Стихи́:

Удо́бно Проко́пие преклони́ ши́ю:

Рече́ бо да отсече́тся льсти́в не жру.

В осмый Проко́пию сла́вному и хра́брому главу́ отсеко́ша.

Вели́кий и преди́вный в чудесе́х Проко́пий бя́ше во времена́ Диоклитиа́на царя́, нарица́емь от Елие́йскаго гра́да. Роди́ся от отца́ благочести́ва и Христа́ испове́дающа, Христофо́ра и́менем, ма́тере же Феодо́сии и́долом служа́щи. Отцу́ же его́ от жития́ отше́дшу, ма́ти же того́ злочести́вей ве́ре уча́ше и пита́ше. Бы́вшу же ему́ в мужь, приведе́ его́ к Диоклитиа́ну, ходя́щу ему́ во Антиохи́и, мольбы́ о нем творя́щи и мно́гая име́ния подаю́щи, прия́ти сы́на ея́. Его́же прие́м и ду́ку Алекса́ндрьскаго поста́ви того́. А́бие же тому́ е́же на христиа́ны брань вручена́ бысть от царя́, я́ко в прилежа́щей но́щи ю́ношествуя. Зло бо бя́ше ше́ствие дню, бу́дущаго ра́ди ва́ра смертоно́снаго. Да я́ко до три́десяти по́прищь гра́да Апами́йскаго быв, после́дствующима и́ обои́ма нуме́рома, бы́вшу же тру́су и мо́лниям, и слы́ша глас с небесе́ призыва́ющь его́ на и́мя: «Неа́ние!», та́ко бо бя́ше пе́рвее ему́ и́мя, и ше́ствию поноша́я, и сме́ртию претя́, я́ко богобо́рне ему́ ше́ствовати. Свято́му же а́бие благоразу́мною душе́ю Го́спода призва́вшу и помоли́вся изве́стнейше Тому́ яви́тися. Яви́жеся ему́ Крест во о́бразе хруста́льне. И глас бысть ему́ от Креста́ глаго́лющь: «Аз есмь распя́тый Иису́с Сын Бо́жий». Тогда́ бо вся́кого управле́ния та́инству научи́вся, изве́стне в ра́зум ве́ры восприе́м. И возврати́вся в Скифопо́ль, повеле́ сотвори́ти ему́ крест от зла́та и сребра́ ско́ван, во о́браз я́вльшийся ему́, и написа́ти на нем три воображе́ния евре́йскими пи́смены: вышше ‐ «Емману́ил», со обою́ же страну́ - от еди́ну «Михаи́л», а от другу́ю «Гаврии́л». И восприе́м крест, и и́же на нем воображе́ныя о́бразы облобыза́в. А́бие ко Иерусали́му обрати́ся и на срацы́ны ополчи́ся, и мно́ги побе́ды сотвори́в на них, пленя́я страны́ их и гра́бя. Повеле́ же ему́ ма́ти его́ же́ртвы побе́дныя бого́м принести́. О́ному же Христо́вою си́лою на ра́тныя соодоле́ния написова́ющу. И приведе́н бысть к царю́, ма́терию оклевета́н. Царь же Улки́ю Кесари́йскому иге́мону повеле́ истяза́ти свята́го, и́же и бие́н от него́ вельми́ [бысть], и не поко́рься и́долом принести́ же́ртвы, вве́ржен бысть в темни́цу е́ле жив. Я́вльшужеся Го́споду на́шему Иису́су Христу́, разреше́н от уз, и Проко́пий нарече́н бысть, и е́же к муче́нию преспея́ние и сконча́нию явля́ющи и́мя, и де́рзость на лю́тыя и прети́мыя му́ки восприе́м. Та́же приведе́н бысть в це́рковь и́дольскую, и моли́твою его́ па́дше и́доли сокруши́шася и изсы́пашася от церко́вных врат. И я́ко ви́девшим во́ином двема́ нуме́рома, со двема́ триу́нома, Никостра́т, и Антио́х, ве́роваша и ти́и во Христа́. И Лео́нтием епи́скопом креще́ние восприе́мше. И повеле́нием царе́вым отсеко́ша им главы́. Я́ти же бы́ша два́десять жен боля́рынь, ку́пно с Феодо́сиею, ма́терию свята́го, ве́ровавшим и тем о бы́вшем чудеси́, и неща́дно му́чени бы́вше, и сосца́ им отре́заша, и разже́ными млаты́ желе́зными мы́шцы их опали́ша, и мече́м главы́ им отсеко́ша. Посе́м Флавиа́ну иге́монство прие́мшу, поста́ви свята́го на испыта́ние, и тому́ не поко́ршуся, повеле́ Архела́ю не́коему уда́рити его́ мече́м. И́же и просте́р ру́ку, а́бие пад на зе́млю и́здше. Та́же растя́жен у́жми святы́й, и жи́лами суро́выми бие́н [бысть]. И у́глием опале́н, и на опале́ныя ра́ны о́цет возлия́ша. Прии́м же в ру́це огнь и лива́н, претерпе́ жгомь, да не вмени́тся нечести́вым, а́ще вве́ржет огнь, же́ртву и́долом принести́. К сим пове́шен и стро́ган. И в пещь разже́ну хотя́ вве́ржен бы́ти, и зна́мением Христов́ым ту́ю устуди́. И ме́чное осужде́ние восприе́м. И отсе́кше главу́ ему́, и взы́де ко Го́споду. Соверша́етжеся собо́р его́ во святе́м его́ муче́нии, су́щем близ Хело́на и в Кондипи́и.

Несть добро́ в безме́рную печа́ль преда́вшуся изнемога́ти, но смири́тися пред Бо́гом прише́дшия ра́ди печа́ли: по ре́кшему: «Возве́рзи на Го́споду печа́ль твою́, и Той тя препита́ет». Не даждь печа́ли души́ твое́й, мно́ги бо погуби́ печа́ль, и несть в ней успе́ха: от печали бо исхо́дит смерть. Печа́ль бо врежда́ет се́рдцу кре́пость. Я́коже бо моль в ри́зе, и че́рвие во дре́ве, си́це печа́ль му́жу врежда́ет се́рдце. Те́мже са́ми о себе́ не скорби́м, но к Бо́гу в слеза́х и воздыха́ниих люботру́дней моли́тве, и кре́пким бде́нием. И та́ко прии́мем от Бо́га по́мощь и избавле́ние.

Рече́ Госпо́дь: «Всяк кни́жник научи́вся Ца́рствию Небе́сному, подо́бен есть челове́ку домови́ту, и́же изно́сит от сокро́вища своего́ но́вая и ве́тхая». Кни́жник бо есть, и́же трудо́м и прилежа́нием почита́ние твори́т боже́ственых писа́ний, се бо сокро́вище прилага́ет ра́зума ве́тхаго зако́на и но́ваго заве́та, и во вре́мя от того́ износя́ уче́ние. А ели́цы не прилежа́т кни́жнаго уче́ния, то не суть домови́тии, ни са́ми иму́ще, ни ине́м подаю́ще, но презря́ще себе́ гла́дом неразу́мия истле́нным. Я́коже бо земли́ неодождя́еме, а́ще кто и мно́жицею вве́ржет се́мя, возрасти́ти не мо́жет, тако́ и ду́ша, а́ще не писа́ний напое́на бу́дет пе́рвее, не мо́жет плода́ добра́ сотвори́ти. Вели́ко у́бо зло е́же не разуме́ти писа́ния, и я́ко безслове́сным ходи́ти. От того́ бо прозяба́ют мно́га зла́я. В том бо ле́ностное житие́ есть и душе́вная слепота́. Я́коже бо све́та сего́ лише́ный непра́во хо́дит, та́ко и непочита́ющии боже́ственых писа́ний, во мно́зе претыка́ются. Сего́ ра́ди поуча́ет апо́стол глаго́ля: «Внима́йте чте́нию, уче́нию, утеше́нию». Те́мже не лени́теся, но почита́йте кни́ги, и ине́х поуча́йте, да сугу́бу мзду прии́мете от Бо́га. Ему́же сла́ва, ны́не и при́сно и во ве́ки веко́в. [Ами́нь.]