Стихи́:

Бога́тство Григо́рие, ему́же Ни́сия престо́л,

Не Пие́рию, ни, Еде́м село́ и́мать:

Григо́рие в деся́тый сме́ртный коне́ц покры́.

Сей бя́ше при́сный брат вели́каго Васи́лия, све́тел во словесе́х и правосла́вной ве́ре ревни́тель. Сего ра́ди и Христо́ви це́ркви наста́вник бысть. И с собра́вшимися в Константи́не граде втора́го собо́ра на злочести́вую е́ресь доше́д, побо́рник обре́теся, супроти́вныя сло́вом и си́лою и пи́сменными явле́ньми посрами́в: вся́ким бо проше́д ви́дом и наказа́нием сло́вом же, и доброде́телию ублагово́льствова, и держа́ву восприя́т. И в до́брую ста́рость дости́г, у́спе, и ко Го́споду отъи́де. Бя́ше же по теле́сному воображе́нию подобен бра́ту своему́ Васи́лию, оба́че седина́в, но я́ко и по-ни́зок.

Стихи́:

Доментиа́н от тли премени́ся,

А́ще и тли подо́бно сие́ житие́ глаго́лет.

Сий бя́ше в ца́рство Иустиниа́на ма́лаго, сын Фео́доров и Евдоки́ин, во благоче́стии живу́щих и бога́тство мно́го иму́щим. Наказа́нию же сподо́бися дово́льну, я́ко вне́шним и боже́ственым пи́сменем, и бра́ку приобщи́вся во вре́мя ма́ло. И обру́чницы его́ от жития́ исше́дши, да я́ко уже́ про́чее тща́ние и е́же к Бо́гу мудролю́бие возлюби́, Мелентиа́нстей святе́й це́ркви архиере́й поста́влен бысть, три́десять лет во́зраста имы́й. Сочета́в же и по́стническое житие́ к жите́йскому ра́зуму, не то́чию е́же под руко́ю его́ [бы́вшим челове́ком] хода́тай быв, но и вся́кому язы́ку: мно́гажды бо от царя́ по́слан бысть, и уста́вив пе́рскаго нача́льствия Хорсо́я (Хозро́я) и Вара́ма (Хага́на) воста́вшаго нань изверго́ша и́зо вла́сти, и́же пови́нника гре́ком того́ сотвори́. Гость же и любо́вен показа́ся о́ному же гре́ческому царю́ Маврики́ю (Мирики́ю) и его супру́жнице, и мно́гим стяжа́нием е́же от них вла́стель быв, в пода́ние святы́м це́рквам и к нищепите́нию сия́ истощи́, и в Царе́ гра́де па́ки быв, ко Го́споду отъи́де. В не́мже почте́н быв со вся́ким ца́рским и церко́вным соверше́нием, и в ковче́зе положе́н, и со свеща́ми и пе́сньми дароно́сными в свой ему́ град принесе́н и положе́н быв, мно́га чудесе́м соде́лования на сем житии́ и по е́же от зде оше́ствии показа́в. Соверша́ет же ся его́ собра́ние и свята́го Григо́рия Ниси́йскаго ку́пно во святе́й Вели́цей це́ркви.

Стихи́:

Взы́де отзде́ к возду́ху Вели́кия це́ркве*

Маркиа́н, ему́же сла́ва ве́лия на земли́.

* - сла́вы

Сей бя́ше в ца́рство Маркиа́ново, и цари́цы Пульхе́рии. От ста́раго Ри́ма прише́дшем роди́телема его́, созида́ти це́рковь святы́я Ири́ны, я́же к мо́рю. И совокупи́в к ней и созда́нный дом, свята́го Иси́дора. Созда́ же и церковь святы́я Анастаси́и, я́же в Домни́нове емво́ле. И́же и спасе́ от вели́каго запале́ния, огню́ о́крест обше́дшу. То́йже на кро́ве стоя́, и ру́це на не́бо возве́д моля́ся. Чудесе́м же соде́лования, и толи́ку бога́тству его́ неоскуде́нию пода́ние, и испы́тному поще́нию, изря́днейшу бы́вшу, я́коже о нем писа́ние пове́дует. Соверша́етжеся собо́р его́ в проро́честве честна́го Предте́чи и Крести́теля, близ Сте́рны Мокиси́йския в Дании́ле, вели́каго ра́ди тру́са бы́вшаго на таковы́й день, в нача́ло Васи́лия царя́, внегда́ и це́рковь Пресвяты́я Влады́чицы на́шея Богоро́дицы в Стигма́тех, и ины́я це́ркви, и до́мове препросты́х челове́к падо́ша.

Свято́му патриа́рху Генна́дию происхожде́ние творящу к моще́м святы́я му́ченицы Анастаси́и, в созда́нную от Маркиан́а це́рковь: и мно́жество наро́да провожда́юще ю́ со свеща́ми и с фимиа́мом. Преподо́бному же Маркиа́ну пред вози́лом иду́щу, и не́кто убо́г проси́ у него́ ми́лостыни. Он же не поме́длив ни отре́кся, но всем се́рдцем послу́шав, и утаи́вся всех, и́де в сокрове́нное ме́сто, и совле́к сви́ту свою́ даде́ ни́щему: и бысть наг, то́кмо в фело́нь оде́ян. (И сотвори́ де́ло по словеси́ Госпо́дню: вся́кому прося́щему у тебе́ дай). И вшед в ряд идя́ше, никому́же ве́дущу сотворе́наго. Вше́дшу же в це́рковь святы́я Анастаси́и, положи́ша мо́щи че́стно. И бы́вши святе́й слу́жбе, прии́де час умове́ния рука́м, и закрыва́шеся фело́нем свои́м боже́ственный Маркиа́н, озира́яся, да не уви́дят е́го я́ко наг есть. Диа́кони же вси, и презви́тери, и патриа́рси, ви́дяще его́ в ца́рскую ри́зу облече́на под фело́нем его́: та́коже егда́ и комка́юща ви́деша. Не́котории же от презви́тер оба́диша его́ к патриа́рху. Он же рече́: и аз ви́дех. И сконча́не бы́вши слу́жбе, призва́ его́ патриа́рх Генна́дий в сосудохрани́тельник, и нача́т поноси́ти ему́ глаго́ля: Что сотвори́л еси́ бра́те чрез зако́н? Ле́по ли тебе́ в ца́рстей оде́жди литургиса́ти? Он же со смире́нием припаде́ к нога́ма его́ глаго́ля: Прости́ мя влады́ко, я́ко не сотвори́х ничто́же такова́го. Глаго́ла ему́ патриа́рх: Мы вси ви́дехом тя, и почто́ запира́ешися? И приступа́ше воздви́гнуша и́, и откры́вше фело́нь, в́идеша те́ло его́ на́го. И уви́девше вои́стинну от чего бы́вшее, просла́виша Бо́га, даю́щаго та́йную благода́ть лю́бящым Его́. И отто́ле уве́дено бысть мно́земи ми́лостивное житие́ его́. В толи́ко же терпе́ние нищеты́, и небреже́ние име́ния прии́де, я́ко не́где в дождь ходи́вшу ему́, мо́кра бысть коты́га его́. И вшед у́бо в хра́мину свою́, и разду́в у́глие, пребыва́ше суша́ коты́гу свою́: не име́яше бо и́но что на обы́чное исхожде́ние. По прилу́чаю же посла́ патриа́рх к преподо́бному. По́сланнии же обрето́ша хра́мину его затворе́ну, и стужа́ху зову́ще его. Он же обеща́ся поити́, и не идя́ше, поне́же не и́зсхла бе коты́га его́. Ви́дев же еди́н от зову́щих его́, сквоз́е дски быва́ющее, и пове́да су́щым с ним, и возвести́ша патриа́рху. Он же слы́шав, рече́ су́щым с ним: Никто́же диви́тся слы́шав о Маркиа́не, той бо нау́к и́мать от ю́ности, еди́ному да́вся Человеколю́бцу Бо́гу, и де́лом апо́стольское сло́во творя́, име́я пи́щу и оде́жду, и сим дово́лен быва́я: и сия́ слы́шавше похвали́ша Бо́га. Проти́ву же благо́му его́ житию́, подаде́ ему́ Бог да́ры чудотворе́ния, бе́сы изгоня́ти, боля́щыя исцеля́ти. И сие́ же чу́до творя́ше: ходя́ше но́щию по у́лицам, да иде́же обря́щет ме́ртва лежа́ща, измыва́ше его́ и облача́ше, и глаго́лаше мертвецу́: Воста́ни бра́те целу́емся. И востава́ше мертве́ц по словеси́ его́, и целова́в его́, па́ки почива́ше. Свята́го же блаже́ннаго му́жа Бог усво́и, и а́нгели похвали́ша, и цари́ устыде́шася, бе́си убоя́шася. И вси наро́ди удиви́шася, и Бо́га просла́виша.