Стихи́:

Уязви́в себе́ Пагкра́тие я́ко кровь:

Страда́нию воздви́же дом ка́мением.

Сей святы́й бя́ше во времена́ святы́х апо́стол, быв ро́дом от преде́л Антиохи́йских. Сей свято́е креще́ние прия́т во святе́м Сио́не, ку́пно со отце́м и с ма́терию. И по отше́ствии о́нех оста́вив вся су́щая своя́, и и́де в го́ры Понти́йския. И в не́кий верте́п вшед, осо́бно бя́ше и себе́ внима́я, и Еди́ному Бо́гу приобща́яся. Верхо́вный же апо́столом Петр, проходя́ гра́ды и поуча́я, обре́те му́жа на ме́сте, и восприе́м его́ по́йде во Антиохи́ю. Та́же в Килики́йския страны́. И внегда́ вели́каго апо́стола Па́вла изобре́т, а́бие поста́ви Криске́нта епи́скопа в Гала́тии. Та́же Маркиа́на в Сираку́се. Свята́го же Пагкра́тия в Тавромени́и. Пагкра́тий же вшед в кора́бль, Ликаони́да и Роми́ла су́щым кора́блеником, дости́же во страну́ иде́же по́слан бя́ше. Зна́мением же мно́гим и чудесе́м от свята́го быва́ющимся, ко Христо́ве ве́ре и кора́бленицы прише́дше и почита́емы им по всех страна́х. Фалка́на же и Лисо́на и про́чих бесо́в потреби́ша. Ме́ста же того́ иге́мон Вонифа́нтий, ви́дев быва́емая и почуди́вся, ве́ровал и той Христо́ви. И тща́ние мно́го положи́, созда́ це́рковь за три́десять дний. Пагкра́тий же бя́ше врачу́я всяк неду́г, и вся́ку боле́знь Христо́вою благода́тию. Того́ ра́ди по всегда́ прихожда́ху мно́жество к Бо́гу и креща́хуся, то́чию же еди́ни монта́не пребы́вше в неве́рии, и́же и вре́мя и́щуще, и л́естию напа́дше, свята́го со Артага́лом кня́зем свои́м того́ уби́ша, и к возлю́бленому его́ посла́ша Го́споду. И та́ко обре́те мно́гим боле́знем воздая́ние.

Стихи́:

О́тче Патерму́фие, вопие́т Копри́е,

Приобе́щник явися житию́ же и мечу́,

Копри́я и Патерму́фия мечь песече́ в девя́тый.

По́двиг Алекса́ндре сугу́б прии́мый,

По́стничеству же и посече́нию сугу́бныя венца́.

Си́и бя́ху во времена́ Иулиа́на престу́пника, ко Еги́петстей пусты́ни безмо́лвное житие́ проходя́ще. На Пе́рсскую же рать иды́й престу́пник, уведе о святы́х, и посла́в приведе́ их. И вопроси́ Патерму́фия: «Коли́кими ле́ты еси́?». О́ному же ре́кшу: «Се́дмьдесять пять». Вопроси́ и Копри́я: и тому́ ре́кшу: «Четы́редесять пять». Повеле́ же извести́ старе́йшаго вон. Ну́дящу же Копри́я, вся́кими ласка́ньми отврещи́ся Христа́. Воспомяну́в же Патерму́фиевы пе́рвыя труды́, и бде́ния, и посты́, и не покори́ся ему́. И́же а́бие повеле́ мучи́тель язы́к ему́ уре́зати. Та́же на сковраду́ о́гненную повеле́ того́ поврещи́, к не́йже ведо́мь препаде́ся. Укрепле́н же быв святы́м Патерму́фием, и́же и с ним взы́де на сковраду́, и изыдо́ша без вреда. Пото́м в пещь о́гненную вве́ржени бы́ста, с ни́ми же вни́де и Алекса́ндр, Христа́ с дерзнове́нием испове́дав, и́же и три́е изыдо́ша без вре́да. И повеле́нием мучи́телевым главы́ им отсеко́ша.

Сей во святы́х оте́ц наш Фео́дор, от гра́да Еде́са, благове́рну роди́телю быв сын, отца́ Симео́на, ма́тере же Мари́и, измла́да же Христа́ возлюби́, и чтец бысть Вели́кия це́ркве. Роди́телема же его́ ко Го́споду отше́дшима. Он же раздаде́ име́ние, и отъи́де в ла́вру свята́го Са́ввы двоюна́десяте лет сый, и бысть мних, и мно́га ле́та во и́ночестве пребы́сть. И доброде́тельнаго ра́ди жития́ его́ поставля́емь быва́ет архиепи́скопом гра́ду Еде́су. Чу́до же тогда́ сотвори́ Бог, хотя́ показа́ти вели́каго Фео́дора досто́йна су́ща святи́тельства. Го́лубь бел па́че естества́, над це́рковию паря́щь сни́де над главо́ю поставля́емаго. И я́ко у́бо о́ба патриа́рха, и и́же с ни́ми епи́скопи, и свяще́нницы, сия́ ви́девше, сла́ву возда́ша Бо́гу, творя́щему ди́вная и пресла́вная чудеса́. И ра́ди его́ доброде́тельнаго жития́ да́ром чуде́с обогати́ся, и много подвиза́ся на еретики́, я́ко тве́рдый адама́нт. И мно́гих во Христов́у ве́ру приведе́, и мно́гая чудеса́ сотвори́, и царя́ Вавило́нскаго Аде́ра крести́, и еретика́ не́коего пря́щагося о ве́ре Христо́ве безгла́сна учини́. И мно́га ле́та поживе́. И проуве́дев свое́ к Бо́гу отше́ствие, отъи́де во оби́тель, Освяще́ннаго Са́ввы, и божес́твенных приобщи́вся Та́ин, и моли́тву сотвори́в, и коне́чное целова́ние бра́тии подаде́, и преста́вися к ве́чным оби́телем: ме́сяца иу́лия в девя́тый день.

Бе́ста два кли́рика су́ща швеца́, близ себе́ живя́ста. Еди́н же име́яше де́ти мно́ги, и жену́ и отца́ и ма́терь. Ходя́ше же в це́рковь при́сно по вся дни, и вся по Бо́зе кормя́ше от ремества́ своего́. Други́й же хитр сый, но зане́же не ходя́ше в це́рковь но и в неде́лю де́лаше, но ни себе́ корми́ти можа́ше. Возревнова́в же сосе́ду своему́ и не терпя́ за́вистию, глаго́ла ему́ со гне́вом: «Отку́ду ты и ка́ко обогате́, аз бо прилежа́х реместву́ своему́ па́че тебе́, и обнища́х». Он же глаго́ла ему́ хотя́ и́ сотвори́ти, дабы́ ходи́л и он в це́рковь: «Се аз хожу́ по вся дни к це́ркви, и обрета́ю зла́то ходя́ пове́ржено на пути́, и отто́ле пома́лу обогате́х. Но а́ще хо́щеши при́сно со мно́ю ходи́ти, да тя взыва́ю, и е́же обря́щеши, или́ аз, взима́ема по полу́». И я́ко он ве́ру ем, ходи́ти нача́ во след его́. И ходя́щу ему́ в це́рковь при́сно, и благослови́ и́ Бог, и обогате́. Тогда́ глаго́ла ему́ до́брый той сове́тник: «Ве́си ли бра́те, еди́на лжа Бо́га ра́ди, коли́ко по́льзова души́ твое́й и име́нию твоему́. Но ими́ ми ве́ру ничто́же обрето́х на земли́, я́ко зла́та ра́ди мнел еси́ ходи́л аз. Но поне́же Бог рече́, ищи́те пре́жде Ца́рства Небе́снаго, и сия́ вся приложа́тся вам, сего́ ра́ди глаго́лах ти. И а́ще то́чию и солга́х, и се не погреши́х, обре́те бо и приобре́те». Се же уве́дав преподо́бный Иоа́нн ми́лостивый па́па, сотвори́ и́ до́браго сове́тника и презви́тера, я́ко досто́ин бя́ше и богочте́ц. Бо́гу на́шему сла́ва ны́не и при́сно и во ве́ки веко́в. [Ами́нь.]