ча́дех ею́, камося деста. Ста́рец же прозорли́в сый, и смотря́я разгоре́ние жа́лости сердца́ ею́, хотя́ пове́дати и уте́шити их, поста́ви на среде́ о́ба ю́ныя мона́хи, и нача́т пред ни́ми вопроша́ти ею́: Коего́ рожде́ния су́ща? И ка́ко и́мя коему́ждо? И ка́ко до него́ доидо́ста? О́нем же наче́ншым пове́дати отца́ и ма́терь, и ка́ко в Вири́т в науче́ние по́слана бы́ста, и ка́ко в мо́ри истопо́ста, и ка́ко сохранена́ бы́ста, и к ста́рцу доидо́ста. О́ чу́до! Тогда́ о́ба бра́та себе́ позна́ста, и роди́телие своя́ ча́да изобрето́ша. И напа́дша на вы́я друг дру́га, бысть вели́ко рыда́ние, я́ко и ста́рцу пропла́кати. И уте́шившымся, возда́ша сла́ву и благодаре́ние Бо́гу, тако изво́льшему. И та́ко помоли́вшеся ста́рцу Ксенофо́нт и Мария, прия́ста на ся мона́шеское одея́ние и житие́. И та́ко подвиго́стася к доброде́тели и посту́, сам и жена́ его́, и де́ти ею́ Арка́дий и Иоа́нн, я́ко и чудеса́ сподо́бльшеся прия́ти. И Бо́гу да́же до конца́ угоди́вше, успо́ша о Го́споде.

Стихи́:

Зе́млю коле́блеши Оте́ческим то́чию по́глядом,

Бо́же Ми́лостивый, целому́дриши челове́ки.

Бы́вшу тру́су при кончи́не Ма́лаго Феодо́сия царя́, сы́на Арка́дия царя́, и Евдокси́и, в день неде́льный, во вторы́й час дне: И падо́ша мно́зи сте́ны Царя́ гра́да, и до́мове мно́зи, я́ко от ча́сти Троди́йских Емво́лех, да́же и до ме́днаго четверовра́тия, и держа́ трус за три ме́сяцы. Царь же у́бо обходя́ со мно́жеством наро́да, непреста́нно со слеза́ми глаго́лаше: Изба́ви нас Го́споди пра́веднаго гне́ва Твоего́ грех ра́ди на́ших, покая́нием. Подви́гл бо еси́ зе́млю, и смути́л колеба́нием беззако́ний ра́ди на́ших, е́же сла́вити Тебе́ Еди́наго Блага́го и Человеколю́бца Бо́га на́шего.

Стихи́:

Прах ве́тхий Симео́н оттрясы́й,

Врагу́ дре́внему главу́ в пе́рсти сокруши́в.

Сей изде́тства пусты́нное восприи́м житие́, и в ма́ле верте́пе пребыва́я, ника́ко челове́ческую пи́щу прие́мля, то́кмо от расту́щих бы́лий пита́яся. Жела́ние боже́ственное восприи́м, на Сина́йскую го́ру взы́де, иде́же не́когда Моисе́й скры́ся. И та́ко пад за седмь дний а́лчен, с моли́твами и слеза́ми пребы́сть, и ника́ко воста́, доне́леже боже́ственнаго гла́са слы́ша повелева́юща тому́ воста́ти, и прии́м лежи́мыя три я́блоки сне́сти. И сшед с горы́, два монастыря́ созда́в, и многотру́днаго жития́ коне́ц восприя́т, пресла́вная чудеса́ пе́рвее соверши́в в сла́ву Бо́гу.

Прии́де иногда́ ста́рец ко ино́му отцу́, и глаго́лющим им, глаго́лаше еди́н: Аз у́мерл есмь ми́ру. И отвеща́ ему́ други́й ста́рец: Не наде́йся о себе́, до́ндеже изы́деши от те́ла твоего́. А́ще бо ты глаголеши: у́мерл есмь, но сатана́ есть не у́мерл, но по вся часы́ блюде́м себе́ опа́сно. Я́коже бо во́ин и лове́ц иду́ще на свое́ де́ло, не ужаса́ются, но подвиза́ются, и не ве́дят, а́ще уязвят́ся или спасу́тся. Та́ко подоба́ет мона́ху с де́моны бра́тися, не упова́ти же на себе́, но на Бо́га наде́ятися. Ему́же сла́ва во ве́ки веко́в. Ами́нь.