Стихи́:

Дар льво́ве всея́дцы, Игна́тие,

Твоего́ те́ла часть оста́вльше ве́рным:

В два́десять девя́тый Игна́тиево те́ло пренесе́но бысть.

Сей насле́дник святы́х апо́стол быв, вторы́й епи́скоп Антиохи́йский быв, и с Полика́рпом Сми́рнския це́ркве епи́скопом ученицы́ бяху благове́стника Иоа́нна Богосло́ва. Приведе́н же бысть к Трая́ну царю́, и вся́кую подъя́т мучи́тельную напа́сть, и превы́ше всех быв: по́слан же бысть в Рим, и львы снеде́н пред всем наро́дом предстоя́щим. Сему́ же сбы́вшуся, христиа́нстии не́котории му́жие па́че тысящь зла́та честны́я и святы́я его́ мо́щи от Ри́ма во Антиохи́ю прене́сше, и я́ко дар возлю́блен бра́тии дарова́ша: они́ же со вся́кою че́стию и любо́вию в земли́ положи́ша. Ему́же ра́достный пра́здник це́рковь пра́зднует.

Стихи́:

Пригвозди́вшагося ра́ди на кресте́ Сло́ва,

Седми́м пригвозди́шася страда́льцем главы́.

Си́и Христу́ вво́инившеся, и пре́лесть изобличи́вше: па́лицами мы́шцы их и сте́гне сокруше́ни бы́ша. Та́же нещадно стро́гани бы́вше, и желе́за тя́жка на вы́и их прия́ша. И в темни́цу вве́ржени. И па́ки изведе́ни, и стро́гани, и пове́шени, и главы́ их пригвозди́ша. И та́ко Богу душы своя́ преда́ша.

Стихи́:

И́хже и зве́рие обнаходи́ша,

Сильва́на же зве́рие разу́мнии и ти́и не позна́ша.

Ца́рствующу Нумериа́ну, гоне́ние бысть ве́лие на христиа́ны. Тогда пове́дано бысть кня́зю Меси́йскаго гра́да, о и́же во святы́х Сильва́не епи́скопе того́же гра́да. И а́бие ят бысть, и с ним Лука́ диа́кон, и Моки́й чтец: и предста́ви суди́щу трех ку́пно свя́заных. Я́же и приле́жно князь суди́в, обре́те испове́дающыя Христа́ Еди́наго Бо́га И́стиннаго, и́долы же почита́ющих, проклина́ющыя, разъяри́вся. Те́мже не возмо́г ласка́нием претвори́ти я́, би сих зело́, и всади́ в темни́цу: и пребы́ша та́мо дни дово́льны, таже па́ки изве́д суди́ их. И друча́ше я гла́дом и жа́ждию. И даде́ на них отве́т, да зверьми́ снеде́ни бу́дут. Везе́ным же святы́м на ме́сто, и звере́м разли́чным напуще́ным. Помоли́жеся святый еже та́мо сконча́тися. И а́бие же им свои́м ему́ уго́дником Бог прия́т ду́шы их. Тогда́ и зве́рие ощути́вше теле́са святы́х му́ченик, и отъидо́ша ника́коже к ним косну́вшымся. Христиа́не же но́щию доше́дше, украдо́ша я́, и погребо́ша их че́стно благодаря́ще Бо́га.

Ели́ко у́бо ты мо́лишися от души́ за оклевета́ющих тя, толи́ко Бог известву́ет о тебе́, и Сам месть твори́т за тя: Мне бо, рече́, месть, Аз отда́м, глаго́лет Госпо́дь. И па́ки рече́ Госпо́дь: Люби́те враги́ ва́ша, добро́ твори́те ненави́дящым вас. Моли́теся за творя́щыя вам па́кости, и изгоня́щыя вы. Чесо́ ра́ди повеле́? Да тя изба́вит от сќорби и гне́ва и злопомина́ния, и Своея́ соверше́нныя любве́ сподо́бит: хо́щет бо вся челове́ки спасти́, и в ра́зум и́стины привести́. Я́ко у́бо Бог естество́м сый, всех ра́вно лю́бит: но доброде́тельнаго прославля́ет, зла́го же в ве́це сем на блага́я обраща́ет, я́ко во тме ходя́ща безу́мием. Соверше́нный бо благода́тель не весть ра́знства, ни своему́, ни чужде́му, ни рабу́, ни свобо́дну, ни ве́рну, ни неве́рну: но всех ра́вно ми́лует. Несть бо по апо́столу, ни иуде́й, ни е́ллин: но вси еди́но суть во Христе́. Ему́же сла́ва со Отце́м и с Пресвяты́м и Благи́м и Животворя́щым Ду́хом, ны́не и при́сно и во ве́ки веко́в. Ами́нь.