Стихи́:

Ри́за же Сыно́вня – Христохрани́мым полко́м:

Ри́за же Ма́терня – Христохрани́мому гра́ду:

Во вторы́й положена́ бысть в ковче́зе ри́за всечестна́я.

В ца́рство Льва и Ири́ны, патрики́я два имены́ Галви́й и Канди́д, сро́дницы Ардави́рия и А́спаря, любо́вию изыдо́ста от Византи́и, и идо́ста во Иерусали́м на поклоне́ние святы́м место́м. И доше́дше в Палести́ну, бы́вше в галиле́йских ме́стех, обрето́ша в не́коей хра́мине евре́яныни жены́ та́мо лежа́щия мно́жество мно́го возлежа́щее. Во ино́й же кле́ти све́щие мно́го и фимиа́мское приноше́ние. И уве́девша я́ко та́мо ри́за Богома́тере лежи́т. И испроси́вше у жены́ е́же та́мо всено́щное стоя́ние сотвори́ти. И преме́риша дре́вом ковче́га ме́ру, и идо́ша во Иерусали́м, и сотвори́ста ин ковче́г тако́в же, и доидо́ста па́ки к жене́. И утаи́вшеся взя́ста ковче́г, иде́же бя́ше честна́я ри́за, свой же положи́ста на ме́сте. И изше́дше поидо́ста к ца́рствующему гра́ду. И́же и положи́ста честно́е сокро́вище во свое́й кле́ти, нарица́емей Влахе́рна. И созда́вше свяще́нную це́рковь, тая́ще, во и́мя святы́х апо́стол Петра́ и Ма́рка. И не возмо́гше на мно́зе кры́ти, яви́ша та́йну царю́. Царь же ра́достию неизрече́нною испо́лнься, и созда́ це́рковь иде́же ны́не лежи́т святы́й ковче́г, и положи́ та́мо свята́го ковче́га с честно́ю ри́зою. Обви́в многоце́нною багряни́цею, всади́ в ковче́г мра́морен. И печа́тию ца́рскою запеча́тав, и́же и досе́ле есть сохране́ние ца́рствующему гра́ду, боле́знем и ра́тем прогна́ние. Соверша́етжеся таковы́й собо́р во Влахе́рнах.

Стихи́:

Па́мять и хвалу́ Иувена́лиеву,

Христо́ву па́мять боже́ственую Палести́на прино́сит.

Иувена́лий во святы́х оте́ц наш, бе в ле́та Феодо́сия Ю́наго: Святи́тель бысть во Иерусали́ме тре́тий по Кири́лле. Пребы́сть же до ца́рства Маркиа́на и Льва. Прише́д же во Ефе́с на собо́р посреди́ святы́х оте́ц, возсия́ в пропове́даниих с Кири́ллом па́пою Александри́йским. Дости́же же и Халкидо́нскаго собо́ра, святы́х оте́ц шестисо́т и три́десяти. И почте́н бысть Маркиа́ном царе́м за доброде́тель его́, я́ко сие́ таќо суть. Во Евфи́мстем сказа́нии, в тре́тием словеси́, в четы́редесятой главе́ обря́щеши. Созда́в же Лахе́рну Маркиа́н, и с Пулхери́ею глаго́лаше Иувена́лию: аще весть о телеси́ Бо́жия Ма́тере, где положено́ бысть? Он же отписа́ у́бо не ве́де. Дре́внее же у́бо сло́во и́стинное приво́дится, я́ко погребено́ бысть, и е́же от святы́х апо́стол слы́шано бысть и а́нгельское пе́ние, да́же до тре́тияго дне: По тре́тием же дни единому от учени́к не бы́вшу на погребе́нии пречи́стаго те́ла, отверзо́ша ему́ гроб, и не обре́теся те́ло Ея́, но токмо гро́бная еди́на. И помоли́вся царь, поне́ ра́ку с гро́бными запечатле́ну посла́ти, е́же и бысть. Святы́й же Иувена́лий епи́скопствова всех лет, три́десять осмь, и у́спе с ми́ром.

Блаже́н есть бра́тие челове́к той, и́же наде́ется при всем на Бо́га, не́жели на челове́ка. Воззри́те на пе́рвыя ро́ды, и ви́дите я́ко ве́роваша Го́сподеви, и не постыде́шася. Или́ кто пребыва́я в стра́се Его́ оста́влен бысть им? Или́ кто призва́в Его́, презре́н бысть? Ми́лостив и Щедр Госпо́дь, отпуща́ет грехи́, и спаса́ет во вре́мя ско́рби. Тем не возсле́дуем мы́сли се́рдца твоего́, ни рцем: кто ны изба́вит от зла? Госпо́дь Бог отмсти́т оби́дящему. Те́мже добро́ есть наде́ятися на Го́спода Бо́га, не́жели на челове́ка.

Я́ко подоба́ет ми́лостыню хотя́щему твори́ти: не ве́дая ра́зньства ни добру́ ни злу, или́ пра́ведну, или́ непра́ведну в теле́сных потре́бах, но всем ра́вно я́же на потре́бу раздава́ти. А́ще бо насы́тился еси́ пи́щами разли́чными, накорми́ а́лчущаго хле́бом. Напи́л ли ся еси́ помно́гу, даждь жа́дному еди́ну ча́шу. Согре́л ли ся во мно́гих мя́гких и драги́х ри́зах, приоде́жди просте́йшею оде́ждею нага́го, и трясу́щагося зимо́ю. В хра́ме же ли кра́сне и высо́це седи́ши, введи́ скита́ющагося по у́лицам в дом твой. Возвесели́л ли ся еси́ с ким твои́м весе́лием, обвесели́ скорбя́щаго. Обра́довал ли ся еси́ о чем, обра́дуй се́тующаго. Почти́ша ли тя я́ко бога́та, почти́ и ты убо́га. Бу́ди дом твой поко́ище служи́телем Бо́жиим, ре́кше презви́тером, и вся́кому церко́вному чи́ну. Бу́ди поко́й по И́ову, о́ко слепы́м и нога́ хромы́м, наги́м оде́жда, безпокро́вным покро́в. Бу́ди нога́ твоя́ ча́сто ходя́щи к темни́цам и к боля́щим, и к монастыре́м, и ко святы́м домо́м, да услы́шиши Го́спода глаго́люща: «Прииди́те благослове́нии Отца́ Моего́, насле́дуйте угото́ванное вам Ца́рство от нача́ла ми́ра». Ему́же сла́ва, ны́не и при́сно и во ве́ки веко́в. [Ами́нь.]