Стихи́:

Лука́ния ка́менная от бра́тии не преста́ша:

Я́ко вку́пе соводру́жьшееся ка́мение:

В пе́рвый иу́лия ка́мением пострада́ша безсре́бреницы.

Сия́ свята́я бе́ста от вели́каго гра́да Ри́ма, при Кари́не царе́, самобра́тия су́ща, и врача́ худо́жеством. Челове́ком же и ското́м пода́юща цельбы́, прося́ща врачевству́ мзду, Христо́во испове́дание и ве́ру, и ничто́же и́но прие́млюща. Оклевета́на же бы́вша царе́ви я́ко волхвова́нным худо́жеством чудоде́йствия творя́ща. Ине́м тех ра́ди ве́домым сама́ сия́ преда́вша себе́, и не покори́стася отврещи́ся Христа́. Па́чеже и того́ самого́ царя́ Кари́на от злоче́стия премени́ста. Цельбу́ неду́гу тому́ пода́вша. И внегда́ вопроша́ше их, и лю́тыми му́ками запреща́ти. О́браз лица́ его́ отпа́д, обрати́ся на плеща́ его́ кри́ве. И о сем предстоя́щии ве́роваша во Христа́, и той сам царь со всем до́мом свои́м, и́же и святы́я с че́стию в до́мы своя́ посла́ша. Пото́м же сих наста́вник и́же и той того́же худо́жества сый позави́дев им, и на го́ру возведе́ их, я́ко на бра́ние врачев́ских бы́лий, и напа́д ка́мением поби́ их. Соверша́ет же ся собо́р их, во святе́м до́ме их, су́щем в Павли́нех.

Стихи́:

Сла́ву оста́вль землену́ю и е́же на земли́ ве́щи,

У́мер, восприя́т небе́сную сла́ву Петр.

Сей бя́ше во времена́ Ири́ны благочести́выя цари́цы, и Константи́на сы́на ея, роди́телю вели́ку и сла́вну. Патрики́й бя́ше оте́ц его́ и страте́г, Константи́н нарица́емь. Сей блаже́нный Петр от млады́х ногте́й кни́жному уче́нию прилежа́, и грамматики́ю и филосо́фию навы́к. Та́же сопря́гся жене́, поста́влен бысть в че́сти доме́стическаго чи́на. Пото́м и Константи́ну отцу́ его́ от жития́ отше́дшу. Ники́фору же ца́рство прие́мшу доме́стика икане́тскаго того́ поста́ви. Тем и на болга́ры того́ поведе́. Ра́ти же срази́вшися, и пе́рвее го́рце победи́ша болга́ры. Пото́м обрати́вшеся болга́ры, порази́ша гре́ки. И я́ту бы́вшу блаже́нному с пятию́десять князь от болга́р, и приведе́ни к муче́нию: яви́ся ему́ но́щию святы́й Иоа́нн, возлеги́й на пе́рси Христо́вы, и изба́ви его́ от уз, и да́же и до Ри́ма приведе́. Блаже́нный же сей сметие́ вся вмени́в, и́де во Оли́мпову го́ру, и а́нгельское житие́ восприе́м, ку́пно с вели́ким Иоанни́кием, вся́ку доброде́тель извы́че. Испо́лни же та́мо лет, три́десять четы́ре. Та́же шед в Царьгра́д, и е́же от него́ созда́нней це́ркви Евандри́йстей быв. И за е́же и жене́ его́ от жития́ отше́дши и сы́ну, на дале́че коли́бу потче́, пребы́сть та́мо осмь лет, власяна́я нося́ по те́лу. Но́зе же во вся ле́та по́стническаго жития́ ника́ко обу́в. Посто́м и бде́нием, и про́чим воздержа́нием себе́ томя́. И та́ко до́бре и богоуго́дне пожи́в, почи́ о Го́споде. Глаго́лется же: я́ко рого́з по на́гу те́лу под власяни́цею носи́ти, и́миже и погребе́н бысть.

Стихи́:

Не телеси́ поко́рься соумре́ти,

Е́ве Лео́н я́коже пе́рвый Ада́м наг сый стыдя́шеся.

Стихи́:

Мечу́ порази́вшу две ты́сящи муже́й,

Честны́х страда́лец и́хже неда́ле мужеявле́ние.

Стихи́:

Маври́кие наг пома́зан бысть ме́дом,

Вмени́в пче́льная ожале́ния я́ко и мед сла́дкий.

Стихи́:

Число́ му́жий сожже́нных о́крест же,

Пяти́щи бо пять я́ко и круг явле́нный.

Брат прии́де в го́ру Фере́мскую ко отцу́ вели́кому глаго́ля: «Что сотворю́ о́тче, я́ко поги́бе ми душа́?» Глаго́ла ему́ ста́рец: «Почто́?» И рече́ да я́ко «егда́ бе в лю́дьстем житии́, мно́го пости́хся и бдех, и мно́ги сле́зы умиле́ния и теплота́ бе во мне. А ны́не о́тче ни еди́наго добра́ сотво́рша ви́жу в себе́ весьма́». И глаго́ла ему́ ста́рец: «Ве́ру ими́ ми ча́до, я́ко ели́ко творя́ше в просто́м житии́, от горды́ни и хвалы́ челове́чи имя́ше спасе́ние, и не прия́то ти бя́ше Бо́гом, те́мже и диа́вол не брежа́ше, ни бра́ни творя́ше ти, да отъе́млет от успе́ха твоего́. А ны́не тя ви́дит я́ко на брань изше́дша, те́мже он и вооружи́лся есть на тя. Оба́че го́де есть Го́сподеви еди́н псало́м, е́же ны́не глаго́леши смире́нием, па́че ты́сящь е́же глаго́лал еси́ в просте́м житии́». Отвеща́ ему́ брат: «Весьма́ ны́не не пощу́ся о́тче, но вся до́брыя де́тели отъя́ты бы́ша от мене́». И глаго́ла ему́ ста́рец: «Бр́ате, довле́ет ти е́же и́маши, добро́ ти бу́дет, толи́ко терпи́». Приложе́но же глаго́лаше: «По пра́вде о́тче, поги́бла ми есть душа́». Тогда́ глаго́ла ста́рец: «Ве́ру ими́ ми бра́те, не хоте́х ти изглаго́лати, е́же ти хощу́ рещи́, да не ослабе́ет ум твой, но па́че ви́жу тя во уны́ние впа́дша от диа́вола. Послу́шай бра́те, сего́ еди́наго е́же мни́ши си, я́ко до́бре живя́ше, и доброде́тель творя́ше, егда́ бе в просте́м житии́ – пе́рвая горды́ня есть. Та́ко и фарисе́я вся си погуби́, ели́ко творя́ше вся до́брая. И па́ки не и́маши в себе́, весьма ни еди́наго добра́ творя́ща. Довле́ет ти бра́те на спасе́ние души́, смире́ние. Та́ко бо опра́вдан бысть мыта́рь, ни еди́наго добра́ сотво́рша себе́ глаго́ла. Го́де есть Бо́гу гре́шник, и лени́вый челове́к, сокруше́нным се́рдцем и смире́нным, па́че творя́щаго добро́, и добро́ иму́ща со тщесла́вием, се бо ве́лие добро́ твори́т». По́льзу же прие́м брат, и уте́ху души́ своея́, поклони́ся до земли́ ста́рцу глаго́ля: «Днесь о́тче спасе́на бысть душа́ моя́».

Веждь ча́до, я́ко маловреме́нен есть род челове́ческий, и сего́ ра́ди до́лжен есть смире́нный и́нок николи́же забыва́ти сме́рти. Но а́ще лю́бо седи́т, лю́бо хо́дит, лю́бо де́лает, лю́бо яст, лю́бо пие́т, да и́мать в по́мысле у́бо страх Божий, и мысль сме́ртную: Во усте́х же псалмы́, и моли́тву, и славосло́вие Божие. Душа́ челове́ча посреде есть а́нгела, и бе́са. И у́бо а́нгел влага́ет и показу́ет и учи́т, я́же к доброде́телем: Бес же влага́ет, я́же суть греху́. Душа́ власть и́мать е́же после́довати, ему́же лю́бо хо́щет, или́ а́нгелу, или́ бе́су. Сего́ ра́ди внемли́, да не оскорби́ши а́нгела. Веждь я́ко пост и воздержа́ние и бде́ние, утолева́ют жела́ние, и не оставля́ют тому́ возраща́тися. Безмо́лвие же и моли́тва, и любо́вь Бо́жия, отню́д того́ посрамля́ют. А́ще же есть и́нок долготерпели́в и ми́лостив, без ве́сти твори́т я́рость отню́д. Бо́гу на́шему сла́ва, ны́не и при́сно и во ве́ки веко́в. Ами́нь.