Стихи́:

Без пи́щи сотвори́в во́лю Госпо́дню:

Пи́щею пребы́сть Иаки́нф Госпо́днею:

Па́губным гла́дом у́мре Иаки́нф в тре́тий.

Той бе от Кесари́и пе́рвыя Капподоки́йския епа́рхии, кувикула́рий са́ном, и служа́ше трапе́зе Троя́на царя́ в Ри́ме. И оболга́н бысть царе́ви, я́ко Христо́во и́мя испове́дует, и пону́жден бысть я́сти скве́рная. И не хотя́ того́ сотвори́ти, но па́че Христа́ Бо́га испове́даше, бие́н бысть по всему́ те́лу. Посе́м в темни́цу вве́ржен, и предлежа́щих идоложе́ртвенных не восхоте́ вкуси́ти, четы́редесять дний а́лчен пребы́сть, царю́ запове́давшу темни́чному стра́жу не да́ти я́сти хле́ба. И та́ко Го́сподеви ду́шу свою́ предаде́. Погребе́н бысть че́стно единове́рными ему́ мужы́. Творя́т же мо́щи его́ чудеса́ и до сего́ дне.

Стихи́:

Посе́чени Феодо́т и Фео́та,

Христо́с свы́ше достоя́ния дая́ венца́:

Бо́га ра́ди просте́ршему не́бо я́ко и ко́жу,

Истя́же Голиду́х ши́ю к мечу́.

P.S. В другом прологе: В тойже день святых мучеников Феодота, Диомида, Евлампия, Асклипиодота и Голиндухи.

Стихи́:

Вмени́ Ма́рко посече́ние ты́льное пе́ние,

Назна́менуя Моки́я на страждьбу́.

Ти́и святи́и му́ченицы я́ти бы́вше, и пре́дани Максимиа́ну епа́рху. Пе́рвое у́бо моли́ми бы́ша пожре́ти и́долом, посе́м прети́ми бя́ху умерщвле́нным бы́ти. Де́тище же ма́ло предъидя́ше к тре́бищу, и не дадя́ше им: Его́же на плещи́ взе́мше е́ллини, би́ша е́ подпру́гою, и злы ра́ны да́вше ему́, сто и де́сять. И рече́ де́тище: «О́ епа́рше, злым кни́гам учи́ши мя». Не поко́ршася же свята́я му́ченика пожре́ти и́долом, но преб́ыста во Христо́ве ве́ре и испове́дании, и мече́м главе́ ею́ усе́чене бы́сте. По святе́м же Моки́и идя́ху жена́ и де́ти его́ во след и пла́чущеся, и́мже веля́ше молча́ти святы́й. Ма́рку же предстоя́щу и усека́ему, жена́ его́ главу́ его́ прия́т.

Стихи́:

Привлече́ Анато́лие коне́ц житию́,

И к незаходя́щему привита́еши Со́лнцу.

Сей бя́ше пе́рвее презви́тер и апокриса́рий сый Александри́йския це́ркве. Пото́м же поста́влен бысть архиере́й Константи́ня гра́да, к сконча́нию ле́том Феодо́сия Ма́лаго, сы́на Арка́диева. Испы́тан же Диоско́ром, мне́вшу сму́дреника того́ бы́ти злове́рному разсмотре́нию, но ника́ко злоде́лию его́ приста́. Бы́вшу же собо́ру в Халкидо́не, того́ самого́ Диоско́ра низложи́ блаже́нный, и и́мя и́же во святы́х Флавиа́на, и́же Диоско́ром разбо́йнически во Ефе́се на второ́м собо́ре, непра́ведною сме́ртию от ерети́к убие́ну, того́ в пи́сьменых учини́. И честно́му его́ пренести́ся сотвори́ телу, и во апо́стольстей це́ркви положи́ти. И посла́ньми печа́тными ко вся́ким местом, епи́скопом посла́в, правосла́вную ве́ру подтвержа́я, и повелева́я им проклина́ти нача́льники ересе́м, Несто́рия, и Евти́хия, и Диоско́ра, и всех и́же злонра́вием на боже́ственое естество́ ху́лящих. Сей у́бо та́ко восприя́т, и учини́ свята́го Флавиа́на. И за осмь лет Це́рковь правосла́вне упасы́й, взы́де ко Го́споду: насто́льника по себе́ оста́ви свята́го Генна́дия.

Не срамля́йся бра́те испове́дати грехо́в твои́х, ни без стра́ха бу́ди прилага́я грехи́ на грехи́. Не рцы, щедро́ты вели́ки Его́, и мно́жество грехо́в мои́х очи́стит. И не отлага́й день за день, но обрати́ся к Бо́гу, ми́лость бо у Него́ и гнев есть. Покая́ния бо ожида́я, пе́рвое благотвори́т и благоде́ет ища́ возвраще́ния, внеза́пу же на́йдет на тя страх Госпо́день, и во вре́мя отмще́ния поги́бнеши. Согреши́л ли еси́, не приложи́ еще́: но о пе́рвых твои́х помоли́вся очи́стишися. Глаго́лет бо Иса́ия: Прииди́те возра́дуемся Го́сподеви Бо́гу на́шему, и исцели́т ны уя́звеныя грехо́м: Изврачу́ет ны и здра́вы сотвори́т по двою́ дню, и в тре́тий возста́вит, и оживе́м с Ним. И уве́мы глаго́лющаго: Прииди́те благослове́нии ко Мне, вси тружда́ющиися и обремене́нии, и Аз упоко́ю вы: Не бо тре́буют здра́вии врача́, но боля́щии: Не приидо́х бо пра́ведных де́ля, но гре́шных на покая́ние призва́ти. Внима́й же сам себе́ о согреше́ниих свои́х, и пока́явся за́поведь прии́м, да сохрани́ши: а́ще и вели́ко и лю́то согреше́ние, да очи́стится покая́нием.

По́мните бра́тие евангели́ста глаго́люща: «Рече́ Госпо́дь, а́ще не обратите́ся и не бу́дете я́ко де́ти, не и́мате вни́ти в Ца́рство небе́сное». И па́ки рече́, бу́дите я́ко новорожде́нии младе́нцы, слове́снаго млека́ жела́юще, неле́стнаго, я́ко да в том живе́м.

Ко́е же де́ло есть де́тищу? Де́тище бо рече́ бие́мо пла́чет, и па́ки с ра́дующимися ра́дуется. А́ще ли досажде́ние прии́мет, не гне́вается. Сла́вимо, не возно́сится. А́щели не́цыи ино́го почту́т, о том не зави́дит. А́ще что́ у него́ во́змут, о том не смуща́ется. А́ще ли оста́вят ему́ роди́тели насле́дие, и не́йдет о том на суд ни сва́рится ни с ким, ни возненави́дит вся́кого челове́ка. А́ще кто осужда́ет, не скорби́т. А́ще ли богате́ет, высо́ких не мы́слит. А́ще ли ви́дит жену́ красну́ доброли́чну, не похо́щет ея́ ни попече́ния твори́т. Ни еди́наго раздража́ет, ни еди́ному льстит, ни руга́ется о́бразу бли́жняго. Вражды́ не и́мать ни с ким, ни осужда́ет ни еди́наго. Не и́мать ума́ о собра́нии бога́тства, ни лю́бит владе́ти. А́ще совлеку́т, то не скорби́т ни держи́т своея́ во́ли. Не бои́тся ча́ди, ни бои́тся ра́ти. А́ще бу́дет гоне́ние, не смяте́тся. Си́це рече́ Влады́ка Госпо́дь наш Иису́с Христо́с.

Те́мже бра́тие разуме́ем, и со изве́стием в стра́се Бо́жии пребу́дем, кроме́ вся́кия зло́бы, попече́мся о свое́м ко́ждо спасе́нии, и друг дру́га бо́льша себе́ творя́ще. А́ще кто нас опеча́лит, или́ брани́т, или́ досади́т, не того́ возненави́дим, но диа́вола, и́же не почива́ет при́сно, хотя́ ны от Бо́га отлучи́ти. Пребыва́яй в любви́, в Бо́зе пребыва́ет, и Бог в нем. Да кто не убои́тся слы́шания? Кто у́бо мудр и без труда́ свою́ ду́шу хотя́ спасти́? Но вся́ку зло́бу и вся́ку не́нависть и́же на бли́жняго не и́мать в се́рдцы свое́м, да не сам сего́ ра́ди изве́ржен бу́дет из Ца́рствия Бо́жия. Бу́дите же творцы́ словеси́ Бо́жию, а не то́чию слы́шателие, ча́юще прия́ти дар Свята́го Ду́ха, егда́ прии́дет и научи́т ны богоуго́дно жи́ти, и даст ны во вражды́ ме́сто любо́вь. За не́нависть и за я́рость, долготерпе́ние. За земна́я, небе́сная лю́бящим Его́. Ему́же сла́ва, ны́не и при́сно и во ве́ки веко́в. [Ами́нь.]

Сей преподо́бный Никоди́м, роди́ся близ гра́да Росто́ва, в ве́си Ива́нкове, от отца́ земледе́льца. Нарече́но же бысть и́мя ему́ Ники́та. И еще́ млад бе, изы́де со скоты́ на по́ле, и слы́шит глас: Никоди́ме, Никоди́ме. И по сме́рти отца́ своего́ пресели́ся в Яросла́вль, и бысть ќовачь желе́за. И отту́ду прии́де в ца́рствующий град Москву́, и быва́ет сожи́тель му́жа единохудо́жна ему́, иму́ща жену́. И во еди́н от дни, свари́ жена́ та ядь не́кую со отра́вою. Яде́ же от я́ди тоя́ мужь ея́ и у́мре: яде́ же и Ники́та, и от того́ пребы́сть в боле́зни вре́мя не ма́ло. Не́когда же седя́щу ему́ на ме́сте, и продаю́щу случа́вшаяся ему́. Прии́де к нему́ мужь, и глаго́ла: Ники́то, чим боли́ши? Он же сказа́ ему́ бы́вшая. Прише́дый же рече́ ему́: Прииди́ в шесты́й час ко хра́му Богоро́дицы Покро́ву на дров, и та́мо мя у́зриши: он же по словеси́ его́ прии́де. Той же даде́ ему́ от сосу́да испи́ти, и бысть здрав. И посе́м прихо́дит на кули́шки к не́коему му́жу и́менем Илие́. Он же глаго́ла ему́: Козю́ской пусты́нник прише́л. Никита́ же не разуме́, что глаго́ла ему́. По сих же прихо́дит, во обитель чу́да архистрати́га Михаи́ла, и постриже́ся, и нареко́ша и́мя ему́ Никоди́м, прежде нарече́нное. И пребы́сть во оби́тели той единона́десять лет. Архимандри́т же оби́тели тоя́ Пафну́тия возво́дится в митрополи́ты на Крутицы, пребы́сть же та́мо и Никоди́м с ним ле́то еди́но. И по благослове́нию того́ отца́ своего́ Пафну́тия, пре́йде к мо́рю в Кожеезе́рскую пусты́ню, и бысть еди́но же лето, и шесть ме́сяц. И отту́ду и́де на реку́ имену́ему Козю́га, на ме́сто неуте́шно и бла́тно. Тогда́ сбы́сться проро́чество Илиино́, е́же глаго́ла ему́, Козю́ский пусты́нник прише́л. И пребы́сть та́мо в труде́х три́десять и шесть лет. И за седмь ме́сяц отше́ствия своего́ ска́зоваше мно́гажды: я́ко егда́ ему стоя́щу на моли́тве, или́ бдя́щу, ви́дит приходя́щая к себе́ вели́каго святи́теля Алекси́я, с ним же и Пресвяты́я Тро́ицы Се́ргиева монастыря́ архимандри́та Диони́сия, и благословля́юща его́. Посе́м же от мно́гаго воздержа́ния и ста́рости изнемо́же, прии́де па́ки в Кожеезе́рскую оби́тель, и пребы́сть четы́редесять и четы́ри дни. И преста́вися, ме́сяца иу́лия в тре́тий день. И погребе́н бысть, близ це́ркве, с полу́денную страну́.