Стихи́:

У́мер, обре́те трудо́м вене́ц ве́лий:

Кри́тский па́стырь, ему́же труды́ – вели́кое пра́вило:

Восхи́щен на небеса́:

Возведе́н бысть Андре́й в четве́ртый.

Сей роди́ся от боголюби́ву роди́телю, гра́да Дама́ска. Изучи́в ме́ньшая пи́смена, и ко грамматики́йскому худо́жеству вдав себе́. Четырена́десятим ле́том во́зраста своего́ сый, вмене́н бысть во свяще́ннический при́чет Фео́дором патриа́рхом свята́го гра́да, и нота́рий назна́менан. И бя́ше всем, яќо и вся́чески. Свято́му же и вселе́нскому шесто́му собо́ру, собра́ну бы́вшу в Константи́не гра́де, по́слан бысть сей патриа́рхом на собо́р. И до́брыя ра́ди доброде́тели его́ и ра́зума, поста́влен бысть диа́кон вели́кия це́ркве. И пома́ле си́рым пита́тель. Та́же архиепи́скоп Кри́тский. И в не́коем о́строве быв нарица́емый Ери́с, близ Митили́на, та́мо житие́ оста́ви. Премно́гая же списа́ния Це́ркви оста́вль, и того́ самого́ вели́каго кано́на, на пе́ние и по́льзу мно́гих и боголюбе́зных душ.

Стихи́:

Тме су́щи, Фео́дору уме́ршу,

И́же проро́ческому пе́рвому сове́ту разсе́дшуся.

Сей бя́ше при Диоклитиа́не царе, от гра́да Ки́ра, и́же при Ливи́и, от него́же Си́мон Кирине́йский. Бысть же добропи́сец вельми́, соверше́нне худо́жеству таково́му извы́к. И́же и предаде́ святы́й це́рквам кни́ги мно́ги свое́ю руко́ю написа́в. Сего́ ра́ди свои́м при́сным сы́ном Ле́ом оклевета́н быв иге́мону Дивлиа́ну: я́ко кни́ги име́я, и мно́ги отвраща́ет от слу́жбы бого́в ко Христо́ве ве́ре. Приведе́н у́бо бысть ко иге́мону, после́дствующым ему́ мно́гим христиа́ном: с ни́ми же бя́ше и свята́я Луки́я, и Иаро́я. Попроси́ша же у свята́го Фео́дора книг, и не подаде́ их, ниже́ покори́ся отврещи́ся Христа́, бие́н бысть па́лицами оловя́ными вельми́. Та́же пото́к тре́бный разврати́в: пове́шен быв на дре́ве, и стро́ган по всему́ те́лу, и о́цтом и со́лию, и о́стрыми клепа́ми по ра́нах тромь. Та́же бри́твою и язы́к ему́ отре́заша. И в темни́цу веде́н. Прие́м от преподо́бных жен отре́заный свой язы́к, положи́ его́ на свои́х пе́рсех, иде́же го́лубь бя́ше ви́димь прикаса́яся свято́му, я́ко от око́нца прилета́я. Такова́я ви́дев идолослуже́бник Луки́й, ве́рова Христов́и. Святы́й же здрав быв. И ма́ло не́что пожи́в испусти́ дух, ку́пно с го́лубем от своея́ хра́мины изше́д. Уве́дев же иге́мон, я́ко Луки́й бысть христиани́н, повеле́ поби́ти святу́ю Луки́ю, и Иаро́ю, и Кипри́ллу: и ели́цы прия́ша от свята́го Фео́дора печа́ть креще́ния. Посе́м крести́ся Луки́й, и претвори́ Дигниа́на иге́мона ве́ровати во Христа́. И́же и отплы́вше ку́пно от Кри́та в Кипр ко ино́му иге́мону, му́чащему нарица́ющих Христа́. И утаи́вся Луки́й от Дигниа́на, предаде́ себе́ мучи́телем. И шед разори́ти тре́бы, и отсеко́ша мече́м главу́ его́. И́же и Дигниа́ном взят бысть, и гро́бу пре́дан. Соверша́ется же собо́р их в муче́нии свята́го Фео́дора, и́же в Пе́ргии. Кипри́лла же му́ченица от того́же гра́да свята́го Фео́дора бя́ше: И́же и с му́жем пожи́вши до двою́ ле́ту: И по сме́рти му́жа своего́ пребы́сть вдови́ца два́десять осмь лет: И́же и умили́вшися о роди́телех свои́х, и́де ко свято́му Фео́дору епи́скопу, затворе́ну ему́ су́щу в темни́це Христо́ва ра́ди испове́дания, цельбы́ ра́ди: Боля́ше бо вельми́ главо́ю, и́же исцеле́вши, служа́ше ему́ с нарече́нными жена́ми, Луки́ею, и Иаро́ею. По сконча́нии же свята́го Фео́дора, оклевета́на бысть ко иге́мону, и предста́вши ему́ испове́да Христа́, и не поко́ршися пожре́ти и́долом, си́це ре́кши: «Несть сия во́льная же́ртва». И сожго́ша ей ру́ку слуга́ми держи́ма. Посе́м пове́шена на дре́ве, и стро́гана: и теча́ше от ра́ны кровь, а от сосе́ц млеко́. И та́ко предаде́ Бо́гу дух свой.

Свята́я му́ченика Христо́ва Феодо́т, и Феодо́тия, Христо́ва ра́ди испове́дания я́та бы́ста от нечести́ваго царя́ Трая́на, и пону́ждена бы́ста отврещи́ся И́стиннаго Бо́га, и пожре́ти и́долом, и не покори́стася, и разли́чно м́учена бы́ста. И затворе́на бы́ста в темни́це, в не́йже затворе́н бысть му́ченик Христо́в Иаки́нф. И бы́ста уче́на тем, и на Христо́ву ве́ру утвержда́ема. И возвеще́на бы́ста от темни́чных страж к царе́ви Трая́ну. По сконча́нии же свята́го Иаки́нфа, изведе́на бы́ста из темни́цы, и предста́ста ему́, и па́ки пону́ждена бы́ста скве́рная я́сти. Она́ же обличи́ста скве́рную лесть и́дольскую: тогда́ пове́шена бы́ста и свеща́ми подожже́на. И с дре́ва сня́та бы́ста, и ме́чную прия́ста кончи́ну. По сконча́нии же прия́ста живо́т и честны́й поко́й. Честны́я же ею́ мо́щи положе́ни бы́ша на ме́сте, иде́же му́чена бы́ста.