Стихи́:

Ополче́ние не́кое обре́теся Бо́гу но́вое,

Дерзнове́нное соше́дшее посреди́ огня́,

Сонча́ огнь равномо́щныя никополи́ты в деся́тый.

Си́и святи́и му́ченицы Христо́вы, бы́ша при Лукини́и царе́, и при Лиси́и иге́моне. И си́и старе́йшины бы́ша в них, Лео́нтий, Маврики́й, Дании́л, и Анто́ний. И предста́ша Лиси́ю, и обличи́ша и, Христа́ же испове́давше. Того́ ра́ди бие́ни бы́ша ка́мением во уста́, и вве́ржени бы́ша в темни́цу. И блюдо́ста их Тимо́ний, и Валира́д, два во́ина, я́же и сама́ ве́роваста Христо́ви. Изве́д же их Лиси́й, и изби́ всех го́лени, и о́ви от них ту умро́ша, о́ви же бя́ху жи́ви моля́ще Христа́. И по сих сконча́шася и ти́и благодаря́ще Христа́ Бо́га, а пре́жде уме́рших телеса́ огне́м сожго́ша.

Во ца́рство благочестивейшаго, тиша́йшаго, самодержа́внейшаго, и христоподража́теля, господаря́ царя́ и вели́каго кня́зя Михаи́ла Фео́доровича всея́ Росси́и самоде́ржца, его́же бысть ца́рство в ми́ре и тишине́, и вси окре́стнии ца́рие глубо́кий мир, и ве́лию любо́вь к нему́ имя́ху, посыла́юще послы́ своя́ к нему́, со мно́гими да́ры прили́чными его́ ца́рскому вели́честву. В Перси́де же тогда́ ца́рствующу Абба́с ша́ху царю́, и́же наипа́че иных окре́стных царе́й вели́кую любо́вь имя́ше, ко благочести́вейшему господарю́ царю́, и вели́кому кня́зю Михаи́лу Фео́доровичу всея́ Росси́и, и ча́стыя послы́, и любоче́стнии да́рове, по достоя́нию их ца́рскаго вели́чества пресыла́ху между́ себе́. В ле́то же от созда́ния ми́ра седмь ты́сящь сто три́десять второ́е, во второ́е же на́десять ле́то благочести́выя держа́вы господаря́ царя́, и вели́каго кня́зя Михаи́ла Фео́доровича всея́ Росси́и самоде́ржца: и в шесто́е ле́то патриа́ршества сугубобы́тна, по плотско́му рожде́нию, и по духо́вному чи́ну, отца́ его́ госуда́рева, вели́каго господи́на и государя, святе́йшаго Филаре́та патриа́рха Ники́тича Моско́вскаго, и всея́ Росси́и: приключи́ся тогда́ бы́ти в Перси́де посла́нником ца́рского вели́чества, Васи́лию Коробьину́, и Евста́фию Кувши́нову, у Абба́с ша́ха царя́: ему́же тогда́ воева́вшу И́верскую зе́млю, и возвра́щшуся с побе́дою. Призва́в же посла́нников о́нех к себе́, пове́дает им о побе́де свое́й, и о всех приключи́вшихся ему́ во И́верстей стране́: С си́ми же сказу́ет им я́ко обре́те та́мо в митропо́лии ри́зу, Вели́каго Бо́га и Спа́са на́шего Иису́са Христа́, от нея́же мно́га чудеса́ быва́ют, ю́же хощу́ посла́ти ко благочести́вейшему ми бра́ту, господарю́ ва́шему царю́, и вели́кому кня́зю Михаи́лу Фео́доровичу всея́ Росси́и самоде́ржцу. Они́ же слы́шавше от него́ о сем, вельми́ удиви́шася, и испыту́юще изве́стно от пола́тных его́, ки́им о́бразом сицево́е вели́кое де́ло позна́но бысть им. Они́ же сказу́юще я́ко во и́верех обрето́ша ю́ в митропо́лии ри́знице, сокрове́нну в не́коем кресте́. Посла́нницы же они́ от Перси́ды воспису́ют о сем, ко благочести́вейшему господа́рю царю́, и вели́кому кня́зю Михаи́лу Фео́доровичу, всея́ Росси́и самоде́ржцу, и ко отцу́ его́ господа́реву, святе́йшему Филаре́ту патриа́рху Моско́вскому, и всея́ Росси́и. Они́ же слы́шавше, вельми́ о сем удиви́шася, и просла́виша Бо́га. По преше́ствии же о́ного ле́та, настоя́щу сто три́десять тре́тиему, ме́сяца ма́рта, прии́де из Перси́ды от предпомя́нутаго Абба́с ша́ха царя́, сла́вен посо́л, и́менем Урусамбе́н, во ца́рствующий град Москву́, ко благочести́вейшему господа́рю царю́, и вели́кому кня́зю Михаи́лу Фео́доровичу всея́ Росси́и самоде́ржцу: с посла́нием и со мно́гими да́ры, досто́йными его́ ца́рскому вели́честву. В пе́рвых же прино́сит вели́кому господи́ну и господа́рю, святе́йшему Филаре́ту патриа́рху Моско́вскому, и всея́ Росси́и, от своего́ Абба́с ша́ха царя́, ковчег злат, ка́мением драги́м украше́н, в не́мже превысоча́йший дар, паче же рещи́ и благода́ть, ри́за вели́каго Го́спода Бога и Спаса нашего Иису́са Христа́, глаго́ля: «Я́ко господа́рь мой перси́дский царь Абба́с шах, своего́ ца́рского вели́чества, посла́л к тебе́ вели́кому архиере́ю, ри́зу вели́каго Иису́са Христа́». Святе́йший же Филаре́т патриа́рх Моско́вский, и всея́ Росси́и, сей пресла́вный дар ра́достно прие́м, и че́стне с ве́рою лобыза́я, полага́ет его́ в сокро́вищех свои́х. По отда́нии же сего́ благода́рного дарова́нии и про́чих, прочита́емо быва́ет и посла́ние пе́рсскаго царя́, в не́мже пи́шет о мно́зей любви́ и бра́тстве, якоже ле́по есть его́ ца́рскому вели́честву. Та́же и о ри́зе Спа́са Христа́: я́ко егда́ плени́вшу ми рече́ И́верскую страну́, и слы́шано ми бысть о ней, от не́ких челове́к изъявле́ную, обрето́х ю́ в митропо́льстей ри́знице, затвержде́ну в кресте́, от нея́же пове́дают и чудеса́ мно́га быва́емая. Прославля́ет же в посла́нии свое́м, вели́кое и́мя Го́спода Бо́га и Спа́са на́шего Иису́са Христа, глаго́ля: А́ще кто не боголе́пне чтит того́ я́ко Бо́га, той у́бо кроме́ вся́кого милосе́рдия огне́м да сожже́н бу́дет. И а́ще кто на такова́го богоху́льника огнь возгнети́т, и той вели́к, и прославле́нию досто́ин. Правосла́вия же опа́сный храни́тель, и па́стырь многочи́сленаго наро́да Росси́йскаго, слове́снаго ста́да Христо́вых ове́ц, святе́йший Филаре́т патриа́рх Моско́вский и всея́ Росси́и, приле́жно размышля́я в себе́ о сем, ка́ко бы достове́рно разсмотри́ти вещь сию, и позна́ти и́стину. Повеле́ собра́ти приключи́вшихся тогда́ во ца́рствующем гра́де Москве́, палести́нских стран и иеросали́млян, иску́сных ста́рцев: Некта́рия архиепи́скопа Волого́дскаго, и Великопе́рмскаго. И Иоанни́кия ке́ларя Спа́са но́ваго монастыря́, и́же пред ма́лым вре́мене сего́ прише́дша во ца́рствующий град Москву́, с Феофа́ном патриа́рхом Иерусали́мским, и ине́х ста́рцев гре́ческия земли́, испыту́я от них, да реку́т и́стинно: А́ще где или́ ка́ко случи́ся им слы́шати во страна́х свои́х, о боже́ственней ризе Спа́са Христа́? Они́ же ки́йждо их я́коже слы́ша, ма́ло не́что изреко́ша о сем: Некта́рий у́бо архиепи́скоп Волого́дский, и Великопе́рмский глаго́ла: «Я́ко бы́вшу ми еще́ архидиа́коном у всесвяте́йшаго патриа́рха Константинопо́льскаго, по́слан бых от него́ не́ких ра́ди потре́б во И́верскую страну́, и приключи́ся ми быти та́мо в це́ркви нарица́емей Иле́та, и ви́дех в це́ркви той на пра́вом ли́це у пе́рваго столпа́ свещы́ возже́ныя. Вопроси́х же свяще́нников су́щих ту, что есть сие́? Они́ же отвеща́вше реко́ша ми: я́ко под сим столпо́м положе́н есть хито́н Христо́в, принесе́ный от не́коего во́ина на́шея страны́, бы́вшаго на распя́тии Госпо́дни, от него́же мно́гая чудеса́ быва́ют». Ини́и же глаго́лаху: «Я́ко ви́дети его́ не сподо́бихомся. Оба́че же в Палести́не, та́коже и во и́верех и во ины́х страна́х от правове́рных, в по́вестех извести́хомся. Глаго́лют бо: я́ко егда́ Пила́т, и архиере́и осуди́вше на распя́тие Го́спода на́шего Иису́са Христа́, тогда́ во́ином преда́ша, да ра́спнут Его́. И введо́ша Его́́ на Голго́фу, и совлеко́ша с Него́ ри́зы Его́, и раздели́ша себе́. Бе же ту с ри́зами и хито́н Его́ не швен, но истка́н свы́ше, о́бразом а́ки бы манди́и без рука́в, широ́к и до́лог: и́бо тем о́бразом во иуде́ох и во Арави́и, ве́рхния ри́зы но́сят: ткала́ же глаго́лют, той хито́н Пресвята́я Де́ва Богоро́дица Мари́я Ма́ти Го́спода на́шего Иису́са Христа́. И во́ини же у́бо мета́ху жре́бия о хито́не Госпо́дни я́коже свиде́тельствует Ева́нгелие. Глаго́лаху бо не предере́м его́, но ме́тнем жре́бия о нем. И я́коже Дави́д в два́десять пе́рвом псалм́е глаго́лет: «Раздели́ша ри́зы Моя́ себе́, и о хито́не Мое́м мета́ша жре́бия». И по жре́бию взят его́ еди́н от во́ин тех, ро́дом И́верския страны́. По стра́сти же Христо́ве и воскресе́нии, и́де той во́ин во свою́ страну́, несе́ же с собо́ю и хито́н Христо́в: и прише́д во своя́ пове́дая всем, я́же во Иеросали́ме соде́явшаяся о Христе́. Хито́н же Христо́в даде́ при́сней по пло́ти сестре́ свое́й, отрокови́це су́щей, вме́сто вели́каго да́ра. Отрокови́ца же та благоразу́мна су́щи, слы́шавши от него́ я́же о Христе́ бы́вшая чудеса́, зело́ возлюби́ ю́ и че́стне храня́ше той хито́н Госпо́день. По сме́рти же свое́й запове́да вме́сто погреба́тельных устрое́ний в нем и погребсти́ себе. По ма́ле же вре́мени отъи́де и она́ от жития́ сего́, и́же по повеле́нию ея́ и погребо́ша в хито́не Госпо́дни. По вре́мени же не́коем др́ево израсте́ над гро́бом открови́цы тоя́ вели́ко, и красно́ зело́, от него́же ми́ро благовонно истече́. В ле́то же по воплоще́нии Госпо́дни, три́ста чет́ыредесять тре́тие, в ца́рство вели́каго царя́ Константи́на, егда́ И́верская страна́ прия́т свято́е креще́ние, тогда́ тем ми́ром исходя́щим от дре́ва того́ пома́зовахуся, вся́кими неду́ги и боле́зньми одержи́мыя и исцеле́ние приима́ху. Правосла́внии же ца́рие и́верстии ви́дяще такова́я пресла́вная чудеса́ быва́ющая, на ме́сте том созда́ша це́рковь красну́, над дре́вом тем, и нача́льнаго епи́скопа ту устро́иша, и та́ко ди́вная и богоде́йственная соверша́хуся чудеса́ на ме́сте том во мно́га ле́та, да́же до пе́рваго пленен́ия от перс И́верския страны́. Егда́ же по попуще́нию Бо́жию, пе́рвое плени́ша пе́рсы И́верскую страну́, тогда́ и це́рковь о́ну разори́шу, иде́же бе о́но мироточи́вое древо. Пото́м же пома́ле а́ще и свободи́ся И́верская страна́ от рабо́ты и́га пе́рсскаго, дре́во же то па́ки не бысть ту, но то́чию столп созда́ша на ме́сте том, ниже́ свято́е ми́ро исходи́мо явля́шеся ктому́ я́коже пре́жде бысть. О хито́не же Госпо́дни еди́нако сла́ва простира́шеся, я́ко во И́верстей стране́ есть: мно́гим бо я́ко не по смотре́нию Бо́жию не́кими ве́рными изъя́т бысть от гро́ба того́, в соблюде́ние святы́ни, во вре́мя плене́ния, или́ по сем ка́ко обре́теся в митропо́лии, о сем отню́д не ве́мы». Святе́йший же патриа́рх, к бо́льшему разсмотре́нию о сем себе́ подви́же, я́ко да уве́сть изве́стно: и от Бо́га открове́ния прося́, полага́ет о том сове́т благ с сы́нми свои́ми епи́скопы Росси́йския страны́, и со всесвяще́нным собо́ром. Настоя́ше же тогда́ время святы́я и вели́кия Четыредеся́тницы: повелева́ет приле́жнее посту́ и мол́итве прилежа́ти, и в тре́тию крестопокло́нную неде́лю того́ свята́го Поста́, сотвори́в всено́щное бде́ние, и повелева́ет Киприа́ну митрополи́ту Са́рскому и Подо́нскому: и Си́монова монастыря́ архимандри́ту Левки́ю, и с ни́ми свяще́нником собо́рныя вели́кия це́ркве, спаси́тельную ризу Христа́ Бога на́шего, на неду́жныя полага́ти. Я́коже дре́вле благочести́вая цар́ица Еле́на, изыска́ и уве́ри Животворя́щий Крест Христо́в ме́ртвою деви́цею, си́це и зде соде́яся. Милосе́рдый же Бог И́же всем призыва́ющым Его́ и́стинною, во́лю боя́щихся Его́ сотвори́, и моли́тву их услы́ша. И у́бо митрополи́т и свяще́нницы повеле́нием святе́йшаго патриа́рха ходя́ще, и на неду́жныя хито́н Христо́в возлага́юще, а́бие боля́щии разли́чными неду́ги ско́рое исцеле́ние приима́ху, и здра́ви бы́вше, сла́ву и благодаре́ние Христу Бо́гу возсыла́ху. И я́коже слы́ша такову́ю благода́ть благочести́вый царь, и святе́йший патриа́рх возра́довашася душе́ю и се́рдцем, я́ко таковы́й пресла́вный Бо́жий дар себе́ стяжа́вше. И повеле́ша к вели́цей собо́рней це́ркви успе́ния Пресвяты́я Богоро́дицы на за́падней стране́ во у́гле ме́сто устро́ити зело́ че́стно и украше́но, иде́же бе и о́браз живоно́снаго гро́ба Христо́ва, и сие неистощи́мое бога́тство, ри́зу Христо́ву глаго́лю, достоле́пне ту положи́ти. И торжествова́ти устро́иша, на вся́ко ле́то от нея́же и до днесь неизче́тная исцеле́ния быва́ют разли́чными неду́ги одержи́мым, с ве́рою приходя́щым во сла́ву Христа́ Бо́га. Ему́же подоба́ет вся́ка сла́ва, со Отце́м, и со Святы́м Ду́хом, ны́не и при́сно, и во ве́ки веко́в. Аминь.

Не возноси́ся челове́че, да не паде́шися внеза́пу, и нанесе́ши души́ свое́й па́губу. Ме́рзок пред Бо́гом и челове́ки всяк велича́вый. Нача́ло бо челове́ческаго греха́ велича́ние, и держа́йся по нем, мерзи́т всем. Коне́ц же его́ отпа́сти от Бо́га. Се́рдце бо велича́ваго, не и́мать умиле́ния. О́ убо́гий челове́че, что возно́сишася? Земля́ сый и пе́пел. Что бо есть велича́ваго безу́мнее. Велича́вый го́рдостию, надыма́яся, я́ко вод́ный гово́р, лицеме́рный износя́ глас. О́ велича́вый, позна́й свое́ естество́, и́же ве́щию сме́ртен, высокоу́мием же мни́шися ве́чен бы́ти. А́ще высо́ко пари́ши мы́слию я́ко оре́л, отту́ду тя све́ргу глаго́лет Госпо́дь. Той бо го́рдым проти́вится. О́чи велича́вых смири́т, и возда́ст возда́ние го́рдым. Тогда́ реку́т в себе́ ка́ющеся, что не успе́ велича́ние на́ше, и что бога́тство с горды́нею помо́жет нам, преидо́ша о́на яќо стень, и того́ ра́ди му́це ве́чне предади́мся, от нея́же да изба́вит ны Госпо́дь Бог наш. Ему́же сла́ва, ны́не и при́сно и во ве́ки веко́в. [Ами́нь.]

Вели́кому кня́зю и царю́ всея́ Ру́сския земли́ Влади́миру, сы́ну Святосла́влю ца́рствующу в Ки́еве. При сем бысть блаже́нный Анто́ний, от гра́да Лю́беча. Сему́ вложи́ Бог в се́рдце возлю́бити и́ноческий чин, и и́де во Святу́ю го́ру и ви́де монастыри́ су́щия та́мо. И обходи́в же я́, и прии́де во еди́н монасты́рь, и умоли́ игу́мена, да возложи́т нань о́браз мни́шеский. Он же послу́шав, прия́т его́, и постриже́ и́, и нарече́ и́мя ему́ Анто́ний. Научи́в же его́ и́ноческому нра́ву и житию́.

И ви́дев преуспе́вша сего́ в доброде́телех и́ноческих, и рече́: «Иди́ па́ки в Руси́ю, и бу́ди благослове́ние с тобою́ Святы́я горы́, я́ко да и та́мо про́чим на успе́х и на утвержде́ние бу́деши». И та́ко блаже́нный Анто́ний прии́де во град Ки́ев, походи́в по всем ме́стом, по гора́м и по де́брем. И на Бе́рестово прии́де, и обре́те пеще́ру, ю́же бе́ша не́когда ископа́ли варя́зи. Сотвори́в же моли́тву и всели́ся в ню. И в ней пребы́сть до лет преставле́ния благове́рнаго кня́зя Влади́мира. Егда́ же прия́ власть безбо́жный Святопо́лк, и нача́ избива́ти бра́тию свою́, и уби́ святу́ю му́ченику Бори́са и Гле́ба, блаже́нный же Анто́ний па́ки отъи́де во Святу́ю го́ру.

И по ле́тех не́ких благочести́вый князь Яросла́в победи́ Святопо́лка и се́де в Ки́еве. В то вре́мя бысть явле́ние от Бо́га игу́мену во Свято́й горе́, глаго́ля: «Посли́ ми Анто́ния па́ки в Руси́ю, я́ко та́мо тре́бую его́». Игу́мен же призва́ преподо́бнаго Анто́ния, и рече́ ему́: «Ча́до Анто́ние, Бо́гу та́ко хотя́щу, иди́ па́ки в Руси́ю, и бу́ди благослове́ние име́я от Святы́я горы́». И прорече́ ему́ глаго́ля, я́ко «Мно́зи и́ноцы от тебе́ и́мут та́мо бы́ти». И благослови́в его́, отпусти́. И па́ки святы́й Анто́ний прии́де к Ки́еву. И и́де на холм, иде́же ны́не пеще́ра его́ есть, и обре́те пеще́ру ма́лу я́ко дву са́жению. И возлюби́ ме́сто то. Пре́жде бо бе ископа́л сию́ Иларио́н митрополи́т. И нача́ моли́тися Бо́гу со слеза́ми глаго́ля: «Го́споди, утверди́ мя на ме́сте сем. И да бу́дет на нем благослове́ние Святы́я горы́, и моего́ игу́мена и́же мя постри́гл [есть]», и всели́ся ту.

И пребыва́ше моля́ Бо́га, яды́й хлеб сух, и того́ чрез день, иногда́ же чрез два. Иногда́ же неде́лю всю не яд пребыва́ше. И воды́ в ме́ру вкуша́ше. Копа́я же пеще́ру, не дая́ше себе́ поко́я день и нощь, в труде́х пребыва́я и во бде́ниих и в моли́твах. Уве́давше же о нем, и прихожда́ху [лю́дие], принося́ще ему́ я́же на потре́бу. И прослы́ я́коже вели́кий Анто́ний, и приходя́щии прося́ху от него́ благослове́ния. И бысть в той пеще́ре не исходя́ лет четы́редесять.

Посе́м же преста́вльшуся вели́кому кня́зю Яросла́ву, и прия́т власть сын его́ Изясла́в, и се́де в Ки́еве. Блаже́нный же Анто́ний премно́гими добро́тами и чудесы́ прослы́ в Ру́сстей земли́. Изясла́в же благове́рный князь уве́дав житие́ его́, и той прии́де с дружи́ною свое́ю, прося́ у него́ благослове́ния и моли́твы. Уве́дан же быв все́ми, нача́ приима́ти от приходя́щих хотя́щия и́ноческому житию́, и пострига́ти я́. И собра́ся к нему́ бра́тии число́м двана́десять. К нему́ же и блаже́нный Феодо́сий прише́д постриже́ся. И ископа́вше пеще́ру вели́ку, и созда́ша це́рковь и ке́лии, я́же и до сего́ дне суть под Ве́тхим монастыре́м в пеще́ре.

Совокупле́нней же бра́тии, рече́ блаже́нный Анто́ний: «Се Бог вас совокупи́ бра́тие, и от благослове́ния есте́ Святы́я горы́, и́мже игу́мен постриже́ мя. Аз же вас постриго́х, да благослове́ние на вас бу́дет пе́рвее от Бо́га, и пото́м от Святы́я горы́». И се рек, извести́ им глаго́ля: «Живи́те о себе́, и поста́влю вы игу́мена, а сам хощу́ во о́ной горе́ бы́ти еди́н, я́коже и пре́жде бех обы́кл уедини́вся». И поста́ви им игу́мена Варла́ма и́менем, и́же по вре́мени изведе́н бысть кня́зем во и́ну оби́тель бы́ти игу́мен. Сам же блаже́нный Анто́ний, и́де в го́ру иде́же ископа́ пеще́ру, я́же есть под Но́вым монастыре́м. В не́йже бе лет шестьна́десять, жив в доброде́тели мно́зе.

И по премно́гу Бо́гу угоди́в, зна́меньми и чудесы́ вели́кими просия́ я́ко со́лнце. И оста́ви по себе́ на ме́сте том преподо́бнаго Феодо́сия, наме́стника своего́ игу́меном, сконча́в живо́т свой и́же на земли́ и в ве́чный живо́т ко Го́споду отъи́де, пожи́в лет де́вятьдесять.

Соверша́ет же ся собо́р его́ в честне́м его́ монастыри́, в це́ркви ю́же сам основа́ в лето шесть ты́сящь пятьсо́т о́семдесять пе́рвое моли́твами свои́ми пресла́вно. Бо́гу на́шему сла́ва, ны́не и при́сно и во ве́ки веко́в. Ами́нь.

P.S. Перенести в житийник.