Стихи́:

Удо́бне му́ченице уста́вом возлежа́щи:

Соблю́дши любо́вь ея́же ра́ди:

О́ба сви́тка прия́т уста́ва ра́ди Евфи́мие в единонадеся́тый.

Ве́домо же, я́ко добропобе́дная му́ченица Евфи́мия, бя́ше во времена́ Диоклитиа́на и При́ска анфипа́та Евро́пии, гра́да Халкидо́на. Дщи су́щи Филофро́нова, и Феодорисиани́и. И Христо́ва же ра́ди испове́дания оклевета́на бы́вши, и с колесе́м и огне́м бра́вшися. Еще́ же ко́зньми ины́х не́которых муче́ний. И львом в снедь дана́ бы́вши, и невреди́ма пребы́вши. И на том позо́рищи ду́шу испусти́. И бысть в ра́це от свои́х единове́рных. По претече́нии же мно́гих лет, внегда́ благочести́вая разшире́ния Феодо́сия сы́на Арка́диева, ски́петры пра́вящаго, бысть таково́е чу́до. Евти́хий не́кто глаго́ла, Го́спода на́шего Иису́са Христа́, от еди́ного естества́ бы́ти, и Еди́нем Соде́лованием. И́же и низложе́н бысть Флавиа́ном архиепис́копом Константи́ня гра́да, и про́чими правосла́вными. Евти́хий же приобре́т помо́щники себе́ царе́вы безбо́жныя скопцы́, не преста́ше ра́спрю неистовле́ния творя́, до́ндеже Феодо́сий от зде су́щих преста́вися. Прие́мшу же ца́рство Маркиа́ну, повеле́ собо́ру бы́ти, и́же и собра́вшеся епи́скоп число́ шесть сот три́десять, ку́пно же правосла́внии, и ересе́м нача́льницы. И́же и сотвори́ша два сви́тка, и отве́рзше ра́ку всехва́льныя, и зна́менавше на пе́рсех ея́ положи́ша. И по три дний помоли́вшеся, отве́рзше, ви́деша ерети́ческий сви́ток под нога́ма святы́я, правосла́вный же в руку́ ея́ держа́щь. Тому́ же бы́вшу, удиви́шася вси ви́девшии таково́е чу́до. И на мно́жайшее потверди́вшеся о ве́ре, просла́виша Бо́га, творя́щаго повсегда́ ве́лия чудеса́ к обраще́нию мно́гим. Соверша́етжеся собо́р ея́ во святе́м ея́ муче́нии, су́щем во Антио́се близ Ла́вса.

Стихи́:

Недосто́йно не́кое всесжига́ние име́я,

Спасы́йжеся и огне́м та́ко у́мрев Кинде́е.

Сей бя́ше от ве́си Талменисиа́ды Памфили́йския, в ца́рство Диоклитиа́ново, манаде́анин ро́дом. Приведе́н быв к Стратони́ку иге́мону, и испове́да Христа́. Тем обуве́н бысть в сапоги́ желе́зны с гвоздьми́, и тече́ сквозе́ Иерапо́ль. И усре́те челове́ка нося́ща бре́мя дров, и́же и е́ллином помы́слившым ту́не похи́тити дрова́, е́же сожещи́ му́ченика. Святы́й же изъе́м три́десять ме́дниц даде́ це́ну за них. Они́ же нача́ша иска́ти друга́го челове́ка, и́же и понести́ я́, сам святы́й взем бре́мя нося́ше на ра́ме. И огню́ разгоре́вшуся, вни́де та́мо. И бя́ше из огня́ наказу́я и движа́ всех ко Христо́ве ве́ре, и невреди́мь бя́ше огнем, я́ко возду́ху с мо́лниями и гро́мы несу́щым студь, и во́ды мно́ги и ту́чныя. И бы́вши тишине́, помоли́ся предаде́ дух. Иере́й же и́дольский ви́дев чу́до, ве́ровав во Христе́, и умоли́в свою́ жену, сотвори́ ю́ ве́ровати: И посла́ рабы́ню свою́ погребсти́ те́ло свята́го, со благоуха́ньми же и поня́вами, и та́ко о́ба прия́ста свято́е креще́ние. Оре́стий же не́кто диа́кон Христо́в, взем честны́я их мо́щи с главо́ю свята́го Кинде́я, и дви́гся по Авваку́му до́йде во еди́н день, от Памфили́и в Енумана́дь во свое́ оте́чество: и поста́вль ра́ку, положи́ святы́х мо́щи рука́ми иере́йскими, я́коже о́браз и подо́бие есть святы́я полага́ти.

Сия́ блаже́нная О́льга ро́дом плесковити́ня. Жена́ же бе И́горя кня́зя всея́ Ру́сския земли́, и́же седя́ше в Ки́еве. И нача́ кня́жити Святосла́в сын его́, бе́ша же у́бо вси неве́дуще Бо́га, куми́ром служа́ще, и диа́волу уго́дная творя́ху. Блаже́нная же О́льга княги́ня мудра́ су́щи и па́че всех, нема́ло печа́ловаше ви́дящи челове́ки вся диа́волом прельще́ны, я́ко слы́шавши о ве́ре гре́честей, и и́де в Константи́нь град. Тогда́ ца́рствующу царю́ Ива́ну Цымисхи́ю. Испыта́вши же до́бре ве́ру Христо́ву, и крести́ся от патриа́рха Фо́тия. Просвещена́ же бы́вши и ра́довашеся душе́ю. Поучи́в же ю́ патриа́рх о ве́ре и рече́: «Блаже́на еси́ ты в жена́х ру́сских, благословя́т бо тя сы́нове ру́сстии в после́дний род внук твои́х». Бе бо и́мя ей нарече́но Еле́на во свято́м креще́нии. Посе́м прие́мши крест и презви́тера, и и́де в свою́ зе́млю. И той крест и до ны́не стои́т во святе́й Софи́и в олтаре́, на десне́й стране́ име́яй пи́смена си́це: «Обнови́ся ру́сская земля́ святы́м креще́нием, его́же прия́т О́льга благове́рная княги́ня». И обходя́ше всю ру́сскую зе́млю, да́ни и уро́ки уставля́ющи, куми́ры сокруша́ющи, я́ко и́стинная учени́ца Христо́ва, и дая́ше ми́лостыню убо́зей ча́ди мно́гу. А́ще и пога́ным дая́ше, но Бо́га должника́ себе́ сотвори́ И́же ю та́ко просла́ви, я́ко нетле́нием боже́ственое те́ло венча́в, е́же и до ны́не ви́димо есть все́ми ру́сскими сы́нми. Чу́дно же пожи́вши се́дмьдесять и пять лет. И нача́ боле́ти, и призва́ сы́на своего́ Святосла́ва, и запове́дав ему́ погребсти́ с земле́ю ра́вно, а моги́лы не сы́пати, ни тризн твори́ти, ни годи́ны де́яти. Но посла́ зла́то к патриа́рху Царя́ гра́да, и преста́вися ме́сяца ию́ля, в 11 день. Последи́ же внук ея́ Влади́мир крести́ всю зе́млю, и созда́ це́рковь во и́мя Святы́я Богоро́дицы. И взем от земли́ те́ло ба́бы своея́ нетле́нно, вложи́ в ра́ку дре́вяну, и поста́ви в це́ркви Святы́я Богоро́дицы. Бо́гу на́шему сла́ва, ны́не и при́сно и во ве́ки веко́в. [Ами́нь.]