Стихи́:

Слы́ши язы́ка плотска́го, его́же не ви́дяше,

Ефре́м, того́ призыва́ющаго, ему́же язы́к си́рский:

В два́десять осмы́й в небе́сная и мы́сленыя Ефре́ма взя́ша.

Сей святы́й бя́ше от восто́ка, си́рин ро́дом, от роди́телей благочести́вых. И поне́же по его́ рождестве́ ви́деша роди́тели его́ во сне, я́ко возра́стшу на язы́це отроча́ти виногра́ду ве́лию, я́ко напо́лнити всю зе́млю: и приходя́щым пти́цам небе́сным и зо́блющым от него́. И проуве́деша, яко отроча́ наро́чито и́мать бы́ти. Дости́же и до лет вели́каго Феодо́сия, пе́рвее си́рски глаго́ля. Не́когда же прише́д к вели́кому Васи́лию и поста́влен быть от него́ презви́тер. И проглаго́ла язы́ком гре́ческим. Изнача́ла мона́шеское житие́ восприи́м, тем от Бо́га свы́ше благода́ть излия́ся в се́рдце его́, и́же о вся́ком покая́нии мно́га словеса́ изложив, и мно́гих к доброде́тели наста́ви, и в глубо́це ст́арости ко Го́споду отъи́де. Соверша́ется же собо́р его́ в муче́нии святы́я Акили́ны, в Филоксе́нии близ торга́.

Стихи́:

Лу́чшая быв теле́сных хожде́ний,

Отхо́дит па́че Палла́дие на возду́х.

Сей блаже́нный в не́коей горе́ хлеви́ну ма́лу сотвори́в, и в ней себе́ затвори́в, бде́нием же при́сно, и моли́твою и посто́м себе́ украси́в. Тем от Бо́га прии́м чуде́с благода́ть. Купцу́ бо не́коему зла́то мно́го носи́вшу, И уби́йцами убие́ну бы́вшу, и пред враты́ хра́мину свята́го положе́ну бы́вшу но́щию, дню же освети́вшу, и я́ве соде́лование быть, вси укоря́ху преподо́бнаго о закла́нии купца́, и вельми́ от мно́жества наро́дскаго напа́даемь, помоли́вся воскреси́ ме́ртваго. Он же воста́в, и уби́йцы пове́дав, и преподо́бнаго тому́ зла́ту не причасти́вшася показа́. Не сие́ же то́кмо получи́, но и ина́я мно́жайшая сотвори́вшу преподо́бному. Бо́льшее ди́вен бысть в де́лех доброде́тельных, с ми́ром к Бо́гу взы́де, достойнопомина́емая пи́смена Бо́жией Це́ркви оста́вив, на по́льзу прилуча́ющымся.

Бра́тие по́весть хощу́ сотвори́ти, о Васи́лии боже́ственнем, и о Ефр́еме Си́рине. Я́же о отце́ н́ашем Васи́лии, то са́ми видевше. А я́же о Ефре́ме ди́внем, от нело́жных уст его́ слы́шавше, есть же си́це: Ефре́м блаже́нный и приснопа́мятный в пусты́ни сый, о́во просвеще́нием Свята́го Ду́ха ви́дев, о́во же от любве́ и вопроша́ния уве́довая ди́вная дела́ отца́ на́шего Васи́лия: и приле́жно Бо́га моля́ше, откры́ти ему́, како́в есть Вели́кий Васи́лий. И быв во изступле́нии, зрит столп о́гнен, его́же глава́ досяза́ше до небесе́. И глас свы́ше слы́ша глаго́лющь: Ефре́ме, Ефре́ме, и́мже о́бразом ви́диши столп о́гненный, тако́в есть Вели́кий Васи́лий. А́бие же пои́м то́лка, зане́ не уме́яше бесе́довати гре́ческим язы́ком: и прии́де в великоимени́тый град Кесари́йск, дости́г в са́мый пра́здник святы́х Богоявле́ний. И вшед о́тай в це́рковь, узре́ исходя́ща свята́го Васи́лия, и рече́ ходя́щему с ним: я́ко вотще́ труди́хомся я́ко непщу́ю бра́те. Сей бо в таково́м сый чи́ну и че́сти челове́честей, несть я́коже ви́дех. Зане́ ви́дех его́ оболче́на одеждею бе́лою, и су́щаго о нем честна́го при́чта белонося́щих, и честь ему́ творя́ща. Став же в ме́сте та́йне церко́внем, и не чая́ше ска́заннаго ему́, глаго́ля в себе́: Мы поне́сше тяготу́ дневну́ю и зной, ничто́же успе́хом: а сей в такове́м дароноше́нии, и че́сти челове́честей, столп о́гнен есть, дивлю́ся. И с́ице ему́ размышля́ющу, посла́ к нему́ архиепи́скоп архидиа́кона, рек: Иди́ к двере́м за́падным, и во угле́ церко́внем обря́щеши му́жа чернори́зца, иму́ща ку́куль, со ине́м не́которым, скудобра́та, ма́ла, и про́чая лица́ его́ сказа́в, и рече́ши ему́: Вни́ди во святи́лище, зове́т тя архиепи́скоп. Архидиа́кон же трудо́м мно́ги разре́яв лю́ди, до́йде, иде́же стоя́ше преподо́бный Ефре́м, и глаго́ла ему́: Го́споди благослови́, пойди́, и вни́ди во святи́лище, зове́т тя архиепи́скоп оте́ц твой. И уве́дев то́лком глаголемое, отвеща́ ему́ глаго́ля: Облазни́лся еси бра́те, мы стра́нни есмы́, и не зна́еми ему́. Шед же архидиа́кон, возвести́ Васи́лию, почита́ющу ему́ кни́ги лю́дем. И ви́де преподо́бный, язы́к о́гнен веща́ющь усты́ его́. И глаго́ла па́ки архидиа́кону епи́скоп, иди́ и рцы ему́: Господи Ефре́ме, убеди́ся вни́ти во святы́й олта́рь, зове́т тя архиепи́скоп, да вни́деши ко свято́му олтарю́. Шед же архидиа́кон, лобза́ плесне́ его́, и рече́: Го́споди Ефре́ме, зове́т тя архиепи́скоп, да вни́деши ко свято́му олтарю́. Удиви́жеся о сих преподо́бный, и просла́ви Бо́га, и сотвори́ мета́ние. И рече́: Вои́стинну вели́к есть Васи́лий: вои́стинну Дух Святы́й веща́ет усты́ Васи́лиевыми. Отвеща́ ему́, и рече́: Яќо по святе́й Литурги́и, в сосудохрани́льнице целу́ю его́. Вшед же по отпуще́нии в сосудохрани́льник архиепи́скоп, призва́ преподо́бнаго Ефре́ма, и о Го́споде целова́ние даде́ ему́, до́бре прише́л еси́ о́тче, рек, чад пусты́нных: до́бре прише́л еси́, умно́живый в ней ученики́ Христо́вы, и бе́сы отгна́вый о Христе́. Во что труд твой о́тче, приш́ел еси ви́дети гре́шна челове́ка? Даст ти Бог мзду по труду́ твоем́у. И отвеща́в святы́й Ефре́м, вся де́ланная и глаго́ланная в се́рдце его́: и с су́щим с ним чернори́зцем, взя комка́ния от святы́х рук его́. И сотво́ршем любо́вь, рече́ преподо́бный Ефре́м: О́тче честны́й, еди́наго прошу́ у тебе́ да́ра, и сего́ восхощи́ да́ти ми. Он же рече́: Та́ко бу́ди, рцы мни́мая тебе, и па́че о труд́е твое́м е́же прише́л еси́ ко мне. Глаго́ла ему́ преподо́бный Ефре́м: Вем о́тче святы́й, я́ко ели́ко про́сиши у Бо́га пода́ст ти, и хощу́, да умо́лиши Бо́га, да возглаго́лю гре́чески. Он же рече́: Вы́ше си́лы проше́ние, но поне́же ве́рне про́сиши, гряди́ о́тче честны́й пусты́ни наста́вниче, и помо́лимся к Бо́гу: мо́щен бо есть сотвори́ти во́лю твою́. Пи́сано бо есть: Во́лю боя́щихся Его́ сотвори́т, и моли́тву их услы́шит, и спасе́т я́. Сотво́ршема же моли́тву на мног час, и воста́вшема. Рече́ Вели́кий Васи́лий: Чесо́ ра́ди го́споди Ефре́ме не прии́меши свяще́ния презви́терскаго? Досто́йно бо ти есть. И глаго́ла ему то́лком: Зане́ гре́шен есмь. Отвеща́ святы́й Васи́лий: Еда́ бы и аз грех твой име́л. И рече́ ему́: Сотвори́м поклоне́ние. Лежа́щема же и́ма на земли́, наложи́ ру́ку на преподо́бнаго Ефре́ма Вели́кий святи́тель, и рече́ моли́тву диа́конскую. Глаго́ла ем́у: То уже́ воздв́игни ны. Уясни́вшужеся язы́ку, рече́ святы́й Ефре́м гре́ческим язы́ком: Спаси́, поми́луй, и возста́ви Бо́же Твое́ю благода́тию. И сбы́стся напи́санное: Тогда́ ско́чит хромы́й я́ко еле́нь, и я́сен бу́дет язы́к гугни́ваго. Проглаго́лавшу же ему́ а́бие гре́чески, вси в том часе́ просла́виша Бо́га всемогу́щаго, и послу́шающаго моле́ния боя́щихся Его́. И духо́вно веселя́ся пребы́сть с ни́ми три дни. И святи́ его́ архиепи́скоп презви́тером, и то́лка его́ диа́коном. И отпусти́ я́ с ми́ром сла́вяща Бо́га, о ни́хже слы́шаста и ви́деста, я́коже глаго́лано бысть и́ма.

Доко́ле о́ дру́же держи́мь еси́ враго́м, соверша́еши ему́ уго́дная! Доко́ле о́ дру́же теле́сным страсте́м рабо́таеши смертоно́сным су́щым! Приими́ мой свет оживля́ющь тя, и очи́стив твою́ ду́шу ку́пно же и те́ло, приступи́ ко Спа́су исцеля́ющему тя, и вся прие́млющему ка́ющыяся, вели́ко ти спасе́ние есть, а́ще к нему́ возбну́в не облени́шися приити́. Па́ки по днех согреша́я и созида́я, потребля́я, расточа́я, и собира́я, де́тем уподо́бился еси́, я́ко мно́жицею победи́л еси́ скорпи́ю, ея́же жа́ло позна́л еси́ в себе́. Бежи́ зми́я, его́же губи́тельство ве́си. Сам преткну́выйся о ка́мень, поткнется, и па́ки втори́цею сотвори́т, слеп есть и безу́мен: и се имей на се́рдце твое́м, и со тща́нием к покая́нию притецы́, и умоли Созда́вшаго тя. Бу́ди смире́н и умиле́н, а́лчен и воздыха́я. Весели́ся о предвари́вших, ра́дуйся о после́дних: та́ко бо иногда́ и Закхе́й мыта́рь спасе́ся. Та́коже и блудни́ца не́когда блу́дне жи́вши, и ви́девши Спа́сове но́зе, разреши́ плени́цы и власы́ оте́рши, и та́ко из ро́ва стра́сти изле́зе. Та́ко и ты вы́ю низложи́ на коле́ну, и яви́ся умиле́н, и сим спасе́шися. Виждь гра́да Содо́мска и Гомо́рска, ро́да непокори́ва и скверна́ва: бежи́ нечи́ста, на него́же одожди́ Бог огне́м и мо́лниями, и весь град их пожже́. Виждь гра́да Ниневи́тска све́тлость, и красно́ цвету́ща, грехи́ же и зло́бами кипя́ща, и сокруши́ти и Госпо́дь запове́дав. Ви́дев же я́ па́ки во вре́тищи и в пе́пеле ходя́ща, во алчбе́ и жа́жде обледе́вша, трепе́щуща, и стра́хом одержи́мых, всю́ду пла́чущихся, друг за дру́га рыда́ющих, свобо́днии, рабо́тнии, бога́тии, ни́щии, и кня́зи, и старе́йшины, ста́рцы и ю́ноты со младе́нцы: уще́дри я́, поми́лова, и спасе́: суд преложи́, и́же бе повеле́л прия́ти им. Таќо бо гре́шники непокори́выя му́чит, не вели́т же непокори́вшымся поги́бнути. Потщи́ся пока́ятися, спасе́шися. Гото́в Бог на ми́лость и на исцеле́ние, скор на по́мощь, приле́жен на избавле́ние. Прося́щым же дае́т, толку́щым отверза́ет. Моля́щемуся пода́ст проще́ние, простира́я да́ры тре́бующым, не щади́т и́щущему, не отре́ет па́дших, но на спасе́ние ру́ку подае́т. Да́рует разреше́ние и́щущым, прети́т непокори́вым. Соблазни́лся ли еси́? Воспряни́. Па́лся ли еси́? Воста́ни: моли́ся, и мил ся дей, припади́, проси́, ищи́ Хотя́щаго тя спасти́, воспряни́ и не впади́ в ти́ну. А́ще ли паде́ши, па́ки воста́ни: низло́жен, испра́вися: согреши́в же, возврати́ся: исцеле́в же пребыва́й здрав всегда, и спасе́н быв, отврати́ неду́ги, и́миже бе побежде́н еси: да не разжже́т тебе́ огнь, его́же погаси́л еси. Не впади́ в скве́рну, юже бе отмы́л: не уподо́бися сви́ниям, ра́дующымся скве́рне: не поревну́й псом, пояда́ющым своя́ блево́тины. Никто́же бо возложи́в на ра́ло ру́це, и зря вспять упра́влен бу́дет в Ца́рство небе́сное. Никто́же омы́вся, и па́ки к скве́рне прите́к чист быва́ет. Еди́н Христо́с, еди́на ве́ра, еди́на благода́ть, еди́на страсть, еди́на смерть, еди́но воскресе́ние. И не подоба́ет заколе́ному па́ки же́ртвою бы́ти, ни избавле́нию ино́му за тя бы́ти. Свободи́лся ли еси́? То не бу́ди раб самово́льне. Омы́лся ли еси́? Не оскверни́ся па́ки: не и́маши бо ба́ни тве́рды на второ́е омове́ние. Чрез естество́ во гресе́х погрузи́вся, не отча́й себе́ отню́д, то́кмо пока́йся, и спасе́шися о Христе́ Иису́се Го́споде на́шем. Ами́нь.